Sohte lipilipil soangen doadoahk dah me ke kin wia, mehnda ma ke kin doadoahngki pali laud en omw madamadau de paliweromw, de ira koaros, ken pohnese me “mie kamwahupen soangen doadoahk laud koaros.” (Lepin Padahk 14:23, NW) Soangen kamwahu dah kan? Ehu, doadoahk laud kin sewese kitail en apwalihala atail anahn en war akan. Mehlel, Koht ketin inoukihda me e pahn ketikihda anahn en irail kan me kin kaudokiong ih ni mehlel. (Madiu 6:31, 32) Ahpw e pil ketin kasik me kitail en pil wia atail pwukoa en pwerisekiong koadoahkihada dahme kitail anahne nan atail mour.—2 Deselonika 3:10.

Eri, kitail kak kilangwohng atail doadoahk nin duwen mehn akadei ehu. Doadoahk iei ahl mwahu ehu me kitail kin wia pwehn apwalihala atail pwukoa kan. Joshua, me sounpar 25, koasoia: “En apwalih pein kowe kin kihong uhk pepehm me ke pweida mwahu. Ma ke kak pwainda dahme ke anahne, eri mie katepen omw doadoahko.”

Patehng met, doadoahk laud kin kalaudehla atail wauneki pein kitail. Mehlel, doadoahk laud kin apwal. Ahpw ma kitail kaiahne pein kitail en loalenohng atail doadoahk, mehnda ma e mwomwen kasangat de apwal, kitail kak ahneki peren en ese me kitail kolokolte madamadau pwung duwen doadoahk. Kitail powehdier pepehm en soikala doadoahk laud.  (Lepin Padahk 26:14) Ni ahl wet, doadoahk kin wahdo peren laud. Aaron, me kitail koasoia mwoweo nda: “I uhdahn perenki pepehm me I kin ahneki mwurin ei doadoahk rahn ehu pwon. Ele I kin pwangada, oh mwein meteikan sohte kin tehk dahme I wia, ahpw I ese me I kanekehla ei doadoahko.”

Paipel kin kapinga ohl emen me kin “kak doadoahk mwahu” oh lih emen me kin soupisengki eh doadoahk. (Lepin Padahk 22:29; 31:13) Mehlel, sohte me kin mwadangete koahiekla nan doadoahk. Oh kaidehn koaros kin perenki wia soahng kan me re sohte mai en wia. Mwein ihme kahrehda me tohto sohte kin perenki arail doadoahk pwehki re sohte kin nantihong en koahiekla nan arail doadoahko.

Aramas kak sukuhlki en perenki wia sohte lipilipil soangen doadoahk dah ma e ahneki madamadau pwung ong doadoahko, de ma e kilangwohngete eh pahn esehla ia duwen eh pahn kak wiahda mwahu doadoahko. William, me sounpar 24, nda: “Ni omw kin wia uwen omw kak koaros nan doadoahk ehu oh kilang imwilahn doadoahko, e kin uhdahn kaperen. Ke sohte kak ahneki pepehm wet ma ke wiahdahte ekis omw doadoahko.”

Dehr medemedewehte ia uwen mwohni me ke kin wiahda. Ahpw idek rehmw soangen peidek pwukat: ‘Dahme kahrehda I anahne doadoahk wet? Dahme pahn wiawi ma I sohte kanekehla doadoahko, de e wiawihda sapwung? Ia duwen ei doadoahko eh wia kamwahu ong meteikan?’

E uhdahn mwahu en medemedewe duwen peidek keieu mwuhro pwehki ke kin keieu perenki omw doadoahk ni omw kilang meteikan ar paiekihda. Pein Sises mahsanih: “Kihwei kaperen sang ale.” (Wiewia 20:35) Me kin paiekihda atail doadoahk iei atail kaun kan oh pil irail kan me kin pwain atail sahpis de dipwisou kan. Ahpw mie meteikan me pil kin paiekihda atail doadoahk. Irail pwukat iei tohn atail peneinei oh pil irail kan me anahne sawas.

Tohn atail peneinei. Ni tapwin peneinei men eh kin doadoahk laud pwehn apwalih tohn eh peneineio, e kin kihda kamwahu ong irail ni ahl riau. Keieu, e kin tehk mwahu me re ahneki dahme re anahne, duwehte mwenge, likou oh imwarail. Eri, e kin kapwaiada pwukoa me Koht ketikihong, me iei en “apwalih . . . uhdahn kisehn pein eh peneinei.” (1 Timoty 5:8) Keriau, me kin pwerisekiong apwalih eh peneineio kin wiahda mehn kahlemeng mwahu duwen kesempwalpen doadoahk laud. Shane, me kitail koasoia mwoweo, nda: “Ei pahpao wia mehn kahlemeng mwahu duwen emen me ahneki madamadau pwung ong doadoahk. Ih ohl mehlel men me kin doadoahk laud erein eh mour, pali laud e wia doadoahk en kapinte. Sang eh mehn kahlemeng mwahu, I sukuhlki kesempwalpen doadoahngki pehi kat oh wiahda soahng kan me pahn wia mehkot katapan ong meteikan.”

Irail kan me anahne sawas. Wahnpoaron Pohl kihda kaweid ong Kristian kan ren “doadoahk . . . oh kak sewesehki me semwehmwe kan.” (Episos 4:28) Mehlel, ni atail kin doadoahk laud pwehn apwalih pein kitail oh pil atail peneinei, ele kitail pil kak sewese irail kan me semwehmwe. (Lepin Padahk 3:27) Eri doadoahk laud kak kahrehiong kitail en ahneki peren laud en kihkihwei.

Nan sapwellime Kapahrek en Pohn Dohl, Sises mahsanih: “A ma sounpei en liki men pahn itonehng uhk ke en wa eh koaruk mwail ehu, iangala mwail riau.” (Madiu 5:41) Ia duwen omw kak doadoahngki kaweid wet nan omw doadoahk? Dehr wiahdahte ekis nan omw doadoahko, ahpw rapahki ahl akan ken wia laudsang dahme anahn. Koasoanehdi mehn akadei kan; nantihong en wia doadoahko pwehn mwahusang oh pitipit sang dahme ke kasik. Perenki omw doadoahko mehnda ma pil ni soahng tikitik kan.

Ma ke wia laudsang, ke pahn uhdahn perenki omw doadoahko. Dahme kahrehda? Pwehki kowe me kaukaweid omw mwekid kan. Ke kin wia laudsang me anahn pwehki ke men, a kaidehn pwehki emen idingkihong uhk. (Pailimwon 14) Me pid met, ele kitail tamanda dahme kileldi nan Lepin Padahk 12:24 me mahsanih: “Doadoahk laud pahn kahrehiong uhk omw pahn ahneki manaman, ahpw pohnkahke pahn kahrehiong uhk ke en wia lidu men.” Mehlel, ekei kitail pahn kak mihla pahn kalidu. Ahpw, mehmen me kin wiahdahte ekis nan eh doadoahko pahn ahnsou koaros mi pahn manaman en meteikan. Ahpw mehmen me kin wia laudsang dahme anahn, pwehki e pilada en wia met, kin pehm me e kin kaukaweid eh mour. E kin kaunda pein eh mwekid kan.

Doadoahk laud uhdahn mwahu, ahpw kitail en tamataman me mie soahng teikan likin doadoahk. Mehlel, Paipel kin kangoange kitail en pwerisek. (Lepin Padahk 13:4) Ahpw e sohte kin kangoange kitail en kedikedirepwkihte doadoahk. Eklesiasdes 4:6 mahsanih: “Ahneki mehkot me tikitik ni kapehd meleilei mwahusang pehmw kan koaros wie kedikedirepwki rahn koaros songosong en koledi kisinieng.” Ia wehwehn met? Emen me kin kedikedirepwkihte doadoahk ele sohte pahn perenki wahn eh doadoahko ma eh doadoahko kin kihsang eh ahnsou oh kehl koaros. Met kak kahrehda eh doadoahko en sohla katepe, duwehte eh kin “songosong en koledi kisinieng.”

Paipel kak sewese kitail en kakairada madamadau toupahrek ong atail doadoahk. Mendahki e padahkihong kitail en pwerisekiong atail doadoahko, e pil kaweid kitail en “pilada dahme keieu mwahu [“kesempwal,” NW].” (Pilipai 1:10) Soahng dah kan me keieu kesempwal? Soahng pwukat iei me iangahki atail en kihong ahnsou rehn atail peneinei oh kompoakepatail kan. Pil kesempwal sang met iei wiewia kan me pidada atail kaudok, duwehte wadewadek oh doudouloale Mahsen en Koht.

Irail kan me ahneki madamadau toupahrek ong mour ele kin uhdahn perenki arail doadoahk. William, me kitail koasoiapene mwoweo, nda: “Emen ei kaun en mahso wia mehn kahlemeng mwahu duwen emen me ahneki madamadau toupahrek ong doadoahk. E kin doadoahk laud oh kin adamwahu rehn irail kan me e kin sahpis ong. Ahpw mwurin doadoahk, e kin ese ia duwen eh pahn pwilikihdi eh doadoahko oh medemedewehte eh peneineio oh eh koasoandi en kaudok. Oh ke ese dah? Ih emen aramas me I ese me kin keieu peren!”