1, 2. Ia duwen Sises eh ketin kakehlakahda sapwellime tohnpadahk ko ni rahno me e ketin iasada?

 SAPWELLIMEN Sises tohnpadahk riemen wie alialu kohlahng kisin kahnimw kis mpen mwail 7 sang Serusalem. Ira nsensuwed pwehki Sises ketin pwoula oh ira saikinte ese me e ketin iasadahr. Nin doken ara alialu kohla, Sises ketin pwarohng ira oh iang ira ketiket kohla nanialo. “Sises eri ketin kawehwehiong ira wasa kan me Pwuhk Sarawi mahsanih duwen pein ih, tepisang pwuhken Moses kohdo lel ni pwuhken soukohp koaros.” (Luk 24:13-15, 27) Met kamweitala ira oh nan kapehdira mwekidkihda peren, rasehng kisiniei, pwehki Sises ketin “kawehwehiong” ira Pwuhk Sarawi.​—Luk 24:32.

² Ni soutikohte, tohnpadahk riemeno pwurala Serusalem. Ni ara tuhwongada wahnpoaron ako, ira padahkihong irail dahme wiawi. Ni arail wie koasoakoasoi, Sises ketin pwarohng irail koaros. Wahnpoaron ko uhdahn masepwehkada oh tepida peikasalki ma iei Sises mwo. Paipel kawehwehda ia duwen eh ketin kakehlakahda irail: “Ih eri ketin kamarainihada kapehdirail ko pwe re en dehdehkihla Pwuhk Sarawi.”​—Luk 24:45.

3. Dahme kahrehda kitail kakete nsensuwedla ni atail kin papah Siohwa? Ia duwen atail kak kolokolte atail peren?

³ Ele ekei pak kitail kin uhdahn nsensuwedla, duwehte me  tohnpadahk ko wia. Mehnda kitail kin doadoahk laud ni atail papah Siohwa, ele kitail kin nsensuwedla ma aramas akan sohte men mwekidki atail kalohk ong irail. (1 Kor. 15:58) De ele kitail medewe me irail kan me kitail onop Paipel rehrail sohte kin kekeirda mwahu. Ele ekei irail pil soikala Siohwa. Ia duwen atail kak kolokol atail peren nan doadoahk en kalohk? Ehu ahl me pahn sewese kitail iei en dehdehkihla mwahu sapwellimen Sises karasaras kan. Kitail pahn tehkpene ahnsou wet karasaras siluh oh kilang dahme kitail kak sukuhlkihsang.

4. Ia wehwehn sapwellimen Sises karasaras duwen sounkamwarak me memeiro?

⁴ Wadek Mark 4:26-29. Ia wehwehn sapwellimen Sises karasaras duwen sounkamwarak me memeiro? Sounkamwarako kin wehwehki sounkalohk kan en Wehin Koht, oh war ko kin wehwehki rohng me re kalokalohki ong aramas akan me ahneki mohngiong mwahu. Sounkamwarako kin wiewia dahme meteikan pil kin kalapw wiewia, e kin “memeir nipwong oh pepehd ni rahn.” Kekeirdahn waro kin wiewiawi erein ahnsou ehu, sang ni ahnsoun kamwarak lao ahnsoun dolung. Erein ahnsowo, “kisin werentuhke ko kin wos oh kekeirda.” Kekeirda wet kin pein wiawi oh kin ekisekis wekiwekla. Pil duwehte emen me kin kekeirda oh karanihala Siohwa, e kin ekisekis wekiwekla. Ni eh kekeirda lao lel ahnsou me e pilada en papah Koht, e kin “wa” ni eh inoukihong Siohwa eh mour oh papidaisla.

5. Dahme kahrehda Sises ketin doadoahngki karasaras en sounkamwarak me memeiro?

⁵ Dahme kahrehda Sises ketin doadoahngki karasaras wet? Sises kupwurki kitail en wehwehki me Siohwa iei me kin ketin kahrehiong padahk mehlel en kekeirda nan mohngiong en irail kan me mihmier nan irair en kak ale mour soutuk. (1 Kor. 3:7) Kitail kin padokedi war ehu oh kalamwuri, ahpw kitail sohte kak idingkihong en mwadang kekeirda. Duwehte ohlo nan karasaraso, kitail sehse ia duwen kekeirda en waro eh kin wiawi. Ni atail kin wiewia dahme kitail kin wia rahn koaros, ele kitail sohte kin tehk kekeirdahn wahn Wehio rehn emen. Ahpw mwuhr, e kin wa, oh wiahla emen tohnpadahk kapw oh iang kitail nan doadoahk en dolung.​—Sohn 4:36-38.

6. Dahme kitail anahne pohnese duwen kekeirdahn emen tohnsukuhl en Paipel?

⁶ Dahme kitail kak sukuhlkihsang karasaras wet? Keieu, kitail anahne pohnese me kitail sohte kak kaunda ia uwen mwadang en tohnsukuhl en Paipel men kin kekeirda nan padahk mehlel. Mendahki kitail kin wia soahng koaros me kitail kak pwehn sewese tohnsukuhlo, kitail sohte pahn idingkihong en papidaisla. Ahpw, ni aktikitik, kitail pohnese me ih kelehpw me kak pilada ma e pahn inoukihong Koht eh mour. Siohwa ketin kupwurki atail poadidiong ih ihte ma kitail uhdahn poakohng ih.​—Mel. 51:12; 54:6; 110:3.

7, 8. (a) Mehn kasukuhl dah teikan me kitail sukuhlki sang sapwellimen Sises karasaras en sounkamwarak me memeiro? Menlau kihda ehu karasaras. (b) Dahme met padahkihong kitail duwen Siohwa oh Sises?

⁷ Keriau, atail wehwehkihla mehn kasukuhl sang karasaras wet pahn sewese kitail en dehr nsensuwedla ma kitail sohte mwadang kilang lipwen atail doadoahk en kalohk. Kitail anahne kanengamah. (Seims 5:7, 8) Ma kitail wiahier soahng koaros me kitail kak pwehn sewese tohnsukuhlo ahpw padahk mehlel sohte kekeirda nan eh mohngiong, met sohte wehwehki me kitail sounpadahk kei me sehse kasukuhl. Siohwa ketin mweidohng wahn padahk mehlel en kekeirdahte nan mohngiong en me aktikitik kan me men wiahda wekidekla kan. (Mad. 13:23) Eri kitail en dehr kadeik uwen pweidahn doadoahk en kalohk sang ni uwen tohtohn aramas me papidaisla. Mwohn silangin Siohwa, pweidahn atail kalohk  sohte kin kohsang mwomwen ahn aramas ar mwekidki atail padahk. Ahpw e kin ketin kesempwalki atail pwerisekiong kalohk.​—Wadek Luk 10:17-20; 1 Korint 3:8.

⁸ Kesiluh, kitail sohte kak ahnsou koaros kilang wekidekla kan me wiawi nan mohngiong en emen. Karasepe, pwopwoud ehu me misineri men kin onop Paipel rehra padahkihong ih me ira men wiahla sounkalohk me saikinte papidais. E katamankihong ira me ira pahn anahne mahs uhdihsang simoak. E pwuriamweikihla ni ara padahkihong ih me ira uhdihsangehr simoak sounpwong kei samwalahro. Ira wehwehkihda me mehnda ma ira rukula oh simoak, Siohwa kak ketin mwahngih oh e ketin kalahdeki aramas mwalaun. Eri ira anahne wiahda pilipil ehu, ira pahn simoak mwohn misinerio de sohla simoak douluhl. Mendahki misinerio uhdahn sehse wekidekla laud me pwopwoudo wiahda, ara limpoak ong Siohwa wie kekeirda oh sewese ira en wiahda pilipil pwung.

9. Ia wehwehn karasaras en uhko?

⁹ Wadek Madiu 13:47-50. Ia wehwehn sapwellimen Sises karasaras duwen uhko? Sises mahsanih me atail kalohki rongamwahu en Wehio kin duwehte atail sehkpeseng uhk laud ieu nansed. Duwehte uhk ehu me kin koledi tohtohn “soangen mwahmw koaros,” atail doadoahk en kalohk pil kin kahrehda aramas tohto en men rong. (Ais. 60:5) Aramas rar rar kei me kin kohdo sounpar koaros pwe ren iang towehda atail mihting tohrohr kan oh rahn en Katamano kin kadehdehda met. Ekei irail kin duwehte “mwomw mwahu kan,” oh re kin wiahla kisehn mwomwohdisohn Kristian. Ahpw ekei kin duwehte “me sakanakan kan,” oh Siohwa sohte ketin kupwurkin irail.

10. Dahme kahrehda Sises ketin doadoahngki karasaras en uhko?

¹⁰ Dahme kahrehda Sises ketin doadoahngki karasaras wet? Katohrohrpeseng en mwahmw ko nan karasaraso sohte kin dokedoke kaimwiseklahn kadeiko nan kahn kamakam kowahlapo. Ahpw, e kin kawehwehda dahme wiawi erein imwin rahn akan en koasoandi wet. Sises ketin kasalehda me kaidehn koaros me perenki rongamwahu en Wehio pahn men wiahla sapwellimen Siohwa ladu. Tohtohn irail kan me kohdo iang atail mihting kan de onop Paipel rehtail sohte kin men inoukihong Siohwa arail mour. (1 Nan. 18:21) Ekei irail sohla iang mihting kan. Ekei me pwulopwul kan tikida rehn pahpa nohno Kristian kan ahpw re sohte uhdahn sukuhlki ren pein poakohngala Siohwa. Sises ketin kasalehda ni sansal me emenemen kitail anahne wiahda pein atail pilipil. Ma kitail wiahda pilipil pwung, Siohwa pahn ketin kilangwohng kitail nin duwen aramas “kesempwal” kei.​—Ak. 2:7.

11, 12. (a) Ia duwen atail kak paiekihda karasaras en uhko? (b) Dahme met padahkihong kitail duwen Siohwa oh Sises?

¹¹ Ia duwen atail kak paiekihda karasaras en uhko? Atail wehwehkihla mehn kasukuhl en karasaras wet pahn sewese kitail en dehr nohn nsensuwedla ma tohnsukuhl en Paipel men de neitail seri men sohte men papah Siohwa. Ele kitail wiahier soahng koaros me kitail kak pwehn kaiahne ih. Emen sohte kin mwadangete wiahla kompoakepahn Siohwa ihte pwehki e pwungki en onop Paipel de e tikida nan padahk mehlel. Ma e sohte pwungki sapwellimen Siohwa kaunda, e sohte kak wia emen sapwellime ladu.

¹² Ia duwe, met wehwehki me e sohte mweimwei ong irail kan me sohla mi nan padahk mehlel en pwurodo nan mwomwohdiso? De met wehwehki me solahr mie koapworopwor ong emen me saikinte inoukihong Siohwa eh mour? Soh, miehte ahnsou mwahu en wiahla kompoakepahn Siohwa mwohn kahn kamakam kowahlap tepida. Siohwa ketin  mahsanihong irail: “Kumwail pwurodohng rehi, oh I ahpw pahn sapahlwohng rehmwail.” (Mal. 3:7) Met kin sansalda mwahu nan sapwellimen Sises karasaras en pwutak me salongalao.​—Wadek Luk 15:11-32.

13. Ia wehwehn sapwellimen Sises karasaras en pwutak me salongalao?

¹³ Ia wehwehn sapwellimen Sises karasaras en pwutak me salongalao? Pahpa limpoako nan karasaraso kin wehwehki Samatail nanleng me ketin limpoak, Siohwa. Pwutak me kesehla mwahl eh sohso kesempwalo kin wehwehki irail kan me kohkohsang mwomwohdisohn Kristian. Irail wiahla kisehn ahn Sehdan sampah, me kin rasehng “sahpw doh ieu,” me dohsang rehn Siohwa. (Ep. 4:18; Kol. 1:21) Mwuhr, ekei irail wehwehkihda me re wiahdahr sapwung laud ehu oh eri pilada ren pwurodo rehn Siohwa. Met kin pidada nanti laud, ahpw pwehki re aktikitik oh uhdahn koluhkihla dahme re wiadahro, Siohwa ketin mahkohng irail oh kupwurki kasamwo irail.​—Ais. 44:22; 1 Pit. 2:25.

14. Dahme kahrehda Sises ketin doadoahngki karasaras en pwutak me salongalao?

¹⁴ Dahme kahrehda Sises ketin doadoahngki karasaras wet? Sises ketin kasalehda me Siohwa uhdahn kupwurki irail kan me kohkohsang Ih ren pwurodo. Pahpao nan karasaraso kin kaskasikte me nah pwutako pahn pwurodo. Ni eh kilangada nah pwutako eh kohkohdo “saikinte karanih ihmwo,” e tangala pwehn tuhwong. Pahpao men nah pwutako en ese me e perenki kasamwo ih. Karasaraso pahn kamwakid irail kan me kohkohsang nan padahk mehlel ren mwadang pwurodo rehn Siohwa. Arail nanpwungmwahu reh ele uhdahn luwet, ele re namenek oh e kakete mwomwen apwal en pwurodo, ahpw arail nantihong wia met uhdahn mie katepe. Ahnsou me irail pwurodo, Siohwa, Sises, oh pil tohnleng kan pahn uhdahn perenkihda.​—Luk 15:7.

15, 16. (a) Mehn kasukuhl dah kan me kitail kak sukuhlkihsang sapwellimen Sises karasaras en pwutak me salongalao? Menlau kihda ekei karasaras. (b) Dahme met kin padahkihong kitail duwen Siohwa oh Sises?

¹⁵ Ia duwen atail kak paiekihda karasaras en pwutak me salongalao? Kitail anahne alasang sapwellimen Siohwa mehn kahlemeng duwen limpoak. Ni emen eh kin pwurodo nan mwomwohdiso, kitail en dehr “nohn kin men wiahla aramas pwung” oh sohte kasamwo ih. Met pahn kauwehla pein atail nanpwungmwahu rehn Siohwa. (Ekl. 7:16) Pil ehu  mehn kasukuhl me kitail kak sukuhlkihsang met iei en kilangwohng me kohkohsang mwomwohdiso nin duwen “sihpw men me salongalahr,” emen me kakete pwurodo. (Mel. 119:176) Ma kitail tuhwong emen me kohkohsang nan mwomwohdiso, kitail pahn wia dahme kitail kak pwehn sewese en pwurodo? Kitail pahn mwadang padahkihong elder kan pwe ren kak sawas? Kitail pahn wia met ma kitail uhdahn wehwehki oh doadoahngki mehn kasukuhl sang sapwellimen Sises karasaraso.

¹⁶ Irail kan me pwurodo uhdahn kin kalahnganki sapwellimen Siohwa mahk kalahngan, oh limpoak oh sawas en mwomwohdiso. Emen brother me piskenla erein sounpar 25 nda: “Peren me I ahneki sangete ei pwurodo kin pousehlahte lalaudla ni ei kin ale ahnsoun kakehlepen loalei sang rehn Siohwa. (Wiewia 3:19, 20) Koaros kin uhdahn sawas oh kasalehda limpoak! Met I ahneki peneinei kaselel ehu.” Emen sister pwulopwul me pwurodo nan mwomwohdiso mwurin sounpar limau koasoia: “I sohte kak kawehwehda ei pepehm ni ei kilang meteikan ar kasalehiong ie ni sansal limpoak me Sises ketin mahsanih duwe. En iang kisehn sapwellimen Siohwa pwihn uhdahn kesempwal!”

17, 18. (a) Mehn kasukuhl dah kan me kitail sukuhlkihsang karasaras siluh pwukat? (b) Dahme kitail en koasoanehdi teng en wia?

¹⁷ Mehn kasukuhl dah kan me kitail sukuhlkihsang karasaras siluh pwukat? Keieu, kitail anahne wehwehkihla me kitail sohte kak kaunda ia uwen mwadang en tohnsukuhl en Paipel men eh kin kekeirda nan padahk mehlel. Kitail en mweidohng Siohwa en ketin wia met. Keriau, kitail sohte kak kasik me koaros me kin patehng kitail oh onop rehtail pahn men papah Siohwa. Kesiluh, mehnda ma ekei kohkohsang rehn Siohwa, kitail en kaskasikte me re pahn pwurodo. Ni ahnsou me re pahn pwurodo, kitail pahn kasamwo irail ni ahl ehu me pahn kasalehda sapwellimen Siohwa limpoak.

¹⁸ Emenemen kitail en pousehlahte rapahki pwe kitail en esehla mwahu, dehdehkihla mwahu, oh ahneki erpit. Ni omw wadek sapwellimen Sises karasaras kan, pein idek rehmw: ‘Ia wehwehn karasaras wet? Dahme kahrehda e ntingdi nan Paipel? Ia duwen ei kak doadoahngki mehn kasukuhl kan me kohsang karasaras wet? Dahme I sukuhlki wasaht duwen Siohwa oh Sises?’ Ni atail wia met, kitail kin kasalehda me kitail uhdahn wehwehkihla sapwellimen Sises mahsen kan.