OARALAP | SEHDAN UHDAHN MIE?
Sehdan Uhdahn Mie?
“I tikida El Salvador. Ma I sapeik, ahi nohno kin ndaiong ie, ‘Tepilo kohkohdohng ale iuk!’ A I pahn nda, ‘Ahn, mweidohng en kohdo!’ I kin kamehlele duwen Koht, ahpw kaidehn Sehdan.”—ROGELIO.
Ia duwe, ke pwungki ahn Rogelio eh madamadauo? Mehnia rehn madamadau pwukat me ke lemeleme mwomwen pwung?
-
Sehdan sohte uhdahn mie; e wiahte kilelepen irair suwed ehu.
-
Sehdan uhdahn mie, ahpw e sohte kin nsenohki dahme aramas akan wiewia.
-
Sehdan iei ngehn uhdahn kehlail men me ahneki manaman laud pohn aramas.
Aramas tohto, mwein lella meh rar rar kei, kin kamehlele ehuehu madamadau pwukat. Ahpw ia duwe, e uhdahn kesempwal mehnia me pwung? Ma Sehdan sohte mie, eri mie me pitihedi irail kan me kamehlele me e uhdahn mie. Ma Sehdan uhdahn mie ahpw sohte kin nsenohki dahme aramas akan wiewia, eri sohte kahrepen aramas tohto en perki de masak ih. Ahpw, ma Sehdan iei emen me koahiek en widingehdi aramas, eri e uhdahn keper sang dahme pali laud en aramas akan medewe.
Kitail pahn tehkpene ia duwen Paipel eh sapengala peidek pwukat: Dahkot de ihs Sehdan? Sehdan wiahte kilelepen irair suwed ehu de ih ngehn emen? Ma Sehdan ngehn emen, e keper ong uhk? Ma ei, ia duwen omw kak pere iuk?
