1. Soangen kapai dah kan sang rehn Siohwa me kak sewese kitail en peren?

 SIOHWA ketin kupwurki kitail en peren oh e ketikihong kitail kapai tohto me kin kahrehda nsenamwahu. Ehu, e ketikihong kitail mour. Kitail kak doadoahngki atail mour pwehn kapinga ih, pwehki ih me ketin kainangihedo kitail ong kaudok mehlel. (Mel. 144:15; Sohn 6:44) Siohwa ketin kamehlelehiong kitail me e ketin poakohng kitail oh kin ketin sewese kitail en dehr uhdihsang atail papah ih. (Ser. 31:3; 2 Kor. 4:16) Kitail kin perenki atail ahneki popohl oh minimin mehlel, perenki riatail Kristian limpoak kan, oh mehn kataman kan me kin kalapw katakatamankin kitail sapwellimen Koht limpoak ong kitail. Patehng met, mie atail koapworopwor en ahnsou kohkohdo.

2. Dahme ekei sapwellimen Koht ladu kan kin apwalki powehdi?

² Mendahki kitail ahneki kahrepe pwukat pwehn nsenamwahu, mie ekei sapwellimen Koht ladu lelepek kan me kin apwalki powehdi arail madamadau sapwung duwen pein irail. Ele re medewe me Siohwa sohte ketin kesempwalkin irail de arail kin papah ih. Irail me kalapw ahneki madamadau sapwung kan ele medewe me en perenki “sounpar koaros” kin wiahte ouraman ehu. Ong irail, e kansensuwed en wia momour rahn koaros.​—Ekl. 11:8.

3. Dahme kak kahrehiong emen en ahneki madamadau sapwung?

 ³ Soangen madamadau sapwung pwukat ele kin kohsang pepehm en mworusala, soumwahu de mahla. (Mel. 42:9; 71:9; Lep. Pad. 13:12;) Pil ehu, kitail anahne pohnese me mohngiongitail me “diren piht” oh e kak kahrehiong kitail en pehm me kitail dipada, mehnda ma Koht kin ketin kupwurkin kitail. (Ser. 17:9; 1 Sohn 3:20) Tepilo kin karaunlikamwih sapwellimen Koht ladu kan. Sehdan kamwakid Elipas en nda me sohte katepatail mwohn silangin Koht. Ni mwehin Sohp, met wia likamw pwoat, oh e pil wiahte likamw pwoat nan atail ahnsou.​—Sohp 4:18, 19.

4. Dahme kitail pahn koasoiapene nan iren onop wet?

⁴ Nan Paipel, Siohwa ketin kamehlelehiong kitail me e pahn ketin ieiang irail kan me kin apwalki powehdi arail madamadau sapwung. (Mel. 23:4) Ehu ahl me e ketin wia met iei sang ni eh ketikihda sapwellime Mahsen. Paipel kin wia tehtehn mahwen manaman ehu sang rehn Koht “mehn kamwomwala wasa kehlail kan.” Met wehwehki me Paipel kak wekidala madamadau sapwung kan me kitail ahneki duwen pein kitail. (2 Kor. 10:4, 5) Eri kitail pahn koasoiapene ia duwen atail kak doadoahngki Paipel pwehn sewese kitail kakairada oh kolokol peren ni atail kin papah Siohwa. Ele ke pahn paiekihda met oh pil esehla ahl akan pwe ken kangoange meteikan.

5. Keseu dahieu me kak sewese kitail en ahneki peren ni atail kin papah Siohwa?

⁵ Wahnpoaron Pohl kasalehda soahng kei me kak sewese kitail en kakairada peren ni atail kin papah Siohwa. E kaweidki mwomwohdisohn Korint nda: “Kumwail kalelapak oh wia keseupen pein kumwail ma kumwail weweidki pwoson.” (2 Kor. 13:5) “Pwoson” wet iei padahk koaros en Kristian me sansalda nan Paipel. Ma kitail nda oh wia dahme Paipel padahngki, eri kitail pweidahr nan keseu wet oh kasalehda me kitail kin “weweidki pwoson.” Mehlel, kitail sohte kak lipilipilki mehnia rehn padahk pwukat me kitail en idawehn. Kitail anahne peikiong padahk en Kristian koaros nan Paipel.​—Seims 2:10, 11.

6. Dahme kahrehda kitail en kasawih ma kitail kin “weweidki pwoson”? (Menlau kilang tepin kilel.)

⁶ Mwein ke sohte men ale keseu wet, ahpw mehlel ma ke leme ke sohte pahn pweida. Ahpw sapwellimen Siohwa madamadau duwen kitail iei me kesempwal sang atail madamadau, pwehki e ketin mwahngih laudsang dahme kitail ese. (Ais. 55:8, 9) E ketin kasawih sapwellime tohnkaudok kan, kaidehn pwehn ketin kadeik irail, ahpw en ketin rapahki irair mwahu me re ahneki oh sewese irail. Ni omw doadoahngki Mahsen en Koht pwehn kasawih pein uhk pwehn kilang ‘ma ke weweidki pwoson,’ ke pahn tepida wehwehkihda ia sapwellimen Koht madamadau duwen pein uhk. Met kak seweseiuk ken soikala soangen madamadau koaros me dene sohte katepomw oh pil seweseiuk ken tamataman sapwellimen Koht madamadau, me iei: Ke kesempwal mwohn silangih. Omw tamataman met kak duwehte omw mweidohng marain en ketipin en kamarainihada wasa rotorot ehu.

7. Ia duwen kahlemeng en irail me lelepek kan nan Paipel eh kak sewese kitail?

⁷ Ehu ahl en kasawih pein kitail iei en doudouloale mehn kahlemeng en aramas lelepek kan nan Paipel. Kilang duwen arail irair oh pepehm kan oh kapahrekiong ahmw kan, oh kilang ia mwomwen omw pahn mwekid ma ke mi nan arail irairo. Kitail pahn kilang mehn kahlemeng siluh me pahn kasalehda ia duwen omw kak doadoahngki Paipel pwehn kamehlelehiong uhk me ke kin “weweidki pwoson.” Met pahn pil seweseiuk ken kakairada madamadau pwung duwen pein kowe.

8, 9. (a) Soangen irair dah me liohdi semwehmweo ahneki? (b) Soangen madamadau sapwung dah me liohdio ele ahneki?

⁸ Nan tehnpas sarawio Serusalem, Sises ketin mahsanihada liohdi semwehmwe men. Ahn liho mehn kahlemeng kak sewese kitail en kolokol  peren ni atail kin papah Siohwa mendahki ma kitail sohte kak wia soahng koaros me kitail men wia. (Wadek Luk 21:1-4.) Medewehla duwen eh irairo. Keieu, e nsensuwedkihte eh pwoudo mehla. Pil ni ahnsowohte, irail kaun en pelien lamalam ko kin noahrok oh kin pirapa liohdi kan duwehte ih ahpw sohte sewese irail. (Luk 20:47) Uwen eh semwehmwe, meirong me keieu laud me e kak kihda nan tehnpaso pahrekiong dahme tohndoadoahk men kin wiahda nan minit keite.

⁹ Song medewehla ia pepehm en liohdio ni eh pedolong nan tehnpaso kolokol sent riaute. Ia duwe, liho medemedewe me eh meirongo nohn tikitik sang dahme e kin kihda ni ahnsou me eh pwoudo momourte? Ni eh kilang meteikan ar kihda meirong laud, e pahn namenengki oh medewe me eh meirongo sohte katepe? Ahpw mehnda ma e ahneki soangen pepehm pwukat, e kihdahte dahme e kak pwehn utungada kaudok mehlel.

10. Ia duwen Sises eh patohwan kasalehda me Koht ketin kesempwalki liohdio?

¹⁰ Sises mahsanih me liohdio oh eh meirongo kin kesempwal ong Siohwa. E mahsanih me liohdio kihda laudsang dahme aramas kepwehpwe ko koaros kihda. Eh meirongo pahn patehngete meirong ko me meteikan kihda, ahpw Sises uhdahn ketin kesempwalki eh kisakiso ong Siohwa. Irail kan me wadek meirong kan me wisikdohng tehnpaso sohte pahn ese ia uwen kesempwal en sent toantoal riauo ong Siohwa de ia uwen Siohwa eh ketin kesempwalki liohdio. Sapwellimen Koht madamadau iei me uhdahn kesempwal, kaidehn dahme meteikan medewe de dahme liohdio kin medewe ong pein ih. Ke kak doadoahngki koasoipen liohdio pwehn kasawih ma ke “weweidki pwoson”?

11. Dahme ke kak sukuhlki sang koasoipen liohdi semwehmweo?

¹¹ Omw irair kan ele pahn koasoanehdi dahme ke kak patohwanohng Siohwa. Pwehki sounpar de kahpwal en roson en paliwar, ekei sohte kak kihong ahnsou laud ong kalohk ni uwen me re men wia. Ia duwe, re anahne medewe me sohte katepen arail ripohtki neirail awahn kalohk me re wiahda? Mehnda ma ke pwulopwul de ahneki roson mwahu, ele ke pehm me omw nannanti kin wiahte mehkot tikitik nanpwungen  awa tohto me sapwellimen Koht aramas akan kin wiahda ni arail kaudokiong ih. Koasoipen liohdi semwehmweo kin padahkihong kitail me Siohwa ketin mwahngih oh kesempwalki soahng tikitik koaros me kitail kin wiahiong ih, ahpw mehlel ma atail irair kan kin apwal. Medewehla omw kaudokiong Siohwa nan sounpar me nekiero. Ia duwe, nanpwungen awa kan me ke wiahda ni omw papah Siohwa, mie ehu rehrail me ke anahne wiahda tounmetei laud? Ma ei, ke kak kamehlele me Siohwa kin ketin kesempwalki dahme ke wiahda ong ih nan awao. Ke kadehdehda me ke kin “weweidki pwoson” ni omw alasang liohdi semwehmweo oh wia uwen omw kak koaros ong Siohwa.

12-14. (a) Soangen madamadau sapwung dahieu me Elaisa ahneki? (b) Dahme kahrehda Elaisa ahneki soangen pepehm wet?

¹² Soukohp Elaisa loalopwoat ong Siohwa oh ahneki pwoson laud. Ahpw mie ahnsou ehu me e mworusala oh peki rehn Siohwa en ketin kemehla ih. E nda: “Maing KAUN, I solahr patohwan warohng soahng pwukat. Komw ketin ale ei mour, pwe e konehngete I en mehla.” (1 Nan. 19:4) Irail kan me sohte kin ahneki soangen pepehm wet ele medewe me ahn Elaisa kapakapo wiahte “pato mwahl” kei. (Sohp 6:3) Ahpw Elaisa uhdahn ahneki soangen pepehm pwukat. Tehk me Siohwa sohte ketin engiengda pahn Elaisa ahpw e ketin sewese ih.

¹³ Dahme kahrehda Elaisa ahnekihda soangen pepehm pwukat? Mwohnte met, Elaisa wiahda manaman ehu me kadehdehda me Siohwa iei me Koht mehlel. Mwurin eh wiahda manaman wet, soukohp en Paal meh 450 kamakamla. (1 Nan. 18:37-40) Elaisa kin koapworopworki me met sapwellimen Koht aramas akan pahn pwuralahng kaudok min, ahpw e sohte pweida. Lih nanmwarki suwed Sesepel poaronlahng Elaisa oh nda me e pahn kemehla. Elaisa masepwehkada oh tang kohdihla palieir sang Israel apali sapwen Suda oh tangalahng nan sapwtehn.​—1 Nan. 19:2-4.

¹⁴ Ni eh wie kelekelehpw nan sapwtehn, e tepida medewe me eh doadoahk nin duwen soukohp men sohte katepe. E patohwanohng Siohwa: “E konehngete I en mehla.” Met wehwehki me e pehm me pein ih uhdahn sohte katepe. E pein medewe me e sohte pweida nan eh doadoahko oh e sohte kesempwal mwohn silangin Siohwa de pil ong meteikan.

15. Ia duwen Koht eh ketin kasalehiong Elaisa me E ketin kesempwalkihte ih?

¹⁵ Ahpw madamadau en Koht Wasa Lapalahpie weksang madamadau en Elaisa. Elaisa kesempwalte rehn Siohwa oh e ketin kupwure me Elaisa wehwehki duwen met. Koht ketin kadarala tohnleng men en kakehlahda Elaisa. E pil ketikihong mwenge oh pihl me pahn sewese ih en kehlail erein eh pahn seiloangki rahn 40 kohdihla Nahna Sainai. Ni Elaisa eh medewe me sohte mehn Israel men me lelepek ong Siohwa, ni kadek Koht ketin kapwungala eh madamadau sapwungo. Pil kilang me Siohwa ketikihong Elaisa pwukoa kapw kan oh Elaisa pwungki. Siohwa ketin sewese Elaisa oh imwilahn met, Elaisa kehlailda oh pwuralahng eh doadoahk nin duwen soukohp men.​—1 Nan. 19:5-8, 15-19.

16. Ia duwen Siohwa eh ketin kakehlakahda iuk?

¹⁶ Ke kak doadoahngki koasoipen Elaisa pwehn kamehlelehiong uhk me ke kin “weweidki pwoson” oh kakairada peren ni omw kin papah Siohwa. Keieu, medewehla ahl akan me Siohwa ketin sewesehkin uhk. Ia duwe, mie pak me ke ale sawas sang elder men de Kristian koahiek men ni ahnsou me ke uhdahn anahne? (Kal. 6:2) Mie pak me Paipel, neitail sawaspen Paipel kan oh mihting kan seweseiuk ken pehm me Siohwa ketin nsenohkin uhk? Ma mwuhr ke alehdi soangen sawas pwukat, medemedewe ia wasa me sawas pwukat uhdahn kohsang ie oh tamataman ken kalahngankihong Siohwa ni kapakap.​—Mel. 121:1, 2.

17. Dahme Siohwa kin ketin kesempwalki rehn sapwellime ladu kan?

 ¹⁷ Keriau, tamataman me madamadau sapwung kak pitihkitaildi. Sapwellimen Koht madamadau duwen kitail iei me kesempwal. (Wadek Rom 14:4.) Siohwa kin ketin kesempwalki atail kin poadidiong oh lelepek ong ih. Siohwa eh ketin kesempwalkin kitail sohte kin poahsoankihda ia uwen laud me kitail wiahda ong ih. Duwehte Elaisa, dahme ke wiahda ong Siohwa kakete laudsang dahme ke ese. Mwein ke kin sewese meteikan nan mwomwohdiso ahpw ke sohte ese. Aramas akan nan wasahn kalohk ele rong duwen padahk mehlel pwehki omw doadoahk laud.

18. Dahme omw pwukoa me ke alehdi sang rehn Siohwa kin kadehdehda?

¹⁸ Keieu mwuhr, medemedewe ehuehu pwukoa kan me Siohwa ketikihong uhk nin duwen mehn kadehde me e ketin kupwurperenkin uhk. (Ser. 20:11) Duwehte Elaisa, ele ke kin nsensuwedla ma omw doadoahk en kalohk mwomwen sohte kin pweida, de e mwomwen me ke sohte kak lel omw mehn akadei kan ni omw papah Siohwa. Ahpw, ke ahnekihte pwais me keieu kaselel me emen kak ahneki. Pwais wet iei en kalohki rongamwahwo oh en wia emen Sounkadehdehn Siohwa. Eri ken kolokolte omw lelepek ong Siohwa. Duwehte me Sises mahsanih, ke pahn kak ‘iang nsenamwahuki eh pai.’​—Mad. 25:23.

19. Ia pepehm en sounnting en Melkahka 102?

¹⁹ Sounnting en Melkahka 102 mihla nan “apwal.” Paliwere de eh pepehm kan tihwohkilahr eh lokolok oh solahr eh kehl en powehdi eh kahpwal ko. (Melkahka 102, nting kan me mi pohn irelaudo) Ihte me e kin medemedewe iei eh weirek, eh kelekelehpw oh pein eh pepehm kan. (Mel. 102:3, 4, 6, 11) E kamehlele me Siohwa ketin kupwurki kesehla ih.​—Mel. 102:10.

20. Ia duwen kapakap eh kak sewese emen en pelianda madamadau sapwung?

²⁰ Ahpw sounmelkahkao kak doadoahngkihte eh mour pwehn papah Siohwa. (Wadek Melkahka 102:19-21.) Melkahka 102 kasalehiong kitail me irail kan me kin “weweidki pwoson” pil kak ahneki lokolok oh sohla kak medewe soahng teikan. Sounnting en melkahkao pehm me e “duwelahr menpihr men me kalakalapwuk pohn pwelengen ihmw,” mwomwen me e pahn kelehpwkihdi eh kahpwal ko. (Mel. 102:7) Ma mie pak ke ahneki soangen pepehm wet, wehkohng Siohwa dahme mi nan omw mohngiong, duwehte me sounmelkahkao wia. Omw kapakap kak seweseiuk pelianda madamadau sapwung kan. Siohwa ketin inoukihda me “e pahn ketin karonge sapwellime aramas me lekdeklahr akan oh karonge ar kapakap.” (Mel. 102:17) Likih sapwellime inou wet.

21. Ma kitail nsensuwedla, ia duwen atail kak kalaudehla atail peren ni atail kin papah Siohwa?

²¹ Melkahka 102 pil kasalehda ia duwen omw kak kalaudehla peren ni omw kin papah Siohwa. Sounmelkahkao pilada en medemedewe duwen eh nanpwungmwahu rehn Siohwa. (Mel. 102:12, 27) E kin kamweitala ih ni eh ese me Siohwa kin ahnsou koaros ketin sewese Sapwellime aramas akan pwe ren dadaur pahn kasongosong kan. Eri ma ke nsensuwedla oh met kin kerempwa omw pahn wia uwen me ke men wia nan sapwellimen Koht doadoahk, kapakapki duwen met. Peki rehn Koht en ketin karonge omw kapakap, kaidehn ihte pwehn kauhdi omw pwunod kan ahpw pwe “mware pahn uhdahn lohkseli.”​—Mel. 102:20, 21.

22.  Ia duwen emenemen kitail kak kaperenda Siohwa?

²² Ei, kitail kak doadoahngki Paipel pwehn kadehde ong pein kitail me kitail kin “weweidki pwoson” oh Siohwa kin ketin kesempwalkin kitail. Mehlel me nan ahn Sehdan sampah, ele kitail sohte kak kihsang soangen madamadau sapwung de pepehm en mworus koaros. Ahpw kitail koaros kak kaperenda Siohwa oh ahneki mour soutuk ma kitail kin dadaurete ni lelepek nan sapwellime doadoahk.​—Mad. 24:13.