Ke pahn kasik me Mahsen en Koht, Paipel, uhdahn tohrohr oh weksang pwuhk teikan koaros. Paipel lik kei wiawihda ni lokaia epwiki kei. Erpit sang Paipel kak kamwahwihala aramas akan.​—Wadek 1 Deselonika 2:13; 2 Timoty 3:16.

Kitail ese me Paipel pwilsang rehn Koht pwehki e kin kohpada ni pwung duwen ahnsou kohkohdo. Sohte aramas men kak pein wia met. Karasepe, tehk pwuhken Aiseia. Ehu pwuhken Aiseia me wiawihda sounpar epwiki samwa mwohn ipwidi en Sises dierek nan pwoahr ehu limwahn Sehden Mehla. E mahsanih me kahnimw en Papilon pahn tehnla. Met pweida sounpar tohto mwurin sapwellimen Sises doadoahk nin sampah.​—Wadek Aiseia 13:19, 20; 2 Piter 1:20, 21.

Ntingdahn Paipel reireiki sounpar 1,600 samwa. Mpen ohl 40 me ntingihada Paipel oh re doadoahngki oaralap ehute oh dahme re ntingihdi sohte kin uhpene. Ia duwen met eh kak wiawi? Koht kin ketin kaweid arail doadoahk.​—Wadek 2 Samuel 23:2.

Ekei ahnsou Koht kin ketin mahseniong irail me ntingihdi Paipel sang ni eh ketin doadoahngki tohnleng kan, kaudiahl kan de ouraman kan. Ahpw pali laud en ahnsou, Koht ketikihong nan madamadau en sounnting kan sapwellime madamadau oh ketin mweidohng irail ren pilada lepin mahsen kan me irail pahn doadoahngki pwe ren kasalehda kupwure.​—Wadek Kaudiahl 1:1; 21:3-5.