1, 2. Dahme kahrehda widing kin kalapw wiawi? Soangen widing dah kan me kitail kin kilang rahnwet? (Menlau kilang tepin kilel.)

 WIDING oh likamw kin kalapw wiawi nan sampah wet. Kitail en dehr pwuriamweikihla met. Paipel kasalehda ni sansal me Sehdan me Tepil kin uhdahn maiong pitihedi aramas oh ih me kakaun sampah wet. (1 Tim. 2:14; 1 Sohn 5:19) Ni atail kerkerenlangehr imwin sampah suwed wet, met kalaudehla ahn Sehdan eh lingeringer pwehki e ese me eh ahnsou “mwotomwotalahr.” (Kaud. 12:12) Eri, kitail kak kasik me irail me Tepilo kin kamwakid pahn pil laudla arail likamw. Re pahn keieu song pitih irail kan me kin papah Siohwa.

² Ni ahnsou me palien nuhs kin koasoia duwen sapwellimen Siohwa ladu kan oh dahme re kamehlele, ekei pak re kin kasalehda ire mehlel keite de likamw kante. Re kin doadoahngki doaropwehn rohng, TV, oh Website en Internet pwehn kasalehda likamw. Ekei aramas kin nsensuwedkihla de lingeringerda pwehki re kamehlele likamw pwukat mwohn arail tehkada ire mehlel kan.

3. Dahme kak sewese kitail pwe padahk likamw kan en dehr pitihkitaildi?

³ Kitail kalahnganki me kitail kak pere kitailsang ahn Sehdan likamw kan. Paipel, me kin “mwahu ong . . . kapwungala wiewia sapwung kan,” de kapwungala soahng kan, kak sewese kitail en soikala ahn Sehdan likamw. (2 Tim. 3:16) Dahme wahnpoaron Pohl ntingihedi kasalehiong kitail me padahk likamw kan pitihdier ekei Kristian kan nan Deselonika. E ntinglahng rehrail nda: “I peki rehmwail, kumwail dehr mwadang sawehwehda nan amwail madamadau.” (2 Des. 2:1, 2) Mehn kasukuhl dah me kitail kak sukuhlki sang ahn Pohl mehn kataman, oh ia duwen atail kak doadoahngki?

4. Ia duwen Kristian kan nan Deselonika arail alehdi mehn kataman duwen “Rahnen Kaun-o” eh kerendohr? Ia duwen atail kin alehdi mehn kataman kan?

⁴ Nan nah keieun kisinlikou ong Kristian kan en Deselonika, Pohl katamankihong irail duwen “Rahnen Kaun-o” eh kerendohr. E sohte men rie Kristian kan en sawehwehda de sohte onopada. E padahkihong irail me irail “aramas marain kei” oh e pil nda: “Kitail pepehd oh onohnop.” (Wadek 1 Deselonika 5:1-6.) Rahnpwukat, kitail awiawih kasohrlahn Papilon Lapalap, me iei pelien lamalam likamw koaros. Kasohrala wet iei me pahn tapiada sapwellimen Siohwa rahn lapalapo. Kitail wehwehki ia duwen Siohwa eh pahn ketin kapwaiada kupwure. Nan mwomwohdiso, kitail kin kaukaule alehdi mehn kataman kan me kak sewese kitail kaunopada ong rahn en Siohwa. Ma kitail rong kanahieng mehn kataman pwukat me kin pwurepwurehng kohda, kitail kak kakehlaka atail en koasoanehdi teng en dehr ‘sawehwehda nan atail madamadau.’​—2 Des. 2:1, 2.

5, 6. (a) Dahme Pohl ntingihedi nan nah keriaun kisinlikou ong mehn Deselonika kan? (b) Dahme Sises pahn ketin kereniong wia? Dahme kitail anahne idek rehtail?

⁵ Pohl ntingihedi keriaun kisinlikou ong mehn Deselonika kan. Nan kisinlikowo, e ntingihedi duwen kahpwal kan me pahn wiawi ni Koht eh pahn ketin doadoahngki Sises en kadeikada “irail kan me pohnsehse Koht oh irail kan me sohte kin peikiong Rongamwahu.” (2 Des. 1:6-8) Nan irelaud 2 en kisinlikowo, Pohl ntingihedi me ekei nan mwomwohdiso “kedirepwkihda koasoi kan” duwen rahn en Siohwa me re kamehlele uhdahn kerendohr. (Wadek 2 Deselonika 2:1, 2.) Tepin Kristian kan sohte wehwehki ni unsek ia duwen kupwuren Siohwa eh pahn pweida. Pohl wehkada duwen met ahnsou me mwuhr e ntingihedi mepwukat duwen kokohp: “Atail kisakis en loalokong de kokohp me sohte unsek ahnsou wet, ahpw ahnsou me me unseko pahn leledo, a mehkoaros me sohte unsek pahn sohrala.” (1 Kor. 13:9, 10) Ahpw irail kak kolokol arail lelepek sang ni arail rongorong mehn kataman kan me Siohwa ketin doadoahngki Pohl, wahnpoaron Piter, oh Kristian keidi lelepek teikan en ahnsowo en ntingihedi.

⁶ Pwehn kapwungala arail madamadau, Koht ketin doadoahngki Pohl en kawehwehda me mwohn rahnen Siohwa, mwekid en kesehla oh uhwongada kaudok mehlel oh “Aramas  Suwedo” pahn pwarada. * Mwurin mwo, ahnsou me Koht ketin kupwurki, Sises pahn ‘kamwmwomwala’ koaros me padahk likamw kan pitihdier. Pohl kawehwehda me kahrepen kadeik wet iei “pwehki ar sohte kasamwo oh poakohng me mehlelo.” (2 Des. 2:3, 8-10) Kitail anahne idek rehtail: ‘Ia uwen ei poakohng padahk mehlel? I kin onopki Kahn Iroir kan oh pwuhk teikan me wiawihda ong sapwellimen Koht aramas akan sampah pwon pwe I en kak ese dahme kitail wehwehki met duwen padahk kan en Paipel?’

7, 8. (a) Ia ekei keper kan me tepin Kristian kan ahneki? (b) Dahme kakete keieu keper ong Kristian kan rahnwet?

⁷ Kaidehn padahk kante en irail me kesehla oh uhwongada kaudok mehlel me pahn wia keper ehu ong Kristian kan. Pohl ntinglahng Timoty me “limpoak ong mwohni, iei tepin soangen suwed koaros.” E pil nda me “mie ekei me kin inenen kasikasik en naineki mwohni, eri, re ahpw salongalahsang pwoson oh kauwehkihla mohngiongirail soangen kapahtou tohtohie.” (1 Tim. 6:10) Pil ehu keper me pahn kalapw pwarada iei “ahnepen aramas.”​—Kal. 5:19-21.

⁸ Pohl kihda mehn kataman kehlail ong mehn Deselonika kan duwen irail kan me e kahdaneki “wahnpoaron likamw ekei.” Ekei irail “pitiheki me pwoson akan lokaia likamw, pwe re en idawehnirailla.” (2 Kor. 11:4, 13; Wiewia 20:30) Sises ketin kapinga mwomwohdiso en Episos pwehki arail sohte pwungki “aramas suwed kan” nan mwomwohdiso. Irail kadehdehda me ohl pwukat uhdahn wahnpoaron likamw kei oh sounlikamw kei. (Kaud. 2:2) Nan nah kisinlikou keriau ong mehn Deselonika ko, Pohl kihda kaweid wet: “Riat ko, ni mwaren atail Kaun Sises Krais se padahkiwohng kumwail en kalekeikumwailsang [“riatail kan,” NW] me mouren pohnkahke.” E doula koasoia duwen Kristian kan me “sohte men doadoahk.” (2 Des. 3:6, 10) Eri ma irail en soikala emen me pohnkahke oh sohte men doadoahk, e uhdahn kesempwal ren soikala emen me tepida uhwongada kaudok mehlel. Ni ahnsowo, en patehng soangen aramas pwuko uhdahn keper oh re anahne dehr wia. Met pil mehlel rahnwet.​—Lep. Pad. 13:20.

9. Dahme kahrehda kitail en kanahieng ma emen tepida kasarki soahng kan me Paipel sohte kawehwehda de kauwe sapwellimen Siohwa pwihn?

⁹ Kitail kerenlahngehr kahn kamakam kowahlap oh imwin koasoandi suwed wet. Mehn kataman kan me Siohwa ketikihda ni mwehin tepin Kristian kan kin kesempwal rahnwet laudsang ahnsowo. Uhdahn kitail sohte men ‘mwamwahliki sapwellimen Koht kalahngan me kitail aleier.’ Ma met wiawi, kitail pahn katihasang koapworopwor en mour kohkohlahte. (2 Kor. 6:1) Kitail anahne uhdahn kanahieng ma emen me kin iang mihting song en kasonge kitail en kasarki soahng kan me Paipel sohte kawehwehda, de kauwe elder kan oh meteikan me kin papah Koht.​—2 Des. 3:13-15.

10. Padahk dah kan me Pohl kaweidki Kristian kan nan Deselonika en idawehn?

¹⁰ Pohl kaweidki Kristian kan nan Deselonika ren “kehlail” oh en pousehlahte wia dahme re sukuhlkiher. (Wadek 2 Deselonika 2:15.) “Me mehlel” dah kei me re sukuhlki? Me mehlel pwukat iei sapwellimen Sises padahk kan oh dahme Koht ketin kamwakid Pohl oh meteikan ren ntingihedi. Pohl sohte ndinda padahk kan me pelien lamalam likamw kan padahngki. E kapinga rie Kristian kan nan  mwomwohdiso en Korint pwehki, nin duwen me e ntingihedi, ‘arail kin tamataman ih ahnsou koaros, oh arail kin ideidawehn padahk kan me e peusehiong irail.’ (1 Kor. 11:2) Pwehki padahk pwukat uhdahn kohsang rehn Siohwa oh sapwellime Ohlo, re kak koapworopworki oh likih.

11. Dahme kak wiawihong emen ma e mweidohng likamw kan en pitihedi?

¹¹ Ahnsou me Pohl ntinglahng mehn Ipru kan, e koasoia ahl riau me Kristian men kakete sohla eh pwoson oh sohla loalopwoat ong Siohwa. (Wadek Ipru 2:1, NW *; 3:12.) E ntingihedi duwen peiwei sang oh sohpeisang Siohwa. E kak apwal en tehkada me pwoht ehu wie peipei kohweisang ni oaroahr ehu. E kak wawai peipei kohwei lao e dohla douluhl. Ahpw, aramas pil kak pilada en siken were pwohto sang ni oaroahr. Karasaras riau pwukat kasalehda dahme kak wiawi ma emen mweidohng likamw kan en pitihedi oh eh likih padahk mehlel en luwetala.

12. Dahme kak kauwehla atail nanpwungmwahu rehn Siohwa?

¹² Ekei mehn Deselonika kan mweidohng likamw kan en pitihiraildi. Ia duwen rahnpwukat? Soahng tohto kak kauwehla atail ahnsou. Medewehla ahnsou laud me emen kin doadoahngki ong soahng kan me e perenki wia, doadoahngki social network, wadewadek oh sapsapeng e-mail de text, de tetehk rohng kapw duwen mwadong laud kan. Soahng pwukat kak kerempwahla Kristian men oh kaluwetala eh ngoangki papah Siohwa. Ia imwilahn met? Ele e pahn uhdihsang wia kapakap sang eh mohngiong. Mwein eh doadoahngki ahnsou ong onop Paipel, kohla mihting oh kalohki rongamwahwo pahn pil tikitikla. Dahme kitail kak wia pwe kitail en dehr mwadang sawehwehda nan atail madamadau?

13. Nin duwen me Paipel kohpadahr, madamadau dah me aramas tohto ahneki? Dahme kak pere atail pwoson?

¹³ Kitail anahne tamataman me imwin ahn Sehdan sampah kerendohr oh atail pilada patehng aramas akan me sohte men kamehlele me kitail mi “ni imwin ahnsou kan” kak keper ong kitail. Wahnpoaron Piter ntingihedi duwen atail ahnsou: “Aramas ekei pahn pwarodo me pahn kin kaweidki ar mour pein ar ineng suwed kan. Re pahn kin kepitkin kumwail, ndinda, ‘E soh inoukihong kumwail me e pahn pwurodo? Eri, ia ih? Samatail ko melahr, a mehkoaros duweduwehte sang nin tepin sampah eh wiawihda!’” (2 Pit. 3:3, 4) Wadewadek Paipel ehuehu rahn oh kaukaule onopki pahn sewese kitail en tamataman me kitail miher “ni imwin ahnsou kan.” Mwekid en kesehla oh uhwongada kaudok mehlel me Paipel kohpada tepida wiawi mahsie, oh e pousehlahte wiwiawi nan atail ahnsou. “Aramas Suwedo” mihmihte oh kin uhwong sapwellimen Koht ladu kan. Pwehki kahrepe pwukat koaros, kitail anahne dehr manokehla me sapwellimen Siohwa rahno kerendohr.​—Sep. 1:7.

14. Ma kitail kin kedirepwki sapwellimen Koht doadoahk, ia duwen met eh pere kitail?

¹⁴ Pil ehu ahl me kitail en dehr sawehwehda nan atail madamadau iei en kaukaule kalohki rongamwahwo. Eri ni Krais Sises eh ketin kehkehlikihong sapwellime tohnpadahk ko ren wia doadoahk en katohnpadahk ong tohn wehi kan koaros oh padahkihong irail ren peikiong dahme e ketin padahngki, e ketikihda kaweid me pahn pere sapwellime tohnpadahk ko. (Mad. 28:19, 20) Pwehn kapwaiada sapwellime kehkehlik, kitail anahne ngoangki doadoahk en kalohk. Ke leme Kristian kan nan Deselonika itarkihte arail kalohk oh padahk pwehki re anahne wia met? Tamataman dahme Pohl ntingkilahng irail: “Kumwail dehr kakundi kisiniei en [“sapwellimen Koht manaman,” NW] rehmwail; kumwail dehr pil  mwamwahliki mahsen en irail kan me wia padahk ni mwaren Koht.” (1 Des. 5:19, 20) Kokohp kan me kitail onopki oh ehukihong meteikan uhdahn kaperen!

15. Ia ekei soahng kan me kitail kak wia erein atail kaudok en peneinei?

¹⁵ Kitail koaros men sewese atail peneinei pwe ren kekeirda nin duwen sounkalohk kan en rongamwahwo. Pwehn wia met, riatail Kristian tohto kin wiahki kisehn arail kaudok en peneinei en praktis ia duwen arail pahn wia doadoahk en kalohk. Mwein ke kak kaunopada en pwurala rehn irail me ke tuhwong nan kalohk. Dahme ke koasoanehdi ken koasoia? Dahme ke kak nda me pahn kahrehiong tohnihmwo en men kalaudehla eh esehla Paipel? Soangen ahnsou dah me keieu mwahu ken pwurala? Me tohto pil kin doadoahngki ekis ahnsou nan arail kaudok en peneinei pwehn kaunopadahng mihting kan. Ia duwe, omw peneineio kak wia met? Ma ke iang pasapeng nan mihting kan, ke pahn kakehlaka omw pwoson oh met pahn seweseiuk ken dehr sawehwehda nan omw madamadau. (Mel. 35:18) Kaudok en peneinei pahn pere kitailsang atail en kasarki soahng kan me Paipel sohte kawehwehda oh pil sang atail en peikasal.

16. Dahme kamwakid Kristian keidi kan en dehr sawehwehda nan arail madamadau?

¹⁶ Erein sounpar kan me dower powe, Siohwa ketin kapaiada sapwellime aramas akan ni eh ketin kalaudehla arail wehwehkihla kokohp kan en Paipel. Met kahrehiong kitail en kamehlele me kitail pahn ahneki keting laud ni ahnsou kohkohdo. Me keidi kan kin kasikasik ren iang mi rehn Krais nanleng. Koapworopwor wet uhdahn kamwakid irail en dehr sawehwehda nan arail madamadau. Dahme Pohl ntingkilahng mehn Deselonika kan kin dokedoke me keidi kan rahnwet. E ntingihedi: “Se uhdahn pahn kapingkalahngankihong Koht ahnsou koaros pwehki kumwail, riat kan me Siohwa kin ketin loalloale, pwehki Koht ketin pilkumwailda . . . sang ni eh ketin kasarawihkinkumwailla sapwellime manaman oh pwehki amwail pwoson me mehlelo.”​—2 Des. 2:13, NW.

17. Ia duwen 2 Deselonika 3:1-5 eh kangoange iuk?

¹⁷ Irail kan me kasikasik en mour kohkohlahte nin sampah anahne wia uwen arail kak, duwehte me keidi kan, pwe ren dehr sawehwehda nan arail madamadau. Ma ke ahneki koapworopwor en mour kohkohlahte nin sampah, peikiong ahnsou koaros mehn kangoang me Pohl ntingihala rehn ienge me keidi kan nan Deselonika. (Wadek 2 Deselonika 3:1-5.) Kitail anahne kalahnganki iren kataman limpoak pwukat. Kisinlikouo ong mehn Deselonika ko kin katamankihong kitail en dehr kasarki soahng kan me Paipel sohte kawehwehda oh kamehlele madamadau likamw kan. Pwehki kitail kerenlahngehr ni imwio, kitail uhdahn anahne kalahnganki mehn kataman pwukat.