1, 2. (a) Ia imwilahn sihpw kan ar kin ale epwel mwahu? (b) Dahme kahrehda aramas tohto ni mwehin Siseso rasehng sihpw kei me sohte silepahr?

 SIHPW kan kin nsenamwahu ma sileparailo kin apwalih mwahu irail. Ehu pwuhk duwen apwalih sihpw koasoia me ma silepen sihpw men mweidongete nah sihpw ko en mwenge nan mwahto ahpw sohte apwalihki arail anahn teikan, sihpw ko pahn luwetala oh soumwahuda mwurin sounpar kei. Ahpw ma sounsilepe men apwalih mwahu emenemen nah sihpw ko, pelin sihpwo pwon pahn kehlail oh roson.

² Met pil duwehte nan mwomwohdiso. Epwel mwahu me silepe kan kin wiahiong emenemen sihpw pahn wia kamwahu ong tohnmwomwohdiso pwon. Ele ke tamanda me Sises kupwurehla pokono pwehki “ar pwunod akan oh sohte epwelparail, pwe re rasehng sihpw kei me sohte silepahr.” (Mad. 9:36) Dahme kahrehda aramas akan ni mwehin Siseso rasehng sihpw kei me sohte silepahr? Pwehki irail me pwukoahki padahkihong aramas ako sapwellimen Koht kosonned kin lemei oh kasik aramas ako en wia laudsang dahme re kak. Ahpw pein irail sohte kin wia dahme re kin padahngki. Kaun en pelien lamalam pwukat sohte kin poakohng oh apwalih aramas ako, ahpw re kahrehiong aramas ako ren uhdahn apwalki papah Koht. Aramas ako kin pehm me re weuwa “wisik toutou” pohn pwopwarail.​—Mad. 23:4.

3. Dahme elder kan anahne tamataman ni arail apwalih sihpw kan?

³ Rahnpwukat, elder kan ahneki pwukoa kesempwal ehu. Sihpw kan me re apwalih iei sapwellimen Siohwa oh Sises. Sihpw pwukat inenen kesempwal ong Sises, me iei “silepen sihpw mwahu,” me ketin tounmeteikihla sapwellime mour ong irail. E ketin ‘pwainkinirailda’ pein sapwellime “nta kesempwal.” (Sohn 10:11; 1 Kor. 6:20; 1 Pit. 1:18, 19) Elder kan anahne ahnsou koaros tamataman me arail sounkaweid iei Sises Krais, “Silepe Lapalap en sihpw kan.” Kahrehda mwohn silangi re pwukoahki mwomwen arail apwalih pelin sihpwo.​—Ipru 13:20.

4. Dahme kitail pahn sukuhlki nan iren onop wet?

 ⁴ Ia mwomwen elder kan ar anahne apwalih sihpw kan? Koaros nan mwomwohdiso ale kangoang en ‘peikiong arail sounkaweid akan.’ Ahpw Siohwa ketin mahsanihong elder kan ren dehr ‘aksoupeidi ong irail kan me mi pahn epwelparail.’ (Ipru 13:17; wadek 1 Piter 5:2, 3.) Ia duwen elder kan ar kak doula wia “sounkaweid” ahpw dehr kin “aksoupeidi” ong pelin sihpwo? De ia duwen elder kan ar kak apwalih anahn kan en pelin sihpwo, ahpw sohte doadoahngki daulihala arail manaman me Koht ketikihong irail?

5. Dahme kitail sukuhlki nan Aiseia 40:11 duwen Siohwa?

⁵ Soukohp Aiseia patohwan ndahki Siohwa: “E pahn ketin apwalih sapwellime pelin sihpw duwehte silepen sihpw men; e pahn ketikipene sihmpwul kan, e pahn ketin apwalihekin irail nin lime; oh e pahn ketin kahre inarail kan ni keneinei.” (Ais. 40:11) Iren Paipel wet kawehwehda ia duwen Siohwa eh ketin apwalih anahn en irail me luwet oh irail me anahne aramas en sinsile. E ketin mwahngih anahn en emenemen tohnmwomwohdiso oh ketin kupwurki sewese, duwehte silepen sihpw men eh ese dahme emenemen nan nah pelin sihpwo uhdahn anahne. Patehng met, rasehng silepen sihpw men eh kolokol oh wahda sihmpwul men me ahpwtehn ipwidi, Siohwa pahn ketin kansenamwahwih oh ketin apwalih kitail ni keneinei ni atail lelohng ahnsoun kasongosong de apwal laud kan. Iei ih “Samatail me kalahngan.”​—2 Kor. 1:3, 4.

6. Ia duwen elder men eh kak kahlemengih Siohwa?

⁶ Ia uwen mwahu en mehn kasukuhl wet me sounsilepen sihpw en mwomwohdiso men eh kak sukuhlki sang Samatailo nanleng! Duwehte Siohwa, e anahne tehk mwahu anahn en sihpw kan. Ma elder men ese soangen apwal dah irail ahneki, e pahn ese iahd oh ia mwomwen eh pahn kangoange oh apwalih arail anahn kan. (Lep. Pad. 27:23 *) Met wehwehki me elder men anahne doadoahngki ahnsou en koasoiong rie Kristian kan oh rong dahme re pahn nda. Mendahki e kin kanahieng pwe en waunekin irail oh dehr peidektingki duwen arail mour, e kin tehk mwahu dahme e kilang oh rong nan mwomwohdiso oh ni limpoak doadoahngki ahnsou en sewese “me luwet akan.”​—Wiewia 20:35; 1 Des. 4:11.

7. (a) Dahme kin wiawihong sapwellimen Siohwa sihpw kan ni mwehin Esekiel oh Seremaia? (b) Mehn kasukuhl kesempwal dahieu me kitail kak sukuhlki sang Siohwa eh ketin soikala sounsilepe kan me soaloalopwoat?

⁷ Medewehla ia madamadau en sounsilepen sapwellimen Koht aramas akan ni mwehin Esekiel oh Seremaia. Sounsilepe pwukat anahne apwalih sapwellimen Siohwa sihpw ko, ahpw re sohte kin wia met nin duwen me konehng kahrehda Siohwa ketin soikala irail. Siohwa ketin mahsanih: “Nei sihpw kan lohdiongehr pahn mahn lawalo kan me kemeiraillahr oh kangiraillahr, pwehki eh sohte sileparail. Pwehki nei silepe ko ar sohte song en rapahki sihpw ko. Pwehki ar kin apwahpwalihte pein irail oh sohte nsenohki sihpw ko.” Aramas ako lokolok pwehki arail kaun ako me roporop oh noahrok. (Esek. 34:7-10; Ser. 23:1) Koht ketin soikala kaunen pelien lamalam likamw kan pwehki soangen kahrepe kohte. Mehn kasukuhl kesempwal dah me elder kan kak sukuhlki sang Siohwa eh ketin soikala sounsilepe kan me soaloalopwoat? Re anahne apwalih mwahu sapwellimen Siohwa pelin sihpw ni limpoak oh nin duwen me konehng.

8. Ia duwen elder kan ar kak alasang sapwellimen Sises mehn kahlemeng mwahu ni arail pahn kaweid riarail Kristian kan?

⁸ Pwehki aramas akan sohte unsek, ekei nan  mwomwohdiso ele sohte uhdahn wehwehki dahme Siohwa ketin kasik sang irail. Ele re wiahda pilipil kan me sohte poahsoankihda mouren padahk kan en Paipel, de mwomwen ar mwekid kasalehda me re saikinte wia Kristian koahiek kan. Ia mwomwen elder kan anahne mwekidki met? Re anahne alasang mwomwen Sises eh ketin kanengamahiong sapwellime tohnpadahk ko. Tohnpadahk ko akupwungki ihs nanpwungarail me pahn keieu lapalap nan Wehio, ahpw Sises sohte engiengda pahrail. E ketin doulahte padahkih irail oh ni limpoak ketikihong irail kaweid duwen arail pahn aktikitik. (Luk 9:46-48; 22:24-27) E pil ketin widen patehnehrail ko pwehn kasalehiong irail ia wehwehn en kin aktikitik. Rahnpwukat, elder kan pil anahne kasalehda aktikitik.​—Wadek Sohn 13:12-15; 1 Pit. 2:21.

9. Madamadau dah me wahnpoaron ako ahneki me Sises anahne ketin kapwungala?

⁹ Wahnpoaron Seims oh Sohn kasalehda me ira medewe me en wia silepe men wehwehki en kaunda meteikan. Re peki rehn Sises ira en ahneki dehu lapalap nan Wehio. Ahpw Sises ketin kapwungala ira oh ketin padahkihong ira en wekidala ara madamadau. E mahsanih: “Kumwail ese duwen nin sampah wet kaun kan kin ahneki manaman en kaunda tohn ar wehi kan, oh me lapalap akan ar kin kakaun irail. A e sohte pahn duwehte rehmwail. Mehmen me men lapalap rehmwail, e pahn papah meteikan.” (Mad. 20:25, 26) Wahnpoaron ako anahne kalekehki pein irail ineng en “aksoupeidi” ong riarail Kristian kan, duwehte en ndaiong irail dahme ren wia ahnsou koaros.

10. Ia duwen Sises eh kupwurki elder kan ren apwalih pelin sihpwo? Ia duwen Pohl eh wia mehn kahlemeng mwahu?

¹⁰ Sises ketin kasik elder kan ren apwalih pelin sihpwo ni ahlohte me e kin ketin wia. Re anahne perenki papah riarail Kristian kan, a dehr mwomwehda me irail me kaunda irail. Duwehte Sises, wahnpoaron Pohl kin papah meteikan ni aktikitik. E padahkihong elder kan nan mwomwohdiso en Episos: “Kumwail eseier duwen ei mihmi rehmwail, sang ni tepin rahn me I pwarodohng kumwail nan wehin Eisia. Eri, nin duwen ladun Kaun-o men I kin wia ei doadoahk ni karakarahk.” Pohl mwahuki elder kan en aktikitik oh doadoahk laud ong riarail Kristian kan. Sang ni eh mehn kahlemeng, Pohl padahkihong elder kan ia mwomwen ren “sewese me luwet akan.” (Wiewia 20:18, 19, 35) Nan ehu kisinlikou, e padahkihong mehn Korint kan me e sohte kaunda arail pwoson. Ahpw e wia sapwellimen Koht ladu aktikitik men duwehte irail oh men sewese irail en peren ni arail papah Koht. (2 Kor. 1:24) Pohl wia mehn kahlemeng mwahu ong elder kan rahnpwukat duwen aktikitik oh doadoahk laud.

11, 12. Ia duwen elder men eh pahn kak sewese rie Kristian men en wiahda pilipil ehu?

¹¹ Kaweid me elder men nan mwomwohdiso kihda anahne ahnsou koaros kohsang “mahseno, me likilikpe mie,” me iei Paipel. (Taitus 1:9) Patehng met eh kaweid anahne kohda ni “kamantik.” (Kal. 6:1) Sounsilepe mwahu men kin song sewese rie Kristian kan ren wiahda arail pilipil kan me poahsoankihda arail poakohng Siohwa oh sapwellime Mahsen, a kaidehn en song idingkihong irail en mwekid ni soangen ahl ehu. Karasepe, elder men ele pahn sewese rie Kristian men en wiahda pilipil kesempwal ehu sang ni ara koasoiapene kaweid kan en Paipel de oaralap ehu nan nehtail pwuhk kan. Mwein e pil pahn ndaiong rie Kristiano en medewe ia duwen pilipil kan me wekpeseng ar kak kamwakid eh nanpwungmwahu rehn Siohwa. Elder kan kak katamankihong uwen kesempwal en kapakap oh peki sapwellimen Koht kaweid mwohn eh pahn wiahda pilipil ehu. (Lep. Pad. 3:5, 6) Mwurin ara koasoipene, eldero pahn mweidohng ih en pein wiahda eh pilipil.​—Rom 14:1-4.

 ¹² Elder kan ar kin kihda kaweid anahne poahsoankihdahte Paipel. Eri e inenen kesempwal ren doadoahngki mwahu Paipel oh ahnsou koaros poahsoankihda arail kaweid kan sang Paipel. Ni arail wia met, elder kan sohte kin doadoahngki arail manaman daulihala sang dahme Koht ketin mweidohng irail. Kaidehn neirail sihpw ko. Eri, emenemen nan mwomwohdiso kin pein pwukoahki eh pilipil kan me e wiahda mwohn Siohwa oh Sises.​—Kal. 6:5, 7, 8.

13, 14. Ni ahl dah kan me elder kan anahne wia mehn kahlemeng ong pelin sihpwo?

¹³ Mwurin Piter eh padahkihong elder kan ren dehr “aksoupeidi” ong riarail Kristian kan, e kangoange irail en “wia kahlemengihpen pwihn sihpw.” (1 Pit. 5:3) Ia duwen elder men eh kak wia mehn kahlemeng ong pelin sihpw? Medewe duwen irair riau me brother men anahne ahneki pwe en wia elder men. Keieu, e anahne “kak kaunda nsene” de ahneki madamadau pwung. Met wehwehki me e wehwehki mwahu kaweid kan en Paipel oh ese ia mwomwen e pahn doadoahngki nan eh mour. E kin meleilei nan irair apwal kan oh kin medewe mwahu mwohn eh wiahda pilipil kan. Keriau, e anahne “uhdahn pahn kak apwahpwalih mwahu eh peneinei.” Met wehwehki me ma mie ahn eldero peneinei, e anahne wiahda mehn kahlemeng mwahu nin duwen ohl pwopwoud oh pahpa men. “Pwe ma aramas emen sohte ese duwen eh pahn apwalih pein eh peneinei, a ia duwen eh kak apwalih mwomwohdiso en Koht?” (1 Tim. 3:1, 2, 4, 5) Tohnmwomwohdiso kin pehm me re kak likih elder kan me ahneki soangen irair pwukat.

¹⁴ Elder kan pil kin wiahda mehn kahlemeng mwahu sang ni arail kin tiengla mwowe nan doadoahk en kalohk duwehte Sises ketin wia. Kalohki rongamwahu en Wehio kin wia mehkot kesempwal nan sapwellimen Sises mour nin sampah oh e ketin padahkihong sapwellime tohnpadahk kan ia duwen ar en wia doadoahk wet. (Mark 1:38; Luk 8:1) Rahnpwukat, sounkalohk kan kin perenki iang elder kan kalohk. Re kilang ahn elder kan arail ngoangki doadoahk kesempwal wet oh kak sukuhlki sang mwomwen arail kin padahk. Ni elder kan ar kaukaule doadoahngki arail ahnsou oh kehl ong kalohki rongamwahwo mendahki arail uhdahn kedirepw, tohnmwomwohdiso kin mwekidki en kasalehda soangen ngoangohte. Elder kan pil kak wiahda mehn kahlemeng mwahu ong riarail Kristian kan sang ni arail kin kaunopada ong mihting kan, kihda pasapeng kan oh wia doadoahk kan duwehte kamwakele oh apwalih Wasahn Kaudok. Met kangoange kitail en “kahlemengih ar pwoson.”​—Ep. 5:15, 16; Ipru 13:7.

15. Kahrepe dahkei elder kan kin mwemweitla rehn riarail Kristian kan?

¹⁵ Silepen sihpw mwahu men kin mwadang  en sewese sihpw men me medekla de soumwahuda. Ni ahlohte, elder kan anahne mwadang en sewese irail kan me lokolok de irail me anahne kaweid de kangoang. Me mah oh me soumwahu kan ele anahne sawas ong arail anahn en ehuehu rahn, ahpw re keieu anahne ire kan sang Paipel en kangoange oh kansenamwahwih irail. (1 Des. 5:14) Me pwulopwul kan ele kin songosong powehdi “ineng en mwahnakapw akan.” (2 Tim. 2:22) Elder kan kin sewese koaros nan mwomwohdiso ni arail mwemweitla rehrail. Erein arail mwemweitla, re kin song wehwehki kahpwal kan en riarail Kristian kan oh kihong irail kangoang sang nan Paipel. Ma elder kan kin mwadang kihong riarail Kristian kan sawas me irail anahne, kahpwal laud tohto kakete sohte wiawi.

16. Ni emen nan mwomwohdiso ahneki kahpwal laud ehu, dahme elder kan kak wia?

¹⁶ Ia duwen ma Kristian men nan mwomwohdiso ahneki kahpwal laud ehu oh eh nanpwungmwahu rehn Siohwa mihla nan keper? Sounnting en Paipel Seims koasoia: “Mie rehmwail me soumwahu? En ekerodo me mah kan en mwomwohdiso pwe re en kapakapki oh keiehki leh ni mwaren Kaun-o. Oh kapakap wet me pahn wiawi ni pwoson, pahn komourala me soumwahwo: Kaun-o pahn ketin kakehlahda, oh ketin lapwahsang dipe kan.” (Seims 5:14, 15) Mehnda ma Kristiano me “soumwahu” sohte “ekerodo me mah kan,” elder kan anahne mwadang sewese ni ahnsou me re esehda eh irairo. Ma re iang irail kapakap, oh ma re kapakapkin irail oh sewese irail ni arail mihla nan kahpwal, elder kan kin kasalehda me re wia sounsilepe mwahu kei me kin kangoange riarail kan pwe ren doulahte perenki papah Koht.​—Wadek Aiseia 32:1, 2.

17. Ni elder kan ar alasang ‘Silepe Lapalapo,’ ia duwen tohnmwomwohdiso ar paiekihda?

¹⁷ Elder kan kin doadoahk laud ren alasang ‘Silepe Lapalapo,’ Sises Krais, ni mehkoaros me re kin wia nan sapwellimen Siohwa pwihn. Ohl koahiek pwukat kin sewese pelin sihpw en pousehlahte kehlailla oh papah Koht ni lelepek. Kitail uhdahn kalahnganki atail sounsilepe limpoak kan oh atail Sounsilepeo me keieu lapalap Siohwa.