1. Dahme kak kahrehiong kitail en sohla kanengamah?

 AHNSOU me Krais ketin wiahla Nanmwarki men nanleng nan pahr 1914, imwin ahn Sehdan koasoandi tepida. Nan pahro, mahwen wiawi nanleng, oh Sises ketin piskendihsang nanleng Sehdan oh nah ngehn saut kan ong sampah. (Wadek Kaudiahl 12:7-9.) Sehdan ese me eh “ahnsou mwotomwotalahr.” (Kaud. 12:12) Ahpw “ahnsou mwotomwotalahr” wet pil mihmier wereisang dahme ekei kitail kasik. Ia duwe, kitail solahr kanengamah ni atail awiawih Siohwa en ketin kasohrehla koasoandi en Sehdan?

2. Peidek dah kan me iren onop wet pahn sapengala?

² E kak keper ong kitail en sohla kanengamah. Dahme kahrehda? Pwehki ni atail sohla kanengamah, ele kitail kak wia soahng kan me kitail sohte mahs medewe kanahieng. Eri, dahme kak sewese kitail en koapworopwor awiawih? Iren onop wet pahn sewese kitail ni eh sapengala peidek pwukat: (1) Dahme kitail kak sukuhlki sang mehn kahlemeng en soukohp Maika duwen kanengamah? (2) Soangen mwekid dah me pahn wia kilelepen imwio eh kerendohr? (3) Ia duwen atail kak kasalehda atail kalahnganki sapwellimen Siohwa kanengamah?

3. Ia mwomwen irair en mehn Israel ko ni mwehin Maika?

³ Wadek Maika 7:2-6. Sapwellimen Siohwa soukohp Maika kilang duwen lelepek en mehn Israel ko ong Siohwa eh wie luhluwetla, oh erein kaundahn Nanmwarki Ahas, re uhdahn sohla lelepek. Maika karasahiong ahn mehn Israel kan arail sohla lelepek duwehte tuhke tekatek ehu me kak kauwehla aramas men. Mehn Israel ko kin duwehte tuhke wet pwehki arail wia kauwe meteikan oh kahrehiong irail keper. Irairo uhdahn suwedla me kahrehda peneinei kan pil sohla poakpene nanpwungarail. Maika  wehwehki me e sohte kak wekidala irairo, eri e kapakapohng Siohwa sang eh mohngiong unsek. Ih eri kanengamah awih pwe Koht en ketin mwekid. Maika uhdahn kamehlele me Siohwa pahn ketin kapwungala irairo ni ahnsou me E ketin kupwurki.

4. Soangen kahpwal dah me kitail ahneki?

⁴ Duwehte Maika, kitail pil kin mi nanpwungen aramas roporop kan. Me tohto “sohte pahn kin kasapahlkalahnganki mehkot,” “irail pahn sempoak,” oh “re pahn pangala iangarail kan.” (2 Tim. 3:2-4) Ele e kin kahpwalihala atail mour ni ahnsou me iengetail tohndoadoahk, tohnsukuhl oh pil mehn mpatail kan kin kasalehda irair en roporop. Ahpw ekei kitail ahneki kahpwal me pil laudsang met. Sises mahsanih me sapwellime tohnpadahk kan pahn lelohng uhwong sang arail peneinei. Sapwellime mahsen kin pahrekiong dahme kitail wadek nan Maika 7:6. Sises mahsanih: “I kodohng kamwakidada liaktohrohr nanpwungen sahm akan oh nair pwutak kan, nanpwungen ihn akan oh nair serepein kan, nanpwungen lih pwopwoud pwulopwul kan oh en arail pwoud kan ar nohno kan; en emen eh imwintihti me keieu suwed, iei kiseh kan.” (Mad. 10:35, 36) E kak uhdahn apwal ni ahnsou me atail peneinei me sohte papah Siohwa kin kapailoke de uhwong kitail. Ma kitail mi nan irair wet, kitail en dehr dukila pahn uhwong pwukat. Kitail anahne loalopwoat ongete Siohwa oh kanengamah awih pwe en ketin kapwungala irairo. Ma kitail pousehlahte kapakapki sapwellime sawas, e pahn ketikihong kitail kehl oh erpit me anahn pwehn lelepekte ong ih.

5, 6. Ia duwen Siohwa eh ketin kapaiada Maika? Dahme Maika sohte kilang?

⁵ Siohwa ketin kapaiada Maika pwehki eh kanengamah. Maika kilang imwin kaundahn Nanmwarki suwed Ahas. E kilang Esekaia, nein Ahas pwutak, wiahla nanmwarki oh sewese mehn Israel ko ren pwuralahng kaudok min. Maika pil kilang duwen kokohp me e ntingihedi duwen Sameria eh pweida ni mehn Asiria kan powehdi paliepeng en wehin Israel.​—Maika 1:6.

⁶ Ahpw Maika mehla mwohn eh kilang pweidahn kokohp koaros me Siohwa ketin kamwakid en ntingihedi. Karasepe, Maika ntingihedi: “Ni rahn akan me pahn kohdo [“ni imwin rahn akan,” NW] dohl me Tehnpas Sarawien KAUN-O uhda powe pahn wiahla dohl me keieu ile nanpwungen dohl kan; e pahn sikdahsang dohl koaros. Wehi tohto pahn pokondohng ie, oh towe kan pahn nda, ‘Nna, kitail kohdahla nin nahnahn KAUN-O, ni Tehnpas Sarawien Koht en Israel.’” (Maika 4:1, 2) Maika koasoanehdi teng pwehn loalopwoatohngete Siohwa lao lel mehla, sohte lipilipil dahme aramas ako wiewia. E ntingihedi: “Pwe wehi koaros kin pwongih oh peikiong arail koht kan, a kiht, se pahn kin pwongih oh peikiong KAUN-O, at Koht, kohkohlahte.” (Maika 4:5) Maika kanengamah awiawih erein ahnsou apwalo pwehki e kamehlele me Siohwa pahn ketin kapwaiada Sapwellime inou kan koaros.  Soukohp lelepek menet koapworopworki Siohwa.

7, 8. (a) Kahrepe dahieu kitail en koapworopworki Siohwa? (b) Dahme pahn kahrehiong ahnsou en mwomwen mwadang nekla?

⁷ Ia duwe, kitail kin koapworopworki Siohwa duwehte Maika? Mie kahrepe mwahu kitail en wia met. Kitail kilangehr pweidahn kokohp en Maika. Erein imwin rahn pwukat, aramas rar rar kei sang wehi, keinek, oh lokaia koaros pokondohngehr “dohl me Tehnpas Sarawien KAUN-O” mi ie. Mendahki re kohsang wehi kan me kin kalapw mahwenpene, tohnkaudok pwukat wekidohngehr “neirail kedlahs akan ni mehn deipwel” oh re sohte pahn “pwurehng onopada ong mahwen.” (Maika 4:3) E wia kapai laud ehu en wia emen sapwellimen Siohwa aramas popohl kan.

⁸ Kitail koaros men Siohwa en ketin kasohrehla koasoandi suwed wet ni ahnsou keren.  Pwe kitail en kanengamah awiawih, atail madamadau anahne pahrekiong sapwellimen Siohwa. Siohwa ketin pilada Sises Krais en kadeikada aramas akan oh E ketin koasoanedier rahn me met pahn wiawi. (Wiewia 17:31) Ahpw mwohn rahno pahn leledo, Koht ketin mweidohng aramas koaros ar ahnsou mwahu ren “marainkihla me mehlel,” doadoahngki dahme re sukuhlki oh komourla. Kitail anahne tamataman me mouren aramas mi nan keper. (Wadek 1 Timoty 2:3, 4.) Ahnsou keren, imwio pahn leledo. Ma kitail kin kedirepwki atail sewese aramas akan ren esehla Siohwa, e pahn mwomwen me ahnsou luhluhwe pahn mwadang nekla. Ni ahnsou me imwio leledo, kitail pahn perenki atail kin pwerisek nan doadoahk en kalohk.

9-11. 1 Deselonika 5:3 pweidahr? Menlau kawehwehda dahme kahrehda.

⁹ Wadek 1 Deselonika 5:1-3. Kereniongehr wehi kan pahn pakairki “Mehkoaros meleilei oh mwahu.” Ma kitail sohte men pakair wet en pitihkitaildi, kitail anahne “pepehd oh onohnop.” (1 Des. 5:6) Met kitail pahn koasoia duwen mwekid kei me wiawi mwohn pakair kesempwal wet pahn wiawi.

¹⁰ Mwurin mahwen keieu oh keriaun sampah wiawi, wehi kan uhdahn men popohl en mie. Mwurin mahwen keieu en sampah, pwihn me adaneki League of Nations wiawihda pwehn wahdo popohl. Mwuhr, mwurin mahwen keriaun sampah wiawi, aramas akan koapworopworki me pwihn me adaneki United Nations kak wahdo popohl. Koperment kan oh kaunen pelien lamalam kan kin koapworopworki pwihn riau pwukat. Karasepe, United Nations kamanahla me pahr 1986 wia Pahr en Popohl en Sampah Pwon. Nan pahro, pelien koperment oh kaunen pelien lamalam tohto iang tuhpene ehu rehn kaunen Sarawi en Kadolik pwehn kapakapki popohl.

¹¹ Ahpw pakair wet oh pil pakair teikan me duwe met sohte kapwaiada kokohp me kileldi nan 1 Deselonika 5:3 me pid “mehkoaros meleilei oh mwahu.” Dahme kahrehda? Pwehki “apwal laud [“kasohrala,” NW]” me pahn mwadangete lelohng irail saikinte wiawi.

12. Dahme kitail ese duwen pakairpen “Mehkoaros meleilei oh mwahu”?

 ¹² Ihs me pahn wia pakair kesempwal en ahnsou kohkohdo duwen “Mehkoaros meleilei oh mwahu”? Pwukoa dahieu me kaunen pwihn en Kristian likamw kan oh pelien lamalam teikan pahn ahneki ong pakair wet? Ia duwen koperment kan ar pahn iang pidada met? Paipel sohte padahkihong kitail. Ahpw dahme kitail ese iei me sohte lipilipil ia duwen pakair wet eh wiawi oh ia uwen aramas akan ar kamehlele, kaidehn uhdahn meleilei mehlel ehu met. Sehdan pahn kakaunte koasoandi wet. Koasoandi wet inenen suwed oh sohte pahn wekila. E pahn uhdahn kansensuwed ma kitail kamehlele pakair likamw pwukat oh sohla kolokol atail soupoupali.

13. Dahme kahrehda tohnleng ko kolokolki ahng en kasohrala ko?

¹³ Wadek Kaudiahl 7:1-4. Ni atail awiawih pweidahn 1 Deselonika 5:3, tohnleng kehlail ko wie kolokol ahng en kasohrala ko en kahn kamakam kowahlap. Dahme re awiawih? Wahnpoaron Sohn ntingihedi me kaimwiseklahn kileldi en “sapwellimen Koht ladu” me keidi kan anahne wiawi mahs. * Ni ahnsou me mwekid kesempwal wet imwisekla, tohnleng ko pahn kadarala ahng en kasohrala ko. Dahme pahn wiawi mwuhr?

14. Dahme kasalehda me Papilon Lapalap pahn kereniong kasohrala?

¹⁴ Papilon Lapalap, me iei pelien kaudok likamw koaros nan sampah, pahn kasohrala nin duwen me e warohng. Ni ahnsou me met pahn wiawi, sohte me pahn kak sewese. Kitail kak kilang me eh pahn kasohrala kerendohr. (Kaud. 16:12; 17:15-18; 18:7, 8, 21) Kitail kak kilang me aramas akan solahr nohn utung sang ni ripoht kan ar kauwe pelien lamalam oh arail kaun kan. Mendahki met, kaunen pelien lamalam kan sohte medewe me re uhdahn mi nan keper. Ia uwen arail sapwung! Mwurin pakairpen “Mehkoaros meleilei oh mwahu” wiawi, koperment kan pahn mwadangete uhwongada oh kamwomwala douluhl pelien lamalam likamw. Papilon Lapalap pahn sohrala kohkohlahte! Ia uwen mwahu atail en kanengamah oh awih pwe mwekid pwukat en wiawi!​—Kaud. 18:8, 10.

15. Dahme kahrehda Siohwa ketin kanengamah oh awih?

¹⁵ Mendahki aramas akan ar kasohwauwi mware, Siohwa kin ketin kanengamah oh awih ahnsou me konehng en ketin mwekid. Siohwa sohte ketin kupwurki irail me ahneki mohngiong mehlel en kasohrala. (2 Pit. 3:9, 10) Ia duwe, kitail pil kin ahneki soangen pepehm wet? Mwohn rahnen Siohwa eh pahn leledo, mie soangsoangen ahl akan me kitail en kasalehiong ih atail kalahnganki sapwellime kanengamah.

16, 17. (a) Dahme kahrehda kitail men sewese irail me uhdihsang papah Siohwa? (b) Dahme kahrehda e karuwaru me irail me uhdihsang papah Siohwa en pwurodo met?

¹⁶ Sewese irail me luwetala oh sohla iang kalohk oh mihting. Sises mahsanih me nanleng kin perenda ni emente sihpw me salongala eh dierek. (Mad. 18:14; Luk 15:3-7) Siohwa uhdahn ketin nsenohki irail me kasalehda re poakohng ih, mehnda ma ahnsou wet re sohte kin papah ih. E kin kaperenda Siohwa oh tohnleng kan ni atail sewese aramas akan ren pwurodohng Siohwa.

¹⁷ Ia duwe, ke iang irail me sohla papah Siohwa ahnsou wet? Mwein ke uhdihsang towehda mihting kan pwehki emen nan mwomwohdiso kansensuwedihiukala. Mwein erein ahnsou ehu dower powe. Eri, pein idek rehmw: ‘Ia duwe, ei mour mwahula met oh I peren  sang mahs? Siohwa me ketin kansensuwedihehla, de aramas soh unsek men? Mie mehkot keper me Siohwa Koht ketin wiahiong ie?’ Siohwa kin ketin wia mwahu ong kitail ahnsou koaros. Mendahki ahnsou wet ele kitail sohte kapwaiada atail inou en papah ih, e kin ketin mweidohngete kitail en perenki soahng mwahu kan me e ketikihong kitail. (Seims 1:16, 17) Ahpw kereniong rahnen Siohwa pahn leledo. Met iei ahnsoun pwuralahng Samatail limpoak, Siohwa, oh pil nan mwomwohdiso. Ni imwin rahn pwukat, wasaht kelehpw me kitail en mi ie me sohte keper.​—Deud. 33:27; Ipru 10:24, 25.

18. Dahme kahrehda kitail en utungada irail me kin tiengla mwowe?

¹⁸ Utung ni loalopwoat irail me kin tiengla mwowe. Nin duwen Sounsilepen sihpw limpoak men, Siohwa kin ketin kahluwa oh pere kitail. E ketin idihadahr sapwellime Ohlo pwehn wia Silepe Lapalapo. (1 Pit. 5:4) Elder kan sang mwomwohdiso tohto sang 100,000 kin kihong ahnsou laud pwehn apwalih emenemen sapwellimen Koht sihpw kan. (Wiewia 20:28) Ni atail utungada ni loalopwoat irail pwukat me tiengla mwowe, kitail kin kasalehiong Siohwa oh Sises me kitail kalahnganki soahng koaros me ira ketin wiahiong kitail.

19. Ia wehwehn en karanihala riatail Kristian kan?

¹⁹ Karanihala riatail Kristian kan. Ia wehwehn met? Ni imwintihti kan ar mahweniong pwihnen sounpei ehu me kaiahnda mwahu, sounpei pwukat kin keipene pwehn wiahda mehn perepe ieu me apwal en kauwehla. Sehdan kin kalaudehla eh uhwong sapwellimen Koht aramas akan. Met kaidehn ahnsoun pelian riatail Kristian kan. Ahpw met iei ahnsoun karanihala emenemen, pohnsehsehla soh unsek en riatail kan, oh likih Siohwa.

20. Dahme kitail en wia met?

²⁰ Eri kitail en kolokol atail nanpwungmwahu rehn Siohwa en kehlail oh koapworopwor oh awiawih. Kitail en kanengamah awih pakairpen “Mehkoaros meleilei oh mwahu” oh kaimwiseklahn kileldi en me keidi kan en wiawi. Mwurin met, tohnleng pahmeno pahn kadarala ahng en kasohrala ko oh Papilon Lapalap pahn sohrala. Ni atail awih mwekid kesempwal pwukat en wiawi, kitail en idawehn kaweid sang irail me idihdida pwehn tiengla mwowe nan sapwellimen Siohwa pwihn. Kitail en keipene oh pelianda Tepil oh ngehn saut akan! Met iei ahnsoun idawehn kaweid en sounmelkahkao: “Kumwail koaros me kin koapworopworki KAUN-O, kumwail kehlail oh kommwad.”​—Mel. 31:24.