Koht ketin inoukihong Eipraam me ‘kadaudoko’ pahn kohsang kadaudoke kan. Kadaudok en Eipraam menet pahn ketikihdo kapai ong aramas akan en “wehi koaros.” (Senesis 22:18) Mwuhr, Seikop me pahpa kahlapki Eipraam, keseula Isip oh eh peneineio wiahla wehin Israel en mahs.

Mwuhr, nan Isip, nanmwarki lemei Parao wiahkihla mehn Israel ko lidu kei lao Koht ketin idihada Moses nin duwen soukohp men me kahluwahsang mehn Israel ko Isip ni eh pwalangpeseng Sehd Weitahtaho. Mwurin met, Koht ketikihong mehn Israel ko kosonned kan, me iangahki Kosonned Eisek ko, pwehn kaweid oh pere irail. Kosonned pwukat kasalehda ni oaritik duwen arail pahn kin wia meirong kan pwehn peki mahkpen diparail. Koht ketin doadoahngki Moses pwehn padahkihong mehn Israel ko me E pahn ketin poaronehdo pil emen soukohp. Soukohp menet iei me wia “kadaudok” me inoupe mie.

Tohtohsang sounpar pahpwiki mwuhr, Koht ketin inoukihong Nanmwarki Depit me “kadaudok” me e ketin kohpada duwe nan mwetuwel en Ihden, pahn kaunda wehi ehu me pahn mihmi kohkohlahte. Kadaudok menet iei Mesaiao, Sounkomour me Koht ketin idihada pwehn doarehla tohnsampah oh pwurehng kaparadaisihala sampah duwehte nin tapio.

Koht ketin doadoahngki Depit oh soukohp teikan en ekisekis kasalehda duwen Mesaiao. Re kohpada me e pahn ketin aktikitik oh kadek oh sapwellime kaunda pahn kihsang duhpek, wiewia sapahrek oh mahwen. Tohnsampah pahn ahnekipene popohl nanpwungarail oh pil rehn mahn akan. Soumwahu, lokolok oh mehla me Koht sohte ketin kupwurki nin tapio solahr pahn mie oh me melahr kan pahn iasada ong mour nin sampah.

Koht ketin doadoahngki soukohp Maika en kohpada me Mesaiao pahn ipwidi nan Pedleem. E pil ketin doadoahngki soukohp Daniel en kohpada me mwuhr Mesaiao pahn kamakamla. Ahpw Koht pahn ketin kaiasada Mesaiao sang mehla oh idihada pwehn wiahla Nanmwarki men nanleng. Daniel pil kohpada me Wehin Mesaiao pahn kasohrehla koperment kan koaros oh uhd kaunda kohkohlahte. Ia duwe, Mesaiao uhdahn ketido nin duwen me kokohpdahr?

​—Kohsang nan pwuhken Senesis, irelaud 22-50, oh pil Eksodus, Deuderonomi, 2 Samuel, Melkahka kan, Aiseia, Daniel, Maika, Sekaraia 9:9.