1. Dahme kitail anahne wia pwehn tehk mwahu me atail pwoson kin kehkehlailte?

 ARAMAS tohto nda me re kin kamehlelehte soahng kan me re kak kilang. Ahpw Paipel mahsanih me “sohte me kin kilangki Koht mese.” (Sohn 1:18) Pwehki kitail sohte kak kilang ih, ia duwen atail kak sewese irail me sohte kamehlele Koht ren pwosonla ih? Dahme kitail kak wia pwehn tehk mwahu me atail pwoson Siohwa, “Koht me soh sansal,” en kak kehkehlailte? (Kol. 1:15) Keieu kitail anahne esehla soangen padahk kan me kin ekihla dahme mehlel duwen Koht. Mwuri, kitail anahne esehla mwahu doadoahngki Paipel pwe kitail en kak kadehdehda me padahk pwuko “kin pelianda erpit en Koht.”​—2 Kor. 10:4, 5.

2, 3. Padahk riau dah kan me kasohwe ahn aramas pahn sukuhlki dahme mehlel duwen Koht?

² Ehu padahk likamw me karotongehla aramas akan oh kasohwe arail en sukuhlki dahme mehlel duwen Koht iei padahk me dene mour pein miehla oh aramas kohsang mahn. Padahk pwoatet sohte pahrekiong dahme ntingdi nan Paipel oh e pil kihsang ahn aramas ar koapworopwor. Ma padahk wet mehlel, e pahn wehwehki me kitail sohte kak kawehwehda ia kahrepen atail mour.

³ Ekei aramas nan pelien lamalam kan padahngki me lahng oh sampah oh audepara koaros mihmihki erein sounpar kid keite. Re nda me Koht ketin kapikada mehkoaros erein rahn weneu, ehuehu rahn ko reireiki awa 24. Irail me kamehlele padahk wet soikala mehn kadehde koaros en palien sains me uhwong dahme re kamehlele. Mwein re kin wauneki Paipel, ahpw padahk pwoatet kahrehiong aramas teikan ren apwalki likih Mahsen en Koht. Dahme kahrehda? Pwehki padahk wet kahrehiong Paipel en mwomwen sapwung. Irail me padahngki padahk pwoatet kin katamankihong kitail ekei aramas ni mwehin tepin Kristian ko. Irail kin ngoangki arail kaudok ong Koht ahpw re sohte kaudokiong ih “ni pwungen marain mehlel.” (Rom 10:2) Ia duwen  atail kak doadoahngki Mahsen en Koht pwehn sewese kadehdehda me “wasa kehlail kan,” de padahk kan me dene mour pein miehla oh aramas kohsang mahn oh lahng oh sampah oh audepara koaros kapikipikda erein rahn weneute, padahk likamw kei? Kitail kak sewese irail ihte ma kitail doadoahk laud pwehn esehla loalokong pwung duwen dahme Paipel padahngki.

4. Dahme atail pwoson en poahsoankihda?

⁴ Paipel padahkihong kitail me kitail anahne kesempwalki erpit duwehte atail kesempwalki takai kesempwal. (Lep. Pad. 10:14) Siohwa ketin kupwurki me atail pwoson ih en poahsoankihda mehn kadehde oh pil lamalam pwung, a kaidehn en kohsang madamadau en aramas de tiahk en pelien lamalam kan. (Wadek Ipru 11:1.) Pwe atail pwoson Koht en kehlail, kitail anahne kamehlele mahs me Siohwa uhdahn ketin mie. (Wadek Ipru 11:6.) Kitail kamehlele met, kaidehn pwehki kitail men kamehlele mehkot, ahpw pwehki kitail kasawiher ire mehlel kan oh “eselahr wekpeseng en me mwahu oh me suwed.”​—Ipru 5:14.

5. Kahrepe dahieu me kitail kak kamehlele me Koht ketin mie?

⁵ Wahnpoaron Pohl kawehwehiong kitail kahrepen atail kak kamehlele me Koht ketin mie, mehnda ma kitail sohte kak kilang Ih. E ntingihedi: “Sang ni ahnsou me Koht ketin kapikada sampah, aramas kak dehdehki me ih uhdahn Koht mehlel oh sapwellime manaman me poatopoat. Mepwukat me sansal mwahu sang ni wiepen nin lime kan.” (Rom 1:20) Ia duwen omw kak sewese emen me peikasalki ma Koht ketin mie en kamehlele dahme Pohl nda? Ke kak doadoahngki ekei karasaras en kapikipik kan me kitail pahn koasoiapene me kadehdehda duwen sapwellimen Koht manaman oh erpit.

6, 7. Ia duwen sapwellimen Siohwa manaman eh sansalda nan soahng riauo me kin pere kitail?

⁶ Kitail kilang kadehdehpen sapwellimen Siohwa manaman nan soahng riau me kin pere kitail. Soahng riau pwukat iei nan wehwe (atmosphere) oh makinet me kapilpene sampah. Nan wehwe wet sohte kihdahte ahng me kitail esingengki ahpw e pil pere kitail. Ia duwen? Mie takai laud kan me kin mwekimwekid mwadang kohwei nan wehwe me kak kahrehda ohla laud ma re lel sampah. Ahpw met sohte kalapw wiawi pwehki takai pwukat kin mwasikala ni arail pedolong nan wehwe wet me wia mehn perepe ieu. Kitail kin kilang arail mwasikala ni atail kilengda pahnlahng nipwong oh kilang mwomwen kisin marain ehu mwekid uhdahn marahra nanpwungen usu kan.

⁷ Makinet me kapil sampah pil kin pere kitail sang keper. Nan werengen sampah, mie mehkot me pali laud wiawihkihda mete peipeseng oh inenen karakar. Mewet kin wiahda makinet me uhdahn kehlail me kapilpene sampah oh pil leldalahng nan wehwe. Angin makinet wet kin pere kitail sang ketipin oh pil soahng keper kan me kin pospeseng nan wehwe. Soahng pwukat me kin pospeseng nan wehwe kin kadarpeseng angin karakar ehu (radiation) me keper ong sampah. Pwehki makinet wet kin perehla sampah, angin karakar sang ketipin sohte isikala mour nin sampah. Ahpw makinet wet kin ihkada angin karakar keper wet, de e kin kapwurehla nan wehwe. Nipwong kan nan sahpw kan me mi karanih Paliepeng oh Palieir en sampah, mehn kadehde duwen makinet wet me soh sansal kak sansalda nan marain kan me kin pwarada pahnlahng ni soangsoangen poh. Ia uwen lapalap en sapwellimen Siohwa manaman!​—Wadek Aiseia 40:26.

8, 9. Ia duwen mour eh kak pousehlahte mie nin sampah rahnwet? Dahme met padahkihong kitail duwen sapwellimen Siohwa erpit?

⁸ Kitail kak sukuhlki duwen sapwellimen Siohwa erpit sang ni eh ketin wiahiong mour en kak pousehlahte nin sampah. Medewehla kahnimw ehu me dihd ehu kapilpene oh aramas  rar kei kousoan loale. Sohte wasa kis nan kahnimwo me kin kapwilodo pihl mwakelekel de kesehla kihd kan. Soangen kahnimw wet pahn uhdahn saminla oh aramas sohla kak kousoan loale. Sampah kin mwomwen duwehte kahnimw wet. Pihl sohte laud oh e sohte mengei en kihsang douluhl atail kihd kan. Ahpw sampah sohte pahn uhdihsang eh kihda soahng koaros me anahn pwe mour koaros en wie momour. Dahme kahrehda met kak wiawi? Pwehki sampah ahneki ahl kapwuriamwei ehu en pwurepwurehng doadoahngki soahng koaros me anahn ong mour.

⁹ Kitail tehk ia duwen sampah eh kihda ahng me adaneki oxygen pwe mour koaros en kak esingek. Soangen mour lik lik kei kin esingengkihda ahng wet oh esingengkihei ahng me adaneki carbon dioxide. Mendahki met kin wiwiawi ahnsou koaros, ahng wet oxygen sohte kin nekla de sohla mie. Ia duwen met eh kak wiawi? Tuhke oh dihpw kan kin alehda carbon dioxide, pihl, marain en ketipin, oh pil soahng kan me kin sewese dihpw, tuhke kan oh mahn akan ren kekeirda oh eri wiahda carbohydrates oh oxygen. Ahnsou me kitail esingengkihlong oxygen oh esingengkihei carbon dioxide, kitail kapwaiada koasoandi ehu me kin pwurepwurehng wiwiawi. Koasoandi wet adaneki photosynthesis. Siohwa ketin doadoahngki tuhke oh dihpw kan me e ketin kapikada pwehn ketikihong “mour oh esingek . . . ong aramas akan koaros.” (Wiewia 17:25) Ia uwen kapwuriamwei en sapwellime erpit!

10, 11. Ni ahl dah kan me sapwellimen Siohwa erpit kin sansalda rehn lipahrourou oh dempwo?

¹⁰ Kitail pil kak kilang sapwellimen Siohwa erpit sang ni mwomwen eh ketin wiahda mahn tohtohie nin sampah. Roporop kasalehda me mie soangsoangen mahn kan me tohtohki mpen rierar lella sapw (rar pak epwiki) me mihmi sampah. (Wadek Melkahka 104:24.) Kitail pahn sukuhlki duwen sapwellime erpit sang mwomwen wiawihdahn ekei mahn pwukat.

¹¹ Karasepe, mie soangen lipahrourou men me eh mwahliel inenen tikitik, uwehte moangen dikek ehu. Mendahki eh mwahliel inenen tikitik, lipahrourou menet kak pihrki mpen mwail 1,800 sang sapwen Canada lella ehu nanwel en sapwen Mexico. E wia met sang ni eh ale kaweid sang ketipino. Ahpw ia duwen eh kak wia met ni ketipino eh kin mwekid? Siohwa ketin kapikada eh mwahliel tikitiko ni ahl ehu me e kak pihr ni ahl pwung mendahki ketipino eh kin mwekid. Pil medewehla duwen kisin mahn tikitik dempwo. Mwahliel en kisin mahn menet kak wehwehki soahng tohto me meseo kilangada oh kak kilang kisin mwekid kan me keieu tikitik me wiawi limwah.

12, 13. Dahme kapwuriamwei duwen mwomwen Siohwa eh ketin kapikada kisin war kan?

¹² Mwomwen Siohwa eh ketin wiahda kisin war (cell) kan en mour koaros kin uhdahn kapwuriamwei. Karasepe, mie kisin war kan mpen meh lik pak kid kei (100 trillion) me mihmi nan paliwaratail. Nan ehuehu kisin war pwukat,  mie mehkot (acid) me adaneki DNA. E kin kolokol ire tohto me anahn pwehn kak wiahda paliwaratail pwon.

¹³ Ia uwen tohtohn ire kan me DNA kolokol? Kitail kak kapahrekiong DNA CD ehu. CD ehu kak kolokol ire koaros nan dikseneri ehu pwon. Met kapwuriamwei. Ahpw DNA kis me marahrahki uwen marahra en tala ehu kak kolokol ire koaros me mi nan CD meh lik pak epwiki (trillion). De kitail kak nda me dihsupwuhn en DNA kereng kis kak kolokol ire koaros me anahn pwehn wiahda aramas koaros me momour rahnwet, pak 350!

14. Ia duwen soahng kan me saintis kan diarada ar kamwakid omw pepehm duwen Siohwa?

¹⁴ Nanmwarki Depit nda: “Ni tih kat eh kakonokonpene ni keneinei nan kapehd en inei, ni ei tepin kekeirda wasa riro, komw ketin mwahngihieier.” (Mel. 139:15) Kitail kak wehwehki dahme kahrehda Depit men kapinga Siohwa ni eh medewe duwen mwomwen paliwereo eh wiawihda. Saintis kan diarada soahng tohto duwen paliwar en aramas me uhdahn kapwuriamwei. Dahme re diarada kahrehiong kitail en pwungki dahme sounmelkahkao ntingihedi duwen Siohwa. E nda: “I kin patohwan kapingahkin komwi omwi lemmwin kowahlap; wiepen nin limomwi kan me kapwuriamwei oh inenen mwahu mehlel. I kin wehwehki duwen met.” (Mel. 139:14) Kapikipik kan koaros me kapilpene kitail iei mehn kadehde me Koht uhdahn ketin mie!

15, 16. (a) Ia duwen neitail sawaspen Paipel kan kamwakid atail kalahnganki sapwellimen Siohwa koahiek en kapikada mehkan? (b) Mehnia oaralap kan sang sawaspen Paipel kan me ke uhdahn perenki?

¹⁵ Erein sounpar tohto, sawaspen Paipel kan me Sounkadehdehn Siohwa kan wiahda sewesehier me tohto ren kalahnganki dahme kapikipik kan kasalehda duwen atail Koht Wasa Lapalahpie. Karasepe, ekei pwuhk pwukat kin wiawihda pwehn sewese irail me rotorotkilahr padahk me dene mour pein miehla oh aramas kohsang mahn oh pil padahk likamw teikan pwe ren marainkihla padahk mehlel. Emen sister ntingla ni ohpis en Sounkadehdehn Siohwa kan nan Amerika duwen pwuhk pwukat, koasoia: “Doadoahk tohrohr en kihla pwuhk wet inenen pweida mwahu. Emen lih peki ma e kak ale pwuhk 20. Ih sounpadahk en sains men oh e men emenemen nah tohnsukuhl ko ren naineki ehu pwuhk.” Emen brother pil koasoia: “I ieiangehr doadoahk en kalohk sangete mwohn pahr 1950 oh I kereniongehr sounpar 75, ahpw nan sounpwong me se kihla Awake! tohrohr wet iei me keieu kaperen ong ie nan kalohk.”

¹⁶ Nan pahr kan me kerendo, oaralap tohto me pid kapikipikda kan pil pwarada nan neitail sawaspen Paipel kan. Oaralap pwukat kasalehda duwen soahng kapwuriamwei kan me sansalda nan kapikipik kan oh pil kasalehda ahl akan me aramas song en alasang Sounkapikada Keieu Lapalapo. Oaralap pwuko wiawihda pwehn kamwakid atail kalahnganki sapwellimen Siohwa koahiek en kapikada mehkan. Peidek kan nan oaralap pwukat sewese sounwadawado en medemedewe ire kan me e wadek. Mie pak ke doadoahngki ekei ire kan me ke perenki sang nan oaralap pwukat ahnsou me ke kohla kalohk ihmw lel ihmw, wasa me aramas kalapw pokon ie, de kalohk ahnsou sohte lipilipil?

17, 18. (a) Pahpa nohno kan, ia duwen amwail kak sewese noumwail seri kan ren kak ahneki koahiek en kawehwe dahme re kamehlele? (b) Ia duwen amwail kin doadoahngki oaralap kan me pid kapikipik kan nan amwail kaudok en peneinei?

¹⁷ Pahpa nohno kan, kumwail kin doadoahngki oaralap pwukat ong noumwail seri kan nan amwail kaudok en peneinei? Ma kumwail kin wia met, kumwail pahn sewese irail ren kalaudehla arail kalahnganki atail Koht ieiaso. Mwein mie noumwail seri me iang pwihn 9 lel 12 nan sukuhl. Irail kin ale uhwong sang irail kan me padahngki padahk likamw me dene mour pein miehla oh aramas kohsang mahn. Saintis kan, sounpadahk nan sukuhl kan, pwuhk de kasdo kan kin kangoange irail en kamehlele me padahk  wet mehlel. Kumwail kak sewese noumwail me pwulopwul kan ren pelianda padahk wet sang ni arail doadoahngki oaralap kan sang neitail Kahn Iroir kan. Oaralap pwukat kangoange me pwulopwul kan ren kakairada arail “erpit” de koahiek en madamadau. (Lep. Pad. 2:10, 11) E kin padahkihong irail ia duwen arail pahn kasawih mwahu ire kan me arail sukuhlo padapadahngki.

¹⁸ Ekei pak me pwulopwul kan kin rong soangen rohng de ripoht kapwuriamwei kan me dene saintis kan diarada tihn mahn en mahs kan me dierek nan takai pwehn kadehde me padahk me dene mour pein miehla aramas kohsang mahn kin mehlel. Sewese irail ren pein kasawih ma soangen rong de ripoht pwukat uhdahn kadehdehda me aramas kohsang mahn. Pil padahkihong irail ia duwen arail pahn sapengala dahme saintis kan nda me dene re kadehdehda nan arail wasahn doadoahk me mour kak pein miehla. Pahpa nohno kan, ma kumwail doadoahngki oaralap pwukat, kumwail kak sewese noumwail seri kan ren kamehlele me re kak sapengala irail me peidengki dahme kahrehda re kamehlele duwen Sounkapikadao.​—Wadek 1 Piter 3:15.

19. Pwais kaselel dahieu me kitail koaros ahneki?

¹⁹ Kitail kak sukuhlki laud duwen sapwellimen Siohwa irair kaselel kan ni atail wadek duwen kapikipik kan nan pwuhk kan me kitail alehdi sang sapwellime pwihn. Soangen mehn kadehde pwukat koaros kin kahrehiong kitail en men kapinga Siohwa sang mohngiongitail. (Mel. 19:1, 2) E wia pwais kaselel en patohwanohng Siohwa, Sounkapikpen mehkoaros, wahu oh kaping me e uhdahn ketin warohng sapwellimanki!​—1 Tim. 1:17.