Kaweid Mwahu me Pid Kiripw oh Pwopwoud

“I ndawohng kumwail . . . en kin wia dahme mwahu oh dahme pwung, pwe kumwail en kin papah Kaun-o ni kapehd mehlel oh unsek.”​—1 KOR. 7:35.

1, 2. Dahme kahrehda kitail anahne sukuhlki kaweid en Paipel kan me pid kiripw oh pwopwoud?

ME PID nanpwungen ohl oh lih, e kin mie soangsoangen pepehm kan duwehte peren, weikek, pwunod me kitail kin kalapw ahneki. Pwehki atail kin ahneki soangen pepehm pwukat, kitail anahne peki rehn Koht sapwellime kaweid. Mie kahrepe tohto me kitail anahnehki en ketin kaweid kitail. Karasepe, ekei Kristian kan me perenki wia kiripw ele medewe me arail peneinei kan de kompoakparail kan song en idingkihong irail en pwopwoudida. Mwein ekei men pwopwoudida ahpw sohte diarada aramas me re konehng pwoudiki. Ekei anahne kaweid duwen ar pahn kaunopada pwukoa kan en wia ohl de lih pwopwoud. Kristian kiripw kan oh pwopwoud kan pil anahne pereirailsang tiahk samin.

² Irair pwukat kak kihong de sohte kihong kitail peren. Ahpw kesempwal sang met, re pil kak kamwahwihala de kauwehla atail nanpwungmwahu rehn Koht. Wahnpoaron Pohl kihda kaweid duwen kiripw oh pwopwoud nan irelaud 7 en nah kisinlikou ong mehn Korint. E men irail kan me wadek nah kisinlikowo ren wia dahme pwung oh pousehlahte papah Koht ni mohngiongirail unsek oh sohte kedirepwki mehkot. (1 Kor. 7:35) En Pohl kaweid duwen ire kesempwal pwukat kak seweseiuk. E men me kiripw oh me pwopwoud kan ren doadoahngki mwahu arail irair pwehn papah Siohwa.

Pilipil Kesempwal Ehu me Emenemen Wiahda

3, 4. (a) Dahme kak wiawi ma en emen eh peneinei oh kompoakepah kan song en idingkihong en pwopwoudida? (b) Ia duwen en Pohl kaweid eh kak sewese kitail en ahneki madamadau pwung duwen pwopwoud?

³ Mehn Suhs kan ni mwehin wahnpoaron ko kin kamehlele me e keieu kesempwal en pwopwoudida. Rahnwet, aramas tohto pil ahneki madamadau wet. Ma emen lel uwen sounpar ehu en pwopwoud ahpw saikinte pwopwoudida, eh peneinei de kompoakepah kan ele kin pwunodkihda oh medewe me re anahne kihong kaweid duwen eh pahn pwopwoudida. Irail ele kin ndaiong me e anahne nantihong diarada eh pwoud. De re ele kin kangoangehki en pwoudikihda emen me re medewe e kak pwoudiki. Oh ekei kin koasoanehdi meh riemen en kapehsepene pwe re medewe me ira anahne pwopwoudida. Wiewia pwukat kakete imwikihla kanamenek, kansensuwed oh kauwehla nanpwungarail.

⁴ Pohl sohte kin ndaiong meteikan me re anahne pwopwoudida de wiahte kiripw. (1 Kor. 7:7) E kin itarki eh sohte eh pwoud ni eh papah Siohwa, ahpw e sohte kin kauwe irail akan me men pwopwoud. Kristian kan rahnwet ahneki pwuhng en pilada ma re anahne pwopwoudida de wiahte kiripw. Meteikan sohte anahne ndaiong irail mehnia pilipil me re anahne wiahda.

Pweida nin Duwen Kiripw Men

5, 6. Dahme kahrehda Pohl kangoange Kristian kan en wiahte kiripw?

⁵ Ahn Pohl kaweid ong mehn Korint kan kin sewese kitail en wehwehki me Kristian kiripw kan kak pweida ni arail papah Koht. (Wadek 1 Korint 7:8.) Ekei kaunen pelien lamalam en Kristian likamw kan me sohte pwopwoud kin medewe me re mwahusang irail kan me pwopwoud. Met kaidehn ahn Pohl madamadau. E kawehwehda me Kristian kiripw kan ele kak papah Koht ni ahl akan me Kristian pwopwoud kan sohte kakohng. Ia wehwehn met?

⁶ Kristian kiripw men kin kalapw kak ale pwukoa kan en papah Siohwa me emen me  pwopwoud ele sohte kak alehdi. Pohl alehdi pwukoa tohrohr ehu en wia “wahnpoaron en mehn liki kan.” (Rom 11:13) Kitail kak wadek dahme wiawihong Pohl nan pwuhken Wiewia irelaud 13 lel 20. Pohl kin iangih ekei misineri pwehn seiloakla wasahn kalohk kapw kan oh re tapihada mwomwohdiso kapw tohto. E kin dadaurete irair apwal kan nan kalohk me tohto kitail sohte pahn lelohng. (2 Kor. 11:23-27, 32, 33) Ahpw Pohl kin nantihong dadaur kahpwal pwukat pwehn katohnpadahk, oh met kihong ih peren. (1 Des. 1:2-7, 9; 2:19) Ma Pohl pwopwoud, ele e sohte pahn kak wia soahng koaros me e wia.

7. Ia duwen Sounkadehde kiripw riemen ara doadoahngki ara irair pwehn kalohki Wehio?

⁷ Kristian kiripw tohto kin isaneki arail irair en kalaudehla arail doadoahk en kalohk. Sara oh Limbania iei kiripw riemen me wia doadoahk en pioneer nan Bolivia. Ira keseula nan kahnimw ehu, wasa me kalohk sohte wiawi erein sounpar tohto. Sohte liohl wasao, oh ira nda me tohn wasao kin keieu nsenohki wadawad pwehki re sohte kin kilang TV de rong redio. Ekei kin wadewadekte nein Sounkadehdehn Siohwa kan pwuhk en mahs kan me solahr wiawihda. Kereniong ihmw koaros, ira kin tuhwong aramas akan me men sukuhlki Paipel, kahrehda ira kin pwand en kanekehla wasahn kalohko. Emen lih mah ndahng ira: “Imwio uhdahn kerendohr pwehki Sounkadehdehn Siohwa kan ar leledohr reht.” Tohn kahnimwo mwadang tepida towehda mihting kan.

8, 9. (a) Dahme kahrehda Pohl koasoia me e mwahu en papah Koht nin duwen kiripw men? (b) Ia ekei kamwahu kan en papah Siohwa nin duwen kiripw men?

⁸ E mehlel me Kristian pwopwoud kan kin pweida ni ar kalohk nan wasa kan me apwal en kalohk. Ahpw ekei pwukoa me pioneer kiripw kan kak ale pahn apwal ong Kristian kan me pwopwoud de naineki seri. Ni Pohl eh ntinglahng mwomwohdiso kan, e ese me mie doadoahk tohto ong kalohki rongamwahwo. Oh e men koaros en perenki katohnpadahk duwehte ih. Ihme kahrehda Pohl koasoia me e kin mwahu en papah Siohwa nin duwen me kiripw men.

⁹ Sister men me kin pioneer nan Amerika kawehwehda ia eh pepehm duwen eh kiripw. E koasoia me ekei kin medewe me irail me kiripw kan sohte kak ahneki peren. Ahpw e ese me en ahneki nanpwungmwahu rehn Siohwa kin wahdo peren mehlel. Mendahki kiripw wia tounmetei ehu, e kamehlele me ma emen doadoahngki eh irair ni ahl mwahu, e kak wia kisakis kaselel ehu. En wia kiripw sohte kin irehdi emen en ahneki peren. Iei ahnsou mwahu en peren. E nda: “I ese me Siohwa sohte kin ketin katohre emen sang sapwellime limpoak, mehnda ma kiripw de pwopwoud.” Ahnsouwet, sister menet kin papah Siohwa nan  sahpw ehu me anahn laud mie ong kalohki rongamwahu. Ma ke kiripw, ke kak kalaudehla omw padahkihong meteikan padahk mehlel? Ma ke kak, eri omw wia kiripw wia kisakis kesempwal ehu sang rehn Siohwa.

Kiripw kan me Men Pwopwoudida

10, 11. Ia duwen Siohwa eh kin ketin sewese irail kan me saikinte diarada emen me konehng ren pwoudiki?

¹⁰ Sounkadehdehn Siohwa men ele pahn pilada en pwopwoudida mwurin eh wia kiripw erein ahnsou ieu. Pwehki eh ese me e anahne kaweid, e kin peki rehn Siohwa en ketin sewese pwehn diarada emen me e kak pwoudikihda oh nsenamwahu.​—Wadek 1 Korint 7:36. *

¹¹ Ma ke mwahuki pwoudiki emen me kin papah Siohwa ni mohngiong unsek, eri pousehlahte kapakapkiong Siohwa duwen met. (Pil. 4:6, 7) Mehnda ma e mwomwen me ke awihkier ahnsou reirei, dehr mworusala. Siohwa ketin mwahngih dahme ke anahne, oh ma ke likih, e pahn ketin seweseiuk ken dadaur omw irair.​—Ipru 13:6.

12. Ma emen peki rehmw kumwa en pwopwoud, dahme ke anahne medemedewe mwohn omw pahn sapeng?

¹² Ia duwen ma emen me sohte ahneki nanpwungmwahu rehn Koht de emen me kaidehn Sounkadehdehn Siohwa peki rehmw kumwa en pwopwoud? Mwein ke uhdahn inengieng pwopwoudida. Ahpw ma omw pilipil sapwung, pepehm me ke pahn ahneki pahn suwedsang sangat me ke pehm ni omw kiripw. Tamataman me ke anahne pwoudikihte aramas me ke pilada en pwoudiki. Omw pilipil me ke wiahda met pahn pid erein omw mour. (1 Kor. 7:27) Dehr pwoudikihda emen pwehki omw pehm me ihte ahnsou mwahu me ke kak pwopwoudida. Ele ke pahn koluhkihla pilipil wet.​—Wadek 1 Korint 7:39. *

Kaunopada ong Pwopwoud

13-15. Soangen kahpwal dah kan me meh riemen anahne koasoiapene mwohn ara pahn pwopwoudida?

¹³ Pohl koasoia me e mwahu en papah Siohwa nin duwen kiripw men, ahpw e sohte medewe me e mwahusang irail kan me pilada en pwopwoud. Pohl men sewese pwopwoud kan, oh eh kaweid kan kin sewese irail en wehwehki dahme ren kasik mwurin ar pahn pwopwoudida oh ia duwen ar pahn wie pwopwoudte.

¹⁴ Ekei pwopwoud kan ele anahne wekidala arail madamadau duwen mouren pwopwoud. Ni ahnsou me ohl men oh lih emen kin medemedewe ira en pwopwoud, mwein ira medewe me ara limpoak uhdahn kehlail. Ira medewe me ira kelehpw me ahneki pepehm wet. Ira tepikihda ara mouren pwopwoud pepehm pwukat oh kamehlele me ira sohte pahn nsensuwedla nan ara mouren pwopwoud. Ahpw uhdahno mour sohte duwehte met. Mour sohte kak kaperen ahnsou koaros. Mehlel me ahnsoun limpoakpene kak wahdo peren. Ahpw met sohte itar en kamwahwihala kahpwal kan me pwopwoud koaros kin lelohng nan arail mouren pwopwoud.​—Wadek 1 Korint 7:28. *

¹⁵ Mwurin ar pwopwoudida, ekei pwopwoud kan kin pwuriamweikihla de nsensuwedkihla ara sohte pwungkipene mehkan me kesempwal. Karasepe, ira ele sohte kin pwungkipene ia duwen ara anahne doadoahngki neira mwohni. De mwein ira sohte pwungkipene mwadong dah me ira pahn wia, ia wasa ira pahn kousoan ie, oh pak depe ira pahn mwemweit rehn ara peneinei kan. Oh soh unsek en emenemen kak kalingeringerih meteio. Ni ahnsou me aramas riemen kin medemedewe ira en pwopwoud, ira kak medewe me ira sohte anahne koasoiapene duwen ire kesempwal pwukat. Ahpw ma ira sohte kin koasoiapene, ire pwukat kak kahrehiong ira kahpwal mwuhr. Eri, e mwahu me ira en koasoiapene duwen ire pwukat mwohn ara pahn pwopwoudida.

16. Dahme kahrehda pwopwoud ehu anahne pwungkipene ia duwen ara pahn kamwahwihala kahpwal kan?

 ¹⁶ Ehu pwopwoud anahne pwungkipene ia duwen ara kin apwalih ara pwukoa kan pwehn ahneki peren nan ara mouren pwopwoud. Ira anahne pwungkipene ia duwen ara pahn kaiahne neira seri kan. Oh ni ara pahpa oh nohno kan arail pahn mahla, ira anahne pwungkipene ia duwen ara pahn apwalih irail. Peneinei koaros ahneki kahpwal kan. Ahpw pwopwoud ehu en dehr mweidohng kahpwal pwukat en katohreirapeseng. Kaweid en Paipel pahn sewese ira en kamwahwihala kahpwal kan, dadaurete kahpwal kan me ira sohte kak mwadang kamwahwihala, oh perenki mihmihpene.​—1 Kor. 7:10, 11.

17. Dahme kahrehda pwopwoud kan kin “pwunodki kedirepw kan en sampah wet”?

¹⁷ Pohl kalaudehla eh kawehwe duwen mouren pwopwoud nan 1 Korint 7:32, 33. (Wadek.) Pwopwoud kin “pwunodki kedirepw kan en sampah wet.” Mepwukat duwehte mwenge, likou, ihmw, oh mehkan me re anahne. Dahme kahrehda pwopwoud kin “pwunodki kedirepw kan en sampah wet”? Karasepe, emen brother kiripw mwein kin doadoahngki eh ahnsou laud oh kehl ong kalohk. Ahpw mwurin eh pwopwoudida, e anahne doadoahngki ekei eh ahnsou ong kalohk oh kehl ong apwalih eh pwoud. Pil duwehte lih pwopwoud men ong eh pwoud. Siohwa ketin mwahngih me ohl pwopwoud men oh lih pwopwoud men mwahuki eh pwoud en peren. E ketin mwahngih me pwopwoudo ele sohte ahneki uwen ahnsou oh kehl ong ara papah ih duwehte ni ara kiripw. Met ira ele anahne doadoahngki ekei ahnsou oh kehl pwe ira en kakehlaka ara pwopwoud.

18. Wekidekla dah kan me pwopwoud ehu mwein anahne wia duwen ara doadoahngki ahnsoun mwadong?

¹⁸ Ahpw ia duwen ahnsou me pwopwoudo kin doadoahngki ong mwadong oh wiewia teikan ni ara kiripw? Ma pwopwoud ehu anahne kihsang ekei ahnsou oh kehl ong ara papah Siohwa pwe ira en kakehlaka ara pwopwoud, ira anahne wia duwehte ong ahnsou oh kehl me ira doadoahngki ong mwadong ni ara kiripw. Ma ohl pwopwoud  men kin doadoahngki uwen ahnsou ong mwadong rehn kompoakepah kan me e kin wia mwohn eh pwopwoudida, ia pahn en eh pwoudo pepehm? De ia pahn pepehm en ohl pwopwoudo ma eh pwoudo kin doadoahngki uwen ahnsou ong wiewia kan rehn kompoakepah kan me e kin wia mwohn eh pwopwoudida? Mwein ira koaros pahn sangat, nsensuwed oh sohte poakpene. Pwe ira en soikala met, pwopwoud ehu anahne wia soahng koaros me ira kak pwe ira en kakehlaka ara pwopwoud.​—Ep. 5:31.

Siohwa Ketin Kupwurki Atail Wiewia kan en Mwakelekel

19, 20. (a) Dahme kahrehda pwopwoud kan anahne pereirailsang tiahk samin? (b) Keper dah me pwopwoud kan kakete lelohng ma ira tohrohrpeseng ahnsou reirei?

¹⁹ Sapwellimen Siohwa ladu kan kin wia soahng koaros me re kak pwe ren mwakelekel ni arail wiewia. Ekei pilada en pwopwoud pwe ren liksang tiahk samin. Ahpw en pwopwoudida sohte kin itar en perehsang tiahk samin. Pwopwoud ehu pil anahne kanahieng ara wiewia kan en mwakelekel. Mahs, kehl kehlail oh ile kin pidakih kahnimw ehu. Ma emen mi nan kahnimwo, e sohte pahn mi nan keper. Ahpw ma e mi likin kehlo e pahn keper pwehki mie lipirap oh mwersuwed kan. Mehkan me Siohwa ketin irehdi ong pwopwoud duwehte kehl kehlail me pidakih kahnimw ehu. Pwopwoud kak pitsang tiahk samin ihte ma ira peikiong kosonned kan oh mehkan me Siohwa ketin irehdi ong pwopwoud.

²⁰ Pohl kawehwehda mehkan me irairdi nan 1 Korint 7:2-5. Lih pwopwoudo kelehpw ahneki pwuhng en wia nsenen pwopwoud ong eh pwoudo. Oh pil duwehte ohl pwopwoudo. Koht ketin mahsanih me emenemen ira anahne kapwaiada eh “pwukoa” de wia nsenen pwopwoud me pwopwoud kan kin ahneki pwuhng en wia. Ma pwopwoud kan kohpeseng erein ahnsou reirei, re sohte kak kapwaiada “pwukoa” wet. Ekei ohl oh lih pwopwoud kan kin mwemweit wasa tohrohr de ar ahnsoun mwemweit wekpeseng. Meteikan kin kohkohlahsang eh pwoudo ahnsou reirei pwehki ar doadoahk. Sehdan kak isaneki soangen irair pwukat pwehn kauwehla pwopwoud kan. Ma ohl men oh eh pwoudo sohte nsenohki ara anahn en wia nsenen pwopwoud, emen rehra kakete lelohng kasongosong en dipen kamwahl. Siohwa pahn ketin kapaiada tapwin peneinei kan me kin apwalih mwahu ar peneinei oh sohte kahrehiong ara pwopwoud nan keper.​—Mel. 37:25.

Peikiong Kaweid en Paipel

21. (a) Dahme kahrehda e apwal en wiahda pilipil kan duwen kiripw oh pwopwoud? (b) Ia duwen kaweid kan nan 1 Korint irelaud 7 ar kak sewese kitail?

²¹ E uhdahn apwal en wiahda pilipil kan me pid duwen kiripw oh pwopwoud. Sohte lipilipil ma ke pilada wia kiripw men de pwopwoudida, e pahn mie kahpwal kan pwehki kitail koaros soh unsek. Oh mendahki Siohwa ketin kapaiada sapwellime aramas akan, ekei pak re pahn mworuskihla mehkan me wiawihong irail. Ahpw kaweid mwahu me Pohl kihda nan 1 Korint irelaud 7 kak seweseiuk ken soikala kahpwal tohto me kitail koasoiapenehr. Mehnda ma kitail kiripw de pwopwoud, kitail kak kaperenda Siohwa. (Wadek 1 Korint 7:37, 38. *) Kapai me keieu kaselel nan atail mour iei Koht en ketin kupwurkin kitail. E kak ketin kupwurkin kitail met oh pil ahnsou kohkohdo ni atail pahn mour nan sampah kapw me Koht ketin inoukidahr. Eri, ohl oh lih kan sohte pahn ahneki kahpwal kan me re ahneki rahnwet.

[Nting tikitik kan me mi pah]

Ke Kak Sapeng?

• Dahme kahrehda kitail en dehr idingkihong me kiripw men en pwopwoudida?

• Ia duwen sapwellimen Siohwa ladu kiripw men eh kak doadoahngki eh irair ni ahl me keieu mwahu?

• Ia duwen meh riemen ara kak doadoahngki ahnsou me ira kin medemedewe ira en pwopwoud pwehn kaunopada ong ekei kahpwal kan me pid pwopwoud?

• Dahme kahrehda pwopwoud kan anahne pereirailsang tiahk samin?

[Peidek en Onop]

[Kilel nan pali 16]

Me kiripw kan me kin kalaudehla arail ahnsou ong papah Koht kin peren

[Kilel nan pali 18]

Wekidekla dah kan ekei ele anahne wia mwurin ar pwopwoudida?