Me Mehlel me Pid Duwen Nanleng

IA UWEN kaselel koapworopwor en kohdahla nanleng! Mehn Muslim kan, Hindu kan, Buddhist kan, ekei Kristian akan oh pil tohto irail me sohte arail pelian lamalam kin kamehlele koapworopwor en mour mwurin mehla. Aramas kin kalapw medewe me nanleng kin wia wasa ehu me kaselel oh kaperen me aramas pahn pitsang lokolok oh pwurehng tuhwong kompoakparail me melahr akan. Ahpw pali laud en aramas sohte men mehla mendahki re men kohdahla nanleng. Dahme kahrehda?

Ma kitail wiawihda pwehn mehla oh kohdahla nanleng, aramas tohto sou pahn kin kasikasik en mehla duwehte ni ahn seri men eh kin kasik en laudla de pil duwehte me pwulopwul men eh kin kasik en pwopwoudida? Ahpw pali laud en aramas sohte men mehla.

Mendahki met, kaunen lamalam kan kin padahngki me mwurin atail kin momour ahnsoukis pohn sampah, nanleng iei wasa me kitail uhdahn pahn mour ie. Karasepe, emen kaun en lamalam nan kahnimw en Washington me adaneki Theodore Edgar Cardinal McCarrick koasoia: “Kitail sohte wiawihda pwehn mour pohn sampah, ahpw kitail wiawihda pwehn mour nanleng.” Pil emen kaun en lamalam mahs nan Amerika koasoia: “Kahrepen mour iei en kapinga Koht oh kohdahla nanleng . . . pwehki nanleng iei atail wasa.”

Irail me kin kamehlele mour nanleng mwurin mehla sohte ahneki mehn kadehde itar ong arail pwoson. George Barna, emen kaunen pesines me kin wia roporop ong madamadau en pelian lamalam kan diarada me aramas tohto kin alehda “madamadau duwen mouren ahnsou wet oh mour mwurin mehla sang kasdo kan, keseng oh pwuhk kan.” Pil emen kaunen lamalam, nan Florida koasoia: “Kitail sohte ese mehkot duwen nanleng, ihte me kitail ese iei me Koht ketiket nanleng.”

Ahpw, nanleng kin wia ire kesempwal ehu nan Paipel. Ia duwen Mahsen en Koht eh kin kawehwehda duwen nanleng? Aramas wiawihda pwehn mour nanleng? Ma aramas pahn kohdahla nanleng, dahme re pahn wia wasao?

[Blurb nan pali 3]

Dahme kahrehda me tohto men kohdahla nanleng ahpw sohte me men mehla?