Ni sounkalohk kan ar tohtohla, riatail Kristian kan anahne pwuhk tohto. Brother kan nan Pedel en Brooklyn kin wiahda makasihn kan, ahpw re kin doadoahngkihte kompani teikan pwehn wiahda kilin pwuhk kan. Eri, erein sounpwong tohto, kompanio sohte kak wiahda pwuhk me itar pwe ren doadoahngki nan kalohk. Eri, Brother Rutherford idek rehn Robert Martin, me kin pwukoahki wasahn wiahda pwuhko, ma e medewe ma irail pahn kak pein wiahda neirail pwuhk kan.

Brother Martin koasoia: “Pilahn mwahu ehu met, pwehki met wehwehki me se anahne wiahda wasahn wiahda pwuhk kapw ehu.” Brother ko rend wasa ehu ni 18 Concord Street nan Brooklyn oh alehda misihn oh kepwe kan me anahn.

Ahpw kaidehn koaros perenki pilahn kapwo. President en ehu kompani ko me kin iang wiahda nait pwuhk kohdo ni at wasahn wiahda pwuhk kapwo. E nda: “Kumwail alehdahr noumwail kepwehn doadoahk uhdahn mwahu kan pwehn wiahda pwuhk kan, ahpw sohte emen rehmwail ese doadoahngki. Erein sounpwong weneute, kumwail pahn kauwehla noumwail kepwehn doadoahk kan koaros.”

Brother Martin koasoia: “E mwomwen me met mehlel, ahpw se ese me Siohwa pahn ketin sewesei kiht, oh ihme e ketin wia.” Dahme Brother Martin ndao pwung. Sohte pwand, wasahn wiahda pwuhk kapwo kin wiahda pwuhk 2,000 nan rahn ehu.

Patehng wiahda pein neirail pwuhk kan, sapwellimen Siohwa aramas akan tepida doadoahngki wiepe kapw ehu en lohkipeseng rongamwahwo. Re doadoahngki redio. Mwurin souwas en Rahn Sarawi, February 26, 1922 iei ehdin Brother Rutherford wia kapahrek nan redio. E  wia kapahreko “Me Rar Rar Kei me Momour Ahnsou Wet Sohte Pahn Mehla” nan redio station KOG nan Los Angeles, California, Wehin Amerika.

Aramas 25,000 me rong prokramo. Ekei irail kadarala kisinlikou kan pwehn kalahnganki padahko eh wiawi nan redio. Ehu kisinlikou ko kohsang Willard Ashford, me kin mi Santa Ana, California. E kalahngankihong Brother Rutherford padahk “mwahu oh kapereno.” E koasoia: “Nan imweio, mie aramas soumwahu silimen me sohte kak pedoisang nan ihmwo. Eri mehnda ma ke wia padahko wasa me uhdahn karanih kiht, se sohte kak kohwei oh rong.”

Pil mie padahk kan nan redio me kohda nan wihk en mwuri ko. Ni imwin pahr 1922, The Watch Tower kasalehda me “aramas meh 300,000 iang rong padahko nan redio.”

Tohnsukuhl en Paipel ko alehdi kangoang laud sang kisinlikou ko kahrehda re koasoanehdi en kauwada redio station ehu nan sapwarailo pohn Staten Island, me sohte nohn dohsang Pedel en Brooklyn. Sounpar kan mwurin mwo, Tohnsukuhl en Paipel kan kin doadoahngki redio stationo pwehn lohkipeseng rongamwahu en Wehio.

The Watch Tower en June 15, 1922, pakairki me mihting tohrohr ehu pahn wiawi nan Cedar Point, Ohio. E pahn tepisang September 5 lel 13, 1922. Tohnsukuhl en Paipel ko uhdahn peren ni arail lella wasao.

Nan ahn Brother Rutherford tepin padahko, e koasoia: “I uhdahn kamehlele me Kauno pahn . . . ketin kapaiahda mihting tohrohr wet oh pahn tehk mwahu me doadoahk en kalohko pahn wiawi laudsang mahso.” Irail me wia padahk kan nan mihting tohrohro kin pwurupwurehng kangoange koaros en iang kalohk.

Nialem, September 8, mwein aramas 8,000 pedolong nan wasahn mihting tohrohro oh kasikasik en rong padahk ehu sang Brother Rutherford. Irail kasik me e pahn kawehwehda wehwehn “ADV” me mi nan neirail doaropwehn luhk ko. Ni arail mwohndi, ekei mwein kilang weliwel en kilel  laud ehu me langalang wasahn padahko. Arthur Claus kohsang Tulsa, Oklahoma, Wehin Amerika pwehn iang mihting tohrohro. E diar wasa en mwohd ie pwehn kak rong mwahu padahko. Met uhdahn apwal pwehki ni ahnsowo sohte microphone de speaker pwehn kalaudehla ngilen padahk kan.

Eri, pwe emen en dehr kedirepwehla padahko, chairmano pakairki me irail kan me pwand sohte pahn pedolong wasao erein Brother Rutherford eh padahko. Kulok 9:30 ni menseng, Brother Rutherford tepida koasoia sapwellimen Sises mahsen ko nan Madiu 4:17: “Wehin nanleng kerendohr.” Ni eh koasoia ia duwen aramas akan ar pahn rong duwen Wehi wet, e koasoia: “Pein Sises mahsanih me erein ahnsoun eh ketiero, e pahn ketikihpene sapwellime me mehlel oh loalopwoat kan.”

Brother Claus me mwomwohd wasao, koasoia: “Se uhdahn rongorong kanahieng padahko.” Ahpw ni soh kasikpe, kapehdeo soansuwedda oh anahne pedoisang wasao. Arthur pedoisang wasao, mendahki e ese me e sohte kak pwurehng pedolong erein Brother Rutherford eh padahko.

Mwurin minit kei, e mwahula. E koasoia me ni eh pwurupwurala, e rongada aramas ko ar wie lopwolopw. E uhdahn men ese dahme wiawi! E medewehda me e pahn rong kaimwiseklahn padahko mehnda ma e doudahla pohn kadoken ihmwo. Brother Claus me sounpar 23 ahnsowo, diarada wasa me e kak doudahla poweo. Wenihmwtok kan en kadoken ihmwo wie langalang, oh ni eh kerenlahng, e kak “uhdahn rong mwahu padahko.”

Ahpw kaidehn Arthur kelehpw me mi pohn ihmwo. Ekei kompoakepah kan pil iang. Emen irail, Frank Johnson, tangala reh oh idek, “Mie noumw kisin naip?”

Arthur nda, “Ei mie.”

Frank nda, “Se wie kapakapki me mie emen me naineki kisin naip. Ke kilang weliwel en sain  lapalao? E pirapiriong mete kat. Rong kanahieng Sounkopwungo. a Ahnsou me e pahn nda, ‘oh kumwail en pakairki, pakairki,’ lopukala sahl pahieu ka.”

Eri, Arthur kol naipo oh iangih meteikan awih iahd me re pahn lopuk sahl ko. Brother Rutherford lel wasa kesempwal en eh padahko. Ni peren oh ngoang, Brother Rutherford kereniong werki: “Kumwail en wia sounkadehde mehlel oh lelepek kei ong Kauno. Kumwail nantihlahte nan amwail pei lao Papilon lapalap kasohrala douluhl. Kalohki rohngo wasa koaros. Sampah wet anahne ese me Siohwa iei Koht oh me Sises Krais iei Nanmwarki en nanmwarki kan oh Kaun en kaun akan. Met wia ahnsou keieu kesempwal ehu nan poadopoad. Kilang, Nanmwarkio kaundahr! Kumwail iei sapwellime sounkadehde kan. Eri, pakairki, pakairki, pakairki duwen Nanmwarkio oh sapwellime Wehi!”

Arthur koasoia me ih oh brother teiko lopuk sahl ko oh saino weliweldihla pah. Pwehn pahrekiong mesen nting ko “ADV,” saino nda: “Pakairki Duwen Nanmwarkio oh Wehio.” (Advertise the King and Kingdom) Mesen nting ko “ADV” iei kamwotpen lokaiahn waio ‘advertise,’ me wehwehki en “kalohk” de “kadehde.”

Mihting tohrohro nan Cedar Point sewese Kristian ko en medemedewehte doadoahk kesempwal en kalohki Wehio, oh irail kan me inengieng wia doadoahk wet kin uhdahn perenki. Emen pioneer sang Oklahoma, Wehin Amerika, ntingihedi, “Se kalohk wasa ehu me aramas tohto kin doadoahk nan wasahn weir takai toantoal kan, oh tohtohn irail uhdahn semwehmwe.” E koasoia me ni aramas akan ar kin kalapw rong rongamwahwo nan makasihno Golden Age, “irail kin tepida sengiseng.” E koasoia: “Se uhdahn peren pwehki se kak kansenamwahwihirailla.”

Tohnsukuhl en Paipel pwukat ese uwen karuwaru en mahsen en Sises ko nan Luk 10:2: “Rahket me laud, ahpw tohndoadoahk kan me malaulau.” Ni pahro eh imwisekla, arail ngoang en pakairki rongamwahu en Wehio wasa koaros uhdahn laudla sang mwoweo.