Paul: Se uhdahn peren! Ahnsowo iei November 1985, oh se kohkohlahng Liberia, Palikapi en Africa wasa me se pahn tepida papah nin duwen misineri. Se uhdi nan Senegal. Anna koasoia: “Awahte ehu luhwe pwe sen lella Liberia!” Mwuri se rong pakair ehu: “Koaros me kohkohla Liberia anahne doudihsang nan sompihro. Aramas kei song en kalowehdi koperment en wasao, ihme kahrehda se sohte kak lella Liberia.” Erein rahn eisek, se mihmi rehn misineri kei nan Senegal oh rong nuhs me aramas tohtohie wie kamakamala oh me koperment en wasao sohte mweidohng aramas en kohkohsang ni imwarail kan ni soutik, pwe ma soh kopermento pahn kemeirailla.

Anne: Kiht aramas kei me kin uhdahn kanaiehng dahme se wia. Sangete ahnsou me I tikitik, I kin uhdahn kanaiehng dahme I kin wia, oh aramas kan kin ekerkin ie ahd ehu pwehki I kin kalapw masepwehk. I pil kin uhdahn salohki kote ahl! Ahpw se men kohlahte Liberia mendahki e kakete keper.

Paul: Ngehi oh Anne tikida ehute wasa, palikapi en England. At pahpa nohno kan kin ahnsou koaros kangoangehki sen wiahla pioneer, eri se tepida pioneer mwurinte sukuhl. Re uhdahn perenki me se men doadoahngki pali laud en ahnsou ong papah Siohwa. Ni ei sounpar 19, I alehdi luhk en kohla Pedel oh Anne iang ie mwurin at pwopwoudla nan 1982.

Anne: Se perenki Pedel, ahpw se kin men papah wasa me mie anahn laud. Se kin doadoahk rehn riat Kristian kan nan Pedel me wia misineri mahso, oh arail mehn kahlemeng mwahu kahrehiong kiht sen pil men wiahla misineri. Ni soutik koaros erein sounpar siluh, se kapakapkihong Siohwa at ineng en men wiahla misineri. Oh nan 1985, se uhdahn perenda ni at alehdi luhk en iang sukuhl en Kilead nempe 79! Se alehdi pwukoa en papah nan Liberia, Palikapi en Aperika.

Paul: Se iang tepin sompihr me pahn kohla Liberia. Aramas ako uhdahn masepwehk oh saikinte mweimwei en kohkohsang imwarail ko ni soutik. Re uhdahn masepwehkada me kahrehda ni ahnsou me sidohsa ehu mwadangete katairongada, irail koaros kin wer oh tang! Pwe sen meleileidi, se kin wadekpene pwuhken Melkahka nipwong koaros.  Mendahki irair apwal nan sahpwo, se uhdahn perenki at pwukoa. Anne kin kohla kalohk rahn koaros, oh I kin mi nan Pedel iang Sohn Charuk doadoahk. a I sukuhlki soahng tohto sang reh pwehki e mi Liberia ahnsou werei oh e uhdahn ese irair en Kristian kan wasao.

Anne: Dahme kahrehda se mwadangete perenki at pwukoa nan Liberia? Pwehki riat Kristian kan. Re kasalehiong kiht limpoak laud oh re kin lelepek. Se uhdahn karanihala irail oh re wiahla at peneinei. Re kin kihong kiht kaweid tohto oh kangoange kiht. Kalohk wasao uhdahn kaperen. Aramas ako sohte perenki ma se mwadang kohkohla! Aramas ako kin koasoakoasoia duwen Paipel wasa koaros. E mengei ong kiht en iang irail koasoi. E uhdahn tohto nait tohnsukuhl en Paipel me kahrehda e apwal en onop rehrail koaros. Ahnsou kaperen ehu met!

Paul: Erein sounpar pahieu, irair en sahpwo meleilei. Ahpw nan 1989, mahwen laud ehu tepida wiawi, soahng koaros mwadangete wekila, oh se mihmi nan pwungen mahweno. Ni July 2, 1990, irail ko me men kalowehdi kopermento kaunda wasao me karanih Pedel. Erein sounpwong siluh, se solahr kak koasoiong emen likin sahpwo, pil at peneinei de poasen kaun. Wasao mie tiahk lemei oh pingiping wasa koaros, apwal en mwenge oh angkehlail wiawihong lih tohto. Irair kansensuwedo pousehla wiawi erein sounpar 14 oh kohpeseng nan sahpwo.

Anne: Ekei keinek peiong oh kemekemehla keinek teikan. Wasa koaros pohn ahl akan mie sounpei. Mie neirail kesik tohto, arail likou ko ehusoahng, oh re kin doulong nan ehuehu ihmw oh ale dahme re mwahuki. Ong ekei irail, kemehla aramas duwehte kemehla malek. Sounpei ko kin perehla ahlo oh kalapw kemehla aramas akan me men kotehla wasao. Mwurin mwo, re kin kaposokehda paliwar ko. Met pil kin wiawi limwahnte Pedel. Sounkadehde lelepek kan kamakamala, iangahki misineri riemen.

Ni ahnsou me sounpei ko kin diar aramas me kohsang keinek me re kailongki, re kin kemeirailla. Riatail brother kan kin tounmeteikihla arail mour pwehn doarehla oh karukehla riatail kan. Misineri oh tohn Pedel kan pil wia duwehte. Nan Pedel, ekei sounkadehde ko me tang meir pah oh ekei mi reht nan at pere ko powe. Peneinei ehu iang mi nan at perehu, irail meh isimen.

Paul: Ehuehu rahn, sounpei ko kin song pedolong nan Pedel pwehn kilang ma mie me se karukehla. Aramas pahmen me wia sounsilasil: riemen sang ehu wenihmwtok ah riemen kin kohla ni kehl me mi likio. Ma meh riemeno me mi ni kehlo kihla pehra ko mwohra, soahng koaros mwahu. Ahpw ma ira kihla  pere ko mwurira, e wehwehki me sounpei ko uhdahn lingeringer, eri me kilikilang sang ni wenihmwtoko pahn tangala oh mwadang karukehla riat ko.

Anne: Ehu rahno, brother ko sohte kak kauhdi pwihnen sounpei lingeringer ko en dehr doulong. I loakehdi ngehi oh sister men nan imwen kaineno, wasa me mie cabinet ehu oh mie kisin wasa kis nan cabineto. Ih wasao me sister ko rukala ie. Sounpei ko doudahla powe oh wa neirail kesik. Re lingeringer oh pakere aht wenihmwo. Paul song en kauhdi irail en dehr pedolong oh nda, “Ahi pwoudo doadoahngki imwen kainen.” Ni ahnsou me I ritingedi wasa me sistero wie rukuruk ieo, wasao katairongda. Eri I anahne kapwurehla soahng koaros pohn danao oh met anahne ahnsou. I kamehlele me sounpei ko pahn medewe dahme I wiewia, eri I masepwehkada oh paliwerei pwon rerrer. I ese me I anahne meleileidi mwohn I ritingada wenihmwo. Dahme I wia? I kapakap ong Siohwa oh peki sapwellime sawas. Eri I ritingada wenihmwo oh ni meleilei rahnmwahwih irail. Emen irail sikeniehla oh alu kolahng cabineto, ritingada oh kamwakid seli soahng koaros pohn danao. E sohte kamehlele me sohte mehkot e diar. Ih oh ienge ko pil kohla rapahki nan pere teiko. Ahpw re sohte pil diar mehkot.

Paul: Sounpwong kei, mwenge uhdahn tikitikla. E kin kalapw sohte me se pahn kang nimenseng, ahpw at iren rahn en nimenseng nan Pedel kin duwehte mwengehn nimenseng. Kiht koaros ese me wadawad oh onopki Paipel pahn kihong kiht kehl en dadaur ehuehu rahn.

Se ese me ma se pahn kohla ale mwenge de pihl, se solahr pahn kak pere irail ko me se karkaruke, oh re pahn kakete kamakamala. Siohwa kin kalapw ketikihong kiht dahme se anahne ni ahnsou me konehng oh ni ahl kapwuriamwei. Siohwa kin ketin apwalih mwahu oh sewese kiht en meleileite.

Irair en sahpwo kin susuwedla oh mwomwen sohla koapworopwor, ahpw padahk mehlel kin kihong kiht koaros koapworopwor. Pali tohtohn irail anahne tang pak tohto pwehn doarehla arail mour ahpw re kolokolete arail pwoson kehlail oh ahnekihte meleilei mendahki kahpwal pwukat. Ekei irail nda me en dadaurete mendahki kahpwal pwukat kin “kaunopirailda ong kahn kamakam kowahlapo.” Ni eimah, elder kan oh brother pwulopwul kan kin wia soahng koaros me re kak pwehn sewese riarail Kristian kan. Riatail kan me kin tangala ekei wasa kin sewese emenemen, oh irail kin tepida kalohk wasa ko. Re kin doadoahngki dahme re diar nanwelo pwehn wiahda Wasahn Kaudok oh wia arail mihting kan. Nan ahnsou apwal ko, en iang towehda mihting oh kalohk ong meteikan kihong riatail ko koapworopwor oh uhdahn kangoange irail. Ni ahnsou me se kihpeseng mwenge, likou oh soahng teikan, pali laud en riat ko idek kopwou en kalohk ah kaidehn likou. Met uhdahn kangoange kiht. Aramas tohto me kilangehr oh lelohngehr kahpwal tohto nan mahweno men rong duwen rongamwahwo. Irail uhdahn pwuriamweikihla uwen Sounkadehde kan ar peren oh ahneki  koapworopwor. Irail duwehte marain ehu nan rotorot. (Mad. 5:​14-16) Pwehki re uhdahn ngoang, pil ekei sounpei lemei ko wiahla riat Kristian kei.

Paul: Ekei pak se anahne kohkohsang Liberia. Pak siluh se anahne kohkohla erein ahnsou kis, oh pak riau se kohkohla erein sounpar ehu pwon. Emen misineri kawehwehda mwahu at pepehm ni ahnsou me se pahn kohkohlao: “Nan Kilead, irail padahkihong kiht en poakohng riat Kristian ko oh at pwukoau ni mohngiong unsek, oh ih met me se wia. Ni ahnsou me se anahne kohkohsang riat ko nan irair apwalo, se uhdahn mworusala oh e duwehte emen eh kauwehla mohngiongit!” Ahpw se uhdahn perenki me se kakete wia soahng tohto pwehn utung riat Kristian ko oh wia doadoahko nan Liberia sang ni sahpw keren wasa me se mihieu.

Anne: Nan May 1996, kiht meh pahmen dake weren Pedel sidohsa oh wa doaropwe kesempwal tohto me pid doadoahko nan Liberia. Se men tangala wasa me sohte keper apali sahpwo, me dohki mwail 10. Ahnsowohte mahwen tepida. Sounpei lingeringer ko kaskih nan wehwe, kauhdi kiht, waikiei kiht meh silimeno, oh tangahki sidohsao iangahki Paul. Se uhdahn pwuriamweila. Sohte pwand, se kilang Paul alialu kohdo reht oh moangeo nta. Nin tapio, se leme me e kesikdi, ahpw soh, pwehki e sohte pahn kak alialu! Emen sounpei ko me wokiedi ni eh sikeniei sang nan sidohsao. Paiamwahu ohlao tikitik.

Mie weren sounpei sidohsa ehu karanih kiht me aramas kei mi loale oh re kereniong kohkohla. Se pilada en iangada, ahpw pwehki sohte wasa loale, se anahne kesihnen kol mwurio. Uhdahn sohte mehkot me se kak koledi. Me diraipo mwadangete tang oh se kereniong pwupwuiei. Se peki en uhdi ahpw e nohn masak en wia met. Se wia uwen at kak en dehr pwupwusang, ni at lella wasa me se kohkohlahngo, se uhdahn pwangada oh paliwarat ka rerrerki at masepwehk.

Paul: Se kilang me at likou ko samin oh ohla, oh se pwuriamweiki me se momourte. Mie elikopder limwaht me diren lipwen leht oh mwomwen pahn mwerpesengehr. Se pahn dake kohla Sierra Leone rahno mwuri. Eri se meirte limwah. Mwurin at lella Sierra Leone, se uhdahn kalahnganki at mourla ahpw se uhdahn pwunodki riat Kristian ko nan Liberia.

Anne: Se lella Pedel nan Freetown, Sierra Leone, wasa me brother ko apwalih kiht mwahu. Ahpw mehkot wiawi me I sohte kasik. I kin mwadangete tamanda soahng suwed ko me wiawi nan Liberia. Rahn koaros, I kin masak me mehkot suwed pahn wiawi oh I sohte kin kak madamadau mwahu. Soahng koaros mwomwen sohte mehlel. Nipwong, I kin kalapw pwourda rerrer oh masak me mehkot suwed pahn wiawi. E kin apwal ong ien esingek. Paul kin koliehdi oh iang ie kapakap. Se kin koulki koulen Wehio lao I meleileidi. I pehm me I pahn ahneki soumwahu laud pwehki dahme wiawi oh I kakete sohla papah nin duwen misineri men.

I sohte pahn manokehla dahme wiawi mwuri. Nan wihkohte, se alehdi makasihn riau. Ehu Awake! en June 8, 1996. Artikelo “Coping With Panic Attacks” mi loale. Met I wehwehkihda dahme kahrehda I ahneki pepehm ko. Keriauo iei The Watchtower en May 15, 1996, artikelo “Where Do They Get Their Strength?” mi loale. Nan makasihno, mie kilel en lipahrourou ehu me eh pehnpihro ohla. Artikelo kawehwehda me duwehte lipahrourou men eh kak pousehlahte mwenge oh pihr mendahki eh pehnpihro ohla, sang ni sapwellimen Siohwa manaman, kitail kak pousehlahte sewese meteikan mendahki soahng suwed kan me wiawi nan atail mour. Sang artikel pwukat, Siohwa ketikihda dahme I anahne ni ahnsou me konehng. (Mad. 24:45) I kin rapahki artikel me duwehte met oh kin kihkihpene. E kin uhdahn sewese ie laud. Mwurin ahnsou kis, I solahr pwunod duwehte me I kin wia mwoweo.

Paul: Ahnsou koaros me se pahn kin pwurala Liberia, se kin uhdahn peren. Imwin pahr 2004, se wia at pwukoau kereniong sounpar 20. Mahwen sohla wiawi. Mie koasoandi en wiahda ihmw nan ohpiso. Ahpw se mwadangete ale pwukoa kapw ehu.

Met uhdahn apwal ong kiht. Se uhdahn poakepoakehla riat Kristian kan nan Liberia. Irail duwehla at peneinei oh se sohte men kohkohsang irail. Ahpw  se kilangehr mwoweo ia duwen Siohwa eh ketin sewesei kiht ni ahnsou me se kohkohsang at peneinei ko kohkohla Kilead, eri se alehda pwukoa kapwo. Se pekederla Ghana, sahpw ehu me keren.

Anne: Se uhdahn sengiseng ni ahnsou me se kohkohsang Liberia. Se uhdahn pwuriamweikihla ni Frank, elder loalokong men eh ndaiong kiht: “Kumwa anahne manokeikihtla!” Ih eri kawehwehda: “Se ese me kumwa sohte pahn manokeikihtla, ahpw kumwa anahne poakohng riomwa Kristian ko nan Ghana sang mohngiongomwa unsek. Met sang rehn Siohwa, eri apwalih mwahu riomwa Kristian ko wasao.” Dahme brothero koasoia sewesei kiht en kaunopada en wiahda kompoakepaht kan nan sahpwo wasa me ekeite esei kiht oh soahng koaros kapw ong kiht.

Paul: Se uhdahn mwadangete poakohngala riat Kristian ko nan Ghana. Tohto Sounkadehde wasao! Se sukuhlki soahng tohto duwen loalopwoat oh pwoson kehlail sang kompoakepaht ko. Mwurin at papahki nan Ghana erein sounpar 13, se alehdi rohng kapwuriamwei ehu. Se alehdi pwukoa en papah nan ohpis en Palimesehn Aperika nan Kenya. Ei mehlel, se uhdahn loaloidki riat ko nan Ghana oh Liberia, ahpw se mwadangete kompoakepahnkihla riat kan nan Kenya. Oh duwehte nan Ghana oh Liberia, doadoahk en kalohk pil uhdahn anahn nan Kenya.

Anne: Nan ahi mour, I lelohng irair kan me uhdahn apwal, oh I kin uhdahn masepwehk. Ni ahnsou me se mi wasa keper oh ahnsou apwal kan, e kak kahrehiong kiht en masepwehk oh soumwahuda. Se sohte kasik me Siohwa pahn ketin perei kiht sang soahng pwukat. Pil rahnwet, ni ahnsou me I kin rong ngilen kesik kan, I kin pehm men mwus oh I solahr kin kak pehm pehi ka. Ahpw I sukuhlki en likih sawas koaros me Siohwa kin ketikihda pwehn kakehlaka kiht iangahki sawas sang riat Kristian kan. Oh I kilangehr me ni atail kin pousehlahte onop, kapakap, iang towehda mihting kan oh kalohk, Siohwa kak ketin sewese kitail en mihmihte nan atail pwukoau.

Paul: Ekei pak aramas kin idek reht, “Kumwa perenki amwa pwukoahn?” Sahpw kan kin kaselel, ahpw re pil kak keper. Eri, dahme se keieu poakohng laudsang sahpwo? Riat Kristian ko. Mendahki se kohsang soangsoangen wasa, at madamadau oh pepehm duwen Siohwa duwepenehte. Se medewe me se kohlahn kakehla irail, ahpw ni mehlelo irail me kakehlaka kiht.

Atail peneinei nan sampah pwon wia kisakis ehu sang rehn Siohwa! Mie atail peneinei wasa koaros! Erein atail wia kisehn mwomwohdiso ehu, mie atail peneinei oh kitail kak nsenamwahu oh sohte perki mehkot. Se uhdahn kamehlele me ma kitail pousehlahte likih Siohwa, e pahn ketikihong kitail kehl en dadaur sohte lipilipil dahme wiawi.—Pil. 4:13.