IREN ONOP 21
KOUL 107 Sapwellimen Koht Mehn Kahlemeng en Limpoak
Ia Duwen Omw Kak Diar Omw Pwoud Mwahu
“Lih pwopwoud me keieu koahiek men, kesempwalsang takai kesempwal akan; ahpw ia duwen eh nohn apwal en diar emen me duwehte met.”—LEP. PAD. 31:10.
DAHME KITAIL PAHN SUKUHLKI
Kitail pahn koasoiapene kaweid kan en Paipel me kak sewese emen en diar eh pwoud mwahu, oh ia duwen meteikan nan mwomwohdiso ar kak sewese me kiripw kan me men pwopwoud.
1-2. (a) Dahme Kristian kiripw kan anahne medewe kanahieng mwohn arail tepida date? (b) Ia wehwehn en “date”? (Menlau kilang “Wehwehn Lepin Lokaia kan.”)
KE MEN pwopwoud? Ele en pwopwoudida kaidehn ihme keieu kesempwal pwehn wahdo peren, ahpw me kiripw tohto, sohte lipilipil ma pwulopwul de mah, kin men pwopwoudida. Ei mehlel, mwohn omw tepida date, ke anahne ahneki nanpwungmwahu kehlail rehn Siohwa, ahneki koahiek en madamadau, oh mie noumw mwohni pwehn kak apwalih pwukoa kan nan mouren pwopwoud. a (1 Kor. 7:36) Ma ke wia soahng pwukat, omw mouren pwopwoud pahn nsenamwahu.
2 Ahpw e sohte kin ahnsou koaros mengei en diar omw pwoud mwahu. (Lep. Pad. 31:10) Oh ni omw pil diar emen me ke men esehla mwahu, ele e sohte mengei en tepida date. b Nan iren onop wet, kitail pahn koasoiapene dahme kak sewese Kristian kiripw kan pwehn diar arail pwoud mwahu oh tepida date. Kitail pahn pil sukuhlki ia duwen meteikan nan mwomwohdiso ar kak sewese irail kan me men pwopwoud.
DAHME KAK SEWESEIUK EN DIAR OMW PWOUD MWAHU
3. Soahng dah kan me Kristian kiripw men anahne medemedewe ni eh rapahki emen me e men pwoudiki?
3 Ma ke men pwopwoudida, e pahn keieu mwahu en ese soangen irair dah kan me ke mwahuki rehn me ke men pwoudikio mwohn amwa tepida date. c Pwe ma soh, ele ke kak soikala emen me kakete wia omw pwoud mwahu, de tepida date emen me sohte pahn mwahu ong uhk. Mehlel, sohte lipilipil ihs me ke men pwoudiki, e anahne papidaislahr. (1 Kor. 7:39) Ahpw kaidehn me papidais koaros me pahn kak wia omw pwoud mwahu. Eri, pein idek rehmw: ‘Dahme I kin akadeiong nan ei mour? Soangen irair dah kan me I medewe kesempwal rehn emen me I men pwoudiki? I kin toupahrek ong dahme I kasik?’
4. Dahme ekei kin kapakapki ni arail rapahki arail pwoud mwahu?
4 Ma ke men pwopwoudida, ele ke kin kapakapki duwen met. (Pil. 4:6) Mehlel, Siohwa sohte ketin inoukihda en ketikihong emen eh pwoud. Ahpw e ketin nsenohki omw pepehm oh anahn kan, oh e kak ketin seweseiuk erein omw rapahki omw pwoud mwahu. Eri pousehlahte padahkihong ih omw pepehm oh ineng kan. (Mel. 62:8) Kapakapki kanengamah oh erpit. (Seims 1:5) John, d brother kiripw men sang Wehin Amerika, koasoia dahme e kin kapakapki: “I kin padahkihong Siohwa soangen irair dah kan me I pahn mwahuki rehn emen me I men pwoudiki. I kin kapakapki me I pahn tuhwong emen me I kak pwoudiki. I pil kin peki rehn Siohwa en sewese ie kakairada irair kaselel kan me pahn sewese ie en wia ohl pwopwoud mwahu.” Tanya, emen sister sang Sri Lanka, koasoia: “Ni ei kin rapahki ei pwoud mwahu, I pil kin peki rehn Siohwa en ketin sewese ie en lelepekte ong ih oh en pil peren.” Mehnda ma ke sohte mwadang diar emen me pahn wia omw pwoud mwahu, Siohwa ketin inoukihda en pousehlahte apwalihekin iuk omw anahn akan.—Mel. 55:22.
5. Iahd me Kristian kiripw kan kak tuhwong me kiripw teikan me kin poakohng Siohwa? (1 Korint 15:58) (Pil kilang kilel.)
5 Paipel kangoange kitail en kin “pwerisekiong wia soahng tohto nan doadoahk en Kauno.” (Wadek 1 Korint 15:58.) Ma ke kin soupisengki omw papah Siohwa oh patehng riomw Kristian tohto, omw werekiong irail pahn kangoange iuk oh pahn mie ahnsou mwahu en tuhwong me kiripw teikan me kin nsenohkihte arail papah Siohwa duwehte kowe. Oh ni omw kin wia uwen omw kak koaros en kaperenda Siohwa, ke pahn ahneki peren mehlel.
Ma ke kin soupisengki omw papah Siohwa oh patehng riatail Kristian tohto, ele ke kak tuhwong meteikan me men pwopwoud (Menlau kilang parakrap 5)
6. Ni arail kin rapahki arail pwoud mwahu, dahme Kristian kiripw kan anahne tamataman?
6 Ahpw ke anahne kanahieng pwe omw rapahki omw pwoud mwahu en dehr wiahla mehkot keieu kesempwal ong uhk. (Pil. 1:10) Nsenamwahu mehlel sohte kin poahsoankihda ma ke pwopwoud de kiripw, ahpw e kin poahsoankihda omw nanpwungmwahu rehn Siohwa. (Mad. 5:3) Oh ni omw kiripw, ele ke ahneki saledek laud en kalaudehla omw doadoahk en kalohk. (1 Kor. 7:32, 33) Doadoahngki mwahu ahnsowo. Jessica, sister men sang Wehin Amerika me pwopwoudla ni eh kereniong sounpar 40, koasoia, “I kin soupisengkihte ei doadoahk en kalohk, oh met sewese ie en peren mendahki I men pwopwoud.”
AHNSOU ANAHN PWEHN ESEHDA MWAHU MWOMWEN EMEN
7. Dahme kahrehda e wia elen loalokong en kihong ahnsou en esehda mwahu mwomwen emen mwohn omw ndaiong ih omw pepehm? (Lepin Padahk 13:16)
7 Ia duwen ma ke medewe me mie emen me kakete wia omw pwoud mwahu? Ke pahn mwadangete ndaiong ih omw pepehm? Paipel mahsanih me aramas loalokong men kin esehda mwahu soahng kan mwohn eh mwekid. (Wadek Lepin Padahk 13:16.) Eri mwohn omw ndaiong emen omw pepehm, e pahn wia elen loalokong en wiahda ahnsou pwehn esehda mwahu mwomwen eh tiahk oh wiewia. Aschwin sang Netherlands koasoia: “Pepehm kak mwadang pwarada ahpw pil kin mwadang sohrala. Eri ni omw kin kihong ahnsou en esehda mwahu mwomwen emen, ke sohte pahn tepidahte date ih pwehki dahme ke pehm.” Patehng met, ele ke pahn esehda me mwein aramaso sohte pahn wia omw pwoud mwahu.
8. Ia duwen me kiripw men eh kak esehda mwahu mwomwen emen? (Pil kilang kilel.)
8 Ia duwen omw kak esehda mwahu mwomwen emen ni ahl me sohte nohn sansal? Ni mihting kan de ni ahnsoun patehng meteikan mwemweit, ele ke tehkada soahng kei duwen ahn aramaso nanpwungmwahu rehn Siohwa, mwomwen ih, de eh tiahk kan. Ihs me e kin kompoakepahnki, oh dahme e kin mwahuki koasoia? (Luk 6:45) Eh mehn akadei kan duwehte ahmw? Ke kak idek rehn elder kan nan eh mwomwohdisou de rehn Kristian koahiek teikan me uhdahn ese ih. (Lep. Pad. 20:18) Ke kak idekda duwen soangen aramas dah ih de duwen eh irair kan. (Rud 2:11) Ni omw kin tehkada mwahu mwomwen emen, tehk kanahieng me ken dehr kahrehiong en soansuwedkihda. Wauneki eh pepehm, dehr kin ahnsou koaros mihmiseli wasa me e kin mi ie de nantihong en diarada soahng koaros duwen ih.
Mwohn omw padahkihong emen me ke men esehla ih, kihong ahnsou en tehkada mwomwen ih ni ahl me sohte nohn sansal (Menlau kilang parakrap 7-8)
9. Mwohn omw pahn koasoiong emen me ke medewe pahn wia omw pwoud mwahu, dahme ke anahne kamehlele?
9 Ia uwen werei me ke anahne esehla mwahu duwen emen mwohn omw ndaiong ih omw pepehm? Ma ke mwadang ndaiong ih omw pepehm, ele e pahn medewe me ke sohte kin medewe mwahu soahng kan mwohn omw wiahda omw pilipil. (Lep. Pad. 29:20) Ma aramaso esehda me ke men esehla ih, ahpw ke awih ahnsou werei pwehn ndaiong omw pepehm, eri e kakete medewe me ke kin pweiek en wiahda omw pilipil. (Ekl. 11:4) Tamataman me mwohn omw pahn koasoiong emen, ke sohte anahne pilada me ke pahn pwoudiki. Ahpw ke anahne uhdahn kamehlele me ke kakehr pwopwoud oh me e kakete wia omw pwoud mwahu men.
10. Dahme ke pahn wia ma ke esehda me mie emen me men eseiukala ahpw ke sohte men kumwa en date?
10 Ahpw ia duwen ma ke esehda me mie emen me men eseiukala? Ma ke sohte men esehla ih, song en kasalehda met ni sansal sang omw wiewia kan. E sohte pahn wia mwekid kadek ehu ma ke kahrehiong aramaso en medewe me kumwa kakete tepida date ma met sohte pahn wiawi.—1 Kor. 10:24; Ep. 4:25.
11. Ma kowe me pahn koasoanehdi meh riemen en date de pwopwoudida, soahng dah kan me ke anahne medemedewe kanahieng?
11 Nan ekei sahpw, aramas akan kin kasik me pahpa nohno kan de aramas laud teikan me pahn pilada ahn me kiripw kan nan peneinei ar pwoud. Nan pil ekei sahpw, tohn peneinei de kompoakparail kan kin rapahkihong me kiripw men eh pwoud mwahu oh eri koasoanehdi me ohlo oh liho en tuhpene pwehn kilang ma ira men tepida date. Ma kowe me re peki en koasoanehdi meh riemen en date de pwopwoudida, medemedewe dahme ohlo oh liho kin mwahuki oh anahne. Ma ke medewe me mie emen me kak wiahla ahn kompoakepahmwo de kisehmwo pwoud mwahu, eri esehla mwahu aramaso, eh irair kan, oh keieu kesempwal, ma e ahneki nanpwungmwahu keren rehn Siohwa. Nanpwungmwahu keren rehn Siohwa kin uhdahn kesempwal sang mwohni, sukuhl laud, de pwukoa me aramaso ahneki. Ahpw tamataman me brother oh sister kiripwo iei me pahn keieu pilada ma ira men pwopwoudla.—Kal. 6:5.
IA DUWEN OMW KAK TEPIDA DATE
12. Ma ke men tepida date emen, ia duwen omw kak padahkihong ih?
12 Ma ke men tepida date emen, ia duwen omw kak padahkihong ih? e Ke kak koasoanehdi en koasoiong aramaso sohte lipilipil ma mwohn aramas teikan de nan delepwohn. Kasalehda ni sansal me ke mwahuki oh men esehla ih. (1 Kor. 14:9) Ma anahn, mweidohng aramaso ahnsou en medewe mahs ia duwen eh pahn sapeng. (Lep. Pad. 15:28) Oh ma e sohte men kumwa en esehla emenemen de date, ke anahne wauneki eh pepehm.
13. Dahme ke kak wia ma emen padahkihong uhk me e men eseiukala? (Kolose 4:6)
13 Ia duwen ma emen men eseiukala? Ele e anahne eimah laud pwehn ndaiong uhk eh pepehm, eri ke anahne kasalehda kadek oh wauneki ih. (Wadek Kolose 4:6.) Ma ke anahne ahnsou pwehn medewe mwahu ma kumwa pahn date de soh, ndaiong. Ahpw song en padahkihong ih ahnsou mwadang ma kak. (Lep. Pad. 13:12) Ma ke sohte men esehla ih, kasalehda met ni kadek oh ni sansal. Tehk dahme Hans, brother men sang Austria, koasoiahki ahnsou me emen sister men koasoiong ih. E koasoia: “I padahkihong ih ei pilipilo ni kadek oh ni sansal. I pil mwadang en wia met pwehki I sohte men en medewe me ehu rahn se kakete date. Pwehki met, I pil kin kanahieng dahme I nda de wia pwe en dehr medewe me I pahn wekidala ei madamadau mwuhr.” Ahpw, ma ke pil men esehla ih, padahkihong ih, oh eri koasoiapene dahme ke kasik pahn wiawi erein amwa pahn date. Dahme ke kasik ele pahn weksang dahme e kasik, mwein pwehki mwomwen amwa tikida de kahrepe teikan.
IA DUWEN METEIKAN AR KAK SEWESE KRISTIAN KIRIPW KAN?
14. Ia duwen atail kak sewese Kristian kiripw kan sang ni atail lokaia?
14 Ia duwen kitail koaros kak sewese Kristian kiripw kan me men pwopwoudida? Ehu me kitail kak wia iei en kanahieng dahme kitail kin nda. (Ep. 4:29) Kitail kak pein idek rehtail: ‘I kin kapailoke irail kan me men pwopwoudida? Ni ei kin kilang brother kiripw men oh sister kiripw men ara koasokoasoipene, I kin medewe me ira mwahuki emenemen?’ (1 Tim. 5:13) Patehng met, kitail en dehr kahrehiong Kristian kiripw kan en pehm me mie mehkot sapwung rehrail de re sohte kesempwal pwehki re sohte pwopwoud. Hans, me kitail koasoiapene mwoweo, koasoia: “Ekei brother kin nda, ‘Ke seu pwopwoudida? Ke solahr pwulopwul.’ Soangen koasoi pwukat kin kahrehiong me kiripw kan en medewe me sohte me kesempwalkin irail oh kin kalaudehla kasongosong en pwopwoudida.” E pahn mwahu en kin rapahki ahnsou en kapinga Kristian kiripw kan!—1 Des. 5:11.
15. (a) Mwohn atail sewese emen me men diarada eh pwoud, dahme kitail anahne medewe kanahieng? (Rom 15:2) (b) Ire kesempwal dah kan me ke sukuhlkihsang kisin kasdou? (Pil kilang kilel.)
15 Ia duwen ma kitail medewe me mie brother men oh sister men me pahn kakete wiahla pwopwoud mwahu ehu? Paipel padahkihong kitail en kin medewe mwahu pepehm en meteikan. (Wadek Rom 15:2.) Me kiripw tohto sohte men emen en pilada ong irail ihs me irail en pwoudiki, eri kitail anahne wauneki dahme irail mwahuki. (2 Des. 3:11) Ekei ele men kitail en sewese irail, ahpw kitail en awih lao re peki atail sawas. f (Lep. Pad. 3:27) Ekei sohte men meteikan en kahreirailla rehn emen pwehn tuhwong. Lydia, sister kiripw men sang Sehmen, koasoia: “Ke kak luke brothero oh sistero en iang pwihn ehu. Eri wiahda ahnsou me brothero oh sistero kak tuhpene oh mweidohng ira en pein pilada dahme ira men wia.”
En iang pokon ehu kak wiahda ahnsou mwahu ong Kristian kiripw kan en tuhpene (Menlau kilang parakrap 15)
16. Dahme Kristian kiripw kan anahne tamataman?
16 Kitail koaros—kiripw de pwopwoud—kak ahneki mour peren oh nsenamwahu! (Mel. 128:1) Eri ma ke men pwopwoud ahpw saikinte diar emen me ke men pwoudiki, medemedewehte omw kin papah Siohwa. Sister men sang Macao me adaneki Sin Yi koasoia: “Ma ke kapahrekihpene ahnsou me ke kak mi rehn omw pwoudo nan Paradais oh ahnsou me ke kiripw, ahnsou me ke kiripw wia ahnsou mwotomwot ehu. Eri kesempwalki ahnsoun omw kiripw oh doadoahngki mwahu.” Ahpw ia duwen ma ke diarehr emen me ke men pwoudiki oh kumwa tepidahr date? Nan iren onop en mwuhr, kitail pahn koasoiapene ia duwen omw kak pweida ni omw pahn date.
KOUL 137 Lih Lelepek kan, Sister Kristian kan
a Pwehn esehda ma ke kakehr pwopwoud de soh, menlau kilang artikelo “Dating—Part 1: Am I Ready to Date?” nan jw.org.
b WEHWEHN LEPIN LOKAIA KAN: Nan iren onop wet oh iren onop en mwuhr, lepin lokaiao “date” kin dokedoke ahnsou me ohl emen oh lih emen kin esehla mwahu emenemen pwehn esehda ma ira pahn kak wia ohl oh lih pwopwoud mwahu. Date kin tepida ahnsou me ohl emen oh lih emen kasalehda ni sansal me ira men esehla mwahu emenemen, oh pahn doulahte date lao ira koasoanehdi ma ira pahn pwopwoudida de uhdi date.
c Pwehn mengei, nan parakrap kan mwurin met, kitail pahn nda me me pahn wia pwoud mwahwo iei brother men. Kaweid pwukat pil kak kadoadoahk ong sister kan.
d Ekei ahd kan me pwarada wasaht kaidehn uhdahn adarail.
e Nan ekei tiahk, brothero me kin tepin kohla oh koasoiong sistero pwehn tepida date. Ahpw, sister men pil kak tepin kohla koasoiong brother men. (Rud 3:1-13) Pwehn kalaudehla omw ese duwen met, menlau kilang artikelo “Young People Ask . . . How Can I Tell Him How I Feel?” nan Awake! en October 22, 2004.
f Menlau kilang kisin kasdou Successful Fighters for the Faith—Single Christians nan jw.org.
