IREN ONOP 26
KOUL 123 Ni Loalopwoat Uhpah Sapwellimen Koht Koasoandi
Aktikitik oh Pohnese Dahme Ke Sohte Ese
“Sapwellimen Koht manaman me lapalahpie kahrehda kitail sohte kak kerenlahng.”—SOHP 37:23.
DAHME KITAIL PAHN SUKUHLKI
Mehnda ma kitail sohte ese soahng koaros me pahn wiawi, kitail kak dadaur pahn kahpwal kan ni atail medewe dahme kitail ese oh likih Siohwa.
1. Soangen koahiek dah me Siohwa ketikihong kitail, oh dahme kahrehda?
SIOHWA ketin kapikkitailda pwehn ahneki koahiek en madamadau, sukuhlki soahng kapw kan, oh ese ia duwen atail kak doadoahngki dahme kitail sukuhlki. Dahme kahrehda e ketin kapikkitailda ni ahl wet? E kupwurki kitail en “diar loalokong me pid duwen Koht” oh doadoahngki atail koahiek en madamadau pwehn papah ih.—Lep. Pad. 2:1-5, NW; Rom 12:1.
2. (a) Dahme kitail anahne wehwehki duwen pein kitail? (Sohp 37:23, 24) (Pil kilang kilel.) (b) Ia duwen atail paiekihda ni atail pohnese me kitail sohte ese soahng koaros?
2 Mendahki kitail ahneki koahiek en sukuhlki soahng tohto, miehte soahng kan me kitail sohte ese. (Wadek Sohp 37:23, 24.) Medewehla duwen Sohp. Siohwa ketin keinemwe rehn Sohp peidek tohto me sewese ih en wehwehki me miehte soahng kan me e sohte ese. Met sewese Sohp en ese me e anahne aktikitik oh wekidala eh madamadau. (Sohp 42:3-6) Kitail pil kak paiekihda ni atail pohnese me kitail sohte ese soahng koaros. Soangen aktikitik wet kin kamwakid kitail en likih me Siohwa pahn ahnsou koaros ketin padahkihong kitail dahme kitail uhdahn anahne ese pwe kitail en kak wiahda pilipil mwahu kan.—Lep. Pad. 2:6.
Duwehte Sohp, kitail kak paiekihda ni atail pohnese dahme kitail sohte ese (Menlau kilang parakrap 2)
3. Dahme kitail pahn koasoiapene nan iren onop wet?
3 Nan iren onop wet, kitail pahn koasoiapene soahng kan me kitail sohte ese oh kahpwal dah kan me kitail kakete lelohng pwehki met. Kitail pahn pil sukuhlki dahme kahrehda eh mwahu me kitail sohte ese soahng kei. Atail koasoiapene ire pwukat pahn kakehlakahda atail likih me Siohwa, “me sapwellimanki kupwurokong unsek,” kin ketin padahkihong kitail dahme kitail uhdahn anahne ese.—Sohp 37:16, NW.
KITAIL SOHTE ESE IAHD ME IMWIO PAHN LELEDO
4. Nin duwen me Madiu 24:36 mahsanih, dahme kitail sohte ese?
4 Wadek Madiu 24:36. Kitail sohte ese iahd me imwin koasoandi en mwehi wet pahn leledo. Pil Sises, erein eh ketiket nin sampah, sohte mwahngih duwen “rahno oh awao.” a Mwuhr, Sises ketin padahkihong wahnpoaron ko me Siohwa iei me ketin sapwellimanki pwuhng en koasoanehdi iahd me soahng kan pahn wiawi. (Wiewia 1:6, 7) Siohwa ketin koasoanedier imwin koasoandi en mwehi wet, ahpw kitail sohte uhdahn ese iahd.
5. Dahme kitail kakete lelohng pwehki atail sohte ese iahd me imwio pahn leledo?
5 Kitail sohte ese ia uwen werei me kitail pahn awih lao imwio leledo. Imwilahn met, kitail kakete sohla ahneki kanengamah de mworusala, ahpw mehlel ma kitail kin awiawihkier rahnen Siohwa ahnsou werei. De e kakete apwal en dadaur ni tohn atail peneinei kan de meteikan ar kauwe kitail. (2 Pit. 3:3, 4) Kitail kakete medewe me ma kitail ese rahn me imwio pahn leledo, e pahn mengei ong kitail en awih oh sohte mworusala mehnda ma meteikan kauwe kitail.
6. Dahme kahrehda e mwahu me kitail sohte ese iahd me imwio pahn leledo?
6 Pwehki Siohwa sohte ketin padahkihong kitail ahnsou me imwio pahn leledo, kitail ahneki ahnsou mwahu en kasalehda me kitail kin papah ih pwehki kitail poakohng oh likih. Kitail men papah Siohwa kohkohlahte, kaidehnte lao imwio leledo. Pwe kitail en dehr nohn medewe iahd me “rahnen Siohwa” pahn leledo, e pahn mwahu kitail en medewe duwen soahng mwahu kan me pahn wiawi mwurin rahno eh leledo. Met pahn kalaudehla atail karanih Siohwa, likih, oh wia soahng koaros me kitail kak pwehn kaperenda ih.—2 Pit. 3:11, 12.
7. Dahme kitail ese?
7 Kitail en medemedewehte dahme kitail ese me iei imwin rahn akan tepida nan pahr 1914. Nan Paipel, Siohwa ketikihong kitail kokohp kan me kadehdehda me imwin rahn akan pahn tepida nan pahr 1914. E pil ketin padahkihong kitail oaritik tohto duwen ia pahn irair en sampah mwurin pahro. Pwehki met, kitail kamehlele me “rahn lapalap en KAUN-O kerendohr.” (Sep. 1:14) Kitail pil ese me doadoahk me Siohwa ketin kupwurki kitail en wia iei en padahkihong me tohto duwen “rongamwahu en Wehio” ni uwen me kitail kak. (Mad. 24:14) Rohng wet lohkselier nan sahpw mpen 240 oh ni lokaia daulih kid. Kitail sohte anahne ese “rahno oh awao” pwe kitail en uhdahn ngoangki doadoahk kesempwal wet.
KITAIL SOHTE ESE IA DUWEN SIOHWA EH PAHN KETIN MWEKID
8. Dahme “wiepen nin limen Koht” kin dokedoke? (Eklesiasdes 11:5)
8 Kitail sohte kin ahnsou koaros ese “wiepen nin limen Koht.” (Wadek Eklesiasdes 11:5.) Met kin dokedoke dahme Siohwa ketin kahrehiong de mweidohng en wiawi pwehn kapwaiada kupwure. Kitail sohte kak uhdahn ese dahme kahrehda Siohwa ketin mweidohng mehkot ehu en wiawi de dahme e pahn ketin wia pwehn sewese kitail. (Mel. 37:5) Kitail sohte uhdahn wehwehki soahng pwukat duwehte atail sohte wehwehki ia duwen seri men eh kin kekeirda nan kapehden eh nohno, mehkot me saintis kan pil sohte uhdahn wehwehki.
9. Pwehki kitail sohte ese ia duwen Siohwa eh pahn ketin mwekid, soangen kahpwal dah kan me kitail kakete lelohng?
9 Atail sohte ese ia duwen Siohwa eh pahn ketin sewese kitail kakete kahrehiong kitail en pweiek en wiahda pilipil kan. Kitail kakete pweiek en wiahda tounmetei kan pwehn kalaudehla atail doadoahk en kalohk de kohla wasa ehu me mie anahn laud ong sounkalohki Wehio kan. De kitail kakete medewe me Siohwa sohte ketin kupwurki atail kin song en kalaudehla atail papah ih, ahpw sohte lel atail mehn akadei kan.De kitail sohte kin kilang imwila mwahu en atail doadoahk laud nan kalohk, oh kitail kin doadoahk laud nan sapwellimen Siohwa pwihn ahpw mie atail kahpwal kan.
10. Irair kesempwal dah kan me kitail kak kakairada pwehki kitail sohte uhdahn ese dahme Siohwa pahn ketin wia?
10 Atail sohte ese ia duwen Siohwa eh pahn ketin mwekid pahn sewese kitail en kakairada irair kesempwal kan me duwehte aktikitik. Met sewese kitail en wehwehki me sapwellimen Siohwa madamadau oh ahl kan ileilehsang atail. (Ais. 55:8, 9) Kitail pil sukuhlki en kin uhdahn likih me Siohwa pahn ketin apwalihala soahng koaros. Siohwa me ketin warohng ale kaping ni atail kilang imwila mwahu kan nan doadoahk en kalohk de doadoahk en kauwada de apwalih Wasahn Kaudok. (Mel. 127:1; 1 Kor. 3:7) Ma ekei soahng kan wiawi ni atail sohte kasik, kitail anahne tamataman me Siohwa ketin mwahngih mehkoaros. (Ais. 26:12) Kitail kin wia uwen atail kak oh pousehlahte likih me Siohwa pahn ahnsou koaros ketin sewese kitail. Kitail kamehlele me e pahn ketikihong kitail kaweid me kitail anahne, mehnda ma e sohte wia met ni ahl kapwuriamwei duwehte me e kin ketin wia mahso.—Wiewia 16:6-10.
11. Dahme kitail ese me kak sewese kitail?
11 Kitail ese me Siohwa kin ahnsou koaros ketin limpoak, mehlel, oh erpit. Kitail ese me e uhdahn ketin kesempwalki dahme kitail kin wiahiong ih oh riatail Kristian kan. Oh kitail ese me Siohwa kin ahnsou koaros ketin katingih irail kan me kin loalopwoatohng.—Ipru 11:6.
KITAIL SOHTE ESE DAHME PAHN WIAWI LAKAPW
12. Nin duwen me Seims 4:13, 14 mahsanih, dahme kitail sohte ese?
12 Wadek Seims 4:13, 14. Kitail sohte ese dahme pahn wiawihong kitail lakapw. Nan koasoandi en mwehi wet, kitail kin lelohng “paisuwed.” (Ekl. 9:11) Pwehki met, kitail sohte ese ma atail koasoandi kan pahn pweida de ma kitail pahn momourte pwehn kapwaiada.
13. Ia atail pepehm ekei pak pwehki kitail sohte ese soahng koaros me pahn wiawi ni ahnsou kohkohdo?
13 Ele e pahn apwal ong kitail en dadaur pwehki kitail sohte uhdahn ese dahme pahn wiawi ni ahnsou kohkohdo. Ia duwen? Kitail kak pwunodki dahme kakete wiawi, oh met kak kihsang atail peren. Atail mour kak wekila ni soh kasikpe, de soahng suwed kan kak mwadangete wiawi, oh met pahn kakete kahrehiong kitail en uhdahn nsensuwedla oh mworusala. De kitail kak mworusala ni soahng me kitail kasik eh sohte wiawi.—Lep. Pad. 13:12.
14. Pwehn ahneki nsenamwahu mehlel, dahme kitail anahne ese oh wia? (Pil kilang kilel kan.)
14 Sohte lipilipil dahme kakete wiawi nan atail mour, kitail kak kadehdehda me kitail kin papah Siohwa pwehki kitail poakohng ih. Koasoipen Paipel kan kasalehda me kitail en dehr kasik me Siohwa pahn ketin perekitailsang soahng suwed koaros oh me e sohte ketin koasoanedier dahme pahn wiawi nan atail mour. E ketin mwahngih me atail nsenamwahu sohte kin poahsoankihda atail ese dahme pahn wiawihong kitail ni ahnsou kohkohdo. Ahpw, met kin poahsoankihda atail rapahki sapwellime kaweid oh peikiong ih. (Ser. 10:23) Sang ni atail peki sapwellime sawas ni atail wiahda pilipil kan, e mwomwen me kitail koasoia: “Ma Siohwa ketin kupwurki, kitail pahn momour oh wiahda met de mwo.”—Seims 4:15.
Atail rapahki sapwellimen Siohwa kaweid oh peikiong ih kin pere kitail (Menlau kilang parakrap 14-15) b
15. Dahme kitail ese duwen ahnsou kohkohdo?
15 Kitail sohte ese dahme pahn wiawi ehuehu rahn ahpw kitail ese me Siohwa ketin inoukihong kitail mour soutuk—mehnda ma nanleng de nin sampah. Kitail ese me e sohte kak ketin likamw oh me sohte mehkot kak kauhdihsang en kapwaiada sapwellime inou kan koaros. (Taitus 1:2) Ih kelehpw kak ketin kohpada dahme pahn wiawi mwuhr, oh soahng kan me saikinte wiawi. Soahng koaros me e ketin kohpada nan Paipel pweida, oh soahng koaros me e ketin kohpada ong ni ahnsou kohkohdo pahn pil pweida. (Ais. 46:10) Kitail ese me sohte mehkot kak kauhdi sapwellimen Siohwa limpoak ong kitail. (Rom 8:35-39) E pahn ketikihong kitail erpit, nsenamwahu, oh kehl me kitail anahne pwehn dadaur pahn soahng koaros. Kitail kak kamehlele me Siohwa pahn ketin sewese oh kapaia kitail.—Ser. 17:7, 8.
KITAIL SOHTE KAK UHDAHN WEHWEHKI IA UWEN SIOHWA EH KETIN MWAHNGIH KITAIL
16. Nin duwen me Melkahka 139:1-6 mahsanih, dahme Siohwa ketin mwahngih duwen kitail me kitail sohte uhdahn wehwehki?
16 Wadek Melkahka 139:1-6. Sounkapikpatailo ketin mwahngih soahng koaros duwen kitail. E kin ketin mwahngih atail madamadau oh pepehm. E ketin mwahngih dahme kitail kin nda oh dahme mi nan atail mohngiong. E pil kin ketin mwahngih soahng koaros me kitail kin wia oh dahme kahrehda. Nanmwarki Depit koasoia me Siohwa kin ahnsou koaros ketin onopada oh kak ketin sewese kitail. Ia omw pepehm ni omw ese me Koht Wasa Lapalahpie, me Keieu Manaman oh me ketin kapikada soahng koaros, kin uhdahn ketin nsenohkin uhk? Depit koasoia: “Omwi wehwehkin ie me inenen laud mehlel; me apwal ong ie mehlel I en dehdehki.”—Mel. 139:6.
17. Dahme kakete kahrehiong kitail en apwalki kamehlele me Siohwa uhdahn ketin mwahngih kitail?
17 Mwein pwehki soahng kan me wiawi nan atail peneinei, tiahk, de dahme kitail kin kamehlele mahso, ele e apwal ong kitail en kilangwohng Siohwa duwehte Sahm limpoak men me kin ketin nsenohki kitail. De ele kitail pehm me sapwung kan me kitail wiahda mahso uhdahn suwed me kahrehda Siohwa sohte ketin kupwurki mwahngih duwen kitail oh ketin dohsang kitail. Ekei pak, Depit pil kin ahneki soangen pepehm pwukat. (Mel. 38:18, 21) De mwein emen me kin nanti laud en wekidala eh mour pwehn kaperenda Koht, kakete medewe, ‘Ma Koht uhdahn mwahngih ie, dahme kahrehda e ketin kasik ien soikala mour ehu me apwal ong ie en soikala?’
18. Ia duwen atail kin paiekihda atail kamehlele me Siohwa uhdahn ketin mwahngih kitail laudsang pein kitail? (Pil kilang kilel kan.)
18 Kitail kak sukuhlki oh kamehlele me Siohwa uhdahn ketin mwahngih kitail laudsang pein kitail oh me e kak ketin mwahngih soahng mwahu kan rehtail me kitail sohte kak kilang. E kin ketin mwahngih atail sapwung, ahpw e mwahngih soangen aramas dah me kitail men wia, oh ketin poakohng kitail. (Rom 7:15) Ni atail ese me Siohwa kin ahnsou koaros ketin mwahngih soangen aramas dah me kitail kak wiahla, met kin kihong kitail kehl me kitail anahne pwehn papah ni lelepek oh peren.
Siohwa kin ketin sewese kitail en dadaur pahn kahpwal kan oh kakehlaka atail pwoson sapwellime inou kaselel kan (Menlau kilang parakrap 18-19) c
19. Dahme kitail kamehlele duwen Siohwa?
19 Kitail ese me Siohwa kin ketin limpoak. Kitail sohte kin peikasalki met. (1 Sohn 4:8) Kitail ese me sapwellime koasoandi pwung kan kin poahsoankihda eh poakohng kitail oh me e ahnsou koaros kupwurki kitail en nsenamwahu. Kitail ese me Siohwa kupwurki kitail en alehdi mour soutuk. E ketikihda pweinen pweipwei sapahlo pwe met en kak wiawi. Kisakis wet kamehlelehiong kitail me mendahki kitail kin wiahda sapwung kan, kitail kak papah Siohwa ni ahl me e ketin kupwurki. (Rom 7:24, 25) Oh kitail ese me “Koht lapalapasang mohngiongitail oh ketin mwahngih mehkoaros.” (1 Sohn 3:19, 20) Siohwa ketin mwahngih soahng koaros duwen kitail, oh e ketin likih me kitail kak pweida ni atail wia kupwure.
20. Dahme pahn sewese kitail en dehr nohn pwunodki dahme kitail sohte ese?
20 Siohwa kin ketin padahkihong kitail soahng koaros me kitail uhdahn anahne ese. Eri kitail sohte anahne pwunodki dahme kitail sohte ese. Ahpw, kitail kak medemedewehte dahme uhdahn kesempwal. Ni atail wia met, kitail kin kasalehda me kitail aktikitik oh uhdahn likih Siohwa, “me ketin mwahngih mehkoaros.” (Sohp 36:4, NW) Mendahki atail sohte wehwehki ekei soahng kan ahnsou wet, kitail ese me Siohwa pahn ketin pousehlahte padahkihong kitail soahng kapw kan kohkohlahte. Oh kitail kin kasikasik pwehki kitail sohte pahn uhdihsang sukuhlki soahng kapw kan duwen atail Koht lapalapo.—Ekl. 3:11.
KOUL 104 Kisakis en Sapwellimen Koht Manaman
a Sises pahn tiengla mwowe oh mahweniong en Sehdan sampah suwed wet, eri kitail kak nda me ni ahnsou wet e mwahngih iahd me Armakedon pahn wiawi oh ahnsou me e pahn “kalowehdi eh imwintihti kan.”—Kaud. 6:2; 19:11-16.
