Peidek kan Sang Sounwadawad kan
Ihs “lih” me Aiseia 60:1 kasalehda, oh ia duwen liho eh pahn “uhda” oh “kihpeseng marain”?
Aiseia 60:1 (NW) mahsanih: “Lih, uhda, kihpeseng marain, pwe omw marain leledohr. Lingan en Siohwa dakeruhkadahr.” Ire teikan kasalehda me ‘liho’ iei Saion de Serusalem me wia kahnimw en Suda ahnsowo. a (Ais. 60:14; 62:1, 2) Serusalem iei me wia poasen kaun en wehin Israel pwon. Mie peidek riau me kitail pahn sapengala me pid iren Paipel wet: Keieu, iahd oh ia duwen Serusalem eh “uhda” oh kihpeseng marain? Keriau, ia duwen dahme Aiseia koasoia eh pweida nan atail ahnsou ni ahl me laudsang mahso?
Iahd oh ia duwen Serusalem eh “uhda” oh kihpeseng marain? Serusalem oh tehnpas sarawio ohlahr ni ahnsou me mehn Suhs kan kalipilipala Papilon erein sounpar 70. Ahpw mwurin Papilon eh lohdi pahn mehn Media oh Persia kan, mehn Israel kan me kin kousoan nan wehin Papilon pwon saledekla pwehn pwurala nan sapwarailo oh pwurehng wiahda pwehn kak kaudokiong Siohwa. (Esra 1:1-4) Tepidahn pahr 537 Mwohn Krais, irail me lelepek me luwehdi sang keinek 12 me wia met. (Ais. 60:4) Irail tepida wiahiong Siohwa meirong kan, wia kasarawi kan, oh pwurehng kauwada tehnpas sarawio. (Esra 3:1-4, 7-11; 6:16-22) Lingan en Siohwa pil pwurehng tepida dakerada pohn Serusalem, me iei, sapwellime aramas akan. Irail uhd, ni karasaras, wiahla marain ong wehio me sohte ese Siohwa.
Ahpw, ekeite ahn Aiseia kokohp ko pweida ni ahnsowo. Pali laud en mehn Israel ko sohte pousehlahte peikiong Koht. (Neh. 13:27; Mal. 1:6-8; 2:13, 14; Mad. 15:7-9) Mwuhr, irail pil soikala Mesaiao, Sises Krais. (Mad. 27:1, 2) Nan pahr 70, Serusalem oh tehnpas sarawio pwurehng ohla.
Siohwa ketin kohpadahr me met pahn wiawi. (Dan. 9:24-27) Eri e sansal me e sohte kupwurki me Serusalem en sampah me pahn kapwaiada kokohpo nan Aiseia irelaud 60 me pid onohnsapahlda.
Dahme Aiseia koasoia pweida nan atail ahnsou ni ahl me laudsang mahso? Ei, ahpw met e wiewiawi ong pil emen lih ni karasaras,—“Serusalem en powe.” Wahnpoaron Pohl ntingihdi duwen liho: “Ih atail nohno.” (Kal. 4:26) Serusalem en powe iei sapwellimen Koht pwihn nanleng me wiawihkihda ngehn lelepek kan. Nah seri kan iei Sises oh Kristian keidi meh 144,000 ko, me duwehte Pohl, ahneki koapworopwor en mi nanleng. Irail koaros wia “wehi sarawi ehu”—“Israel en Koht.”—1 Pit. 2:9; Kal. 6:16.
Ia duwen Serusalem en powe eh “uhda” oh “kihpeseng marain”? E wia met sang ni eh doadoahngki nah me keidi kan nin sampah. Kilang ia duwen dahme wiawihong irail eh duwehte dahme Aiseia irelaud 60 kohpada.
Kristian keidi kan anahne “uhda” pwehki e mwomwen me re mihla nan rotorot ni ahnsou me irail me uhwongada oh kesehla kaudok mehlel tohtohla mwurin wahnpoaron ko mehla. (Mad. 13:37-43) Ni ahnsowo, irail mihla pahn Papilon Lapalap me iei pwihn en pelien lamalam likamw koaros. Me keidi kan wie sensel lao lel “imwin koasoandi en mwehi wet,” me tepida nan pahr 1914. (Mad. 13:39, 40) Mwurin mwo, nan pahr 1919, irail saledekla oh mwadangete tepida kihpeseng marain sang ni arail soupisengkihla doadoahk en kalohk. b Erein sounpar kan kohdo, aramas akan sang wehi koaros kodohr nan maraino, iangahki luhwen me keidi kan en Israel en Koht—“nanmwarki kan” me Aiseia 60:3 kasalehda.—Kaud. 5:9, 10.
Ni ahnsou kohkohdo, Kristian keidi kan pahn kihpeseng marain sang Siohwa ni ahl me uhdahn laud. Ia duwe? Ni ahnsou me irail mehla nin sampah, irail pahn wiahla kisehn “Serusalem Kapw,” de nanmwarki oh samworo meh 144,000 me pahn iang Krais kaunda.—Kaud. 14:1; 21:1, 2, 24; 22:3-5.
Serusalem Kapwo pahn kapwaiada kokohp en Aiseia 60:1. (Pil kilang Aiseia 60:1, 1, 3, 5, 11, 19, 20 oh Kaudiahl 21:2, 9-11, 22-26.) Duwehte Serusalem eh wia poasen kaun en koperment en Israel mahso, ih pil duwen Serusalem Kapwo oh Krais, pahn wia koperment en koasoandi kapwo. Ia duwen Serusalem Kapwo eh “kohkohdi sang nanleng, sang rehn Koht”? Sang ni arail wiahda soahng kan ong sampah. Aramas akan sang wehi koaros me kin lemmwiki Koht “ pahn weweidki marain en kahnimwo.” Irail pahn saledeksang dihp oh mehla. (Kaud. 21:3, 4, 24) Imwilahn met, “onohnsapahl en mehkoaros” pahn wiawi ni unsek, nin duwen me Aiseia oh soukohp teikan kohpada. (Wiewia 3:21) Onohnsapahl keieu laud wet tepida ni ahnsou me Krais ketin wiahla Nanmwarki oh pahn imwisekla ni imwin Kaundahn Pahr Kido.
a Nan Aiseia 60:1, Kawehwe en Sampah Kapw doadoahngki lepin lokaiao “lih” a kaidehn “Saion,” de “Serusalem,” pwehki lepin lokaia ko “uhda,” “kihpeseng marain,” oh ‘uhk’ kin dokedoke lih emen.
b Esekiel 37:1-14 oh Kaudiahl 11:7-12 pil koasoia duwen onohnsapahldahn kaudok mehlel me wiawi nan pahr 1919. Esekiel kohpada duwen onohnsapahldahn Kristian keidi koaros mwurin arail senselki erein ahnsou reirei. Kokohpo nan Kaudiahl kin dokedoke mwomwen ipwidi en pwihn tikitik en brother keidi kan me kin tiengla mwowe mwurin arail sohte kak papah Siohwa erein ahnsou mwotomwot pwehki arail selidi. Nan pahr 1919, irail idihda nin duwen “ladu lelepek oh loalokong.”—Mad. 24:45; menlau kilang Pure Worship of Jehovah Restored At Last!, pali 118.
