1. Iahd me me keidi koaros pahn miher nanleng?

 SOUNPAR samwalahr ko, sapwellimen Siohwa aramas akan kin medewe, ‘Iahd me lahsen Kristian keidi kan pahn kohdahla nanleng?’ Mahso kitail kin medewe me ekei me keidi kan ele pahn mihmihte nan Paradais nin sampah erein ahnsou kis mwurin Armakedon. Ahpw nan Kahn Iroir en July 1, 2013, kitail sukuhlki me mwohnte Armakedon pahn tepida, koaros meh 144, 000 kan pahn miher nanleng.—Mad. 24:31.

2. Peidek dahieu me kakete pwarada, oh dahme kitail pahn koasoiapene nan iren onop wet?

² Ahpw ekei kitail kakete idek: Dahme pahn wiawihong sapwellimen Krais “sihpw teikan” me pahn papah Siohwa ni lelepek nin sampah erein ‘kamakam kowahlapo’? (Sohn 10:16; Mad. 24:21) Ekei “sihpw teikan” ele sohte pahn ese dahme re pahn wia ni ahnsou me riarail me keidi kan kohdahla nanleng. Kitail pahn koasoiapene irair riau me kahrehda irail kak ahneki madamadau wet. Mwuri kitail pahn koasoiapene kahrepe kan me kitail sohte anahne pwunodki met.

DAHME SOHTE PAHN WIAWI?

3-4. Dahme ekei kakete medewe, oh dahme kahrehda?

³ Ekei kakete pwunodki me sihpw teikan sohla pahn papah Siohwa ni ahnsou me Pwihn me Kin Apwalih Mwomwohdiso nan Sampah Pwon sohla kaweid irail. Irail kakete medewe met pwehki dahme wiawi nan ekei poadopoad en Paipel. Kitail pahn koasoiapene karasepe riau. Keieuo pidada Samworo Lapalap Sehoiada. Ih sapwellimen Koht ladu lelepek men. Ih oh eh pwoudo Sehosihpa, sewese kisin pwutak men me adaneki Sehoas oh sewese en wiahla nanmwarki mwahu oh lelepek  men. Erein Sehoiada momour, Sehoas kin kaudokiong Siohwa oh wia soahng mwahu kan. Ahpw mwurin Sehoiada mehla, Sehoas tepida wia soahng suwed kan. E kin rong kaun suwed kan oh sohla papah Siohwa.—2 Kron. 24:​2, 15-19.

⁴ Keriau iei irail Kristian kan me momour mwurin wahnpoaron ko. Wahnpoaron me mehla keieu mwuhr iei Sohn. Erein eh momour, e kin sewese Kristian tohto en lelepekohngete Siohwa. (3 Sohn 4) Duwehte dahme ekei sapwellimen Sises wahnpoaron ko wia, Sohn kin doadoahk laud pwehn pere mwomwohdiso sang irail kan me kin padahngki soahng likamw kan. (1 Sohn 2:18; 2 Des. 2:7.) Ahpw mwurin Sohn mehla, me tohto nan mwomwohdiso wiahla kisehn irail me kesehla oh uhwongada kaudok mehlel. Nan sounpar kan mwuhr, irail pwukat kin padahngki padahk likamw tohto oh mweidada tiahk samin en wiawi nan mwomwohdiso kan koaros.

5. Dahme kitail en dehr medewe pwehki karasaras riauo sang nan Paipel?

⁵ Ia duwe, karasepen Paipel pwukat kasalehda me mwurin me keidi kan kohdahla nanleng, sapwellimen Krais sihpw teikan kakete tepida wia me suwed, duwehte me Sehoas wia, de wiahla kisehn irail kan me kesehla oh uhwongada kaudok mehlel, duwehte me tohto wia mwurin wahnpoaron ko mehla? Pasapengo iei uhdahn soh! Kitail kak kamehlele me mwurin me keidi kan kohdahla nanleng, sihpw teikan pahn doulahte kaudokiong Siohwa ni ahl me pwung, oh e pahn ketin pousehlahte apwalih irail. Dahme kahrehda kitail kak kamehlele met?

KAUDOK MIN SOHTE PAHN OHLA

6. Ahnsou siluh dah me kitail pahn koasoiapene?

⁶ Dahme kahrehda kitail kak kamehlele me kaudok min sohte pahn ohla, pil ni ahnsou apwal kan me pahn kohdo? Pwehki Paipel kawehwehda me ahnsou me kitail mihmi loale uhdahn weksang ahnsoun mehn Israel ko oh mwurin wahnpoaron ko mehla. Eri kitail pahn koasoiapene ahnsou siluh pwukat: (1) Ahnsoun mehn Israel ko mahso, (2) ahnsou ehu mwurin wahnpoaron ko mehla, oh (3) atail ahnsou, “ahnsoun onohnsapahl en mehkoaros.”—Wiewia 3:21.

7. Dahme kahrehda mehn Israel lelepek ko pilada en kolokolete arail koapworopwor ni ahnsou nanmwarki kan oh me tohto teikan pilada en wia dahme suwed?

⁷ Ahnsoun mehn Israel ko mahso. Mwohnte eh mehla, Moses padahkihong mehn Israel ko: “I ese me mwurin ei pahn mehla aramas akan pahn suwedla oh kesehla mehkan me I padahkihongirailehr.” (Deud. 31:29) Moses pil padahkihong mehn Israel ko me ma irail pahn uhwongada Siohwa, irail pahn kalipilipala. (Deud. 28:​35, 36) Mahsen ko pweida? Ei. Erein sounpar epwiki kei, nanmwarki kan kin wia soahng suwed kan mwohn silangin Siohwa oh aramas akan kin idawehn irail pwehn wia kaudok likamw. Pwehki met, Siohwa ketin kaloke mehn Israel suwed ko oh sohte mweidohng nanmwarki en Israel ko en kakaun irail. (Esek. 21:​25-27) Ahpw ni mehn Israel lelepek ko kilang me dahme Koht mahsanih pweidahr, met kihong irail eimah en doulahte papah ih ni lelepek.—Ais. 55:​10, 11.

8. Ia duwe, kitail anahne pwuriamweiki me mwomwohdisohn Kristian kan mwurin wahnpoaron ko mehla suwedla? Menlau kawehwehda.

⁸ Ahnsou ehu mwurin wahnpoaron ko mehla. Ia duwe, kitail anahne pwuriamweiki me mwomwohdisohn Kristian kan mwurin wahnpoaron ko mehla suwedla? Uhdahn soh. Sises ketin kohpada me e pahn mie irail kan me kesehla oh uhwongada kaudok mehlel. (Mad. 7:​21-23; 13:​24-30, 36-43) Wahnpoaron Pohl,  Piter, oh Sohn pil kadehdehda me sapwellimen Sises kokohpo tepidahr wiawi nan arail mwehio. (2 Des. 2:​3, 7; 2 Pit. 2:1; 1 Sohn 2:18) Mwurinte lahsen wahnpoaron ko, Kristian kan me kesehla oh uhwongada kaudok mehlel wiahla kisehn Papilon Lapalap, lamalam likamw en sampah. Dahme Sises ketin kohpada pweida.

9. Ia duwen atail ahnsou eh weksang ni ahnsoun mehn Israel ko oh ni mwehin mwomwohdisohn Kristian ko mwurin wahnpoaron ko mehla?

⁹ “Ahnsoun onohnsapahl en mehkoaros.” Atail ahnsou weksang ahnsoun mehn Israel ko oh ni mwehin irail ko me kesehla oh uhwongada kaudok mehlel mwurin wahnpoaron ko mehla. Dahme kitail kin kahdaneki atail ahnsou? Kitail kin kalapw kahdaneki “imwin rahn akan” en koasoandi suwed wet. (2 Tim. 3:1) Ahpw Paipel kasalehda me mie ahnsou reirei ehu me tepida ahnsowohte. E pahn doulahte lao Wehin Mesaiao kahrehiong aramas akan en unsekla oh kaparadaisihala sampah. Ahnsou reirei wet iei me Paipel kahdaneki “ahnsoun onohnsapahl en mehkoaros.” (Wiewia 3:21) Ahnsowo tepida pahr 1914. Eri dahme kapwurpwurdo? Sises wiahla Nanmwarki men nanleng. Eri Siohwa ketin pwurehng idihada kaun emen me pahn wia wiliepe, emen kadaudok en Nanmwarki lelepeko Depit. Ahpw kaidehn ihte met me Siohwa ketin kapwurehdo. Mwurinte mwo, Siohwa ketin sewese sapwellime ladu kan nin sampah en pwurehng kaudokiong ih ni ahl me e ketin kupwurki! (Ais. 2:​2-4; Esek. 11:​17-20) Eri ia duwe, kaudok min pahn pwurehng ohla?

10. (a) Dahme Paipel kohpada duwen kaudok min nan atail ahnsou? (Aiseia 54:17) (b) Dahme kahrehda kokohp pwukat kangoange kitail?

¹⁰ Wadek Aiseia 54:17. Medewehla duwen kokohpo: “Sohte tehtehn mahwen ehu pahn kak kauweiukala”! Mahsen pwukat pweidahr rahnwet. Mahsen kansenamwahu pwukat pil dokedoke atail ahnsou: “Pein ngehi pahn padahkihong noumw aramas akan, oh ketikihong irail paiamwahu oh popohl. Pwuhng oh inen pahn kakehleiukada. Ke pahn silasil mwahu sang pahn kehnaudek oh me kamasepwehk kan.” (Ais. 54:​13, 14) Oh pil “koht en koasoandi en mwehi wet,” Sehdan, sohte kak kauhdi doadoahk me sapwellimen Siohwa aramas akan wiewia rahnwet en padahkihong meteikan duwen Siohwa. (2 Kor. 4:4) Kaudok min onohnsapahldahr, oh e sohte pahn pwurehng ohla. E pahn mihmi kohkohlahte. Sohte tehtehn mahwen ehu pahn kauweikitailla!

 DAHME PAHN WIAWI?

11. Dahme pahn kamehlelehiong kitail me pokon kalaimwuno sohte pahn kelehpwla ni me keidi kan ar kohdahla nanleng?

¹¹ Dahme pahn wiawi ni ahnsou me irail me keidi kan kohdahla nanleng? Tamataman, Sises iei Sounsilepetail. E ketin wia tapwin mwomwohdisohn Kristian. Sises mahsanih: “Amwail Kaun mehtehmen, iei Krais.” (Mad. 23:10) Sises me ketin kakaun nanleng pahn ahnsou koaros apwalih sapwellime tohnkaudok mehlel kan. Pwehki Krais kin ketin kaukaweid irail, sapwellime tohnpadahk kan nin sampah sohte anahne masak mehkot. Ei mehlel, kitail sohte ese oaritikpen mwomwen Krais pahn ketin kaweid sapwellime aramas akan ni ahnsowo. Eri kitail pahn koasoiapene ekei karasaras kan nan Paipel me kak kangoangei kitail.

12. Ia duwen Siohwa kin ketin apwalih sapwellime aramas akan (a) mwurin Moses mehla? (b) mwurin Elaisa alehdi ehu pwukoa tohrohr? (Pil kilang kilel.)

¹² Mwohn mehn Israel ko pedolong nan Sapwen Inowo, Moses mehla. Dahme wiawihong sapwellimen Koht aramas ako? Ia duwe, Siohwa sohla ketin sewese sapwellime aramas ko mwurin Moses mehla? Soh. Erein arail kin lelepekte, Siohwa kin ketin apwalih irail. Mwohn Moses eh mehla, Siohwa ketin padahkihong en idihada Sosua pwehn kaweid aramas ako. Erein sounpar tohto Moses kin kaiahne Sosua. (Eks. 33:11; Deud. 34:9) Patehng met, mie ohl koahiek tohto kei me kin tiengla mwowe—ekei kaun kan kin pwukoahki aramas kid, aramas epwiki, aramas limehk, oh pil aramas ehk. (Deud. 1:15) Sapwellimen Siohwa aramas akan kin alehdi epwel mwahu. Met pil wiawihong Elaisa. E kin doadoahk laud erein sounpar tohto pwehn sewese mehn Israel ko en kaudokiong Siohwa. Ahpw mwuhr Siohwa ketin idihada en papah palieir en Suda. (2 Nan. 2:1; 2 Kron. 21:12) Ia duwe, aramas lelepek kan nan keinek en wehin Israel kelehpwla? Soh. Elaisa kin kaiahne Elisa erein sounpar tohto. Pil mie “nein soukohp pwutak” kan me pil alehdi kaiahn. (2 Nan. 2:7) Eri, mie ohl lelepek tohto me kin kaiahne sapwellimen Koht aramas akan. Siohwa kin ketin pousehlahte kapwaiada kupwure oh kin apwalih sapwellime tohnkaudok lelepek kan.

13. Dahme Siohwa ketin inoukihong kitail nan Ipru 13:5b? (Pil kilang kilel.)

¹³ Sang ni karasaras ko, dahme ke medewe pahn wiawi ni lahsen me keidi kan kohdahla nanleng? Kitail esehier dahme pahn wiawi. Paipel mahsanih ire mehlel wet: Siohwa  sohte pahn ketin likidmeliehla sapwellime aramas akan nin sampah. (Wadek Ipru 13:5b.) Duwehte Moses oh Elaisa, kisin pwihn en Kristian keidi kan me kin tiengla mwowe rahnwet wehwehki kesempwalpen en kaiahne meteikan. Erein sounpar tohto Pwihn me Kin Apwalih Mwomwohdiso nan Sampah Pwon kin kaiahne ohl kan sang sihpw teikan pwehn tiengla mwowe. Karasepe, re kin koasoanehdi sukuhl tohto pwehn kaiahne elder kan, sounapwalih kan me kin seiloak, Pwihn me Kin Apwalih Ohpis en Sounkadehdehn Siohwa kan, sounapwalih kan nan Pedel, oh meteikan. Pwihn me Kin Apwalih Mwomwohdiso nan Sampah Pwon kin kaiakaiahne sounsawas kan nan soangsoangen committee kan nan pwihn wet. Met sounsawas pwukat kin ni lelepek apwahpwalih pwukoa tohto nan sapwellimen Siohwa pwihn. Irail uhdahn onopada mwahu pwehn pousehlahte apwalih sapwellimen Krais sihpw kan.

14. Ire kesempwal dahieu me kitail koasoiapenehr?

¹⁴ Ire kesempwal me kitail koasoiapene iei: Ni lahsen me keidi kan kohdahla nanleng ni imwin kahn kamakam kowahlapo, sapwellimen Siohwa aramas akan nin sampah pahn pousehlahte kaudokiong ih ni lelepek pwehki irail mi pahn kaundahn Sises Krais. Kitail ese me ni ahnsowo, pwihn ehu me Paipel kin kahdaneki Kok en Makok pahn uhwongada sapwellimen Koht aramas akan. (Esek. 38:​18-20) Ahpw uhwong wet sohte pahn pweida; e sohte pahn kauhdi sapwellimen Koht aramas akan en kaudokiong Siohwa. E uhdahn pahn ketin doareirailla! Nan Kaudiahl ehu, emen lapalap ko padahkihong Sohn me “pokon kalaimwun” wet pahn “kohieisang nan kamakam kowahlap.” (Kaud. 7:​9, 14) Eri kitail uhdahn kamehlele me Siohwa pahn ketin doareirailla!

15-16. Nin duwen me Kaudiahl 17:14 mahsanih, dahme iengen Krais me keidi kan pahn wia erein mahwen en Armakedon, oh dahme kahrehda met kangoange kitail?

¹⁵ Ahpw dahme me keidi kan pahn wia mwurin arail kohdahla nanleng? Paipel sapengala peidek wet. E kasalehda me koperment kan en sampah wet pahn “mahweniong Sihmpwulo.” Irail pahn lohdi. Paipel mahsanih: “Sihmpwulo  pahn kaloweiraildi” oh ihs me pahn sewese? Iretikitiko mahsanih me irail me “Koht ketin malipeier oh piladahr oh me kin lelepek.” (Wadek Kaudiahl 17:14.) Ihs irail pwukat? Irail me keidi kan me iasada! Eri ni lahsen me keidi kan nin sampah kohdahla nanleng ni imwin kahn kamakam kowahlapo, ihme re pahn tepin wia iei mahwen. Pwukoa wet uhdahn kaselel! Ekei Kristian keidi kan mahso kin peiong meteikan mwohn arail wiahla Sounkadehdehn Siohwa. Ekei pil kin iang sounpei. Ahpw mwuhr irail wiahla Kristian mehlel kei oh sukuhlki en ahneki popohl rehn meteikan. (Kal. 5:22; 2 Des. 3:16) Irail sohla utung mahwen kan. Ahpw, mwurin arail kohdahla nanleng, irail pahn iang Krais oh nah tohnleng sarawi kan mahweniong sapwellimen Koht imwintihti kan.

¹⁶ Nna medewehla! Nin sampah, ekei Kristian keidi kan mah oh pil luwetalahr. Ahpw ni ahnsou me irail pahn iasadahng mour nanleng, irail pahn wiahla tohnleng kehlail kei me sohte kak mehla oh pahn iang Sises Krais mahwen. Mwurin mahwen en Armakedon, irail pahn iang Sises doadoahk pwehn sewese aramas akan en unsekla. Eri sang nanleng, irail pahn kak sewese riarail Kristian kan nin sampah laudsang ni ahnsou me irail wia aramas soh unsek kei!

17. Ia duwen atail ese me sapwellimen Koht ladu kan koaros sohte pahn lelohng keper erein mahwen en Armakedon?

¹⁷ Ke iang wia pwihn en sihpw teikan? Ma ei, dahme ke pahn anahne wia ni ahnsou me mahwen kesempwal en Armakedon tepida? Ihte met: Likih Siohwa, oh idawehn sapwellime kaweid. Dahme met kin pidada? Paipel mahsanih: “Kumwail pedolong nan imwamwail kan, oh ritingedi wenihmw. Kumwail rukula mahs lao sapwellimen Koht engieng imwisekla.” (Ais. 26:20) Sapwellimen Koht ladu lelepek kan koaros, nanleng oh nin sampah sohte pahn lelohng keper ni ahnsowo. Duwehte wahnpoaron Pohl, kitail kak kamehlele me kaidehn “koperment kan de mehkan en ahnsou wet de mehkan me pahn kohdo . . . pahn kak katohreikitailsang sapwellimen Koht limpoak.” (Rom 8:​38, 39) Ahnsou koaros tamataman me Siohwa ketin poakohng uhk oh sohte pahn ketin likidmelieiukala!