1. Soahng mwahu dah kei me pweinen pweipwei sapahlo kak wiahiong kitail?

 PWEINEN pweipwei sapahlo me Sises Krais ketikihda kin wahdo kapai tohto. Koasoandi en pweinen pweipwei sapahlo langahda ahl ong kadaudoken Adam kan koaros me kin poakohng me pwung pwe ren ehu rahn wiahla kisehn sapwellimen Koht peneinei. Kitail pil kak kasik kitail en mour kohkohlahte ni peren. Laudsang met, pweinen pweipwei sapahlo kin pidada ire kan me uhdahn kesempwal ong koaros me mi nanleng oh sampah.​—Ipru 1:9.

2. (a) Ire kesempwal dah kan nanleng oh sampah me Sises mahsanih nan sapwellime kapakap? (Menlau kilang tepin kilel.) (b) Dahme kitail pahn koasoiapene nan iren onop wet?

² Mpen sounpar riau mwohn Sises pwoula, e ketin padahkihong sapwellime tohnpadahk ko duwen arail pahn kapakap: “Samat me ketiket nanleng: Mwaromwi en sarawihla rehn aramas koaros, mweimwi [“Wehiomwi,” NW] en pweida wasa koaros, kupwuromwi en kin wiawi nin sampah duwen eh kin wiawi nanleng.”  (Mad. 6:9, 10) Kitail tehkpene ia duwen pweinen pweipwei sapahlo eh pidada kasarawihlahn mwaren Siohwa, kaundahn Wehin Koht, oh pweidahn kupwuren Koht.

3. Dahme mwaren Siohwa kin kawehwehda? Ia duwen Sehdan eh kauwehla mwaren Siohwa?

³ Keieu, Sises ketin kapakapki me mwaren Siohwa en sarawihla. Mwaren Siohwa kin kawehwehda duwen pein ih de ihs ih. Ih me keieu manaman oh pwung nanleng oh sampah pwon. Sises pil ketin kamwarehkin ih “Semei me Sarawi.” (Sohn 17:11) Pwehki Siohwa ketin sarawi, soahng koaros me e ketin wia oh kosonned koaros me e ketin wiahda kin sarawi. Ahpw nan mwetuwel en Ihden, Sehdan, ni elen widing, peidengki sapwellimen Koht pwuhng en ketikihda koasoandi kan ong aramas. E likamwkihda soahng kan duwen Siohwa oh kauwehla mwaren Koht.​—Sen. 3:1-5.

4. Ia duwen Sises eh ketin kasarawihala mwaren Koht?

⁴ Sises uhdahn ketin poakohng mwaren Siohwa oh wia soahng koaros me e kak pwehn ketin kasarawihala. (Sohn 17:25, 26) Ia duwen? Sang sapwellimen Sises wiewia kan oh mwomwen eh kin ketin padahkih aramas, e ketin sewese meteikan en kilang me sapwellimen Siohwa koasoandi kan kin pwung oh soahng koaros me e kupwurki kitail en wia kin wia kamwahupatail. (Wadek Melkahka 40:8-10.) Mehnda ma Sehdan kahrehiong ih en ketin lokolok oh pwoula, Sises ketin kolokol eh loalopwoat. E kadehdehda me aramas unsek men kak peikiong Siohwa ni unsek.

5. Ia duwen atail kak kasarawihala mwaren Siohwa?

⁵ Ia duwen atail kak kasalehda me kitail poakohng mwaren Siohwa? Sang atail wiewia kan. Siohwa ketin kupwurki kitail en sarawi. (Wadek 1 Piter 1:15, 16.) Met wehwehki me kitail pahn kaudokiong ih kelehpw oh peikiong ih sang ni mohngiongitail unsek. Pil ni ahnsou me kitail lelohng kalokolok, kitail kin wia uwen atail kak en mour ni ahl me Siohwa ketin padahkihong kitail. Ni atail mour pahrekiong sapwellimen Siohwa koasoandi kan, kitail kin kalinganahla mwareo. (Mad. 5:14-16) Kitail kin kadehdehda me sapwellimen Siohwa kosonned kan kin mwahu oh me Sehdan likamw. Kitail sohte unsek, eri kitail uhdahn pahn wiahda sapwung kan. Ahpw ni atail kin wia met, kitail kin koluhla oh wia uwen atail kak en uhdi wia soahng kan me kin kauwehla mwaren Siohwa.​—Mel. 79:9.

6. Dahme kahrehda Siohwa kak ketin kilangwohng kitail nin duwen aramas pwung kei, mehnda ma kitail sohte unsek?

⁶ Sohte lipilipil ma kitail me keidi kei de “sihpw teikan,” Siohwa kin ketin mahkohng dipatail kan ma kitail pwoson pweinen pweipwei sapahlo. E kin ketin kupwurki irail kan me kin inoukihong ih arail mour en wia sapwellime tohnkaudok kan. E mahsanih me me keidi kan pwunglahr nin duwen sapwellime kan oh pil me “sihpw teikan” pwunglahr nin duwen kompoakepah kan. (Sohn 10:16, NW; Rom 5:1, 2; Seims 2:21-25) Kahrehda pil ahnsou wet, kitail kak ahneki nanpwungmwahu keren rehn Samatailo oh kasarawihala mwareo pwehki pweinen pweipwei sapahlo.

7. Kapai dah kan me pweinen pweipwei sapahlo kihda?

⁷ Nan kapakap me Sises ketin padahkihong kitail, e mahsanih: “Mweimwi [“Wehiomwi,” NW] en pweida.” Ia duwen pweinen pweipwei sapahlo eh pidada Wehin Koht? Wehin Koht de koperment en Koht wiawihkihda Sises oh me 144,000 ko me pilipilda sang sampah.  Pweinen pweipwei sapahlo me kahrehiong irail me 144,000 pwukat en kak iasadahng nanleng. (Kaud. 5:9, 10; 14:1) Re pahn wia nanmwarki oh samworo kei oh pahn iang Sises ketin kakaun sampah erein sounpar kid. Erein ahnsowo, Siohwa pahn ketin doadoahngki Wehio en kaparadaisihala sampah oh sewese aramas koaros en unsekla. Oh pil sapwellimen Siohwa ladu kan nanleng oh sampah pahn wiahla peneinei ehu. (Kaud. 5:13; 20:6) Sises pahn ketin kasohrehla Sehdan oh ketikihsang kahpwal koaros me Sehdan kahrehda.​—Sen. 3:15.

8. (a) Ia duwen Sises eh ketin sewese sapwellime tohnpadahk ko wehwehki me Wehin Koht kesempwal? (b) Ia duwen atail kin utung Wehin Koht rahnwet?

⁸ Sises ketin sewese sapwellime tohnpadahk ko en wehwehki kesempwalpen Wehin Koht. Ia duwen? Mwurinte Sises ketin papidaisla, e tepida ketin kalohki duwen “Rongamwahu en Wehin Koht” wasa koaros e kohla ie. (Luk 4:43) E pil mahsanihong sapwellime tohnpadahk ko en kadehde duwen ih “lelohng ni irepen sampah.” (Wiewia 1:6-8) Rahnwet, pwehki doadoahk en kalohki duwen Wehin Koht, aramas akan ahneki pwais kaselel en esehla duwen pweinen pweipwei sapahlo oh wiahla towe kan en Wehin Koht. Kitail kin kasalehda me kitail towe loalopwoat kei en Wehio sang atail kin sewese me keidi kan kalohki rongamwahu wet sampah pwon.​—Mad. 24:14; 25:40.

9. Dahme kahrehda kitail kak kamehlele me Siohwa pahn ketin kapwaiada kupwureo ong aramas akan?

⁹ Ia wehwehn dahme Sises mahsaniho: “Kupwuromwi en kin wiawi”? Ni Siohwa eh kin mahsanih me mehkot pahn wiawi, e uhdahn pahn wiawi. (Ais. 55:11) Ahn Sehdan uhwongada sohte kak kauhdi Siohwa. Ia kupwuren Siohwa ong sampah? E ketin kupwurki sampah en direkihla kadaudok unsek kan en Adam oh Ihp. (Sen. 1:28) Ma Adam oh Ihp mehla ahpw sohte nainekihda seri, kupwuren Koht en kadirehkihla sampah neira seri kan sohte pahn pweida. Eri Siohwa ketin mweidohng ira en nainekihda seri. Pweinen pweipwei sapahlo kin kihong aramas koaros me pwoson pwais en unsekla oh mour kohkohlahte. Siohwa ketin poakohng aramas akan oh kupwurki kitail en ahneki mour kaselel me e ketin kupwurki ong kitail.

10. Ia duwen me melahr akan ar kak paiekihda pweinen pweipwei sapahlo?

¹⁰ Ahpw, ia duwen aramas lik lik kan me mehla ahpw sohte esehla Siohwa? Siohwa ketin kupwurki aramas akan en momour. Eri e pahn ketin kaiasada irail kan me mehla. Irail kak iasada pwehki pweinen pweipwei sapahlo. Irail pahn kak sukuhlki duwen Siohwa oh mour kohkohlahte. (Wiewia 24:15) Siohwa iei Utupen mour. Ni Siohwa eh kin ketin kaiasada aramas akan, e ketin wiahla Samarail. (Mel. 36:9) Nan kapakapo me Sises ketin padahkihong kitail, e mahsanih me Siohwa iei ‘Samatail me ketiket nanleng.’ (Mad. 6:9) Siohwa ketikihong Sises pwukoa kesempwal ehu en kaiasada me melahr akan. Sises mahsanih: “Ngehi me mour sapahl oh Sounkomour.”​—Sohn 11:25.

11. Ia kupwuren Koht ong pokon kalaimwuno?

¹¹ Siohwa ketin luke koaros en wiahla kisehn sapwellime peneinei. Sises mahsanih: “Aramas akan me kin kapwaiada kupwur en Koht, iei irail me riei oh inei.” (Mark 3:35) Siohwa ketin inoukihda me aramas akan me kohsang wehi, keinek oh lokaia koaros pahn wiahla kisehn sapwellime tohnkaudok. Irail wia “pokon ehu me inenen kalaimwuhnie​—me sohte aramas kak wadekedi uwen tohto!”  Re pwoson pweinen pweipwei sapahlo oh men peikiong Koht. Re kin kapinga ih oh nda: “Komourpat pwilisang rehn at Koht, me ketiket nan mwoale, oh sang rehn Sihmpwulo!”​—Kaud. 7:9, 10.

12. Nan sapwellime kapakapo, dahme Sises mahsanih duwen kupwuren Siohwa ong aramas akan?

¹² Kitail sukuhlki laud duwen Siohwa oh kupwureo ong aramas peik kan nan kapakapo me Sises ketin padahkihong kitail. Keieu, kitail anahne wia uwen atail kak en kasarawihala mwaren Siohwa oh kawauwih ih. (Ais. 8:13) Meirong en pweinen pweipwei sapahlo me Sises ketikihda kin kahrehiong kitail en kak komourla oh e pil kin kawauwihala mwaren Koht. Mwaren Siseso wehwehki “Siohwa Iei Komour.” Keriau, Siohwa pahn ketin doadoahngki sapwellime Wehio en wahdohng aramas akan kapai koaros me kohsang pweinen pweipwei sapahlo. Oh kesiluh, kitail uhdahn kamehlele me sohte mehkot kak kauhdi dahme Siohwa ketin kupwurki en wiawi.​—Mel. 135:6; Ais. 46:9, 10.

13. Dahme kahrehda kitail kin papidaisla?

¹³ Ehu ahl kesempwal me kitail kin kasalehda atail kalahnganki pweinen pweipwei sapahlo iei sang atail inoukihong Siohwa atail mour pwehki atail pwoson pweinen pweipwei sapahlo oh papidaisla. Atail papidaisla kin kasalehda ni sansal me kitail sapwellimen Siohwa. (Rom 14:8) Ni ahnsou me kitail papidaisla, kitail kin patohwan peki rehn Siohwa en ketikihong kitail nsenmwakelekel. (1 Pit. 3:21) Siohwa kin ketin kehsehkin kitail me kitail wia kompoakepah. Oh kitail uhdahn ese me e pahn ketikihong kitail soahng koaros me e ketin inoukihda.​—Rom 8:32.

14. Dahme kahrehda Siohwa ketin kehkehlikihong kitail en poakohng meteikan?

 ¹⁴ Soahng koaros me Siohwa kin ketin wia kin kohsang sapwellime limpoak laud ong kitail, oh e kupwurki sapwellime tohnkaudok kan koaros en kahlemengih ih. (1 Sohn 4:8-11) Ni atail kin poakohng aramas akan, ahpw keieu riatail Kristian kan, kitail kin kadehdehda me kitail kalahnganki pweinen pweipwei sapahlo oh me kitail men iang wia kisehn sapwellimen Siohwa peneinei. (Mad. 5:43-48) Kosonned riau me keieu kesempwal iei keieu, poakohng Siohwa, oh keriau, poakohng meteikan. (Mad. 22:37-40) Ehu ahl me kitail en kasalehiong aramas akan limpoak iei en padahkihong irail duwen rongamwahu en Wehin Koht. Ma kitail peikiong sapwellimen Siohwa kosonned en poakohng meteikan, atail limpoak ong ih pahn “unsekla.”​—1 Sohn 4:12, 20.

15. (a) Kapai dah kan me Siohwa ketikihong kitail ahnsou wet? (b) Kapai dah kan me kitail pahn ale ni ahnsou kohkohdo?

¹⁵ Siohwa ketin kamehlelehiong kitail me pwehki kitail pwoson pweinen pweipwei sapahlo, e pahn ketin ‘kamwakeleweisang kitail dipatail kan.’ E kak ketin mahkohng douluhl dipatail kan. (Wadek Wiewia 3:19-21.) Nin duwen me kitail koasoiapenehr mwoweo, Siohwa kak ketin pwekada ekei aramas nin duwen sapwellime nanleng pwehki pweinen pweipwei sapahlo. Irail pwukat iei me keidi kan. (Rom 8:15-17) E ketin luke irail me wia “sihpw teikan” en wia kisehn sapwellime peneinei nin sampah. Mie kasongosong ehu me pahn wiawi mwurin arail unsekla. Ma re loalopwoatohng Siohwa, e pil pahn sapwellimankihla irail. (Rom 8:20, 21; Kaud. 20:7-9) Siohwa pahn ahnsou koaros poakohng sapwellime kan. Pweinen pweipwei sapahlo pahn pousehlahte wahdo kapai kan kohkohlahte. (Ipru 9:12) Siohwa ketikihongehr kitail kisakis kesempwal wet, oh sohte emen kak kihsang.

16. Ia duwen pweinen pweipwei sapahlo eh sewese kitail en saledekla?

¹⁶ Ma kitail koluhkihla dipatail kan, sohte mehkot me Tepilo kak wia pwehn kauhdi kitail sang atail pahn ehu rahn wiahla kisehn sapwellimen Siohwa peneinei. Sises pwoula “mehtehpak.” Pweinen pweipwei sapahlo pweipweilahr. (Ipru 9:24-26) Adam me kahrehda en mie mehla, ahpw sapwellimen Sises meirongo pahn wahdohng kitail mour kohkohlahte. Pweinen pweipwei sapahlo kak kasaledekitailsang ahn Sehdan sampah wet oh pil kahrehiong kitail en sohla masak mehla.​—Ipru 2:14, 15.

17. Ia wehwehn sapwellimen Siohwa limpoak ong uhk?

¹⁷ Sapwellimen Koht inou kan pahn ahnsou koaros pweida. Duwehte sapwellimen Siohwa koasoandi en kepikipikda eh sohte kin wekila, Siohwa sohte pil pahn ketin wekila. E uhdahn pahn ketin kapwaiada met. (Mal. 3:6) Siohwa ketikihong kitail laudsang ihte kisakis en mour. E ketikihong kitail sapwellime limpoak. “Pein kitail ese oh kamehlele sapwellimen Koht limpoak ong kitail. Koht, iei limpoak.” (1 Sohn 4:16) Sapwellime inou kan kin ahnsou koaros pweida. Ahnsou keren, sampah wet pahn wiahla paradais kaselel ehu. Koaros me momour pahn alasang Siohwa oh poakohng emenemen. Koaros sapwellime ladu kan nanleng oh sampah pahn nda: “Kaping oh lingan oh erpit oh kapingkalahngan oh wahu oh manaman oh roson, ong Koht erein dih koaros kohkohlahte! Amen.”​—Kaud. 7:12.