1. Dahkot “sapwellimen Koht popohl,” oh ia duwen atail kak paiekihda? (Pilipai 4:6, 7)

 MIE soangen popohl ehu me sampah wet sohte ese. Met iei “sapwellimen Koht popohl” me kin kahrehiong kitail en ahneki nanpwungmwahu keren rehn Samatailo nanleng. Ni atail kin ahneki sapwellimen Koht popohl, kitail sohte kin perki mehkot. (Wadek Pilipai 4:6, 7.) Kitail kin ahneki nanpwungmwahu keren rehn irail me kin poakohng ih. Oh kitail pil kin ahneki nanpwungmwahu keren rehn “Koht en popohl.” (1 Des. 5:23) Ni atail kin ese, likih oh peikiong Samatailo, sapwellime popohl kak kameleileidi loalatail erein kahpwal laud ehu.

2. Dahme kahrehda kitail kak kamehlele me kitail kak ahneki sapwellimen Koht popohl?

² Ia duwe, kitail kak uhdahn ahneki sapwellimen Koht popohl ni ahnsoun kahpwal kan me duwehte soumwahu lusulus, rerrer en sahpw de melimel ape, pingiping nanpwungen aramas oh ar wehi, de kalokolok? Kahpwal laud pwukat kak kahrehiong kitail en masepwehkada. Ahpw Sises ketin kaweidki sapwellime tohnpadahk ko: “Kumwail dehr nsensuwed oh masak.” (Sohn 14:27) Ni peren, riatail Kristian kan kin idawehn sapwellimen Sises kaweid. Siohwa kin ketin sewese irail en ahneki popohl ni arail dadaur pahn kahpwal laud kan.

3. Ia duwen soumwahu lusulus ehu eh kak kihsang atail popohl?

³ Soumwahu lusulus ehu kak wekidala laud mouren aramas. Medewehla dahme soumwahu lusuluso COVID-19 wiahiong me tohto. Ehu roporop kasalehda me aramas tohto kin apwalki meir erein soumwahu lusuluso. Soumwahu lusuluso kalaudehla  ahn aramas pwunod, mworus, kamam sakau, doadoahngki wini en kasahliel, tiahk lemei nan peneinei, oh men kemehla pein irail. Ma mie soumwahu en lusulus nan omw wasa, ia duwen omw kak powehdi omw pwunod oh ahneki sapwellimen Koht popohl?

4. Dahme kahrehda atail ese sapwellimen Sises kokohpo duwen imwin rahn akan kin wadohng kitail popohl?

⁴ Sises ketin kohpada me ni imwin rahn akan, soumwahu lusulus pahn kin wiawi “ehuehu wasa.” (Luk 21:11) Ia duwen atail ese met eh kin wadohng kitail popohl? Kitail sohte kin pwuriamweikihla soumwahu lusulus kan. Kitail ese me mwekid kan pahn kin wiewiawi nin duwen me Sises ketin kohpadahr. Eri kitail pahn idawehn kaweido me Sises ketikihong irail kan me momour ni ahnsoun imwi: “Kumwail dehr masepwehkada.”—Mad. 24:6.

5. (a) Nin duwen me Pilipai 4:8, 9 mahsanih, dahme kitail anahne kapakapki ni ahnsoun soumwahu lusulus ehu? (b) Ia duwen omw kak paiekihda omw rong wadawad en Paipel nan audio recording?

⁵ Soumwahu lusulus ehu kak kahrehiong kitail kapwunod laud oh per. Met wiawihong sister men me adaneki Desi. b Mwurin nein rien eh pahpao nah meseniho, pil emen rien eh pahpao ohl, oh eh toahkteo mehkihla COVID-19, e kin perki me e pahn alehdi soumwahwo oh kadaurehng eh nohnou me mahlahr. Soumwahu lusuluso pil kahrehiong en pwunodki me e pahn sohla eh doadoahk. Eri e kin medemedewe dahme e pahn pwainki mwenge oh eh rento. E uhdahn pwunodki mepwukat me kahrehiong en sohte kak meir. Ahpw Desi pwurehng ahneki popohl. Ia duwen? E kin kapakapki Siohwa en ketin sewese ih en meleilei oh medemedewe soahng mwahu kan. (Wadek Pilipai 4:8, 9.) E kin rong Siohwa eh ketin “mahseniong” ih sang ni eh rong wadawad en Paipel nan audio recording. E nda: “Ngilen sounwadawado kin kameleileidi ei pwunod oh katamankihong ie me Siohwa kin ketin nsenohkin ie.”—Mel. 94:19.

6. Ia duwen wia pein omw onop oh towehda mihting kan ar kak seweseiuk?

⁶ Erein ahnsoun soumwahu lusulus ehu, ele kitail sohla kak ahnsou koaros wia soahng kan me kitail kin wia mwoweo. Ahpw dehr mweidohng met en kauwehla omw ahnsou en wia pein omw onop de towehda mihting kan. Koasoiepen riatail Kristian kan nan neitail sawasepen Paipel kan pahn katamankihong uhk me irail kin papah Siohwa ni lelepek mendahki re kin lelohng soangen kahpwalkohte. (1 Pit. 5:9) Mihting kan pahn seweseiuk en kin medemedewe soahng kangoang kan sang nan Paipel. E pil kin kihong uhk ahnsou mwahu en kangoange meteikan oh pil ale kangoang sang irail. (Rom 1:11, 12) Ni  omw kin medemedewe ia duwen Siohwa eh kin ketin sewese sapwellime kan ni arail kin soumwahu, perki mehkot, de kelekelehpw, omw pwoson pahn kehlailla oh ke pahn kamehlele me e pahn pil ketin seweseiuk.

7. Dahme ke kak sukuhlkihsang wahnpoaron Sohn?

⁷ Nantihong koasoiong riomw Kristian kan. Ele soumwahu lusulus ehu kak kahrehiong kitail en dehr karanih meteikan pil ni atail kin mi rehn iengatail tohnkaudok kan. Nan soangen irairo, ele ke ahneki soangen pepehmohte me wahnpoaron Sohn ahneki. E men tuhwong kompoakepaho Kaius. (3 Sohn 13, 14) Ahpw Sohn wehwehki me e sohte kak tuhwong Kaius erein ahnsou ehu. Eri Sohn wia dahme e kak; e ntinglahng Kaius. Ma ke sohte kak ahnsou koaros mwemweitla rehn riomw Kristian kan, song delepwohnla rehrail, de koasoiong irail nan video de text. Ni omw kin koasoiong riomw Kristian kan, ke sohte pahn nohn pehm me ke kelekelehpw, oh ke pahn ahneki meleilei. Delepwohnla rehn elder kan ma ke kin uhdahn pwunod, oh kalahnganki arail kangoangeiuk ni limpoak.—Ais. 32:1, 2.

8. Ia duwen kahpwal laud ehu eh kak kihsang omw popohl?

⁸ Ma ke lelohng lapake, melimel de rerrer en sahpw, de kisiniei laud ehu wiawi nan omw wasao, ele ke kin pwunodkihte met pil mwurin kahpwalo wiawi. Ma emen me ke poakohng mehla, de imwomwo oh omw kepwe kan ohla, ele ke pahtoula, sohla omw koapworopwor, de pil lingeringer. Met sohte wehwehki me ke kesempwalkihte kepwe ko, de omw pwoson tikitikla. Ke lelohng kahpwal laud ehu, oh mwein ekei kasik ken kaulim. (Sohp 1:11) Ahpw ke kak ahnekihte popohl. Ia duwen?

9. Dahme Sises mahsanih pwe en kaunopkitailda ong kahpwal kan?

⁹ Tamataman dahme Sises ketin kohpada. Ekei aramas medewe me re sohte pahn lelohng kahpwal laud. Ahpw kitail ese me kahpwal kan pahn laudla nan atail ahnsou, oh kitail kakete lelohng ekei kahpwal pwukat. Sises mahsanihong sapwellime tohnpadahk kan me “rerrer en sahpw laud” oh kahpwal teikan pahn wiawi mwohn imwio leledo. (Luk 21:11) E pil ketin kohpada duwen “lalaudlahn me suwed,” me uhdahn wiewiawi rahnpwukat. Karasepe, kitail kilang tiahk mwersuwed, tiahk lemei, oh mwekid en pwihn lemei kan me kin kamaramas. (Mad. 24:12) Sises sohte mahsanih me kahpwal pwukat pahn lelohng irail kante me Siohwa ketin likidmeliehla. Ni mehlel, sapwellimen Siohwa ladu lelepek tohto kin lelohng kahpwal laud kan. (Ais. 57:1; 2 Kor. 11:25) Siohwa ele sohte pahn ketin wiahda manaman pwehn pereikitailsang kahpwal koaros, ahpw e pahn ketikihda dahme kitail anahne pwe kitail en meleilei oh ahnekihte popohl.

10. Dahme kahrehda kaunopada ong kahpwal kan ahnsou wet kin kasalehda atail pwoson? (Lepin Padahk 22:3) 

¹⁰ Ma kitail kin kaunopada mwohn kahpwal wiawi, e pahn mengei ong kitail en meleilei ni ahnsowo. Ahpw ia duwe, atail wia met kasalehda me kitail sohte kin pwoson Siohwa? Uhdahn soh. Ni mehlel, atail kin kaunopada ong kahpwal kan kin kasalehda me kitail uhdahn pwoson me e pahn ketin apwalih kitail. Ia duwen? Mahsen en Koht kaweid kitail en kaunopada ong kahpwal kan me kakete wiawi. (Wadek Lepin Padahk 22:3.) Oh nan neitail makasihn kan, mihting kan, oh pakair kan, sapwellimen Koht pwihn kin pwurupwurehng kangoange kitail en kaunopada. c Kitail  kin likih Siohwa? Ma iei, kitail pahn idawehn kaweido ni ahnsou wet, mwohn kahpwal ehu eh wiawi.

11. Dahme ke sukuhlkihsang mehn kahlemeng en Margaret?

¹¹ Tehk dahme wiawihong emen sister me adaneki Margaret. Tohndoadoahk en kopermento ndaiong ih en tangasang imweo pwehki kisiniei laud wiawi nan eh wasao. Pwehki aramas tohto nannanti en wiahkinteieu kohkohsang wasao, sidohsa kan tengla nan ahlo. Ediniei mosul parpeseng nan wehwe oh Margaret sohte kak pedoisang nan were sidohsao. Ahpw e pitila pwehki e kaunopada. E kin wa map ehu nan eh kopwowo pwehn diar ehu ahl tohrohr en tangasang wasao. E pil tangehr nan ahlo mwoweo pwe en kak esehla wasa ahn tang ie ma kahpwal ehu pwarada. Pwehki e kaunopada mwahu, Margaret pitsang kahpwalo.

12. Dahme kahrehda kitail kin idawehn kaweid kan mehn pere kitail?

¹² Pwehn pere kitail oh meteikan, tohndoadoahk en koperment kan ele pahn peki kitail en peikiong kulok en pwurala imwatail kan, kohkohsang wasa ehu, de idawehn kaweid teikan. Ekei aramas sohte men peikiong kaweid pwukat pwehki re sohte men kohkohsang arail kepwe kan. Dahme Kristian kan kin wia? Paipel padahkihong kitail: “Pwehki Kauno, kumwail uhpahiong aramas koaros me ahneki manaman, mehnda ma pil nanmwarki men pwehki eh lapalap sang kumwail de kepina kan me pekederdo sang rehn nanmwarkio.” (1 Pit. 2:13, 14) Sapwellimen Koht pwihn pil kin kihong kitail kaweid pwe kitail en dehr lelohng keper. Elder kan kin kaukaule katamankihong kitail en kihong irail neitail adres de nempehn delepwohn kapw pwe ren kak mwadang en eker kitail ma kahpwal pwarada. Ke wiahier met? Ele kitail pil alehdi kaweid duwen atail en mi wasa ehu, wasa kitail en tangala ie, oh wasahn ale dahme kitail anahne ni ahnsoun kahpwalo, de ia duwen oh iahd me kitail en sewese meteikan. Ma kitail sohte peikiong, kitail kak kahrehiong atail mour oh mour en elder kan nan keper. Tamataman me ohl lelepek pwukat kin apwahpwalih kitail. (Ipru 13:17) Margaret koasoia: “I uhdahn kamehlele me ahi idawehn kaweid en elder kan oh sapwellimen Koht pwihn doarehla ei mour.”

13. Dahme kin kahrehda peren oh popohl ong Kristian tohto me kohkohsang arail wasa?

 ¹³ Riatail Kristian tohto me anahne kohkohsang imwarail kan pwehki mahwen de pingiping en arail wehi, kin wia uwen arail kak en ahnla wekidekla kan en arail irairo oh pousehlahte papah Siohwa. Duwehte Kristian en mahs ko me tangpeseng pwehki kalokolok, irail kin pousehlahte “lohlohkiseli rongamwahu.” (Wiewia 8:4) Kalohk kin sewese irail en medemedewehte duwen Wehio a kaidehn irair apwal kan. Pwehki met, irail kin ahnekihte peren oh popohl.

14. Ia duwen kalokolok eh kak kauwehla atail popohl?

¹⁴ Kalokolok kak adihasang soahng tohto me kin sewese kitail en ahneki popohl. Kitail kin peren ni atail kin tuhpene ni saledek, kalohk ni saledek, oh wia soahng kan me kitail kin wiewia ehuehu rahn oh sohte perki en selidi. Ma kitail sohla kak wia soahng pwukat, ele kitail kak pwunodkihda oh masak dahme pahn wiawi mwuhr. E sohte sapwung en ahneki soangen pepehm pwukat. Ahpw kitail anahne kanahieng. Sises mahsanih me kalokolok kak kahrehiong sapwellime tohnpadahk kan en dipekelekel. (Sohn 16:1, 2) Eri ia duwen atail kak ahnekihte popohl ni atail lelohng kalokolok?

15. Dahme kahrehda kitail en dehr masak kalokolok? (Sohn 15:20; 16:33)

¹⁵ Mahsen en Koht padahkihong kitail: “Koaros me men mourki poadidiong Koht ni arail kin miniminiong Krais Sises pil pahn lelohng kalokolok.” (2 Tim. 3:12) Brother men me adaneki Andrei apwalki kamehlele me sapwellimen Koht ladu kan pahn lelohng kalokolok mwurin doadoahk en kalohko keinapwidi nan eh wasao. E koasoia: ‘Sounkadehde kan uhdahn tohto wasaht. Ia duwen pilismen kan ar kak salihedi kiht koaros?’ Met sohte kihong Andrei popohl, ahpw uhd kihong ih pwunod laud. Brother teikan likih Siohwa oh sohte medewe me re sohte pahn selidi. Irail ese me irail kakete selidi, ahpw irail sohte pwunodki laud duwehte Andrei. Eri Andrei pilada en pil ahneki soangen madamadauo me irail ahneki oh likih Siohwa. Sohte pwand e meleileidi, oh met e kin ahneki peren mendahki miehte kahpwal tohto. Kitail pil kak duwehte ih. Sises mahsanih me kitail en kasik kalokolok kan, ahpw e pil ketin kamehlelehiong  kitail me kitail kak ahnekihte pwoson.—Wadek Sohn 15:20; 16:33.

16. Kaweid dah me kitail anahne peikiong ni atail lelohng kalokolok?

¹⁶ Ni atail doadoahk en kalohk eh kin keinapwidi, kitail kakete ale kaweid sang ohpis en Sounkadehdehn Siohwa kan oh elder kan. Kaweid pwukat wia mehn perepatail, en tehk mwahu me kitail kin aliale padahk kan sang nan Paipel, oh sewese kitail en pousehlahte kalokalohk ni uwen me kitail kak. Wia uwen omw kak en peikiong kaweid me ke alehdi, mehnda ma ke sohte uhdahn wehwehki kahrepen omw alehdi. (Seims 3:17) Pil ehu, dehr padahkihong irail kan me sohte warohng en ese duwen riatail Kristian kan de soahng kan me kin wiawi nan mwomwohdiso.—Ekl. 3:7.

17. Duwehte wahnpoaron ko ni mwehin tepin Kristian kan, dahme kitail koasoanehdi teng en wia?

¹⁷ Ehu kahrepe me Sehdan kin uhwong sapwellimen Koht aramas akan iei pwehki irail “pwaisanki doadoahk en kadehdehda duwen Sises.” (Kaud. 12:17) Dehr mweidohng Sehdan oh eh sampah en kamasak uhk. Atail kalohk oh katohnpadahk mendahki uhwong kan kin kihong kitail peren oh popohl. Ni mwehin tepin Kristian ko, ni ahnsou me kaunen mehn Suhs ko ruwese wahnpoaron ko en uhdihsang kalohk, ohl lelepek pwukat pilada en peikiong Koht. Irail pousehlahte kalohk, oh doadoahk wet kahrehiong ren peren. (Wiewia 5:27-29, 41, 42) Ei mehlel, ni atail doadoahk eh keinapwidi, kitail anahne kanahieng ni atail kin kalohk. (Mad. 10:16) Ahpw ma kitail wia uwen atail kak, kitail pahn ahneki popohl me kohsang atail kaperenda Siohwa oh sang atail kin lohki rohng en komourla.

18. Rehn ihs me kitail kak ale popohl mehlel?

¹⁸ Kamehlele me pil ni ahnsou me uhdahn apwal, kitail kak ahneki popohl. Nan soangen ahnsou ko, kitail anahne tamataman me popohl me kitail anahne iei sapwellimen Koht popohl, me iei, popohl me Siohwa kelehpw kak ketikihda. Koapworopworki ih ni omw lelohng soumwahu lusulus, melimel de rerrer en sahpw ape, de kalokolok. Karanihte sapwellime pwihn. Kilangwohngete ahnsou kaselelo me kohkohdo. Ni omw wia met, ‘Koht en popohl pahn ketiket rehmw.’ (Pil. 4:9) Nan iren onop en mwuhr, kitail pahn koasoiapene ia duwen atail kak sewese riatail Kristian kan me lelohng kahpwal pwe ren ahneki sapwellimen Koht popohl.