1. Dahme kak wiawi mwurin emen eh wiahda dihp laud ehu?

 NAN iren onop en mwoweo, kitail sukuhlki dahme Pohl padahkihong mwomwohdiso en Korint ren wia ni ahnsou me ohl emen wiahda dihp laud ehu. Me wiahda dihpo sohte koluhla oh mwomwohdiso anahne kihsang ih nanpwungarail. Ahpw nin duwen me iren Paipel en iren onop wet kasalehda, Koht kak ketin kaweid emen en koluhla. (Rom 2:4) Ia duwen eh kin ketin doadoahngki elder kan pwe ren sewese emen en koluhla?

2-3. Dahme kitail anahne wia ma kitail esehda me emen riatail Kristian wiahda dihp laud ehu, oh dahme kahrehda?

² Ma elder kan sohte ese me emen wiahda dihp laud ehu, irail sohte kak sewese. Eri, dahme kitail anahne wia ma kitail esehda me riatail Kristian men wiahda dihp laud ehu—mehkot me kak imwikihla mwomwohdiso en kihsang ih nanpwungarail? Kitail anahne kangoange me wiahda dihp laudo en peki sawas rehn elder kan.—Ais. 1:18; Wiewia 20:28; 1 Pit. 5:2.

³ Ahpw, ia duwen ma me wiahda dihp laudo sohte men tuhwong elder kan? Eri kitail pahn pein kohla rehn elder kan oh tehk mwahu me aramaso alehdi sawas me anahn. Ni atail wia met, kitail kin kasalehda me kitail poakohng riatailo pwehki kitail ese me elder kan kak sewese. Ma aramaso sohte wekila, met pahn kauwehla eh nanpwungmwahu rehn Siohwa. E pil  kakete kauwehla adamwahu en mwomwohdiso. Eri mehnda ma met apwal, kitail kin koasoiong elder kan pwehki kitail poakohng Siohwa oh riatailo.—Mel. 27:14.

IA DUWEN ELDER KAN AR KIN SEWESE IRAIL KAN ME WIAHDA DIHP LAUD

4. Ia ahn elder kan mehn akadei ni arail tuhwong emen me wiahda dihp laud ehu?

⁴ Ni emen nan mwomwohdiso eh wiahda dihp laud ehu, elder kan kin pilada meh silimen sang nanpwungarail pwehn tuhwong aramaso. a Ohl pwukat anahne en kin mpahi oh aktikitik. Irail ese me mehnda ma irail song en sewese aramas emen, re sohte kak idingkihong emen en wekila. (Deud. 30:19) Elder kan wehwehki me kaidehn koaros pahn koluhla duwehte me Nanmwarki Depit wia. (2 Sam. 12:13) Ekei kakete pilada en dehr rong kaweid me kohsang rehn Siohwa. (Sen. 4:​6-8) Ahpw, ahn elder kan mehn akadei iei en sewese aramaso en koluhla. Dahme elder kan anahne tamataman ni arail tuhwong emen me wiahda dihp laud?

5. Madamadau dah me elder kan anahne ahneki ni arail tuhwong emen me wiahda dihp laud? (2 Timoty 2:​24-26) (Pil kilang kilel.)

⁵ Elder kan en kilengwohng me wiahda dihp laudo sihpw kesempwal men me salongala. (Luk 15:​4, 6) Ihme kahrehda ni ahnsou me irail kin tuhwong emen, irail sohte kin koasoi lemei ong de sohte kadek ong. Elder kan sohte kin medewe me ihte me re anahne wia iei idek peidek kan oh esehda dahme mehlel. Ahpw, irail pahn kasalehda irair kaselel kan me mi nan 2 Timoty 2:​24-26. (Wadek.) Elder kan kin meleilei oh kadek pwehki re kin men sewese aramaso en wekidala eh madamadau.

6. Ia duwen elder kan ar pahn kaunopada arail mohngiong mwohn arail tuhwong emen me wiahda dihp laud? (Rom 2:4)

⁶ Elder kan kin kaunopada arail mohngiong. Irail kin song kahlemengih Siohwa ni arail wiewia koaros ong me dipan men sang ni arail tamataman dahme Pohl koasoia: ‘Ni kadek Koht kin ketin songosong en kaweid uhk ken koluhla.’ (Wadek Rom 2:4.) Elder kan wia sounsilepe kei oh irail anahne idawehn sapwellimen Krais kaweid oh kahlemengih ni arail apwalih mwomwohdiso. (Ais. 11:​3, 4; Mad. 18:​18-20) Mwohn elder kan ar tuhwong me wiahda dihp laudo, irail kin kapakap ong Siohwa pwe ren kak sewese me dipano en koluhla. Irail pahn roporopki iren Paipel kan oh neitail sawasepen Paipel kan. Oh irail pahn kapakapki Siohwa en ketin sewese irail en wehwehki aramaso oh eh irair. Irail pahn  koasoiapene dahme re anahne ese duwen aramaso oh dahme kahrehda e medewehda oh wia dahme e wiahdao.—Lep. Pad. 20:5.

7-8. Ia duwen elder kan ar kak kahlemengih sapwellimen Siohwa kanengamah ni arail tuhwong emen me wiahda dihp laud?

⁷ Elder kan kin kahlemengih sapwellimen Siohwa kanengamah. Irail kin tamataman ia duwen Siohwa eh kin ketin sewese irail kan me wiahda dihp laud mahso. Karasepe, Siohwa ketin kanengamahiong Kain. E ketin padahkihong dahme pahn wiawi ma e sohte wekila oh me e pahn ketin kapaiahda ma e wekila. (Sen. 4:​6, 7) Siohwa ketin kadarala Soukohp Nadan pwehn kihong Depit kaweid. Nadan doadoahngki karasaras ehu me sewese Depit en koluhla. (2 Sam. 12:​1-7) Oh Siohwa ketin pwurupwurehng kadarala sapwellime soukohp ko rehn mehn Israel ko ni ahnsou me re kin sapeikiong ih. (Ser. 7:​24, 25) E sohte kin ketin awih sapwellime aramas ako en koluhla mwohn eh sewese irail. Ahpw, e kin ketin tiengla mwowe oh kangoange irail en koluhla.

⁸ Elder kan kin idawehn sapwellimen Siohwa mehn kahlemeng ni arail song en sewese irail kan me wiahda dihp laud. Irail kin “kanengamah” duwehte me 2 Timoty 4:2 mahsanih. Eri elder men anahne kin ahnsou koaros meleilei oh kanengamah pwehn sewese me wiahda dihp laudo en men wia dahme pwung. Ma eldero lingeringerda, aramaso kakete sohte rong kaweido de kakete sohte men koluhla.

9-10. Ia duwen elder kan ar kak sewese me wiahda dihp laudo en medemedewe dahme e wiahdao?

⁹ Elder kan kin song esehda pilipil dah kan me aramaso wiahda mwohn eh wiahda dihp laud. Karasepe, dahme kaluwetehla eh nanpwungmwahu rehn Siohwa? E uhdihsang kaukaule onop Paipel de sohla iang kalohk? E sohla kin kaukaule kapakap ong Siohwa? E sohla pelian ineng sapwung kan? Ihs me e kin werekiong? Mehn kamweit dah kan me e kin pilada? Ia duwen pilipil pwukat eh kamwakid eh madamadau oh ineng? E wehwehki ia sapwellimen Siohwa pepehm ong dahme e wiahdao?

¹⁰ Elder kan kak idek rehn aramaso peidek kan me pahn sewese en medemedewe soahng kan me kaluwetehla eh nanpwungmwahu rehn Siohwa oh kahrehiong en wiahda dihp laud. Irail kin wia met ni elen kadek oh sohte kin idek peidek oaritik kan me re sohte anahne ese. (Lep. Pad. 20:5) Patehng met, elder kan kakete doadoahngki karasaras ehu pwehn sewese aramaso en medewe eh wiewia kan oh pohnese me e sapwung, duwehte Nadan eh doadoahngki karasaras ehu pwehn sewese Depit. Mwein arail tepin tuhpeneo, aramaso pahn tepida nsensuwedkihla pilipil kan me e wiahda oh mwomwen eh madamadau. E pil kakete koluhla.

11. Dahme Sises kin ketin wiahiong me dipan kan?

¹¹ Elder kan kin nantihong kahlemengih Sises. Ni ahnsou me Sises mahseniong Sohl en Tarsus, e keinemwe: “Sohl, Sohl, dahme ke kalokalokehkin ie?” Pwehki peidek wet, Sises ketin sewese Pohl en esehda me dahme e wiewiao sapwung. (Wiewia 9:​3-6) Oh duwen “liho Sesepel,” Sises mahsanih: “I kihong ih ahnsou en koluhla.”—Kaud. 2:​20, 21.

12-13. Ele ia duwen elder kan ar kin wiahda ahnsou pwe me wiahda dihp laudo en koluhla? (Pil kilang kilel.)

¹² Elder kan kin kahlemengih Sises oh sohte kin mwadang en pilada me aramaso sohte men koluhla. Ele ekei pahn koluhla ni ahnsou me elder kan tepin tuhwong irail. Ahpw ele ekei pahn anahne ahnsou laud. Eri ele elder kan kin koasoanehdi en tuhwong aramaso tohtohsang pak ehu. Mwein mwurin arail tepin tuhpeneo, Kristian me wiahda dihp laudo  pahn tepida medemedewe kanahieng dahme re padahkihong. Ele e pahn kasalehda aktikitik oh peki Siohwa en ketin mahkohng ih. (Mel. 32:5; 38:18) Eri ni arail pahn pwurehng tuhpene, ele eh madamadau pahn weksang ahnsou me re tepin tuhpeneo.

¹³ Pwehn sewese me wiahda dihp laudo en koluhla, elder kan kin kasalehda kadek oh wehwehki eh pepehm. Irail kin kapakapki Siohwa en ketin kapaiahda arail nannanti oh koapworopworki me riarailo pahn pwurehng ahneki madamadau pwung oh koluhla.—2 Tim. 2:​25, 26.

14. Ihs me konehng ale kaping ni me dipan eh koluhla, oh dahme kahrehda?

¹⁴ Ma me wiahda dihp laudo koluhla, kitail kin uhdahn perenkihda! (Luk 15:​7, 10) Mendahki elder kan kin wia uwen arail kak en sewese me wiahda dihp laudo en koluhla, ihs me kin uhdahn sewese en wekila? Taman dahme Pohl ntingihdi duwen irail pwukat: “Ele Koht pahn ketin mweidohng irail en koluhla.” (2 Tim. 2:25) Eri Siohwa a kaidehn aramas me kin sewese Kristian men en wekidala eh madamadau oh wiewia. Pohl kawehwehda soahng mwahu kan me kin wiawi mwurin emen eh koluhla. Ahn aramaso eh ese padahk mehlel kak laudla, e kak pwurehng ahneki madamadau pwung, oh kak pitsang ahn Sehdan lidip kan.

15. Ia duwen elder kan ar kak pousehlahte sewese emen me wiahda dihp laud?

¹⁵ Ni emen eh koluhla, elder kan pahn pousehlahte mwemweitla reh pwehn sewese kakehlaka eh pwoson, oh sewese en pousehlahte pelianda ahn Sehdan kasongosong kan oh wia dahme pwung. (Ipru 12:​12, 13) Ei mehlel, elder kan sohte kin padahkihong meteikan oaritikpen dahme me dipano wiahda. Ahpw, dahme mwomwohdiso anahne ese?

“PANAWIH IRAIL . . . MWOHN KOAROS ME KILANG”

16. Nin duwen me 1 Timoty 5:20 mahsanih, ihs irail kan “me kilang” me Pohl koasoakoasoia?

¹⁶ Wadek 1 Timoty 5:20. Pohl padahkihong Timoty, pil emen elder, en panawih irail kan me wiahda dihp mwohn “koaros me  kilang.” Pohl sohte ndinda me irail anahne panawih me wiahda dihp laudo mwohn mwomwohdiso pwon. Ahpw, e koasoakoasoia irail kan me eseier sapwung dah me wiawi. Ele ekei irail pein kilang dahme wiawi, de ele aramaso padahkihong irail dahme e wiao. Elder ko pahn ni elen loalokong padahkihong irail pwukatte me irail apwalialahr irairo oh me me wiahda dihp laudo aleier peneu.

17. Ma me tohto esehier me emen wiahda dihp laud ehu de pahn esehda, pakair dah me pahn wiawi, oh dahme kahrehda?

¹⁷ Ekei pak, me tohto nan mwomwohdiso esehier me emen wiahda dihp laud ehu, de ele re pahn esehda duwen met. Nan soangen irairo, irail kan “me kilang” kin pidada mwomwohdiso pwon. Eri elder men pahn pakairkihong mwomwohdiso me brother men de sister men ale peneu. Dahme kahrehda? Pohl koasoia: “Pwe en wia mehn kataman ehu ong meteikan” pwe ren dehr wiahda dihp laud.

18. Ma emen me tikitiksang sounpar 18 wiahda dihp laud ehu, dahme elder kan pahn wia? (Pil kilang kilel.)

¹⁸ Dahme elder kan kin wia ni emen me papidaisla oh tikitiksang sounpar 18 wiahda dihp laud ehu? Elder kan pahn koasoanehdi elder riemen en tuhwong me pwulopwulo oh eh pahpa nohno Kristian ko. b Elder ko pahn idek rehn pahpao oh nohnou ma miehier mehkot ira wia pwehn sewese serio en wiahda wekidekla kan me anahn oh koluhla. Ma serio rong kaweid en pahpa nohnou oh wekidala eh madamadau oh wiewia, elder riemeno kakete pilada en mweidohng pahpa nohnou en pousehlahte sewese serio. Elder kan ese  me Siohwa ketikihong pahpa nohnou pwukoa en kapwungala neira serio ni elen limpoak. (Deud. 6:​6, 7; Lep. Pad. 6:20; 22:6; Ep. 6:​2-4) Eri mwuhr, elder kan pahn ekei pak koasoiong papah nohnou pwehn tehk mwahu me serio alehdi sawas me anahn. Ahpw, dahme elder kan kin wia ma serio pousehlahte wia dahme sapwung? Ma met wiawi, elder silimen pahn tuhwong serio iangahki eh papah nohno Kristian ko.

“SIOHWA ME DIREN LIMPOAK OH KADEK KALAHNGAN”

19. Ia duwen elder kan ar kak kahlemengih Siohwa ni arail tuhwong emen me wiahda dihp laud ehu?

¹⁹ Siohwa ketin kupwurki elder kan en perehsang mwomwohdiso irail kan me sohte kin peikiong sapwellime kehkehlik kan. (1 Kor. 5:7) Ahpw irail pil kin wia uwen arail kak koaros pwehn sewese emen en koluhla ma kak. Ni arail kin sewese aramaso, irail kin koapworopworki me e pahn wekila. Dahme kahrehda? Pwehki irail men kahlemengih Siohwa me kin ketin “diren limpoak oh kadek kalahngan.” (Seims 5:11) Wahnpoaron Sohn kin kasalehda limpoak ong rie Kristian kan. E ntingihedi: “Nei kisin seri ko, I ntingkiwohng kumwail mepwukat pwe kumwail en dehr wiahda dihp. Ahpw ma emen wiahda dihp, sounsawaspatail mie rehn Sahmo, iei Sises Krais, me pwung men.”—1 Sohn 2:1.

20. Dahme kitail pahn koasoiapene nan iren onop en mwuhr?

²⁰ E kansensuwed me ekei pak Kristian men sohte men koluhla. Ma met wiawi, mwomwohdiso anahne kihsang ih nanpwungarail. Dahme elder kan kin wia ma met wiawi? Kitail pahn koasoiapene ire wet nan iren onop en mwuhr.