1. Irair dahieu me wahnpoaron Sohn mi loale ni imwin mwehin tepin Kristian kan?

 NI IMWIN mwehin tepin Kristian kan, wahnpoaron Sohn mi nan irair apwal ehu. E mahlahr oh wie sensel pohn dekehn Padmos, oh ele ih kelehpw me momour nanpwungen wahnpoaron ko. (Kaud. 1:9) E ese me irail me uhwong kan kin pitipitih mwomwohdiso kan oh kahrehiong irail en tohrohrpeseng. E mwomwen me e pahn kereniong sohla mie Kristian mehlel kan.​—Sud 4; Kaud. 2:15, 20; 3:1, 17.

2. Nin duwen me Kaudiahl 7:9-14 mahsanih, kaudiahl dahieu me Sohn kilangada? (Menlau kilang kilel ni kilin Kahn Iroir wet.)

² Erein eh mi nan irair apwal pwukat, Sohn alehdi kaudiahl kapwuriamwei ehu me pid kokohp ehu. Nan kaudiahl wet, tohnleng kan alehdi kaweid ren kolokol ahng kehlail kan en kahn kamakam kowahlapo lao imwiseklahn kileldi en pwihn en ladu kan. (Kaud. 7:1-3) Pwihn wet wiawihkihda meh 144,000 me pahn iang Sises ketin kakaun nanleng. (Luk 12:32; Kaud. 7:4) Sohn pil koasoia duwen pwihn tohrohr ehu me inenen tohto me kahrehda e ngihl laud nda: “Kilang!”​—met ele kasalehda eh uhdahn pwuriamweikihla mehkot me e sohte kasik. Dahme Sohn kilangada? “Pokon kalaimwun ehu me aramas sohte kak wadekedi uwen tohto. Re kohsang wehi koaros, keinek koaros, aramas koaros oh lokaia koaros, oh re uh mwohn mwoahlo oh mwohn Sihmpwulo.” (Wadek Kaudiahl 7:9-14.) Medewehla ia uwen Sohn eh perenda ni eh esehda me aramas tohto pahn wiewia kaudok mehlel ni ahnsou kohkohdo!

3. (a) Dahme kahrehda kaudiahl me Sohn kilangadao kak kakehlakahda atail pwoson? (b) Dahme kitail pahn sukuhlki nan iren onop wet?

³ Kaudiahlo uhdahn kakehlakahda ahn Sohn pwoson. Ia  uwen met eh pahn kakehlakahda atail pwoson, pwehki atail miher ni ahnsou me kaudiahl wet pweida! Kitail kilangehr pokonpenehn aramas rar rar kei me ahneki koapworopwor en pitsang kahn kamakam kowahlapo oh mour kohkohlahte nin sampah. Nan iren onop wet, kitail pahn sukuhlki ia duwen Siohwa eh ketin kasalehda daulih sounpar welihsek samwalahro ihs pokon kalaimwun en sapwellime aramas akan. Kitail pil pahn koasoiapene soahng riau duwen pokono: (1) uwen tohtohn irail oh (2) re kohsang sampah pwon. Mepwukat pahn kakehlakahda pwoson en koaros me ahneki koapworopwor en iang kisehn pwihn pai wet.

4. Padahk mehlel en Paipel dahieu me irail kan me dene irail Kristian kei sohte wehwehki, oh ia duwen Tohnsukuhl kan en Paipel ar weksang irail?

⁴ Irail kan me dene irail Kristian kei sohte kin padahngki padahk mehlel en Paipel me mahsanih me ehu rahn aramas peik kan pahn mour kohkohlahte nin sampah. (2 Kor. 4:3, 4) Rahnwet, pali laud en pelien lamalam kan me dene irail Kristian kei kin padahngki me aramas mwahu kan koaros pahn kohdahla nanleng ahnsou me irail mehla. Ahpw met weksang padahk en pwihn tikitik en Tohnsukuhl kan en Paipel me kin wiahda Kahn Iroir sangete pahr 1879. Re wehwehki me Koht pahn ketin pwurehng kaparadaisihala sampah oh me aramas rar rar kei me kin peik pahn mour nin sampah​—kaidehn nanleng. Ahpw, ahnsou anahn pwe irail en wehwehkihla ni sansal ihs aramas peik pwukat.​—Mad. 6:10.

5. Dahme Tohnsukuhl kan en Paipel kamehlele duwen meh 144,000 ko?

⁵ Tohnsukuhl kan en Paipel pil wehwehkihda mwahu sang Pwuhk Sarawi me ekei pahn “pweipweida sang nin sampah” pwehn iang Sises ketin kakaun nanleng. (Kaud. 14:3) Pwihn wet wiawihkihda Kristian 144,000 me kin ngoang oh poadidi oh kin papah Koht ni lelepek erein ar mi nin sampah. Ahpw ia duwen pokon kalaimwuno?

6. Dahme Tohnsukuhl kan en Paipel kamehlele duwen pokon kalaimwuno?

⁶ Nan eh kaudiahlo, Sohn kilangada pwihno ar “uh mwohn mwoahlo oh mwohn Sihmpwulo.” (Kaud. 7:9) Mahsen pwukat kahrehiong Tohnsukuhl kan en Paipel ren medewe me pokon kalaimwuno pahn kousoan nanleng duwehte meh 144,000 ko. Ma meh 144,000 ko oh pokon kalaimwuno kousoan nanleng, ia duwen ehu pwihn ar pahn weksang pwihn teio? Tohnsukuhl kan en Paipel medewe me pokon kalaimwuno ele wiawihkihda Kristian kan me sohte kin uhdahn peikiong Koht ni arail mi nin sampah. Mendahki arail ahneki mour mwakelekel, ekei irail kin mihmihte nan pelien lamalam kan me dene irail Kristian kei. Tohnsukuhl kan en Paipel kasalehda me irail pwukat kin kasalehda ngoang ahpw e sohte itar pwe ren iang Sises ketin kakaun. Pwehki arail limpoak ong Koht sohte uhdahn kehlail, pokon kalaimwuno pahn mi nanleng mwohn mwoahlo ahpw kaidehn en mwohd pohn mwoahl kan.

7. Ihs me Tohnsukuhl en Paipel ko kamehlele me pahn mour nin sampah erein Pahr Kido, oh dahme re kamehlele duwen me lelepek kan mahso?

⁷ Eri ihs me pahn kousoan nin sampah? Tohnsukuhl kan en Paipel kamehlele me mwurin meh 144,000 ko oh pokon kalaimwuno ar pokonpene nanleng, aramas rar rar teikan pahn mweimweida en kousoan nin sampah pwehn ahneki kapai kan en Kaundahn Krais Pahr Kido. Tohnsukuhl en Paipel ko sohte kasik me aramas rar rar pwukat pahn papah Siohwa mwohn tepidahn Kaundahn Krais. Re medewe me pwihn wet pahn sukuhlki sapwellimen Siohwa ahl akan erein Pahr Kido. Mwuhr, irail kan me kin peikiong sapwellimen  Siohwa koasoandi kan pahn ahneki kapai en mour kohkohlahte nin sampah ahpw irail kan me uhwongada pahn sohrala. Tohnsukuhl en Paipel ko pil medewe me ele ekei me pahn papah nin duwen “nanmwarki kei” erein ahnsowo​—iangahki me iasada lelepek kan me mehla mwohn Krais—​pahn ale keting en mour nanleng ni imwin Pahr Kido.​—Mel. 45:16.

8. Pwihn siluh dahieu me mwomwen iang kisehn sapwellimen Koht koasoandi?

⁸ Eri, Tohnsukuhl en Paipel ko medewe me mie pwihn siluh: (1) meh 144,000 ko, me pahn iang Sises ketin kakaun nanleng; (2) pokon kalaimwun en Kristian kan me sohte kin uhdahn ngoang, me pahn kesihnen mwohn mwoalen Sises nanleng; oh (3) aramas rar rar kan me pahn sukuhlki sapwellimen Siohwa ahl akan nin sampah erein Kaundahn Krais Pahr Kido. b Ahpw mwuhr, Siohwa ketin sewese irail en wehwehkihla ire wet ni sansal.​—Lep. Pad. 4:18.

9. (a) Ni ahl dah me pokon kalaimwuno kak kesihnen “mwohn mwoahlo oh mwohn Sihmpwulo”? (b) Dahme kahrehda kawehwehn Kaudiahl 7:9 uhdahn wehwe mwahu?

⁹ Nan pahr 1935, e sansalda ihs pokon kalaimwuno me Sohn kilangada nan kaudiahlo. Sounkadehdehn Siohwa kan esehda me pokon kalaimwuno sohte anahne mi nanleng pwehn kesihnen “mwohn mwoahlo oh mwohn Sihmpwulo.” Ahpw, re pahn wia met ni mwomwen karasaras ehu. Mendahki re pahn kousoan sampah, pokon kalaimwuno kak kesihnen “mwohn mwoahlo” sang ni arail pohnese oh uhpah sapwellimen Siohwa pwuhng en kaunda. (Ais. 66:1) Re kak kesihnen “mwohn Sihmpwulo” sang ni arail kin pwoson sapwellimen Sises meirong en pweinen pweipwei sapahlo. Duwehte met, nan Madiu 25:31, 32, “tohnwehi koaros”​—iangahki me suwed kan—​pahn ‘pokonpene mwohn’ Sises me ketiket pohn mwoale lingalingo. E sansal me tohnwehi pwukat koaros sohte mi nanleng ahpw re mi sampah. Eri e uhdahn sansal kawehwe wet. E kawehwehda dahme kahrehda Paipel sohte mahsanih me pokon kalaimwuno kohdahla nanleng. Pwihn ehute me ahneki koapworopwor en mour soutuk nanleng, me iei meh 144,000 ko, me pahn iang Sises ketin “kaunda sampah nin duwen nanmwarki kei.”​—Kaud. 5:10.

10. Dahme kahrehda pokon kalaimwuno anahne sukuhlki sapwellimen Siohwa ahl kan mwohn Pahr Kido?

¹⁰ Sangete pahr 1935, Sounkadehdehn Siohwa kan wehwehkier me pokon kalaimwuno nan kaudiahl me Sohn kilangadao iei pwihn en Kristian lelepek kan me ahneki koapworopwor en mour kohkohlahte nin sampah. Pwehn pitsang kahn kamakam kowahlapo, pokon kalaimwuno anahne sukuhlki sapwellimen Siohwa ahl kan mwohn Pahr Kido tepida. Re anahne kasalehda pwoson kehlail pwe ren “kakohng pitsang mepwukat koaros me uhdahn pahn wiawi” mwohn Kaundahn Krais Pahr Kido.​—Luk 21:34-36.

11. Dahme kahrehda ekei Tohnsukuhl kan en Paipel ele medewe me ekei pahn kakete kohdahla nanleng mwurin Pahr Kido?

¹¹ Ahpw ia duwen madamadau me dene ekei me lelepek sang sampah pahn kohdahla nanleng mwurin Pahr Kido? Padahk me dene met kak wiawi pwarada sounpar kan samwalahro nan Kahn Iroir (lokaiahn wai) en February 15, 1913. Emen kak medewe, ‘Dahme kahrehda me lelepek kan mahso ahneki koapworopwor en kousoan nin sampah kelehpw ahpw Kristian kan me sohte kin uhdahn lelepek ahneki koapworopwor en mour nanleng?’ E ahneki soangen madamadau wet pwehki madamadau sapwung riau: (1) pokon kalaimwuno pahn mi nanleng oh (2) pokon kalaimwuno wiawihkihda  Kristian kan me sohte kin uhdahn ngoang.

12-13. Dahme me keidi kan oh pokon kalaimwuno ese duwen ketingparailo?

¹² Ahpw nin duwen me kitail kilangehr, sangete pahr 1935, Sounkadehdehn Siohwa kan wehwehkihier ni sansal me irail kan me pahn pitsang Armakedon iei pokon kalaimwuno me Sohn kilangada nan Kaudiahlo. Re pahn “kohieisang nan kahn kamakam kowahlap” nin sampah, oh re pahn “pousehlahte weriwer ni ngihl laud, ndinda: ‘Komourpat kohsang rehn at Koht, me ketiket nan mwoahlo, oh sang rehn Sihmpwulo.’” (Kaud. 7:10, 14) Pwuhk Sarawi pil padahngki me irail kan me pahn iasadahng mour nanleng pahn ale “mehkot me mwahusang” irail me lelepek kan mahso. (Ipru 11:40) Riatail Kristian kan tepida luke ni ngoang aramas akan en papah Siohwa oh ahneki koapworopwor en mour kohkohlahte nin sampah.

¹³ Irail me wia kisehn pokon kalaimwuno kin uhdahn perenki koapworopwor wet. Re wehwehki me Siohwa pahn ketin pilada ia wasa sapwellime tohnkaudok lelepek kan pahn papah ih, mehnda ma nanleng de nin sampah. Me keidi kan oh pokon kalaimwuno pohnese me mie ketingparail ihte pwehki sapwellimen Siohwa kadek sapan me sansalda sang pweinen pweipwei sapahl en Sises Krais.​—Rom 3:24.

14. Mwurin pahr 1935, dahme kahrehda me tohto medewe ia duwen kokohp duwen pokon kalaimwuno eh pahn pweida?

¹⁴ Mwurin sapwellimen Siohwa aramas akan ar wehwehkihla padahk pwukat nan pahr 1935, me tohto kin medemedewehte ia duwen irail kan me ahneki koapworopwor en mour nin sampah ar kak wiahla pokon uhdahn kalaimwun ehu. Karasepe, Ronald Parkin sounpar 12 ni ahnsou me sansalda ihs pokon kalaimwuno. E nda: “Ni ahnsowo, mpen sounkalohk 56,000 me mie nin sampah oh me tohto, ele pali laud en irail, wia me keidi kei. Eri pokon kalaimwuno ele mwomwen sohte uhdahn tohto.”

15. Ia duwen pokonpenehn pokon kalaimwuno eh pousehlahte kekeirda?

¹⁵ Ahpw sounpar kan mwuri, misineri kan pekederlahng sahpw tohto, oh Sounkadehdehn Siohwa kan wie tohtohla. Mwuhr, nan pahr 1968, ehu prokram en onop Paipel tepida ni arail doadoahngki pwuhko Padahk Mehlel me Kahluwalahng Mour Soutuk. Ahl mengei me e kawehwehda duwen padahk mehlel en Paipel kahrehiong me aktikitik tohto en men esehla Siohwa laudsang mahs. Erein sounpar pahieu mwurin met, tohnpadahk kapw daulih meh limelopw papidaisla. Ni pelien lamalam en Kadolik eh sohla nohn kehlail nan Latin America  oh sahpw teikan, oh pil doadoahk en kalohk sohla keinapwidi nan palimese en Iurop oh ekei wasa nan Aperika, aramas rar rar kei pil papidaisla. (Ais. 60:22) Sounpar kan me keren, sapwellimen Siohwa pwihn wiahda wiepe mwahu tohto teikan pwehn sewese aramas en esehla dahme Paipel kin padahngki. Eri e uhdahn sansal me pokon kalaimwuno, me met dauliher meh welirar, pokonpenehier.

16. Sang ia wasa me pokon kalaimwuno pahn kohsang?

¹⁶ Ni Sohn eh ntingihedi duwen kaudiahl me e kilangadao, e nda me pokon kalaimwuno pahn kohsang “wehi koaros, keinek koaros, aramas koaros oh lokaia koaros.” Soukohp Sekaraia kohpada mwowe mehkot me duwehte met. E ntingihedi: “Ni rahn pwuko mehn liki ehk pahn kohdo rehn mehn Suhs men oh nda, ‘Se pahn ianguhkala nan omw palien lamalam en, pwe se rong me Koht kin ketin ieiang uhk.’”​—Sek. 8:23.

17. Dahme wiawi pwehn sewese aramas akan sang wehi oh lokaia koaros?

¹⁷ Sounkadehdehn Siohwa kan ese me pwe aramas akan sang lokaia koaros en pokonpene, rongamwahwo pahn anahne lohkpeseng ni lokaia tohto. Kitail kin kawehwehda sawaspen Paipel kan daulih sounpar 130, ahpw  met kitail wia doadoahk en kawehwe laudsang mahs ni lokaia epwiki kei. E sansal me Siohwa ketin wiahda manaman ehu ahnsou wet—kapokonepene pokon kalaimwuno sang wehi kan koaros. Pwehki padahk mehlel mie ni lokaia tohto, pokon wet me kohsang wasa koaros nin sampah kak miniminpene oh kaudok. Oh me tohto ese duwen Sounkadehde kan ar kin kalohk ni ngoang oh limpoakpene nin duwen pirien kei. Ia uwen met eh kin kakehlakahda atail pwoson!​—Mad. 24:14; Sohn 13:35.

18. (a) Nin duwen me Aiseia 46:10, 11 mahsanih, dahme kahrehda kitail sohte pwuriamweiki me Siohwa ketin kapwaiadahr kokohpo duwen pokon kalaimwuno? (b) Dahme kahrehda irail kan me ahneki koapworopwor en kousoan nin sampah sohte pehm me re katihasang kapai ehu?

¹⁸ Kitail uhdahn kasikasik kokohp en pokon kalaimwuno! Kitail sohte pwuriamweikihla me Siohwa ketin kapwaiadahr kokohpo ni ahl ehu me uhdahn kaselel. (Wadek Aiseia 46:10, 11.) Irail kan nan pokon kalaimwuno uhdahn kalahnganki koapworopwor me Siohwa ketikihong irail. Re sohte pehm me re katihasang kapai ehu pwehki re sohte iang keikihdi sapwellimen Koht manaman pwehn iang Sises ketin papah nanleng. Nan Paipel, kitail wadek duwen ohl oh lih lelepek kan me sapwellimen Koht manaman kin kamwakid; ahpw re sohte iang kisehn meh 144,000 ko. Sohn Sounpapidaiso iei emen irail. (Mad. 11:11) Depit pil emen. (Wiewia 2:34) Ira oh pil me tohto teikan pahn iasada nan paradais nin sampah. Irail koaros, iangahki pokon kalaimwuno, pahn ahneki ahnsou mwahu en kasalehda arail loalopwoatohng Siohwa oh sapwellime kaunda.

19. Ia duwen pweidahn kaudiahl me Sohn kilangadao duwen pokon kalaimwuno eh kasalehda uwen karuwaru en ahnsou me kitail mi loale?

¹⁹ Sohte pak ehu nan poadopoad en aramas me Koht ketin kapokonepene aramas rar rar kei sang wehi koaros. Mehnda ma kitail ahneki koapworopwor en mour nanleng de sampah, kitail anahne sewese uwen tohtohn aramas me kitail kak pwe ren wiahla kisehn pokon kalaimwun en “sihpw teikan.” (Sohn 10:16) Ahnsou keren, Siohwa pahn ketikihdo kahn kamakam kowahlapo me kokohpdahr pwehn kasohrehla koperment oh pelien lamalam kan me kahrehda lokolok laud ong aramas akan. Ia uwen met eh uhdahn wia pwais kaselel ehu ong koaros me wia kisehn pokon kalaimwuno en papah Siohwa nin sampah kohkohlahte!​—Kaud. 7:14.