1-2. Ia wekpeseng en nanmwarki riemeno, oh peidek dah kan me kitail pahn koasoiapene?

KITAIL pahn koasoiapene duwen nanmwarki riemen mahso. Emen kaunda keinek eisek en wehin Israel, oh emen kaunda keinek riau en wehin Suda. Ira sohte momour ni ahnsou ehute, ahpw ira wia soahng tohto me duwepenehte. Nanmwarki riemen ko koaros uhwongada Siohwa oh kahrehiong sapwellime aramas akan en wiahda dihp. Ira koaros kin kaudokiong dikedik kan oh kin kamaramas. Ahpw, mie wekpeseng en nanpwungen ohl riemen pwukat. Emen ira doulahte wia soahng suwed kan lao e mehla, ahpw emen koluhla oh ale mahkpen soahng suwed kan me e wiahda. Ihs ira?

² Adara ko iei Eihap, nanmwarki en Israel, oh Manase, nanmwarki en Suda. Wekpeseng en ohl riemen pwukat kak padahkihong kitail duwen ire ehu me uhdahn kesempwal, me iei koluhla. (Wiewia 17:30; Rom 3:23) Dahkot koluhla, oh ia duwen atail kak kasalehda me kitail koluhla? Kitail anahne ese duwen met pwehki kitail men Siohwa en ketin mahkohng kitail ni atail kin wiahda dihp. Pwehn sapengala peidek pwukat, kitail pahn koasoiapene mouren nanmwarki riemen pwukat oh kilang dahme kitail kak sukuhlkihsang ara mehn kahlemeng. Mwuri kitail pahn kilang dahme Sises ketin padahngki duwen koluhla.

3. Soangen nanmwarki dahmen Eihap?

³ Eihap me keisimen en nanmwarki en keinek eisek en wehin Israel. E pwoudkihla Sesepel, nein nanmwarki en Saidon serepein, wehi kepwehpwe ehu sang paliepeng. Ara pwopwoudida kak kahrehiong sapwen Israel en kepwehpwehla. Ahpw e pil  kauwehla nanpwungmwahu me wehin Israel kin ahneki rehn Siohwa. Sesepel kin kaudokiong Paal, oh e kin kahrehiong Eihap en kangoange aramas akan en iang kaudok kasaut me pidada tiahk samin en netiki paliwar oh pil meirongki seri nan tehnpas sarawio. Erein Sesepel eh wia lih nanmwarki, sapwellimen Siohwa soukohp koaros mi nan keper. Sesepel pil kemehla soukohp tohto. (1 Nan. 18:13) Eihap “wiahda dihp ong KAUN-O laudsang nanmwarkien mwowe kan.” (1 Nan. 16:30) Siohwa sohte ketin pohnsehsehla dahme Eihap oh Sesepel wiewia. Ahpw Siohwa ketin kasalehda mahk oh poaronehla Elaisa en kangoange aramas ako en wekila oh papah ih mwohn eh pahn pwandala. Ahpw Eihap oh Sesepel sohte dukiong.

4. Dahme Siohwa ketin mahsanih me e pahn ketin wiahiong Eihap, oh ia duwen Eihap eh mwekidki met?

⁴ Kedekedeo, Siohwa sohla ketin kanengamah. E ketin poaronehla Elaisa en padahkihong Eihap oh Sesepel ia duwen eh pahn ketin kaloke ira. Ara peneinei pwon pahn kamakamala. En Elaisa koasoio uhdahn kansensuwedihada Eihap! Eri, ohl aklapalapo aktikitikla.​—1 Nan. 21:19-29.

5-6. Ia duwen atail ese me Eihap sohte koluhla mehlel?

⁵ Mendahki Eihap aktikitikla ahnsowo, eh wiewia kan mwuhr kasalehda me e sohte koluhla mehlel. E sohte song en kihsang kaudok en Paal nan eh wehio. E pil sohte kangoange aramas akan en kaudokiong Siohwa. Eihap pil wiahda soahng teikan me kadehdehda me e sohte uhdahn koluhla.

⁶ Mwuhr, Eihap peki Nanmwarki Seosopat en Suda en iangih mahweniong mehn Siria kan. Seosapat wia Nanmwarki mwahu men me kin likih Siohwa, oh e nda me ira en peki emen sapwellimen Siohwa soukohp ko en padahkihong ira dahme ira anahne wia mwohn ara kohla mahwen. Eihap sohte pwungki met, oh e nda: “Ei, pil mie emen, Maikaia, nein Imla. Ahpw I suwedki, pwehki eh sohte kin kohpada mehkot me mwahuwong ie, ahpw ahnsou koaros mehkot me kin suwediong ie.” Mendahki met, ira kohla rehn soukohp Maikaia. Dahme Eihap ndao pwung. Soukohpo kohpada mehkot suwed ong Eihap! Eihap sohte koluhla oh peki Siohwa en ketin mahkohng ih, ahpw e kesehlong soukohpo nan imweteng. (1 Nan. 22:7-9, 23, 27) Eihap kak salihedi Maikaia, ahpw e sohte kak kauhdi kokohpo sang eh pahn pweida. Nan mahweno, Eihap kamakamala.​—1 Nan. 22:34-38.

7. Ia sapwellimen Siohwa madamadau ong Eihap mwurin eh mehla?

⁷ Mwurin Eihap mehla, Siohwa ketin kasalehda ia sapwellime madamadau duwen ohl menet. Ni ahnsou me Nanmwarki Seosopat pwurala imweo, Siohwa ketin poaronehla soukohp Sehu en padahkihong me e sapwung en sewese Eihap. Soukohpo nda: “Komwi kupwukupwure me tiahk mwahu ehu sewesehda me suwed akan oh uhpalihki me kin kailongki KAUN-O?” (2 Kron. 19:1, 2) Medewehla met: Ma Eihap koluhla mehlel, soukohpo sohte pahn ndahki ih ohl suwed men me kailongki Siohwa. Eri, mendahki Eihap kasalehda me e ekis koluhla, e sohte uhdahn koluhla mehlel.

8. Dahme kitail kak sukuhlkihsang mehn kahlemeng en Eihap duwen en koluhla?

⁸ Dahme kitail kak sukuhlkihsang mehn kahlemeng en Eihap? Ni ahnsou me Elaisa padahkihong Eihap me Siohwa pahn ketin kaloke ih oh eh peneineio, nin tapio Eihap aktikitikla. E wia dahme pwung. Ahpw, eh wiewia kan mwuhr kasalehda me e sohte koluhla mehlel. Eri, pwehn koluhla, kitail anahne wia laudsang en ndahte me kitail nsensuwedkihla atail sapwung kan. Met kitail pahn  koasoiapene dahme kitail kak sukuhlkihsang Manase duwen ia wehwehn koluhla mehlel.

9. Soangen nanmwarki dahmen Manase?

⁹ Mpen sounpar riepwiki mwurin mwo, Manase wiahla nanmwarki en Suda. Dipe kan ele suwedsang en Eihap ko! Paipel mahsanih: “E wiahda dihp lapalap ong KAUN-O oh kahngiangihadahr.” (2 Kron. 33:1-9) Manase wiahda pei sarawi en koht likamw kan, oh kihlong dikedik ehu, ele sansal en emen koht lih likamw, nan sapwellimen Siohwa tehnpas sarawio. Manase kin wia tiahk en akmanaman, kosetipw, oh katieni. E pil “kemelahr aramas mwakelekel tohto.” E kemehla aramas tohto oh pil “wiahkihla meirong isihs sapwellime pwutak” ong koht likamw kan.​—2 Nan. 21:6, 7, 10, 11, 16.

10. Ia duwen Siohwa eh ketin panawih Manase, oh ia duwen Manase eh mwekidki met?

¹⁰ Duwehte Eihap, Manase sohte dukiong kaweid kan me sapwellimen Siohwa soukohp ko padahkihong ih. Kedekedeo, Siohwa eri “ketin mweidohng kaun akan en karis en mehn Asiria en mahweniong Suda. Re kalowehdi Manase, doakoahlong kehs nan paliwere, oh salihedi oh walahng Papilon.” Ni ahnsou me e mi nan imweteng nan Papilon, e mwomwen me Manase medemedewe laud dahme e wiahda. E ahpw “aktikitikla, sohpeiong KAUN-O, eh Koht.” E pil wia laudsang met. E “peki sapwellime sawas.” Ohl suwed menet tepida wekila. E tepida wiahkihla Siohwa “eh Koht” oh kin kapakap ong ih ni ngidingid.​—2 Kron. 33:10-13.

11. Nin duwen me 2 Kronikel 33:15, 16 mahsanih, ia duwen Manase eh kasalehda me e koluhla mehlel?

¹¹ Kedekedeo, Siohwa ketin sapengala ahn Manase kapakap kan. E kak uhdahn ketin mwahngih me Manase uhdahn wekila pwehki dahme Manase kin kapakapki. Eri Siohwa ketin karonge ni Manase eh pekimahngki dipe kan oh ketin mweidohng en pwurehng wiahla nanmwarki. Manase wia uwen eh kak pwehn kadehdehda me e koluhla mehlel. E wia dahme Eihap sohte wia. Eh wiewia kan wekila. E uhwongada kaudok likamw oh kangoange aramas akan en kaudokiong Siohwa. (Wadek 2 Kronikel 33:15, 16.) Manase anahne eimah oh pwoson pwehn wia met, pwehki mwohn eh koluhla, e kin wia mehn kahlemeng suwed ong eh peneineio, nah lapalap kan, oh sapwellimen aramas akan erein sounpar tohto. Ahpw, ni eh mahlahr, e kin song en kamwahwihala ekei kahpwal kan me e wiahda. Ele e wia mehn kahlemeng mwahu ong nein nah pwutako pwutak Sosaia, me mwuhr wiahla nanmwarki uhdahn mwahu men.​—2 Nan. 22:1, 2.

12. Dahme kitail kak sukuhlkihsang ahn Manase mehn kahlemeng duwen koluhla?

¹² Dahme kitail kak sukuhlkihsang mehn kahlemeng en Manase? E aktikitikla oh pil wia laudsang met. E kapakap oh peki mahk.  E wekidala eh tiahk kan. E doadoahk laud pwehn kamwahwihala kahpwal kan me e wiahda, oh wia uwen eh kak en kaudokiong Siohwa oh sewese meteikan ren pil wia duwehte. Ahn Manase mehn kahlemeng kin sewese irail kan me kin wia soahng kan me uhdahn suwed. Dahme wiawihong Manase kadehdehda me Siohwa Koht “me kupwur mwahu oh diren mahk ong kiht.” (Mel. 86:5) Siohwa pahn ketin mahkohng irail kan me koluhla mehlel.

13. Menlau kihda ehu karasaras duwen koluhla.

¹³ Manase wia laudsang en ndahte me e nsensuwedkihla eh sapwung kan. Met padahkihong kitail mehkot kesempwal duwen koluhla mehlel. Medewehla karasaras wet: Ke kohla wasahn netiki pilawa ehu oh ke pahn ale keik. Ahpw me net ong uhko kihong uhk kutohr ehu a kaidehn keik. Ke pahn peren? Uhdahn soh! Ia duwe, e pahn sawas ma tohndoadoahko kawehwehiong uhk me kutohro wia mehkot kesempwal pwehn wiahda keiko? Pil soh! Duwehte met, Siohwa ketin kupwurki me dipan kan en koluhla. Ma me dipano suwedkihda dipeo, met mwahu. Pepehm wet kesempwal pwehn koluhla, ahpw kaidehn ihte met. Dahme pil anahn? Kitail pahn sukuhlki laud sang sapwellimen Sises karasaraso.

14. Nan sapwellimen Sises karasaraso, ia duwen mwahnakapwo eh kasalehda me e tepidahr koluhla?

¹⁴ Sises ketin padahkihong kitail duwen koasoipen mwahnakapw men me salongala me kileldi nan Luk 15:11-32. Mwahnakapwo uhwongada eh pahpao, kohkohsang imweo, oh seiloakla “sahpw doh ehu.” Ih wasao me e mourki mour suwed. Ahpw, ni eh mouro uhdahn apwalla, e tepida medemedewe duwen pilipil sapwung kan me e wiahda. E esehda me eh mour ni ahnsou me e mi ni imwen eh pahpao uhdahn mwahusang. Sises mahsanih me mwahnakapwo “eri pwurehng tepida medewe.” Ih eri pilada en pwurala ni imweo oh pekimahk rehn eh pahpao. E kesempwal ong mwahnakapwo en pohnese me e wiahda pilipil suwed tohto. Ahpw ia duwe, met itar? Soh. E anahne wiahda wekidekla kan!

15. Ia duwen mwahnakapw me salongalao eh kadehdehda me e koluhla mehlel?

¹⁵ Mwahnakapw me salongalao kasalehda eh koluhkihla mehlel dahme e wiahdao. E pwurala imweo me uhdahn doh. Eri, ni eh koasoiong eh pahpao, e nda: “I dipadahr rehn Koht oh rehmw. I solahr warohng adaneki noumw pwutak.” (Luk 15:21) Dahme mwahnakapwo wehkada ni mehlel kasalehda me e men kamwahwihala eh nanpwungmwahu rehn Siohwa. E pil ese me eh wiewia ko kamedekihala eh pahpao. Oh e men doadoahk laud pwehn pwurehng kamwahwihala eh nanpwungmwahu rehn eh pahpao. Pwehn wia met, e pil men wiahla emen nein eh pahpao tohndoadoahk! (Luk 15:19) Koasoiepen mwahnakapwo sohte wiahte koasoi kangoang ehu. Koasoi pwoatet  wia sawas laud ehu ong elder kan. E kak sewese irail ni arail songosong en diarada ma emen me wiahda dihp laud koluhla mehlel de soh.

16. Dahme kahrehda e apwal ong elder kan en ese ma emen koluhla mehlel?

¹⁶ E sohte mengei ong elder kan en ese ma emen me wiahda dihp laud uhdahn koluhla met. Dahme kahrehda? Irail sohte kak ese dahme mi nan mohngiong en emen, eri irail kin song en rapahkihda mehn kadehde kan me riarailo uhdahn sukuhlki en kailongki dahme e wiahdao. Ekei pak, emen ele wiahda dihp ehu me uhdahn suwed me kahrehda elder kan me tuhwong ih sohte uhdahn kamehlele me e koluhla mehlel.

17. (a) Karasaras dahieu me kasalehda me emen ele sohte koluhla mehlel, mehnda ma e nda me uhdahn nsensuwedkihla dahme e wiahdao? (b) Nin duwen me 2 Korint 7:11 mahsanih, dahme emen me koluhla mehlel anahne kasalehda?

¹⁷ Medewehla karasaras ehu. Brother men wiahda dipen kamwahl pak tohto oh erein sounpar tohto. E sohte peki sawas, ahpw e ekihsang eh pwoudo, kompoakepah kan, oh elder kan eh wiewia suwedo. Kedekedeo, elder ko esehda dahme e wiao. Ni ahnsou me elder ko ndaiong ih me mie mehn kadehde me e wiahda dipen kamwahl, e wehkada dahme e wiao oh pil mwomwen koluhkihla mehlel. Ahpw ia duwe, met kadehdehda me e koluhla? Soh. Elder kan me apwalih soangen irairo, anahne kilang laudsang ihte pepehm en nsensuwed. Ohlo sohte wiahda dihp pak ehute pwehki e wiahda pilipil sapwung. Ahpw, e wiahda dihp laud pak tohto. Me dipano sohte pein kohla oh wehkada dahme e wiahdao, ahpw emen tohrohr me diarada oh kohla padahkihong elder ko. Eri elder ko pahn anahne kilang kadehdepen me dipano eh wekidala eh madamadau, pepehm, oh wiewia. (Wadek 2 Korint 7:11.) Ele me dipano pahn anahne ahnsou laud pwehn wiahda wekidala pwukat pwehn kadehdehda me e koluhla mehlel. E pahn kakete piskensang nan mwomwohdisohn Kristian erein ahnsou ehu.​—1 Kor. 5:11-13; 6:9, 10.

18. Ia duwen emen me piskenla eh kak kasalehda koluhla mehlel, oh ia imwilahn met?

¹⁸ Pwehn kasalehda me e koluhla mehlel, emen me piskenla pahn anahne iang kaukaule towehda mihting kan oh idawehn en elder kan kaweid en kaukaule kapakap oh onop Paipel. E pahn pil doadoahk laud pwehn nantihong soikala soahng kan me kakete kasonge ih en pwurehng wiahda dihp. Ma e nantihong en kamwahwihala eh nanpwungmwahu rehn Siohwa, e kak kamehlele me Siohwa uhdahn pahn ketin mahkohng ih oh elder kan pahn sewese ih en pwurehng wiahla kisehn mwomwohdiso. Ni elder kan ar song en diarada ma emen koluhla mehlel, irail ese me ehuehu irair ko wekpeseng. Eri irail anahne kasawih mwahu ehuehu irair ko.

19. Dahme koluhla mehlel kin pidada? (Esekiel 33:14-16)

 ¹⁹ Kitail sukuhlki me e sohte itar ong me dipan men en ndahte me e nsensuwedkihla dihp me e wiahdao. E anahne wekidala mwomwen eh madamadau oh pepehm oh wia soahng kan me kasalehda me e koluhla. E anahne uhdihsang eh wiewia suwed kan oh pwurehng peikiong sapwellimen Siohwa koasoandi kan. (Wadek Esekiel 33:14-16.) Dahme me dipano en keieu kesempwalki iei en pwurehng ahneki nanpwungmwahu rehn Siohwa.

20-21. Ia duwen atail kak sewese emen me wiahda dihp laud?

²⁰ Sises ketin kawehwehda soahng kesempwal ehu nan sapwellime doadoahk en kalohk ni eh mahsanih: “I kohdohng luke . . . me dipan akan pwe ren koluhla.” (Luk 5:32) Kitail pil anahne ahneki soangen madamadau wet. Ia duwen ma kitail esehda me kompoakepatail keren men wiahda dihp laud. Dahme kitail anahne wia?

²¹ Ma kitail song en ekihla dipen kompoakepatailo, kitail pahn ihte kahrehiong ih nan keper. Kitail sohte kak ekihla dipeo pwehki Siohwa ketin mwahngih. (Lep. Pad. 5:21, 22; 28:13) Ke kak sewese kompoakepahmwo sang ni omw katamankihong ih me elder kan men sawas. Ma kompoakepahmwo sohte men padahkihong elder kan dihp me e wiahdao, ke anahne padahkihong elder ko. Met pahn kasalehda me ke uhdahn men sewese ih. Eh nanpwungmwahu rehn Siohwa mihlahr nan keper!

22. Dahme kitail pahn koasoiapene nan iren onop en mwuhr?

²² Ahpw ia duwen ma emen wiahda dihp laud erein ahnsou reirei me kahrehda elder kan pilada me e pahn piskensang nan mwomwohdiso? Ia duwe, met wehwehki me elder kan sohte kasalehda mahk oh kalahngan? Nan iren onop en mwuhr, kitail pahn kilang ia duwen Siohwa eh kin ketin kasalehda mahk oh kalahngan ni eh kin ketin panawih me dipan kan oh ia duwen atail kak kahlemengih.