Pwehn kapwaiada arail doadoahk en kalohk, Tohnsukuhl en Paipel kan pahn anahne eimah. Irail anahne kalohki duwen “rohng mwahu” ong me opampap kan, oh duwen “rahnen ikih en atail Koht.”

Brother J. H.  Hoskin sang Canada kin kalohk ni eimah nan pahr 1921 mendahki uhwong kan. Pak ehu, e tuhwong emen sounpadahk en palien lamalamo Methodist. Brother Hoskin tepida koasoi oh nda: “Kita anahne koasoiapene duwen Paipel ni meleilei. Oh mehnda ma kita sapwungki soahng kei, kita kak uhdi ata koasoi ni meleilei oh dehr wiahla imwintihti kei.” Ahpw met sohte wiawi. Brother Hoskin koasoia: “Se koasoi mwurin minit keite a sounpadahko poakih kehlail kilahs en eh wenihmwo me kahrehda I medewe me kilahs en wenihmwo pahn mweredi.”

Sounpadahko wer oh nda: “Dahme ke seu kohla kalohk ong irail me kaidehn Kristian?” Brother Hoskin sohte nda mehkot, ahpw ni eh kohkohla, e medewe, ‘E mwomwen me I koasoakoasoiong emen me kaidehn Kristian!’

Ni sounpadahko eh padahk nan eh imwen sarawio rahno mwuri, e koasoia soahng suwed kan duwen Brother Hoskin. Brother Hoskin koasoia: “E ndaiong aramas ako me ngehi me keieu likamw nan kahnimwo oh I anahne kamakamala.” Ahpw met sohte kauhdi Brother Hoskin. E pousehlahte kalohk ong aramas tohto. E koasoia: “I uhdahn perenki kalohk wasaht. Ekei aramas ako pil ndaiong ie: ‘I ese me ke wiewia sapwellime Koht doadoahk!’ oh irail kin men kihong ie soahng kan me I anahne.”

Pwehn sewese aramas akan ren wehwehkihla mwahu Paipel, Tohnsukuhl en Paipel kan kin kaukaule wiahda peidek oh pasapeng kan nan Paipel nan makasihn me met kitail kin kahdaneki Awake! Mie peidek kan sang nan Paipel ong me pwulopwul kan me pahpa nohno kan kak koasoiaiong neirail seri kan. Pahpa nohno kan pahn kin idek rehn neirail seri kan peidek pwukat oh sewese irail en diarada pasapeng kan sang nan Paipel. Ekei peidek ko, me duwehte “Pwuhk depe mi nan Paipel?,” kin padahngki soahng mengei kan nan Paipel. Pil ekei peidek, duwehte “Kristian mehlel koaros anahne lelohng lokolok?,” kin sewese me pwulopwul kan ren wiahla sounkalohk eimah kei.

 Pil mie peidek oh pasapeng kan sang nan Paipel ong irail kan me ese laud duwen Paipel. Pasapeng ko kak dierek nan keieun pwuhken Studies in the Scriptures. Sounwadawad tohto sukuhlki soahng tohto sang peidek pwukat, ahpw mwuhr re pakairkihda me re sohla pahn pwurehng wiahda peidek pwukat. Dahme kahrehda?

Brother kan me kin tiengla mwowe wehwehki me aramas akan anahne sukuhlki duwen Paipel ni soandi mwahu. Eri, irail wiahda pwuhko me adaneki The Harp of God nan November 1921. Irail kan me alehdi pwuhko pil iang koasoandi en onop ehu me irail kak pein wia. Koasoandi en onop wet sewese aramas akan en sukuhlki duwen Koht eh ketin kupwurki ketikihong aramas akan mour soutuk. Ia duwen arail wia met?

Ni emen eh kin alehdi pwuhko, e pil kin alehdi card ehu me padahkihong ih pali dah me e anahne wadek nan pwuhko. Wihko mwuri, e pahn alehdi card ehu me mie peidek kei duwen dahme e wadek. Kisin cardo pil padahkihong sounwadawado pali dah kan me e anahne wadek ong wihk en mwurio.

Ehuehu wihk erein wihk 12, pwihnen kasukuhlo de mwomwohdisou kin kadaralahng tohnsukuhlo card kapw ehu. Irail me mah kan nan mwomwohdiso oh irail kan me sohte kak kohla kalohk ihmw lel ihmw iei me kin kalapw kadarpeseng card ko. Karasepe, Anna K. Gardner, sang Millvale, Pennsylvania, Wehin Amerika, koasoia: “Ni ahnsou me pwuhko The Harp of God wiawihda, e kihong riei serepeino Thayle me sohte kak alu, doadoahk me e kak wia, me iei en kadarpeseng card kan me peidek kan mi loale wihk koaros.” Ni ahnsou me aramaso kin kanekehla kasukuhlo, emen sang nan mwomwohdiso kin mwemweitla reh pwehn sewese kalaudehla eh sukuhlki Paipel.

Ni imwin pahr 1921, Brother J.F. Rutherford kadarala kisinlikou ong pwihnen kasukuhl ko koaros. E koasoia me “doadoahk en Wehio nan pahret laudsang oh pweidahsang doadoahk kan en mwoweo.” Ih eri pil kapatahiong: “Mihete doadoahk laud me pahn pil wiawi. Kangoange meteikan ren pil iang doadoahk kesempwal wet.” E sansal me tohnsukuhl en Paipel ko kapwaiada dahme e nda. Nan pahr 1922, irail kalohki duwen Wehio ni eimah laudsang mwoweo.