1-2. Dahme kahrehda Kristian kan rahnwet en men sukuhlki pwuhken Lipai?

 WAHNPOARON Pohl katamankihong kompoakepah mwahnakapwo Timoty me “Nting Sarawi unsek ntingdier sang ni kaweid en Koht oh e mwahu.” (2 Tim. 3:16) Met pil iangahki pwuhken Lipai. Dahme ke kin medewehki pwuhk wet? Ele ekei aramas medewe me e wiahte pwuhk ehu me diren kosonned me sohte kin kadoadoahk nan atail ahnsou. Ahpw dahme Kristian mehlel kan medewe weksang met.

² Pwuhken Lipai ntingdi daulih sounpar 3,500 samwalahro, ahpw Siohwa ketin nekinekid leledo met “pwe en padahkih kitail.” (Rom 15:4) Pwehki pwuhken Lipai kin sewese kitail en wehwehki sapwellimen Siohwa madamadau, kitail en men wadek oh sukuhlki. Ni mehlel, mie mehn kasukuhl tohto me kitail kak sukuhlkihsang pwuhk wet. Kitail pahn koasoiapene mehn kasukuhl pahieu.

3. Dahme kahrehda nan sounpar koaros meirong kan kin wiawi ni Rahnen Tomw?

³ Keieun mehn kasukuhl: Kitail anahne ale kupwuramwahu sang Siohwa pwe en kak ketin kupwurperenki atail meirong kan. Ehuehu sounpar ni Rahnen Tomwo, wehin Israel kin pokonpene oh samworo lapalapo kin meirongki mahn akan. Meirong pwukat sewese katamankihong mehn Israel kan me re anahne mwakelekelda sang diparail kan! Ahpw mwohn samworo lapalapo pahn wahlong ntahn meirongo nan Wasa Sarawiheo ni rahno, keieu e anahne wia soahng ehu tohrohr, me ni mehlel kesempwalsang ale mahkpen dipen wehin Israel.

4. Nin duwen me Lipai 16:12, 13 mahsanih, dahme samworo lapalapo wia ni keieun eh pedolong nan Wasa Sarawiheo ni Rahnen Tomwo? (Menlau kilang kilel ni kilin Kahn Iroir wet.)

⁴ Wadek Lipai 16:12, 13. Medewehla dahme kin wiawi ni Rahnen  Tomwo: Samworo lapalapo kin pedolong nan impwal sarawio. Ni rahno, e anahne pedolong nan Wasa Sarawiheo pak siluh, eri met pahn wia keieu en eh pedolong. Apali peho kolokol deupen warpwohmwahwo oh pali teio kolokol dahlen kisiniei me diren mwoalus ngkengken. E uhdi ekis mwohn kahdeng me pere wasahn pedolong ong nan Wasa Sarawiheo. Ni wahu unsek, ih eri pedolongala nan Wasa Sarawiheo oh kesihnen mwohn kohpwahn inou lapo. Ni karasaras, e mwomwen kesihnen mwohn silangin Siohwa Koht! Samworou eri wudekidi ni keneinei warpwohmwahu sarawio pohn mwoalus ngkengkeno, oh pwohn warpwohmwahwo eri kohpeseng nan pereo. b Mwuhr e pahn pwurehng pedolong nan Wasa Sarawiheo oh wa ntahn mahno me meirongalahr ong mahkpen dihp. Tehk me e isikala warpwohmwahwo mwohn e patohwanohng Siohwa ntahn meirong en mahkpen dihp.

5. Dahme kitail kak sukuhlkihsang duwen samworo lapalapo eh doadoahngki warpwohmwahu ni Rahnen Tomwo?

⁵ Dahme kitail kak sukuhlkihsang duwen samworo lapalapo eh doadoahngki warpwohmwahu ni Rahnen Tomwo? Paipel kasalehda me kapakap kan me Siohwa ketin kupwurperenki sang sapwellime tohnkaudok lelepek kan kin rasehng warpwohmwahu. (Mel. 141:2; Kaud. 5:8) Tamataman me samworo lapalapo kin kasalehda wahu unsek ni eh patohwanda warpwohmwahwo mwohn silangin Siohwa. Pil duwehte met, ni atail kin pato mwohn Siohwa ni kapakap, kitail kin wia met ni wahu unsek. Kitail kin uhdahn wauneki ih. Kitail kin uhdahn kalahnganki me Sounkapikpen lahng oh sampah ketin mweidohng kitail en pato mwohn silangi oh karanihala ih, duwehte seri men ong semeo. (Seims 4:8) E ketin kupwurki kitail nin duwen kompoakepah kei! (Mel. 25:14) Kitail kin uhdahn kalahnganki pai kaselel wet me kahrehda kitail sohte pahn men wia mehkot me pahn kansensuwedihada ih.

6. Dahme kitail kak sukuhlkihsang samworo lapalapo eh isik warpwohmwahwo mwohn eh patohwanda meirong kan?

⁶ Tamataman me samworo lapalapo anahne isik warpwohmwahwo mwohn eh kak patohwanda meirong kan. Ni ahl wet, e kin tehk kanahieng me e pahn alehdi kupwuramwahu sang Siohwa ni eh pahn patohwanda meirong kan. Dahme kitail kak sukuhlkihsang met? Ni eh ketiket sampah, Sises anahne ketin wia mehkot kesempwal​—ni mehlel mehkot me uhdahn kesempwalsang komourala aramas akan—​mwohn e kak ketikihda sapwellime mour nin duwen meirong ehu. Dahme e anahne ketin wia? E anahne peikiong Siohwa ni loalopwoat erein eh mour nin sampah pwe Siohwa pahn ketin kupwurki eh meirongo. Ni ahl wet, Sises pahn ketin kadehdehda me en wiewia soahng kan ni ahl me Siohwa ketin kupwurki iei ih ahl pwung en mour. Sises pahn kasansalehda, de kadehdehda me sapwellimen Semeo pwuhng en kaunda, de elen sapwellime kaunda me pwung oh pahrek.

7. Dahme kahrehda sapwellimen Sises mour unsek nin sampah kin kaperenda Semeo?

⁷ Erein eh mour nin sampah, Sises kin ketin peikiong ni unsek sapwellimen Siohwa koasoandi pwung kan. Mendahki e ketin lelohng kasongosong, kahpwal laud, oh e pil mwahngih me e pahn ketin kamakamala ni ahl kamedek ehu, e ketin koasoanehdi teng en kadehdehda me elen kaunda me Semeo sapwellimanki iei me keieu mwahu. (Pil. 2:8) Ni eh ketin lelohng irair apwal akan, Sises kin loulou “ni kapitie laudida iangahki pilen silangi.” (Ipru 5:7) Sapwellime kapakap kan sang eh mohngiong kasalehda me e kin ketin lelepek ong Siohwa, oh kin kalaudehla eh koasoanehdi teng en peikiong Siohwa. Mwohn silangin Siohwa, ahn Sises kapakap kan kin rasehng warpwohmwahu. Sapwellimen Sises mour unsek nin sampah uhdahn kaperenda  Semeo oh pil kadehdehda duwen sapwellimen Siohwa pwuhng en kaunda.

8. Ia duwen atail kak alasang sapwellimen Sises elen mour?

⁸ Kitail kak alasang Sises sang ni atail wia uwen atail kak en peikiong Siohwa oh loalopwoat ong ih. Ni atail kin lelohng kahpwal kan, kitail kin ngidingid kapakapki sapwellimen Siohwa sawas pwehki kitail men kaperenda ih. Ni soangen ahl pwukat, kitail kasalehda atail utung sapwellimen Siohwa elen kaunda. Kitail pohnese me Siohwa sohte pahn ketin kupwurperenki atail kapakap ma kitail kin wia tiahk kan me e ketin kalahdeki. Ahpw ma kitail kin wiewia soahng kan me e ketin kupwurperenki, kitail kak kamehlele me atail kapakap sang mohngiongitail pahn rasehng warpwohmwahu mwohn Siohwa. Kitail pil kak kamehlele me atail lelepek oh peik ni loalopwoat kin kaperenda kupwuren Samatailo nanleng.​—Lep. Pad. 27:11.

9. Dahme kahrehda mehn Israel kan kin wia meirong en kaminimin?

⁹ Keriaun mehn kasukuhl: Kitail kin papah Siohwa pwehki atail kalahngan ong ih. Kitail pahn sukuhlki mehn kasukuhl wet ni atail tehkpene duwen meirong en kaminimin kan me mehn Israel kan kin wia. c Nan pwuhken Lipai, kitail sukuhlki me mehn Israel men kak kihda meirong en kaminimin nin duwen meirong en “kapingkalahngan” ehu. (Lip. 7:11-13, 16-18) E kin wia meirong wet, kaidehn pwehki e anahne wia, ahpw pwehki e men wia met. Eri aramaso kin nsenki toukihda meirong wet pwehki e poakohng eh Kohto, Siohwa. Aramas me kihda meirongo, eh peneinei, oh samworo kan pahn kang uduk en mahno me meirongala.  Ahpw mie wasa kei ni mahno me kin meirongala ongete Siohwa kelehpw. Wasa dah kei me?

10. Ia duwen meirong en kaminimin kan me Lipai 3:6, 12, 14-16 kasalehda eh duwehte Sises eh kin papah Siohwa?

¹⁰ Kesiluh en mehn kasukuhl: Pwehki limpoak, kitail kin patohwanohng Siohwa dahme keieu mwahu rehtail. Siohwa ketin wiahki wih en mahn wasa me keieu mwahu ni mahn akan. E pil ketin kasalehda ni oaritik me mie wasa kei ni mahno, iangahki mwidihlik ko, me uhdahn kesempwal. (Wadek Lipai 3:6, 12, 14-16.) Eri Siohwa kin uhdahn ketin kupwurperenki ni mehn Israel men eh nsenki toukihda ong ih wasa mwahu pwukat. Mehn Israelo me toukihda soangen meirongo kin kasalehda eh uhdahn men patohwanohng Koht dahme keieu mwahu reh. Ni ahlohte, Sises perenki patohwanohng Siohwa uwen eh kak koaros sang ni eh kin papah Ih pwehki eh limpoak ong Ih. (Sohn 14:31) Ong Sises, en wiewia kupwuren Koht kin uhdahn kaperen; e kin uhdahn ketin poakohng sapwellimen Koht kosonned kan. (Mel. 40:8) Ia uwen Siohwa eh kin ketin kupwurperenkihda ni eh mahsanih duwen Sises eh nsenki papah ih!

11. Ia duwen atail papah Siohwa eh duwehte meirong en kaminimin, oh ia duwen met eh kak kamweitkitailla?

¹¹ Atail papah Siohwa kin duwehte meirong en kaminimin ko pwehki e duwehte atail kin kasalehiong Siohwa atail pepehm ong ih. Kitail kin patohwanohng Siohwa dahme keieu mwahu rehtail, oh kitail kin wia met pwehki kitail poakohng ih sang mohngiongitail unsek. Ia uwen Siohwa eh kin ketin kupwurperenkihda ni eh mahsanih tohnkaudok rar rar kei ar papah ih pwehki arail poakohng ih oh pil sapwellime ahl akan! Ni atail tamataman me Siohwa kin ketin mwahngih oh kesempwalki kaidehn ihte dahme kitail kin wia ahpw pil dahme kahrehda kitail kin wia met, e kak uhdahn kamweitkitailla. Karasepe, ma kowe emen me mah oh sohla kak wia soahng tohto me ke men wia, kamehlele me Siohwa ketin mwahngih laudsang omw soh itar kan. Ele ke pehm me dahme ke kin patohwanohng Siohwa uhdahn tikitik, ahpw Siohwa ketin mwahngih duwen limpoak me ke ahneki me kin kamwakid uhk ken wia dahme ke kak wia. E kin ketin kupwurperenki dahme ke kak patohwanohng ih ni uwen omw kak.

12. Ia duwen Siohwa eh kin ketin kilangwohng meirong en kaminimin, oh ia duwen met eh kin kangoange kitail?

¹² Dahme kitail kak sukuhlkihsang meirong en kaminimin kan? Ni kisinieio eh isikala wasa keieu mwahu kan en mahno, edinieio kin kohdalahng Siohwa oh e kin ketin kupwurperenkihda. Eri kamehlele me Siohwa pil kin ketin kupwurperenki ni omw kin nsenki wia uwen omw kak en papah ih. (Kol. 3:23) Medewehla duwen eh kin ketin kupwurperenkinuhkada. Sohte lipilipil ma ke kak wia soahng tohto ong Siohwa de mehkot uhdahn tikitik, dahme ke kin wiahda ong ih kin uhdahn kesempwal ong ih, oh e pahn ketin tamataman kohkohlahte.​—Mad. 6:20; Ipru 6:10.

13. Nin duwen me Lipai 9:23, 24 kasalehda, ia duwen Siohwa eh ketin kasalehda eh kupwurperenkihda idihdida en samworo ko?

¹³ Kapahieu en mehn kasukuhl: Siohwa kin ketin kapaiahda sapwellime pwihn nin sampah. Medewehla dahme wiawi nan pahr 1512 mwohn Krais, ni ahnsou me impwal sarawio kokouda ni utuhn Nahna Sainai. (Eks. 40:17) Moses wia kasarawi ehu pwehn idihada Aaron oh nah pwutak ko nin duwen samworo kei. Wehin Israel pwon pokonpene pwehn kilang samworo ko ar wia tepin arail meirongki mahn akan. (Lip. 9:1-5) Ia duwen Siohwa eh ketin kupwurki samworo ko me ahpwtehn idihdida? Ni Aaron oh Moses ara kapaiahda aramas ako, Siohwa ketin kahrehiong kisinieio en isikala luhwen meirongo pohn pei sarawio.​—Wadek Lipai 9:23, 24.

14. Dahme kahrehda Siohwa eh ketin utung koasoandi en samworo kan en Aaron kin kesempwal ong kitail rahnwet?

¹⁴ Dahme kisinieio sang nanleng kasalehda? Siohwa ketin kadarodo kisinieio pwehn  kasalehda Eh uhdahn ketin utung Aaron oh nah pwutak ko me E ketin pilada en wia samworo kei. Ni mehn Israel ko ar kilang mehn kadehde sansal wet, re wehwehki me re pil anahne utung samworo ko. Ia duwe, met kesempwal ong kitail? Uhdahn! Koasoandi en samworo kan nan Israel kin wiahte karasepen koasoandi en samworo ehu me lapalapasang. Krais iei Samworo Lapalapo me lapalapasang koasoandi en mwoweo, oh mie samworo oh nanmwarki meh 144,000 me pahn iang ih ketin papah sang nanleng.​—Ipru 4:14; 8:3-5; 10:1.

15-16. Ia duwen Siohwa eh ketin kasalehda me e kin ketin kupwurperenki ‘ladu lelepek oh loalokongo’?

¹⁵ Nan pahr 1919, Sises ketin idihada pwihn tikitik en Kristian keidi kei nin duwen ‘ladu lelepek oh loalokongo.’ Ladu menet kin tiengla mwowe nan doadoahk en kalohk oh kin kihong sapwellimen Krais tohnpadahk kan “kanarail mwenge ni ahnsou me konehng.” (Mad. 24:45) Ia duwe, kitail kilang mehn kadehde sansal me Koht kin ketin kupwurperenki ladu lelepek oh loalokongo?

¹⁶ Sehdan oh eh sampah kin songosong en kauhdi doadoahk en ladu lelepek oh loalokongo. Ma ladu menet sohte ale sawas sang rehn Siohwa, e sohte pahn kak wia doadoahk wet. Mendahki mahwen en sampah riau wiawiher, mie kahpwal en mwohni nan sampah pwon, oh kalokolok oh uhwong laud kin wiawihong sapwellimen Koht aramas akan, ladu lelepek oh loalokongo kin pousehlahte kihda padahk mehlel kan ong sapwellimen Krais tohnpadahk kan nin sampah. Medewehla uwen tohtohn sawaspen Paipel kan me kitail naineki rahn wet me sohte isepe, oh wiawihda ni lokaia tohto sang 900! Met wia mehn kadehde sansal me Koht kin ketin utung ladu lelepek oh loalokongo. Doadoahk en kalohko pil wia ehu mehn kadehde me Siohwa kin ketin kapaiahda laduwo. Ni mehlel, rongamwahwo lohkselier “wasa koaros me aramas kin mi ie nin  sampah.” (Mad. 24:14) E sansal me Siohwa kin ketin kaukaweid oh pil ketin kapaiahda laud sapwellime pwihn rahnwet.

17. Ia duwen atail kak kasalehda atail utung pwihn me Siohwa kin ketin doadoahngki?

¹⁷ Kitail en pein idek rehtail, ‘I kin kalahnganki ei iang miniminiong sapwellimen Siohwa pwihn nin sampah?’ Ni mwehin Moses oh Aaron, Siohwa ketin kadarodo kisiniei sang nanleng pwehn kasalehda me e ketin kupwurperenki irail kan me e ketin idihada. Pil duwehte met, Siohwa ketikihong kitail mehn kadehde sansal me e kin ketin doadoahngki sapwellime pwihn rahnwet. Kitail en uhdahn kalahnganki met. (1 Des. 5:18, 19) Ia duwen atail kak kasalehda me kitail kin utung pwihn me Siohwa ketin doadoahngki? Sang ni atail kin idawehn kaweid kan me poahsoankihda Paipel me mi nan neitail sawaspen Paipel kan, nan atail mihting kan, oh pil ni atail mihting tohrohr tikitik oh laud kan. Patehng met, kitail kak kasalehda atail utuht sang ni atail kin iang doadoahk en kalohk oh padahk ni uwen atail kak.​—1 Kor. 15:58.

18. Dahme ke koasoanehdi teng en wia?

¹⁸ Kitail en koasoanehdi teng en doadoahngki mehn kasukuhl kan me kitail sukuhlkihsang pwuhken Lipai. Kitail en ale kupwuramwahu sang Siohwa pwe atail meirong kan en kak kaperenda ih. Kitail en kin papah Siohwa pwehki atail kalahngan ong ih. Kitail en pousehlahte patohwanohng Siohwa dahme keieu mwahu rehtail pwehki kitail poakohng ih sang mohngiongitail unsek. Oh kitail en utungada ni mohngiong unsek pwihn me e kin ketin doadoahngki rahnwet. Ni atail wia soahng pwukat, kitail kak kasalehiong Siohwa me kitail kin kesempwalki pai kaselel en papah ih nin duwen sapwellime Sounkadehde kan!