1-2. Dahme sounnting men nda, oh dahme kitail pahn koasoiapene nan iren onop wet?

 RAHNWET, aramas rar rar kei kin kose me re kamehlele Sises, ahpw re sohte kin kapwaiada dahme e ketin padahngki. (2 Tim. 4:3, 4) Ni mehlel, emen sounnting nda: “Ma emen me duwehte ‘Sises’ rahnwet kin nda soahng kan ni soangen ahlohte me Sises kin mahsen . . . , kitail pahn soikala ohlo rahnwet duwehte me aramas akan wia sounpar riekid samwalahro? . . . Pasapengo iei: Ei, kitail pahn.”

² Ni ahnsou me Sises ketiket sampah, me tohto kin rong sapwellime padahk oh kilang eh ketin wiahda manaman kan, ahpw re sohte kin pwoson ih. Dahme kahrehda? Nan iren onop en mwoweo, kitail koasoiapene kahrepe pahieu me aramas akan kin dipekelekelki dahme Sises mahsanih oh ketin wia. Kitail pahn koasoiapene pil kahrepe pahieu. Ni atail wia met, kitail pahn kilang dahme kahrehda aramas akan rahnwet kin soikala sapwellimen Sises tohnpadahk kan oh ia duwen atail en dehr dipekelekel.

3. Dahme Sises ketin wia me kahrehiong ekei aramas en soikala ih?

³ Ni eh ketiket sampah, Sises kin ketin werekiong soangsoangen aramas akan. E kin iang sak rehn me kepwehpwe kan oh me lapalap kan, ahpw e pil kin ketin wiahda ahnsou ong me semwehmwe kan oh me sohte sawasparail kan. Patehng met, e pil kin ketin poakehla irail kan me meteikan kin kahdaneki “me dipan akan.” Ekei aramas pohnmwahso kan kin soikala Sises pwehki dahme e ketin wia. Re kin idek rehn sapwellime tohnpadahk ko: “Dahme kumwail kin iangki sounrik daksis oh me dipan akan  mwengemwenge oh niminim?” Sises ketin sapeng irail mahsanih: “Irail kan me roson sohte anahne toahkte, ahpw irail me soumwahu me anahne. Kaidehn me pwung kan me I kohdohng luke, ahpw me dipan akan pwe ren koluhla.”​—Luk 5:29-32.

4. Nin duwen me soukohp Aiseia kohpada, dahme mehn Suhs ko anahne kasik me pid Mesaiao?

⁴ Dahme Paipel mahsanih? Sounpar tohto mwohn Mesaiao ketido, soukohp Aiseia kawehwehda me aramas akan pahn soikala ih. Kokohpo mahsanih: “Kitail mwamwahliki oh sohpeisangehr sohte men kilang . . . Sohte emen mie me men kilang—kitail kin pohnsehse pwe likamwete sohte mwahn ih mehkot.” (Ais. 53:3) Kokohpo mahsanih me “kitail” de aramas, pahn pohnsehsehla ih, eri mehn Suhs ko ni mwehin tepin Kristian ko anahne kasik me aramas akan pahn soikala Sises.

5. Ia duwen me tohto rahnwet kin kilangwohng sapwellimen Sises tohnpadahk kan?

⁵ Kitail kin kilang soangen kahpwalo rahnwet? Ei. Kaunen pelien lamalam tohto kin perenki kasamwo irail kan me lapalap, kepwehpwe, oh me aramas kin wiahki aramas loalokong kei, en iangala arail mwomwohdiso. Irail kin mweidohng irail en iangala irail mendahki aramas pwukat kin wia soahng kan me Siohwa kin ketin kalahdeki. Kaunen pelien lamalam pwukat kin kailongki sapwellimen Siohwa ladu mwakelekel oh ngoang kan pwehki pali tohtohn aramas akan rahnwet sohte kin wiahki irail aramas kesempwal kei. Nin duwen me Pohl koasoia, Koht kin ketin pilada irail kan me meteikan “kin kilengdiong.” (1 Kor. 1:26-29) Ahpw ong Siohwa, sapwellime ladu lelepek kan koaros kin kesempwal ong ih.

6. Dahme Sises mahsanih nan Madiu 11:25, 26, oh ia duwen atail kak kahlemengih ih?

⁶ Ia duwen atail en dehr dipekelekel? (Wadek Madiu 11:25, 26.) Dehr mworuskihla mwomwen aramas akan nin sampah ar kilangwohng sapwellimen Koht aramas akan. Kamehlele me Siohwa kin ketin doadoahngki irail kante me aktikitik en wia kupwure. (Mel. 138:6) Oh medemedewe ia uwen tohtohn soahng kan me e ketin wiahda ni eh ketin doadoahngki irail kan me sampah wet sohte wiahki aramas loalokong kei.

7. Dahme kahrehda Sises ketin kahdaneki Parisi ko aramas mwalaun kei, oh ia duwen arail mwekidki met?

⁷ Ni eimah, Sises ketin kadeikada kaunen pelien lamalam kan ni eh mwehio pwehki re sohte kin padahkihong aramas akan en kaudokiong Siohwa ni pwung. Karasepe, e ketin kasalehda mwalaun en Parisi ko, me kin nsenohki mwomwen arail pahn omwiomw laudsang arail en apwalih arail pahpa nohno kan. (Mad. 15:1-11) Sapwellimen Sises tohnpadahk ko ele pwuriamweikihla sapwellime mahsen ko. Ni mehlel, re patohwan idek reh: “Komw mwahngih me Parisi ko dipekelekelki ar rong dahme komw mahsaniho?” Sises ketin sapeng mahsanih: “Tuhke koaros me Semei nanleng sohte ketin padokedi pahn usuhsdahsang. Kumwail pohnsehsehla irail. Sounkaweid maskun kei irail. Eri ma me maskun men kin kahre me maskun men, ira koaros pahn pwupwudiong nan pwoahr.” (Mad. 15:12-14) Mendahki kaunen pelien lamalam ko lingeringer pahn Sises pwehki soahng kan me e mahsanih, Sises sohte ketin uhdihsang eh padahngki dahme mehlel.

8. Ia duwen Sises eh ketin kasansalehda me kaidehn pelien lamalam koaros kin kaperenda Koht?

⁸ Sises pil ketin kasansalehda me ekei padahk en pelien lamalam kan kin likamw. E sohte mahsanih me padahk en pelien lamalam koaros kin kaperenda Koht. Ahpw e mahsanih me aramas tohto pahn keid nan ahl tehlap me kolahng kasohrala, oh me malaulaute me pahn keid nan ahl tehtik me kolahng mour. (Mad. 7:13, 14) E pil ketin kasansalehda me ekei pahn nda me  re kin papah Koht, ahpw ni mehlel irail sohte kin wia met. E mahsanih: “Kumwail mwasahn soukohp likamw akan me kin kohdo rehmwail ni mwomwen sihpw, ahpw loalarail, irail kidien wel kei me uhdahn duhpek. Kumwail pahn esehkin irail wahrail.”​—Mad. 7:15-20.

9. Ia ekei padahk likamw kan me Sises ketin kasansalehda?

⁹ Dahme Paipel mahsanih? Paipel kohpada me Mesaiao pahn kasalehda eh ngoangki sapwellimen Siohwa tehnpas sarawio. (Mel. 69:9; Sohn 2:14-17) Ngoang wet iei me kamwakid Sises en ketin kasansalehda padahk oh wiewia likamw kan en Parisi ko. Karasepe, Parisi ko kamehlele me mie mehkot soh sansal nan paliwar en aramas me kin momourte mwurin mehla; ahpw Sises ketin padahngki me aramas melahr kan wie memeir. (Sohn 11:11) Sadusi kan kin kahmahmkihla kaiasada; ahpw Sises ketin kaiasada kompoakepaho Lasarus. (Sohn 11:43, 44; Wiewia 23:8) Parisi kan kin padahngki me Koht ketin koasoanedier soahng koaros me pahn wiawihong kitail, de dahme kitail pahn wia; ahpw Sises ketin padahngki me aramas akan kak pilada ma irail pahn papah Koht de soh.​—Mad. 11:28.

10. Dahme kahrehda me tohto kin dipekelekelki atail padahk kan?

¹⁰ Kitail kin kilang soangen kahpwalo rahnwet? Ei. Me tohto kin soikala kitail pwehki kitail kin doadoahngki Paipel pwehn kasalehiong aramas akan me ekei padahk en pelien lamalam kan sapwung. Kaunen pelien lamalam kan kin padahkihong tohn arail mwomwohdiso me Koht kin ketin kaloke aramas suwed kan nan ehl. Irail kin doadoahngki padahk likamw wet pwehn kaunda neirail aramas akan. Pwehki kitail kin kaudokiong Siohwa, Koht en limpoak, kitail kin sewese aramas akan en wehwehki me padahk wet likamw. Kaunen pelien lamalam kan pil kin padahngki me mie mehkot me soh sansal nan paliwar en aramas me kin momourte mwurin mehla. Kitail kin kadehdehda me padahk wet sohte kohsang nan Paipel, pwehki ma padahk wet mehlel, eri kaiasada sohte pahn mie katepe. Oh mendahki pelien lamalam tohto kin padahngki me Koht, de mehkot soh sansal, ketin koasoanedier soahng koaros me kitail en wia, kitail kin padahngki me aramas ahneki saledek en wiahda pilipil oh kak pilada en papah Koht. Ia duwen pelien lamalam  kan ar kin mwekidki met? Irail kin kalapw lingeringerkihda!

11. Nin duwen me Sises mahsanih nan Sohn 8:45-47, dahme Koht ketin kupwurki sapwellime aramas akan en wia?

¹¹ Ia duwen atail en dehr dipekelekel? Ma kitail kin poakohng padahk mehlel, kitail pahn kamehlele oh peikiong mahsen en Koht. (Wadek Sohn 8:45-47.) Weksang Sehdan me Tepil, kitail kin tengediong me mehlelo. Kitail sohte kin wia mehkot me sohte pahrekiong dahme kitail kamehlele. (Sohn 8:44) Koht ketin kupwurki me sapwellime aramas akan en “tatki me suwed” oh “tengediong me mwahu,” duwehte me Sises ketin wia.​—Rom 12:9; Ipru 1:9.

12. Dahme kahrehda mwomwen Sises eh ketin kamakamala kahrehiong mehn Suhs tohto en soikala ih?

¹² Ia pil ehu kahrepe me mehn Suhs kan ni mwehin Siseso kin soikala ih? Pohl koasoia: “Kitail kin kalohki Krais me ketin kamakamala nin tuhkeo, me wia mehn kadipekelekel ehu ong mehn Suhs akan.” (1 Kor. 1:23) Dahme kahrehda mehn Suhs tohto soikala Sises pwehki mwomwen eh ketin kamakamala ni tuhkehn kalokoloko? Ong irail, Sises eh ketin kamakamala pohn tuhkehn kalokoloko kahrehda en mwomwen me ih loallap men oh me dipan emen, a kaidehn Mesaiao.​—Deud. 21:22, 23.

13. Dahme irail kan me soikala Sises sohte men kamehlele?

¹³ Irail mehn Suhs ko me soikala Sises sohte men pohnese me sohte sapwung kis me e ketin wiahda, me aramas akan karaunlikamwih ih, oh me ahn aramas ako ar wiewia ong ih sohte pwung. Irail kan me kopwung Sises sohte nsenohki en kasalehda kopwung pahrek. Sounkopwung ko nan mwoalen kopwung lapalap en mehn Suhs ko mwadang kohpene oh kopwung Sises, oh sohte idawehn kosonned kan duwen kopwung. (Luk 22:54; Sohn 18:24) Sounkopwung ko sohte wia kopwung pahrek ni arail rong karaun oh mehn kadehde likamw kan me aramas ako ndahki Sises. Oh re pil “raparapahki mehn kadehde likamw ong Sises pwe re en kak kemehla.” Ni arail sohte kak diar mehkot sapwung reh, samworo lapalap ko uhd song en kahrehiong Sises en mahsanih mehkot me sapwung pwe irail en kak nda me e ketin wiahda sapwung. Met uhdahn uhwong kosonned.  (Mad. 26:59; Mark 14:55-64) Oh mwurin Sises eh ketin iasada, irail sounkopwung likamw ko pwainohng sounpei en Rom ko me sinsile sapwellime sousowo “silper tohto” pwe sounpei ko en kihpeseng lokaia likamw duwen kahrepen sousowo eh sohte kanenge.​—Mad. 28:11-15.

14. Dahme Paipel kohpada duwen pwoulahn Mesaiao?

¹⁴ Dahme Paipel mahsanih? Mehn Suhs tohto ni mwehin Siseso sohte kasik me Mesaiao pahn anahne pwoula, ahpw tehk dahme kokohpdahr nan Paipel: “E meirongkihla eh mour sang ni pein nsene, oh mweidala pein ih pwe en iang wadawadohng me dipan akan. E wilianla me dipan ngeder oh kasakaskin irail pwe re en ale mahkpen diparail kan.” (Ais. 53:12) Eri sohte kahrepen mehn Suhs ko ar dipekelekelki Sises eh ketin kamakamala nin duwen me dipan men.

15. Karaun likamw dah kan me wiawihong Sounkadehdehn Siohwa kan me kahrehiong ekei en dipekelekelkin irail?

¹⁵ Kitail kin kilang soangen kahpwalo rahnwet? Ei uhdahn! Aramas karaunlikamwih Sises oh kose me dene e wiahda sapwung, oh rahnwet, aramas akan pil kin wiahiong Sounkadehdehn Siohwa kan soahngohte. Medewehla ekei karasepen met. Nan Wehin Amerika, nanpwungen pahr 1930 oh 1950, mie kopwung tohto nan mwoalen kopwung kan me kin kopwungki atail saledek en kaudokiong Koht. Ekei sounkopwung kan kin kasalehda ni sansal arail lipilipilki aramas. Nan Quebec, Canada, pelien lamalam kan en wasao oh arail kopermento kin uhdahn doadoahkpene pwehn uhwong atail doadoahk. Sounkalohk tohto selidi pwehki arail kalohk ong mehn mparail kan duwen Wehin Koht. Nan Sehmen, koperment en Nazi kemehla riatail brother pwulopwul tohto me kin lelepek. Nan pahr kan me keren, riatail Kristian tohto nan Russia alehdi kopwung sapwung oh selidi pwehki re kin koasoia duwen Paipel, wiewia ehu me koperment en wasao kahdaneki wiewiahn sounpelian koperment kan. Irail pil keinapwihdi neitail New World Translation of the Holy Scriptures ni lokaiahn Russia oh kahdaneki pwuhk wet nein sounpelian koperment kan neirail pwuhk pwehki mwaren Siohwa mi loale.

16. Nin duwen me 1 Sohn 4:1 kasalehda, dahme kahrehda kitail en dehr kamehlele koasoi likamw kan duwen sapwellimen Siohwa aramas akan?

¹⁶ Ia duwen atail en dehr dipekelekel? Esehda ire mehlel kan. Nan sapwellime Kapahrek en Pohn Dohl, Sises ketin katamankihong sounrongorong kan me ekei pahn “kinehda soangen suwed koaros” duwen irail. (Mad. 5:11) Likamw pwukat kohsang rehn Sehdan. E kin kahrehiong sounuhwong kan en kinehda likamw kan duwen irail kan me kin poakohng padahk mehlel. (Kaud. 12:9, 10) Kitail anahne soikala soangen likamw kan me sounuhwong kan kin wiahda. Kitail en dehr mweidohng likamw pwukat en kaluwetehla atail pwoson de perki papah Koht.​—Wadek 1 Sohn 4:1.

17. Ia duwen dahme wiawi mwohnte Sises pwoula eh kakete kahrehiong ekei en dipekelekel?

¹⁷ Mwohnte Sises eh pwoula, emen sapwellime tohnpadahk 12 ko pangala ih. Pil emen tohnpadahk ko kahmahmkihla ih pak siluh, oh sapwellime tohnpadahk ko koaros tangasang ih nipwongo mwohn eh pwoula. (Mad. 26:14-16, 47, 56, 75) Sises sohte ketin pwuriamweikihla met. E ketin kohpada me met pahn wiawi. (Sohn 6:64; 13:21, 26, 38; 16:32) Ni ekei ar kilang met, irail kakete dipekelekel oh nda, ‘Ma ih mwomwen sapwellimen Sises tohnpadahk ko me, I sohte men iang kisehrail!’

18. Kokohp dah kan me pweida mwohnte Sises eh pwoula?

¹⁸ Dahme Paipel mahsanih? Sounpar epwiki kei mwowe, Siohwa ketin kasalehda nan sapwellime Mahsen me aramas pahn pangala Mesaiao ni uwen mwohni silper 30. (Sek. 11:12, 13)  Me pangala iho pahn wia emen kompoakepahn Sises. (Mel. 41:9) Soukohp Sekaraia pil ntingihedi: “Peiong silepen sihpwo . . . oh sihpw kan ahpw pahn tangpeseng.” (Sek. 13:7) Aramas me ahneki mohngiong mehlel sohte pahn soikala Sises pwehki soangen mwekid pwukat. Arail pwoson pahn kehlailla ni arail kilang kokohp pwukat pweida rehn Sises.

19. Dahme irail kan me ahneki mohngiong mehlel kin ese?

¹⁹ Kitail kin kilang soangen kahpwalo rahnwet? Ei. Nan atail ahnsou, mie ekei Sounkadehde me me tohto kin ese me uhdihsang papah Koht. Irail kesehla oh uhwongada kaudok mehlel oh song en kahrehiong meteikan en pil sohla papah Koht. Irail kin kadarpeseng nan nuhs oh Internet ripoht likamw oh soahng likamw kan duwen Sounkadehdehn Siohwa kan. Ahpw weksang irail, irail kan me ahneki mohngiong mehlel sohte kin dipekelekel. Irail ese me Paipel kohpadahr me soahng pwukat pahn wiawi.​—Mad. 24:24; 2 Pit. 2:18-22.

20. Ia duwen atail en dehr dipekelekelki irail kan me kesehla padahk mehlel? (2 Timoty 4:4, 5)

²⁰ Ia duwen atail en dehr dipekelekel? Kitail anahne kolokolete atail pwoson en kehlail sang ni atail kin kaukaule onop, pousehlahte kapakap, oh doulahte soupisengki doadoahko me Siohwa ketikihong kitail en wia. (Wadek 2 Timoty 4:4, 5.) Ma kitail ahneki pwoson, kitail sohte pahn masepwehkada ni atail rong rohng suwed kan duwen Sounkadehdehn Siohwa kan. (Ais. 28:16) Atail poakohng Siohwa, sapwellime Mahsen, oh riatail Kristian kan pahn sewese kitail en dehr dipekelekelki irail kan me kesehla padahk mehlel.

21. Mendahki pali tohtohn aramas akan rahnwet kin soikala atail padahk, dahme kitail kak uhdahn kamehlele?

²¹ Ni mwehin Siseso, me tohto kin dipekelekel oh soikala ih. Ahpw me tohto teikan kin pwungki ih. Irail pwukat iei me iangahki tohtohsang emen tohn Sanedrin en mehn Suhs ko, oh pil “me tohto rehn samworo ko.” (Wiewia 6:7; Mad. 27:57-60; Mark 15:43) Pil duwehte rahnwet, me rar rar kei sohte kin dipekelekel. Dahme kahrehda? Pwehki re ese oh poakohng padahk mehlel me mi nan Paipel. Mahsen en Koht mahsanih: “Irail kan me kin kesempwalki sapwellimomwi kosonned kin ahneki saledek sang apwal, oh sohte mehkot me kak kahrehiong arail pahn pwupwudi.”​—Mel. 119:165.