1. Dahme kahrehda sapwellimen Siohwa tohnkaudok kan kin ekei pak pehm me re kelekelehpw?

 PALI laud en kitail kin ekei pak ahneki pepehm en sangat. Ong ekei, pepehm pwukat kin mwadang sohrala. Ong ekei, pepehm en sangat kin mihmihki ahnsou reirei. Ele kitail pil kin sangat ni atail kin mi rehn aramas tohto. Ekei kin apwalki wiahda kompoakparail kan nan mwomwohdiso kapw ehu. Ekei wia kisehn peneinei ehu me kin wiapene soahng tohto, ahpw re kin uhdahn sangat ni arail kin keseula wasa ehu me dohsang arail peneinei. Ekei pil kin uhdahn loaleidki kompoakparail men me melahr. Oh ekei Kristian, ahpw mehlel irail me ahpwtehn sukuhlki padahk mehlel, kin pehm me re kelekelehpw ni arail peneinei kan oh kompoakparail kan me sohte kin kaudokiong Siohwa ar keseirailla de kaloke irail.

2. Peidek dah kan me kitail pahn sapengala?

² Siohwa ketin mwahngih de wehwehki soahng koaros duwen kitail. Ni atail kin sangat, e kin ketin mwahngih duwen met, oh ketin kupwurki sewese kitail en powehdi pepehm wet. Ia duwen Siohwa eh kin ketin sewese kitail? Dahme kitail kak wia pwehn sewese pein kitail? Oh ia duwen atail kak sewese meteikan me kin sangat nan atail mwomwohdiso? Kitail pahn koasoiapene pasapengpen peidek pwukat.

3. Ia duwen Siohwa eh ketin kasalehda me e ketin nsenohki Elaisa?

³ Siohwa ketin kupwurki sapwellime tohnkaudok koaros en peren. E kin ketin karanih emenemen kitail, oh ketin mwahngih ni atail kin nsensuwed de mworusala. (Mel. 145:18, 19)  Medewehla ia uwen eh ketin nsenohki en soukohp Elaisa pepehm oh ia duwen eh ketin sewese ih. Ohl lelepek menet momourki erein ahnsou apwal ehu nan poadopoad en Israel. Me lapalap kan nan Israel me sohte kin poakohng Siohwa kaloke irail kan me kin kaudokiong ih, ahpw Elaisa me re men keieu kemehla. (1 Nan. 19:1, 2) Elaisa pil medewe me ih kelehpw soukohp me luhwehdi me kin papah Siohwa, oh ele met kin uhdahn kamworusihala. (1 Nan. 19:10) Koht ketin mwadangete wia mehkot pwehn sewese ih. Siohwa ketin poaronehla tohnleng men en kamehlelehong sapwellime soukohpo me e sohte kelekelehpw​—me miehte mehn Israel tohto me kin papah Siohwa ni lelepek.​—1 Nan. 19:5, 18.

4. Ia duwen Mark 10:29, 30 eh kasalehda uwen Siohwa eh kin ketin nsenohki irail kan me sohla ale sawas sang arail peneinei de kompoakparail kan?

⁴ Siohwa ketin mwahngih me ni atail kin pilada en papah ih, ekei kitail pahn anahne wiahda tounmetei tohto. Ele ehu rehn soahng kan me kitail tounmeteikihla iei sawas sang tohn atail peneinei oh kompoakepatail kan me sohte kin papah Siohwa. Mwein pwehki wahnpoaron Piter pwunod, e keinemwe rehn Sises: “[Se] pwilikidier mehkoaros oh ideidawehn komwi; eri dahme se pahn pwaisanki?” (Mad. 19:27) Ni kadek, Sises mahsanihong sapwellime tohnpadahk ko me mwomwohdiso pahn duwehla peneinei ehu ong irail. (Wadek Mark 10:29, 30.) Oh Siohwa, Samatailo nanleng, ketin inoukihda me e pahn ketin sewese irail kan me men papah ih. (Mel. 9:10) Medewehla soahng mwahu kan me ke kak wia pwehn ale sapwellimen Siohwa sawas ni omw kin pelipelian pepehm en me ke kelekelehpw.

5. Dahme kahrehda e mwahu en medewe ia duwen Siohwa eh kin ketin seweseiuk?

⁵ Medewe ia duwen Siohwa eh kin ketin seweseiuk. (Mel. 55:22) Met pahn seweseiuk en ese me ke sohte kelekelehpw. Sister kiripw men me adaneki Carol, b me eh peneinei sohte mi nan padahk mehlel, nda: “Ni ei medewehla duwen Siohwa eh kin ketin sewese ie en dadaur pahn ahnsou apwal kan, met sewese ie en pehm me I sohte kelekelehpw. Oh met  kamehlelehiong ie me Siohwa pahn ketin ahnsou koaros sewese ie.”

6. Ia duwen 1 Piter 5:9, 10 eh kak kangoange irail kan me pehm me re kelekelehpw?

⁶ Medewe ia duwen Siohwa eh kin ketin sewese riatail Kristian kan me kin pehm me re kelekelehpw. (Wadek 1 Piter 5:9, 10.) Hiroshi, brother men me kelehpw wia Sounkadehde men nan eh peneineio erein sounpar tohto, nda: “Nan mwomwohdiso, e mengei en kilang me koaros ahneki kahpwal. En ese me kitail koaros kin wia uwen atail kak pwehn papah Siohwa kak kangoange irail kan me pehm me re kelekelehpw nan padahk mehlel.”

7. Ia duwen kapakap eh kin seweseiuk?

⁷ Kaukaule kapakap, wadek Paipel, oh towehda mihting kan. Ke anahne padahkihong Siohwa ia uhdahn omw pepehm. (1 Pit. 5:7) Massiel nda: “Ehu rehn soahng kan me keieu kesempwal me sewese ie en dadaur pahn ei pepehm en kelekelehpw iei kapakap ngidingid ong Siohwa. Ni sister pwulopwul menet eh pilada en papah Siohwa, e pehm me e kelekelehpw pwehki eh peneinei sohte kin papah Siohwa. E pil nda: “Siohwa ketin wiahla uhdahn ei pahpa, oh I kin kapakap ong ih rahn koaros pak tohto, oh padahkihong ih ei pepehm kan.”

8. Ia duwen wadawad en Paipel oh doudouloale eh kin seweseiuk?

⁸ Kaukaule wadek Mahsen en Koht, oh medewe duwen ire kan me kasalehda me Siohwa kin ketin poakohng uhk. Bianca, sister men me anahne dadaur pahn lokaia kamedek sang eh peneinei, nda: “En wadek oh doudouloale duwen sapwellimen Siohwa aramas akan nan Paipel oh pil ni atail ahnsou me ahneki soangen kahpwal kohte uhdahn kin sewese ie.” Ekei Kristian kan wadlikihala iren Paipel kan me uhdahn kansenamwahwihirailla, me duwehte Melkahka 27:10 oh Aiseia 41:10. Ekei kin rong wadawad en Paipel nan neirail sehlpwohn de tablet de pil ire kan pwehn kaunopada ong mihting. Irail nda me met sewese irail en pehm me re sohte nohn kelekelehpw.

9. Ia duwen omw kin paiekihda omw iang mihting kan?

⁹ Wia uwen omw kak en kaukaule iang towehda mihting kan. Ke pahn uhdahn paiekihda prokramo, oh ke pahn pil esehla mwahu riomw Kristian kan. (Ipru 10:24, 25) Massiel, me kitail koasoiapene mwoweo, nda: “Mendahki I kin uhdahn namenek, I koasoanehdi ien kin iang towehda mihting en mwomwohdiso koaros oh iang pasapeng. Met sewese ie en pehm me I iang kisehn mwomwohdisou.”

10. Dahme kahrehda e kesempwal en kompoakepahnkihla riatail Kristian lelepek kan?

¹⁰ Kompoakepahnkihla Kristian lelepek kan. Wiahda kompoakepahmw kan nan mwomwohdiso  me ke kak sukuhl sang, mehnda ma irail mah de pwulopwul sang uhk, de mwomwen arail tikida weksang ahmw. Paipel katamankihong kitail me “aramas mah kan” kin ahneki erpit. (Sohp 12:12) Me mah kan kak sukuhlki soahng tohto sang me pwulopwul kan. Depit uhdahn pwulopwul sang Sonadan, ahpw met sohte irehdi ara en kompoakepahnki emenemen. (1 Sam. 18:1) Depit oh Sonadan kin sawaspene pwehn papah Siohwa mendahki kahpwal kan. (1 Sam. 23:16-18) Sister men me adaneki Irina, me kelehpw wia Sounkadehde men nan eh peneineio, nda: “Riatail Kristian kan kak wiahla uhdahn atail pahpa, nohno, de riatail. Siohwa kak ketin doadoahngkin irail en wiahla uhdahn atail peneinei.”

11. Dahme ke anahne wia pwehn wiahda kompoakepahmw mwahu kan?

¹¹ En wiahda kompoakepahmw kapw sohte mengei, ahpw mehlel ma ke kin namenek. Ratna, sister men me kin namenek, sukuhlki padahk mehlel mendahki uhwong kan. E nda: “I anahne pohnese me I anahne sawas sang riei Kristian kan nan mwomwohdiso.” E kak apwal en ndaiong emen ia omw pepehm, ahpw ni omw wia met, aramaso kak wiahla kompoakepahmw keren men. Kompoakepahmw kan men kangoange oh seweseiuk, ahpw irail anahne ken padahkihong irail ia duwen arail kak wia met.

12. Ia duwen doadoahk en kalohk eh seweseiuk en wiahda kompoakepah mwahu kan?

¹² Ahl me keieu mwahu en wiahda kompoakepahmw kan iei sang ni omw iang riomw Kristian kan kalohk. Carol, me kitail koasoiapene mwoweo, nda: “I kin wiahda kompoakepahi mwahu tohto sang ni ei iang sister kan kalohk oh pil iang wia soahng teikan nan sapwellimen Siohwa doadoahk. Siohwa ketin sewese ie erein sounpar tohto leledo met sang ni eh ketikihda kompoakepahi pwukat.” Atail kin kompoakepahnkihla riatail Kristian lelepek kan kin ahnsou koaros mwahu ong kitail. Siohwa kin ketin doadoahngki soangen kompoakepah mwahu pwukat pwehn seweseiuk ni omw kin mworusala, duwehte ni omw kin pehm me ke kelekelehpw.​—Lep. Pad. 17:17.

13. Pwukoa dah me koaros nan mwomwohdiso ahneki?

¹³ Koaros nan mwomwohdiso pwukoahki en wiahda popohl oh kasalehda limpoak nan mwomwohdiso pwe sohte emen en pehm me e kelekelehpw. (Sohn 13:35) Dahme kitail wia oh nda kak uhdahn kangoange laud meteikan! Tehk dahme emen sister nda: “Ni ahnsou me I esehla padahk mehlel, mwomwohdiso wiahla ei peneinei. I sohte kak wiahla emen Sounkadehdehn Siohwa ma irail sohte sewese ie.” Dahme ke kak wia pwehn sewese irail kan me pehm me re kelekelehpw nan padahk mehlel pwe ren pehm me irail wia kisehn mwomwohdiso?

14. Dahme ke kak wia pwehn kompoakepahnkihla me kapw kan?

¹⁴ Song en kompoakepahnkihla me kapw kan. Kitail kak tepida wia met sang ni atail kasamwo ni kadek me kapw kan nan mwomwohdiso. (Rom 15:7) Ahpw kitail anahne wia laudsang en ihte rahnmwahwih irail. Kitail men wiahda kompoakepah kan me pahn mihmi werei. Eri kasalehda kadek oh me ke uhdahn nsenohki me kapw kan. Dehr idek peidek kan me pahn kanamenek ong irail, ahpw song wehwehki kahpwal kan me irail ahneki. Ele e kin apwal ong ekei en kasalehda arail pepehm, eri dehr idingkihong irail en koasoi. Idek peidek kan ni kadek oh rong arail pasapeng kan ni kanengamah. Karasepe, ke kak idek ia duwen arail esehla padahk mehlel.

15. Ia duwen Kristian koahiek kan ar kak sewese meteikan nan mwomwohdiso?

 ¹⁵ En koaros pwoson nan mwomwohdiso pahn kehlailla ni Kristian koahiek kan, ahpw mehlel elder kan, ar kin nsenohki irail. Melissa, me tikida nan padahk mehlel rehn eh nohnou, nda: “I uhdahn kalahnganki brother kan me duwehte pahpa kei ong ie, me kin wiahda ahnsou ong ie, oh pil nsenohkin ie. Ahnsou koaros kin mie me I kak lokaiaiong.” Brother pwulopwul men me adaneki Mauricio, nsensuwedla oh pehm me e kelehpwla ni eh sounpadahk en Paipelo kohkohsang padahk mehlel. Mauricio nda: “Elder kan kasalehda me re uhdahn nsenohkin ie oh met sewese ie laud. Irail kin kaukaule koasoiong ie. Irail kin iang ie kalohk, ehukihong ie soahng kesempwal kan sang arail onop en Paipel, oh pil iang ie mwadong.” Melissa oh Mauricio doulahte doadoahngki pali laud en ara ahnsou ong papah Siohwa.

16-17. Ni ahl mwahu dah kan me ke kak sewese meteikan?

¹⁶ Kihda sawas me mwahu ong irairo. (Kal. 6:10) Leo, misineri men me mi nan sahpw ehu me dohsang eh peneinei, nda: “Pak tohto ihte me ke anahne iei emen en kadek ong uhk ni ahnsou me konehng. I tamanda ehu rahno ni ei lelohng aksident. Ahnsou me I lella nihmwo, I uhdahn pwunod. Ahpw pwopwoud ehu luke ie ien kohla iang ira mwenge. I sohte taman dahme se kang ahpw I taman me ira kadek ni ara rong ie. Mwurin mwo, I uhdahn nsenamwahula!”

¹⁷ Kitail koaros kin perenki ni atail kak iang iengatail Sounkadehde teikan oh koasoiapene padahk kan me kitail rong, me duwehte ni mihting tohrohr kan. Ahpw, Carol, me kitail koasoiapene mwoweo, nda: “I kin uhdahn pehm me I kin kelekelehpw ni mihting tohrohr kan.” Dahme kahrehda? E nda: “Mendahki I mi nanpwungen riei Kristian tohtohie, I kin kalapw kilang re kin patehng arail peneinei. Ni ei kilang irail, I kin uhdahn pehm me I kelekelehpw.” Meteikan kin apwalki pwurehng tepida iang towehda mihting tohrohr kan mwurin arail pwoud mehla. Mie emen me ke ese me ahneki soangen kahpwal wet? E pahn mwahu ma ke luke ih en iang omw peneineio kohla iang towehda mihting tohrohr me pahn wiawi mwurin mwo.

18. Ia duwen atail kak doadoahngki 2 Korint 6:11-13 ni atail kin kasamwo meteikan?

 ¹⁸ Wiahda ahnsou en patehng meteikan. Song en patehng soangsoangen riomw Kristian kan, ahpw mehlel irail kan me kin pehm me re kelekelehpw. Kitail men “ritingada douluhl” atail mohngiong, ahpw mehlel ong irail. (Wadek 2 Korint 6:11-13.) Melissa, me kitail koasoia mwoweo, nda: “Se kin ahnsou koaros perenki ni riat Kristian kan ar kin lukei kiht en kohla ni imwarail de iang irail mwemweitla ekei wasa.” Mie emen nan omw mwomwohdiso me ke kak kasamwo?

19. Ahnsou dah me pahn keieu mwahu ong kitail en patehng riatail Kristian kan?

¹⁹ Ele mie ahnsou me riatail Kristian kan pahn uhdahn perenki ma kitail patehng irail. Ekei ele apwalki mi rehn arail peneinei kan me kaidehn Sounkadehdehn Siohwa ni rahnen kasarawi kan. Ekei ele kin uhdahn nsensuwed ni rahnen kataman en mehlahn emen me re poakohng. Ni atail kin wiahda ahnsou pwehn patehng riatail Kristian kan me ahneki soangen kahpwal pwukat, kitail kin kasalehiong irail me kitail ‘uhdahn nsenohkin’ irail.​—Pil. 2:20.

20. Ia duwen mahsen en Sises ko nan Madiu 12:48-50 eh sewese kitail ni atail kin pehm me kitail kelekelehpw?

²⁰ Mie kahrepe tohto me Kristian men kak ekei pak pehm me e kelekelehpw. Ahpw kitail en dehr manokehla me Siohwa uhdahn ketin mwahngih soangen pepehm pwukat. E kin kalapw ketin doadoahngki riatail Kristian kan pwe ren kihong kitail dahme kitail anahne. (Wadek Madiu 12:48-50.) Eri kitail uhd kasalehiong Siohwa atail kalahnganki mwomwohdiso ni atail kin wia uwen atail kak en sewese riatail Kristian kan. Sohte lipilipil ia atail pepehm ekei pak, kitail sohte kin kelekelehpw pwehki Siohwa kin ketin ahnsou koaros ieiang kitail!