1. Dahme Siohwa ketin wiahiong emenemen kitail?

 SIOHWA kin ketin kakaranihala emenemen kitail reh. (Sohn 6:44) Medewehla ia wehwehn met. Ni Siohwa eh kin ketin tetehk mwahu aramas lik lik kei nin sampah wet, e ketin tehkada me kowe wia aramas mwahu men oh kak poakohngala ih. Met wia mehkot kesempwal ong ih. (1 Kron. 28:9) Siohwa ketin mwahngihiuk, wehwehki duwen kowe, oh poakohng uhk. Ia uwen kansenamwahu en ese met!

2. Ia duwen Sises eh sewese kitail en wehwehki uwen Siohwa eh kin ketin nsenohki emenemen kitail?

² Siohwa kin uhdahn ketin nsenohkin uhk, oh e pil ketin nsenohki riomw Kristian kan koaros. Pwehn sewese kitail en wehwehki met, Sises ketin kapahrekiong Siohwa sounsilepen sihpw men. Ma emen sihpw salongasang sihpw 100 nan pelin sihpwo, dahme sounsilepen sihpwo pahn wia? E pahn “kihdi me 99 pohn nahnao oh kohla rapahki me salongalahro.” Ni sounsilepen sihpwo eh diarada sihpwo, e sohte pahn lipwoare. E pahn peren. Ia ire kesempwalo? Sihpw koaros kin kesempwal ong Siohwa. Sises mahsanih: “Semei me ketiket nanleng pil sohte ketin kupwurki emen rehn me tikitik pwukat en sohrala.”​—Mad. 18:12-14.

3. Dahme kitail pahn koasoiapene nan iren onop wet?

³ Uhdahn kitail sohte men kahrehiong emen riatail Kristian en mworusala. Ia duwen atail kak soikala kadipekelekelih meteikan? Oh dahme kitail kak wia ma emen kamedekihala kitail? Kitail pahn sapengala peidek pwukat nan iren onop wet. Ahpw keieu, kitail pahn kalaudehla atail wehwehki ihs “me tikitik pwukat” me Madiu irelaud 18 mahsanih duwe.

4. Ihs irail “me tikitik pwukat”?

⁴ “Me tikitik pwukat” iei sapwellimen Sises tohnpadahk kan koaros. Sohte lipilipil irail sounpar depe, irail duwehte “kisin seri” pwehki irail kin perenki ale kasukuhl sang Sises. (Mad. 18:3) Mendahki mwomwen arail tikida, mwomwen arail tiahk, oh mwomwen arail madamadau kin wekpeseng, irail koaros kin pwoson Krais. Oh Krais kin uhdahn ketin poakohng irail.​—Mad. 18:6; Sohn 1:12.

5. Ia sapwellimen Siohwa pepehm ni emen eh kin kadipekelekelih de kamedekihala emen sapwellime aramas?

⁵ Irail “me tikitik pwukat” koaros kin kesempwal ong Siohwa. Pwehn wehwehki sapwellime pepehm, medewehla ia atail pepehm ong seri kan. Kitail kin kesempwalkin irail. Kitail kin men pere irail pwehki irail luwet, soakoahiek, oh sohte ahneki erpit duwehte me laud kan. Kitail sohte perenki kilang emen eh kaloke emen tohrohr, ahpw ni atail kin kilang emen eh kaloke seri men, kitail kin uhdahn lingeringerki. Ni ahlohte, Siohwa kin ketin kupwurki pere kitail. E kin ketin kupwursuwedki​—pil engiengkihda—​ni emen eh kadipekelekelih de kamedekihala emen sapwellime kan!—Ais. 63:9; Mark 9:42.

6. Nin duwen me 1 Korint 1:26-29 mahsanih, ia duwen sampah wet eh kin kilangwohng sapwellimen Sises tohnpadahk kan?

⁶ Ni ahl dah teikan me sapwellimen Sises tohnpadahk kan kin duwehte irail “me tikitik pwukat”? Ihs me sampah wet kin kesempwalki? Irail kin kesempwalki me kepwehpwe kan, me ndand, oh me ahneki manaman laud. Ahpw pali laud en sapwellimen Sises tohnpadahk kan sohte duwehte irail. Eri aramas en sampah wet kin medewe me irail “me tikitik pwukat” mwomwen wia aramas me sohte kesempwal oh sohte katepe. (Wadek 1 Korint 1:26-29.) Ahpw Siohwa sohte kin ketin kilangwohng irail ni ahl wet.

7. Pepehm dahieu me Siohwa ketin kupwurki kitail en ahneki ong riatail Kristian kan?

⁷ Siohwa kin ketin poakohng sapwellime ladu kan koaros, sohte lipilipil ma irail papah ih erein sounpar tohto de irail kapw nan padahk mehlel. Riatail Kristian kan koaros kin kesempwal ong Siohwa, kahrehda kitail pil anahne kesempwalki irail. Kitail men ‘poakohng riatail kan koaros,’ kaidehn ekeite. (1 Pit. 2:17) Kitail en men wia uwen atail kak en pere oh pil apwalih irail. Ma kitail esehda me kitail kamedekihala de kansensuwedihada emen, kitail en dehr pohnsehsehla met oh medewe me aramaso anahne mahkohng kitail oh manokehla dahme wiawi. Dahme kahrehda ekei kakete nsensuwedla? Mwein pwehki mwomwen arail tikida, ekei riatail Kristian kan kin medewe me irail sohte kesempwal duwehte meteikan. Ekei irail kapw nan padahk mehlel oh irail saikinte sukuhlki me re anahne mahkohng en aramas ar sapwung kan. Sohte lipilipil kahrepe dahieu me kitail, de irail, nsensuwedkihla, kitail anahne pwurehng wiahda popohl. Pil ehu, emen me kin kalapw nsensuwedla pahn meteikan anahne pohnese me irair wet sohte mwahu oh me e anahne kamwahwihala. Eri e pahn ahneki peren oh nanpwungmwahu rehn rie kan.

8. Madamadau dahieu me aramas akan ni mwehin Siseso ahneki me pil kamwakid sapwellime tohnpadahk kan?

⁸ Dahme kamwakid Sises en mahsanih duwen irail “me tikitik pwukat”? Sapwellime tohnpadahk ko kalelapek reh: “Ihs me keieu lapalap nan Wehin nanleng?” (Mad. 18:1) Mehn Suhs tohto kin men meteikan en medewe me irail uhdahn kesempwal. Emen ohl saman koasoia: “En ale wahu sang meteikan  oh ndandla iei me keieu kesempwal nan arail mour.”

9. Dahme sapwellimen Sises tohnpadahk ko anahne wia?

⁹ Sises mwahngih me mehn Suhs tohto kin medewe me e kesempwal en mwahusang meteikan. Eri sapwellime tohnpadahk ko anahne doadoahk laud pwehn wekidala arail madamadau. E mahsanihong irail: “Mehmen me keieu lapalap nanpwungamwail en wiahla me keieu tikitik, oh mehmen me kin tiengla mwowe en kin papah kumwail.” (Luk 22:26) Kitail en wia “me keieu tikitik” ni atail kin “wiahki meteikan lapalapasang” kitail. (Pil. 2:3) Ni atail kin kakairada madamadau wet, kitail sohte pahn kadipekelekelih meteikan.

10. Ahn Pohl kaweid dahieu me kitail anahne doadoahngki?

¹⁰ Riatail Kristian kan koaros kin lapalapasang kitail ni soangen ahl koaros. E mengei en wehwehki met ni atail kin medemedewehte arail irair mwahu kan. Kitail anahne tamataman kaweid me wahnpoaron Pohl kihong mehn Korint ko: “Pwe ihs me wiahiong uhk ken weksang meteikan? Ni mehlel, dahme ke ahneki me ke sohte alehdi? Ma mehlel ke alehdi, dahme kahrehda ke kin suweiki likamwete ke sohte alehdi?” (1 Kor. 4:7) Eri kitail sohte men meteikan en wadek kitail de pein wiahki kitail lapalapasang meteikan. Karasepe, brother men me kin wia padahk me uhdahn mwahu de sister men me kin mwadang en tapiada onop en Paipel tohto anahne ahnsou koaros patohwanohng Siohwa kaping pwehki dahme re kak wia.

11. Ia mehn kasukuhlo me kitail sukuhlki sang karasaras en nanmwarkio oh nah laduwo?

¹¹ Mwurin Sises eh ketin katamankihong sapwellime tohnpadahk kan en dehr kadipekelekelih meteikan, e ketikihda karasaras ehu duwen nanmwarki men oh nah laduwo. Nanmwarkio irisasang ahn nah laduwo pweipwand laud ehu me e sohte kak pwainla. Mwuhr, laduwo sohte men irisasang ahn emen ienge ladu pweipwand tikitik ehu me e pweipwandkihong ih. Imwilahn met, nanmwarkio kesehlong nan imweteng ladu soh kadeko. Ia mehn kasukuhlo? Sises mahsanih: “Semei nanleng pil pahn ketin wiahiong kumwail soahngohte ma emenemen kumwail sohte pahn mahkohng rie sang nan eh mohngiong.”​—Mad. 18:21-35.

12. Ia duwen atail kin kamedekihala meteikan ma kitail sohte kin mahkohng irail?

¹² Dahme laduwo wia kamedekihala, kaidehn ih kelehpw, ahpw pil meteikan. Keieu, e sohte kadek oh sohte kasalehda mahk ong ienge laduwo pwehki e “kesehlong ih nan imweteng, e lao pahn kak kapwungala eh pweipwand.” Keriau, e kamedekihala ladu teiko me kilang dahme e wiahdao. Ni ienge “ladu ko ar kilangada dahme wiawi, re ahpw nsensuwedkihla kowahlap.” Duwehte met, atail wiewia kak kamwakid meteikan. Ma emen wiahiong kitail mehkot suwed oh kitail sohte men mahkohng ih, dahme kak wiawi? Keieu, kitail kamedekihala ih pwehki kitail sohte mahkohng ih, oh ele kitail pohnsehsehla ih oh sohte kasalehiong ih limpoak. Keriau, kitail kin kahrehiong meteikan nan mwomwohdiso en soansuwedkihda arail kilang me kitail sohte ahneki meleilei rehn meteio.

13. Dahme ke sukuhlkihsang dahme wiawihong emen pioneer?

¹³ Ni atail kin mahkohng riatail Kristian kan, kitail kin nsenamwahula oh kitail kin sewese meteikan en pil nsenamwahula. Ih met me wiawihong emen pioneer me kitail pahn kahdaneki Crystal. Emen sister nan mwomwohdiso kansensuwedihala ih. Crystal nda: “Eh  lokaia ko kin uhdahn kamedek duwehte e doakoahkin ie naip. Nan kalohk, I sohte pil men iang sidohsa me e kin iango. I tepida sohla ahneki ngoang oh peren.” Crystal pehm me e ahneki kahrepe mwahu en lingeringer. Ahpw e sohte kolokolete eh lingeringero de medemedewehte pein ih oh eh pepehmo. Ni aktikitik, e doadoahngki kaweid en Paipel me mi nan iren onopo “Mahkohng Meteikan Sang Nan Kapehdomw” nan Kahn Iroir en May 1, 2000. E mahkohng rieo. Crystal nda: “Met I wehwehki me kitail koaros kin nannanti en wiahda wekidekla kan, oh Siohwa kin ketin kupwurperenki mahkohng kitail rahn koaros. I pehm me mehkot toutou kohsang pohi. I pwurehng ahneki peren.”

14. Nin duwen me Madiu 18:21, 22 mahsanih, kahpwal dahieu me wahnpoaron Piter ele ahneki oh dahme ke sukuhlkihsang dahme Sises ketin sapengki?

¹⁴ Kitail ese me kitail anahne kasalehda mahk; e pwung en wia met. Ahpw ele kitail kin apwalkihte wia met. Wahnpoaron Piter ele kin ekei pak ahneki soangen pepehm wet. (Wadek Madiu 18:21, 22.) Dahme kak sewese kitail? Keieu, doudouloale uwen laud en Siohwa eh kin ketin mahkohng uhk. (Mad. 18:32, 33) Kitail sohte warohng sapwellime mahk, ahpw e kin ketin kupwurperenki mahkohng kitail. (Mel. 103:8-10) Ni ahnsowohte, “kitail pil anahne poakohng emenemen.” Eri en kasalehda mahk kaidehn pilipil ehu. E konehng kitail en mahkohng riatail Kristian kan. (1 Sohn 4:11) Keriau, doudouloale dahme kin wiawi ni atail kasalehda mahk. Ele kitail kin sewese aramaso me wiahiong kitail sapwung, kaminiminpene mwomwohdiso, pere atail nanpwungmwahu rehn Siohwa, oh nsenamwahula. (2 Kor. 2:7; Kol. 3:14) Kesiluh, kapakapohng Ih me ketin kupwurki kitail en kasalehda mahk. Dehr mweidohng Sehdan en kauwehla popohl me ke ahneki rehn riomw Kristian kan. (Ep. 4:26, 27) Kitail anahne sapwellimen Siohwa sawas ma kitail men ahneki popohl nan mwomwohdiso.

15. Dahme Kolose 3:13 mahsanih ke kak wia ma riatail Kristian men wiahda mehkot me kansensuwedihkitailla?

¹⁵ Ahpw ia duwen ma riomw Kristian men wiahda mehkot me uhdahn kansensuwedihiukada? Dahme ke pahn wia? Wia uwen omw kak en kolokol meleilei. Kapakapohng Siohwa oh patohwanohng ih omw pepehm kan. Peki ih en ketin sewese aramaso me kansensuwedihiukala oh en ketin seweseiuk en kilang irair mwahu kan reh​—soangen irair kohte me Siohwa ketin kupwurperenki reh. (Luk 6:28) Ma ke sohte kak manokehla dahme riomwo wiahda, medewehda ia ahl me keieu mwahu en koasoiong ih. E kin ahnsou koaros mwahu en medewe me riomwo uhdahn sohte men kamedekihiukala. (Mad. 5:23, 24; 1 Kor. 13:7) Ni omw koasoiong ih, medewe me ele mie kahrepe mwahu ehu me e ahneki. Ahpw ia duwen ma e sohte men wiahda popohl? “Pousehlahte kanengamahiong” riomwo. (Wadek Kolose 3:13.) Keieu kesempwal, dehr kolokol omw lingeringer pah, pwe met kak kauwehla omw nanpwungmwahu rehn Siohwa. Dehr mweidohng mehkot en kadipekelekeleiuk. Ni omw wia met, ke kadehdehda me ke poakohng Siohwa laudsang mehkoaros.​—Mel. 119:165.

16. Pwukoa dahieu me emenemen kitail ahneki?

¹⁶ Kitail kin kalahnganki atail kak iang riatail Kristian kan papah Siohwa nin duwen “pelin sihpw teieu” pahn ‘silepatail mehtehmen.’ (Sohn 10:16) Pwuhko Organized to Do Jehovah’s Will, pali 165, koasoia: “Pwehki ke perenki miniminpene wet, ke anahne wia omw pwukoa pwehn kolokol miniminpene wet.” Eri, kitail anahne “kaiahne pein kitail en kilangwohng riatail Kristian kan nin duwen me Siohwa kin ketin wia.” Kitail koaros me wia “me tikitik pwukat” kin kesempwal ong Siohwa. Kitail anahne kilangwohng riatail Kristian kan ni ahlohte. Siohwa kin ketin mwahngih oh pil kesempwalki soahng koaros me ke kin wia pwehn sewese oh apwalih irail.​—Mad. 10:42.

17. Dahme kitail koasoanehdi teng en wia?

¹⁷ Kitail kin poakohng iengatail tohnkaudok kan. Eri kitail en “koasoanehdi teng en dehr kihdi mehn kadipekelekel de mehn kerempwa mwohn riatail men.” (Rom 14:13) Kitail kin wiahki riatail Kristian kan lapalapasang kitail, oh men mahkohng irail sang mohngiongitail. Kitail en dehr mweidohng pein kitail en dipekelekelki meteikan. Ahpw kitail en pilada en “rapahki soahng kan me kin kahrehda popohl oh soahng kan me kin kakehlaka emenemen.”​—Rom 14:19.