En Reopoham eh pahpao iei Solomon, me wia nanmwarki en Israel erein sounpar 40. (1 Nan. 11:42) Mwurin eh pahpao mehla, Reopoham seiloak sang Serusalem lella Sekem pwehn idihdida nin duwen nanmwarki. (2 Kron. 10:1) Ia duwe, e masak en wiahla nanmwarki mwuhr? Aramas akan kin ese me Solomon uhdahn erpit. Ahnsou keren Reopoham pahn anahne kadehdehda ma mie eh erpit en kapwungala kahpwal kan.

Mehn Israel ko kin mi nan lokolok oh re kadarala wilieperail kan en ndaiong Reopoham dahme re mwahuki ih en wia. Re nda: “Semomwio ketikihong kiht wisik toutou ehu. Ma komwi pahn kamarahda wisik toutou pwukat pwe se en nsenamwahu nan at momour, se pahn wiahla sapwellimomwi aramas loalopwoat.”​—2 Kron. 10:3, 4.

Reopoham anahne wiahda pilipil apwal ehu. Ma e wia dahme aramas ako mwahuki, ih oh eh peneinei oh irail kan nan tehnpas en nanmwarkio pahn kakete sohla nsenamwahuki ekei soahng mwahu kan me re kin ahnla. Ahpw, ma e sohte kapwaiada dahme aramas ako peki, irail kakete uhwongada ih. Dahme e wia? Keieu,e koasoiong ohl mah oh koahiek kan me kin sewese eh pahpao. Irail ndaiong ih en rong aramas ako. E sohte wia met ahpw e koasoiong ienge ko me wehte ih oh pilada en idawehn arail kaweid. E pilada en lemeiong aramas ako. Eri e sapengki: “Ei pahpao ketikihong kumwail wisik toutou; a ngehi I pahn kalaudehsang. E ketin wokihkin kumwail sahl; a ngehi I pahn wokihkin kumwail kilin kou!”​—2 Kron. 10:6-14.

Ia mehn kasukuhl ong kitail? Rahnwet, mie me mah kan rehtail me kin papah Siohwa sounpar tohto oh re kak sewese kitail en wiahda pilipil mwahu kan. Kitail en kasalehda erpit oh rong irail.​—Sohp 12:12.

Reopoham eri kihpene nah sounpei ko pwehn mahweniong keinek ko me uhwongada irail. Ahpw, Siohwa ketin poaronehla soukohp Semaia en  ndaiong irail: “Kumwail dehr mahweniong riamwail mehn Israel kan. Kumwail koaros pwuralahng nan dewemwail, pwe mepwukat pweidahr pwehki ngehi me wiahda.”​—1 Nan. 12:21-24. *

Ia duwe, e mengei ong Reopoham en rong Siohwa? Dahme aramas ako pahn medewehki arail nanmwarki kapwo? E ndaiong irail me e pahn kaloke irail ni eh ‘wokihkin irail kilin kou,’ ahpw met e sohte pahn wia mehkot me pid uhwong wet! (Pil kilang 2 Kronikel 13:7.) Mendahki dahme aramas ko medewehki duwen ih, nanmwarkio oh nah sounpei ko “peikiong mahsen en KAUN-O, re ahpw pwuralahng nan dewerail kan.”

Ia iren mehn kasukuhl ong kitail? E wia elen erpit en ahnsou koaros peikiong Koht mendahki ma aramas akan kauwe kitail pwehki atail wia met. Koht pahn ketin ahnsou koaros kapaiahda kitail ni atail kin peik.​—Deud. 28:2.

Ia duwe, Reopoham ale kapai pwehki eh peik? Reopoham wiahte nanmwarki en Suda oh Pensamin, oh e pilada en kauwada kahnimw kapw kan. E pil uhdahn kakehlailihala ekei kahnimw kan. (2 Kron. 11:5-12) Kesempwal sang met, erein ahnsou ehu e kin peikiong sapwellimen Siohwa kosonned kan. Pwehki keinek eiseko tepida kaudokiong dikedik kan, me tohto sang wasao seiloakla Serusalem pwehn “utung Reopoham” oh kaudok mehlel. (2 Kron. 11:16, 17) Eri pwehki Reopoham peikiong Siohwa, eh wehio kehlailla.

Ni wehin Reopohamo eh kehlailla, e wiahda mehkot kapwuriamwei. E uhdihsang peikiong sapwellimen Siohwa kosonned kan oh tepida kaudokiong koht likamw kan! Dahme kahrehda? Ia duwe, e idawehn eh nohno, me wia mehn Amon men? (1 Nan. 14:21) Ia duwe, eh peneineio kin kamwakid eh pilipilo? Kitail sohte ese, ahpw wehio idawehn eh mehn kahlemeng suwed. Eri Siohwa ketin mweidohng Nanmwarki en Isip Sisak, en kalowehdi kahnimw tohto nan wehin Suda. Met wiawi mendahki Reopoham wiahiong kahnimw ko en uhdahn kehlail!​—1 Nan. 14:22-24; 2 Kron. 12:1-4.

Irairo uhdahn suwedla ni Sisak oh nah sounpei ko ar kohdo pwehn peiong Serusalem, wasa me Reopoham wie kakaun. Ih ahnsowo me soukohp Semaia kihong Reopoham oh ienge kaun ko mahsen wet sang rehn Koht: “Kumwail keseielahr, eri, I pil pahn keseikumwaillahng rehn Sisak.” Ia duwen Reopoham mwekidki kaweido? Ni ahl ehu me uhdahn mwahu! Paipel mahsanih: “Nanmwarkio oh kaun ako ahpw patohwan pehmada me re dipadahr, re ahpw patohwan, ‘Dahme KAUN-O kupwuredahr en wia iei me pwung.’” Eri Siohwa ketin kapitala Reopoham, oh Serusalem sohte kasohrala.​—2 Kron. 12:5-7, 12.

Mwurin mwo, Reopoham pousehlahte kakaun wehin Suda. Mwohn eh mehla, e kihong kisakis tohto ong nah pwutak ko. Ele e men tehk mwahu me re sohte pahn uhwongada riarail pwutako Apaisa, me pahn wiahla nanmwarki mwurin ih. (2 Kron. 11:21-23) Ni eh wia met, Reopoham wiahda mwekid ehu me loalokong sang dahme e wiahda ni ahnsou e pwulopwulo.

Mendahki Reopoham nantihong song en wia soahng kan me mwahu, Paipel mahsanih: “Reopoham wiahda dihp.” Dahme kahrehda? Pwehki “eh sohte ketin rapahki kupwur en KAUN-O.” Eri Siohwa sohte ketin kupwurperenki ih.​—2 Kron. 12:14.

Dahme kitail kak sukuhlkihsang dahme wiawihong Reopoham? Ekei pak e kin peikiong Koht. Oh e wiahda soahng mwahu kan ong sapwellimen Siohwa aramas akan. Ahpw e sohte ahneki nanpwungmwahu keren rehn Siohwa, oh e sohte ahneki ineng laud en kaperenda ih. Eri e uhdihsang wia me pwung oh tepida kaudokiong koht likamw kan. Ele ke pahn medewe: ‘Ni ahnsou me Reopoham kin peikiong Siohwa, e kin wia met pwehki e uhdahn koluhkihla dipe kan oh men kaperenda Koht? De e kin wia met ihte pwehki dahme meteikan nda e anahne wia?’ (2 Kron. 11:3, 4; 12:6) Ahnsou ehu mwuhr nan eh mour, e pwurehng wia dahme suwed. E uhdahn weksang eh pahpa kahlapo Nanmwarki Depit! Mehlel me Depit wiahda sapwung kan. Ahpw e uhdahn koluhkihla dipe ko. Oh e poakohng Siohwa oh kaudok mehlel erein eh mour.​—1 Nan. 14:8; Mel. 51:1, 17; 63:1.

 Kitail kak sukuhlkihsang koasoipen Paipel wet. Kitail anahne apwalih atail peneinei oh doadoahk laud nan sapwellimen Siohwa doadoahk. Ahpw met sohte itar. Pwe kitail en kenikenla rehn Koht, kitail anahne kaudokiong ih ni ahl ehu me kin kaperenda ih, oh kitail anahne ahneki nanpwungmwahu kehlail reh.

Pwe kitail en lelohng mehn akadei wet, kitail anahne uhdahn poakohng Siohwa. Duwehte atail kin saun kisiniei ehu pwehn lullul, kitail anahne kolokolete atail limpoak ong atail Koht en kehlail sang ni atail pahn kaukaule onopki sapwellime Mahsen, doudouloale oh poadidiong kapakap. (Mel. 1:2; Rom 12:12) Oh limpoak wet pahn kamwakid kitail en kaperenda Siohwa ni soahng koaros me kitail kin wia. Met pahn pil kamwakid kitail en uhdahn koluhla ni atail wiahda sapwung kan oh patohwan peki rehn Siohwa en ketin mahk ong kitail. Eri kitail sohte pahn duwehte Reopoham ahpw kitail en kolokolete atail loalopwoat ong kaudok mehlel.​—Sud 20, 21.