1. Dahme kahrehda Siohwa iei Sounwia sah me keieu lapalap?

 NAN November 2010, uwen pweinen sah ehu me wiawihda mahs mahsie nan China kereniong lel tala isidep (70,000,000) nan London, England. E kapwuriamwei me sounwia sah men kak wiahda sah kaselel oh pweilaud ehu sang pwehl me pweitikitik oh kitail kin kilang wasa koaros. Ahpw sohte sounwia sah men me kak pahrekiong Siohwa. Paipel mahsanih me Siohwa ketin wiahda ohl unsek men sang “nesen pwehl ehu sang nanpwel.” (Sen. 2:7) Ohlo Adam iei “sapwellimen Koht” oh e kepikipikda ahneki koahiek en alasang sapwellimen Koht irair kan.​—Luk 3:38.

2, 3. Ia duwen atail kak alasang mehn Israel ko me koluhla?

² Ni ahnsou me Adam uhwongada Sounkapikpeo, e sohla wia sapwellimen Koht. Ahpw kadaudok en Adam tohto piladahr Siohwa en ketin wia arail Kaun. (Ipru 12:1) Sang ni arail kin aktikitik oh peikiong Sounkapikparail, re kasalehdahr me re men ih, ahpw kaidehn Sehdan, en ketin wia Samarail oh Sounwiaparail me rasehng sounwia sah. (Sohn 8:44) Arail loalopwoatohng Koht kin katamankihong kitail duwen dahme mehn Israel kan me koluhla nda: “Komwi me samat, Maing KAUN. Se rasehng pwehl, a komwi sounwia sah. Komwi me ketin wiaikitada.”​—Ais. 64:8.

 ³ Sapwellimen Siohwa tohnkaudok mehlel kan rahnwet pil kin song uwen arail kak en aktikitik oh peik. Irail kin medewe me e wia pai kaselel ehu en ekerki Siohwa Samarail, oh re kin men en ketin wia Sounwiaparail. Ia duwe, kitail kin men duwehte pwehl mwuterek me Koht kak ketin wiahda en duwehla sah kaselel ehu? Kitail kin kilang ahn riatail Kristian kan ar ale kaiahn sang Koht nin duwen mehkot me kin wiewiawihte? Pwehn sewese kitail en ahneki madamadau pwung ong met, kitail pahn koasoiapene ia duwen Siohwa eh kin ketin pilada ihs me e pahn ketin kaiahne, dahme kahrehda e kin ketin kaiahne irail, oh ia duwen eh kin ketin wia met.

4. Ia duwen Siohwa eh kin ketin pilada irail kan me e kin ketin kainangihedo reh? Menlau kihda karasaras kan.

⁴ Siohwa sohte kin ketin kilang mwomwen aramas duwehte atail kin wia. Ahpw, e kin ketin kasawih mohngiongitail oh kilang dahme uhdahn mi loalatail. (Wadek 1 Samuel 16:7b.) Siohwa ketin kasalehda met ni eh ketin wiahda mwomwohdisohn Kristian. E ketin kainangihedo reh oh sapwellime Ohlo aramas tohto me ekei kin medewe me sohte kateparail. (Sohn 6:44) Karasepe, emen me duwehte met iei Parisio me adaneki Sohl, me kin “lahlahwe mahso, oh pil kaloke oh kauwe.” (1 Tim. 1:13) Ahpw Siohwa ketin kasawih ahn Sohl mohngiongo oh sohte ketin medewe me e rasehng pwehl me sohte katepe. (Lep. Pad. 17:3) Siohwa ketin mwahngih me Sohl kak wiahla emen me pahn papah ih oh kalohk ong “mehn liki kan oh nanmwarki kan oh pil mehn Israel kan.” (Wiewia 9:15) Siohwa pil ketin pilada meteikan me kak kaiahnda “ong ni doadoahk kesempwal akante,” iangahki irail kan me mahs kin kamam sakau, wia tiahk samin, oh pirap. (Rom 9:21; 1 Kor. 6:9-11) Ni arail onopki Paipel, re kin kakehlakahda arail pwoson Siohwa oh mweidohng en ketin kaiahnehda irail.

5, 6. Ia duwen atail likih Siohwa nin duwen Sounwiapatail eh kin kamwakid atail madamadau ong (a) aramas akan nan atail wasahn kalohk? (b) riatail Kristian kan?

⁵ Kitail likih me Siohwa kak ketin pilada oh kainangihedo aramas pwung kan. Ihme kahrehda kitail en dehr kadeik meteikan nan atail wasahn kalohk de mwomwohdiso. Kilang ehu karasaras en dahme ohl emen me adaneki Michael wia ni ahnsou me Sounkadehdehn Siohwa kan mwemweitla reh. E nda: “I kin sohpeisang oh pohnsehsehla irail mwomwen me re sohte mi mwo. I uhdahn lemei ahnsowo! Mwuhr, nan irair tohrohr ehu, I tuhwong peneinei ehu me I uhdahn perenki pwehki arail wiewia mwahu kan. Ahpw ehu rahno I pwuriamweikihla ahi esehda me irail Sounkadehdehn Siohwa kei! Arail wiewia kan kamwakid ie en kasawih ia kahrepen ei kin lipilipil. I mwuhr esehda me ei madamadauo kin poahsoankihda dahme I sohte wehwehki oh dahme I rong sang meteikan, ahpw kaidehn sang dahme uhdahn mehlel.” Michael men kalaudehla eh wehwehki met oh pwungkihda en onop Paipel. Mwuhr e papidaisla oh wiahla emen me kin doadoahngki pali laud en eh ahnsou ong papah Siohwa.

⁶ Ni atail pohnese Siohwa nin duwen Sounwiapatail, atail madamadau ong riatail Kristian kan pahn pil wekila. Kitail pahn kilangwohng ar ale kaiahn nin duwen mehkot me kin wiewiawihte. Ihme Siohwa pil kin ketin wia. E kin ketin mahsanih dahme uhdahn mi nan mohngiongirail oh mwahngih me arail soh unsek pahn ongete ahnsou mwotomwot. E pil ketin mwahngih soangen aramas dah me emenemen irail kak wiahla. (Mel. 130:3) Kitail kak alasang Siohwa ma kitail ahneki soangen madamadauohte ong riatail Kristian kan. Kitail pil kak iang Sounwiapatail sewese riatail Kristian kan en kekeirda. (1 Des. 5:14, 15) Elder kan nan mwomwohdiso anahne wia mehn kahlemeng mwahu ni arail wia met.​—Ep. 4:8, 11-13.

7. Dahme kahrehda ke kin kalahnganki sapwellimen Siohwa kaweid?

⁷ Ekei aramas ele kin nda: ‘I sohte uhdahn kin kesempwalki kaweid me ei papah nohno kin kihong ie lao I pein nainekihda seri.’ Ni atail laudla, kitail ele kin kesempwalikihla kaweid kan pwehki kitail ese me met wia kasalepen limpoak. (Wadek Ipru 12:5, 6, 11.) Ei, Siohwa ketin poakohng kitail nin duwen sapwellime kan, ihme kahrehda e kin ketin kaweid, de kaiahne kitail ni kanengamah. E ketin kupwurki kitail en ahneki erpit oh nsenamwahu oh poakohng ih nin duwen Samatail. (Lep. Pad. 23:15) E sohte ketin kupwurki kilang kitail en lokolok, oh e sohte ketin kupwurki kitail en mehla nin duwen emen me wiahda dihp ahpw sohte koluhla.​—Ep. 2:2, 3.

8, 9. Ia duwen Siohwa eh kin ketin kasukuhlih kitail rahn pwukat, oh ia duwen kasukuhl wet eh pahn pousehlahte wiawi ni ahnsou kohkohdo?

⁸ Mwohn atail esehla Siohwa, ele kitail kin ahneki soangen irair suwed tohto. Ahpw Siohwa ketin kaiahnehda kitail oh sewese kitail en wekila, oh pwehki met, kitail ahneki irair kaselel kei ahnsou wet. (Ais. 11:6-8; Kol. 3:9, 10) Kitail mi nan irair en popohl oh minimin ehu me rasehng paradais. Met irair tohrohr ehu me Siohwa ketin wiahda nan atail ahnsou pwehn sewese kaiahne kitail. Nan irair wet, kitail sohte kin perki soahng kan mendahki sampah wet suwed. Ekei me kekeirda sohte ahneki pepehm en limpoak nan arail peneinei kin pehm limpoak mehlel sang riarail Kristian kan ahnsou wet. (Sohn 13:35) Oh kitail sukuhlki en kasalehda limpoak ong meteikan. Ahpw keieu kesempwal, kitail esehlahr Siohwa oh met kitail pehm sapwellime limpoak nin duwen Samatail.​—Seims 4:8.

⁹ Nan sampah kapwo, kitail pahn uhdahn paiekihda irair en popohl oh minimin wet. Kitail pil pahn perenki mour nan paradais pahn kaundahn Wehin Koht. Erein ahnsowo, Siohwa pahn ketin pousehlahte kaiahne oh kasukuhlih kitail ni ahl ehu me pahn apwal ong kitail en medewehla. (Ais. 11:9) Siohwa pahn pil ketin kahrehiong atail madamadau oh paliwaratail en unsekla. Met pahn kamengeihala atail en wehwehki oh uhdahn peikiong sapwellime kaweid kan. Eri kitail en pousehlahte mweidohng Siohwa en ketin kaiahne kitail, oh kitail en kasalehiong ih me kitail kesempwalki kadehdepen sapwellime limpoak ong kitail.—Lep. Pad. 3:11, 12.

10. Ia duwen Sises eh alasang kanengamah oh koahiek me Sounwiapatail Lapalapo ketin kasalehda?

¹⁰ Duwehte sounwia sah koahiek men, Siohwa uhdahn ketin mwahngih duwen kitail. E ketin mwahngih atail luwet kan, soahng kan me kitail sohte kakohng, oh pil atail kin wie kekeirda. Oh e kin ketin medewe irair pwukat ni eh kin ketin kaiahne emenemen kitail. (Wadek Melkahka 103:10-14.) Kitail kak sukuhlki ia sapwellimen Siohwa madamadau ong kitail ni atail kilang ia ahn Sises pepehm ong soh unsek en sapwellime wahnpoaron ko. Ekei pak, wahnpoaron ko kin akamaiki ihs me keieu lapalap rehrail. Ma ke mi mwo ahnsowo, ia pahn omw madamadau ong ahn wahnpoaron ko ar wiewia? Ele ke pahn medewe me irail sohte duwehte pwehl mwuterek. Ahpw, Sises mwahngih me irail kak kaiahnda ma irail rong sapwellime kaweid me kadek oh kanengamah oh ma irail alasang eh kin ketin aktikitik. (Mark 9:33-37; 10:37, 41-45; Luk 22:24-27) Mwurin Sises eh ketin iasada, wahnpoaron ko alehdi sapwellimen Koht manaman oh re sohla kin medemedewe ihs me keieu lapalap rehrail. Ahpw re uhd kin medemedewehte doadoahko me Sises ketikihong irail.​—Wiewia 5:42.

11. Ni ahl dah kan me Depit kadehdehda me e duwehte pwehl mwuterek, oh ia duwen atail kak alasang ih?

¹¹ Rahnwet, Siohwa kin ketin doadoahngki Paipel, sapwellime manaman, oh mwomwohdiso  en kaiahne kitail. Ia duwen Paipel eh kak kaiahne kitail? Kitail anahne wadek, doudouloale dahme kitail wadek, oh peki rehn Siohwa en ketin sewese kitail kapwaiada dahme kitail sukuhlki. Nanmwarki Depit ntingihedi: “Ni ei kin wendi nan kiei, I kin tamataman komwi; erein pwohngo pwon, I kin medemedewe komwi.” (Mel. 63:6) E pil ntingihedi: “I kin patohwan kapinga KAUN-O, pwehki eh kin ketin kaweid ie, oh ei pepehm pil kin katamankin ie nipwong.” (Mel. 16:7) Ei, Depit kin doudouloale sapwellimen Siohwa kaweid oh mweidohng met en kaiahne eh madamadau oh pepehm loal kan, mehnda ma kaweido apwal en kapwaiada. (2 Sam. 12:1-13) Depit kasalehiong kitail mehn kahlemeng kaselel en aktikitik oh peik. Eri pein idek rehmw: ‘Ni ei kin wadek Paipel, I kin doudouloale oh mweidohng sapwellimen Koht kaweid en sair ei madamadau oh pepehm loal kan? I kak wia laudsang met?’​—Mel. 1:2, 3.

12, 13. Ia duwen Siohwa eh kin ketin kaiahne kitail ni eh ketin doadoahngki sapwellime manaman oh mwomwohdisohn Kristian?

¹² Sapwellimen Koht manaman kak kaiahne kitail ni soangsoangen ahl teikan. Karasepe, e kak sewese kitail en sukuhlki alasang sapwellimen Sises irair kaselel kan, me iangahki irair kan en wahn sapwellimen Koht manaman. (Kal. 5:22, 23) Ehu irair iei limpoak. Kitail poakohng Koht oh men peikiong ih oh mweidohng en kaiahne kitail pwehki kitail ese me sapwellime kehkehlik kan kin wia kamwahupatail. Patehng met, sapwellimen Koht manaman kak kihong kitail kehl pwehn soikala kaiahn sang sampah suwed wet. (Ep. 2:2) Ni wahnpoaron Pohl eh pwulopwul, e kin mweidohng tiahk en kaunen pelien lamalam en mehn Suhs kan me kin pohnmwahso en kamwakid ih. Ahpw sapwellimen Koht manaman sewese ih en wekila. Mwuhr e ntingihedi: “Ahpw kiht me kin ahneki pai kesempwal wet, se rasehng sah pwehl kan me kopwukopw oh kehohla; eri met pwe en kadehdehda duwen manaman lapalap eh uhdahn sapwellimen Koht, a kaidehk aht.” (2 Kor. 4:7) Kitail pil anahne peki sapwellimen Koht manaman, oh kitail ese me Siohwa pahn ketin sapengala ni atail kin kapakap ong ih ni mehlel.​—Mel. 10:17.

 ¹³ Siohwa pil kin ketin doadoahngki mwomwohdiso oh elder kan pwehn kaiahne emenemen kitail. Karasepe, ma elder kan tehkada me mie atail luwet, re kin song en sewese kitail. Ahpw, re sohte kin kihong kitail kaweid me poahsoankihda pein arail madamadau. (Kal. 6:1) Ni aktikitik re kin kapakapohng Siohwa en ketikihong irail dehde oh erpit. Mwuhr, re kin wia roporop ni arail doadoahngki Paipel oh sawaspen Paipel kan pwehn kak diarada ire kan me kak sewese kitail. Ma elder kan kohdo rehmw oh kihong uhk sawas ni elen kadek oh limpoak, duwehte me pid mwomwen sidail en omw likou, tamataman me arail kaweid kin wia kasalepen sapwellimen Koht limpoak ong uhk. Ni omw kapwaiada kaweido, ke pahn duwehte pwehl mwuterek me Siohwa kak ketin kawekila de kaiahne, oh ke pahn paiekihda.

14. Ia duwen Siohwa eh kin ketin kasalehda me e ketin wauneki atail saledek en wiahda pilipil kan mendahki e sapwellimanki manaman pohtail?

¹⁴ Ma kitail wehwehki ia duwen Siohwa eh kin ketin kaiahne kitail, met kak sewese kitail en ahneki nanpwungmwahu rehn riatail Kristian kan. Kitail pil pahn ahneki madamadau pwung ong aramas akan nan atail wasahn kalohk, iangahki neitail tohnsukuhl en Paipel kan. Mwohn sounwia sah men pahn wiahda sah, e kin anahne kamwakelehda mahs pwehlo oh kihsang kisin takai oh pil soahng teikan nan pwehlo. Sounwiapatail Lapalap, Siohwa, kin ketin sewese kaunopada irail kan me men kaiahnda pwe en kak ketin kaiahne irail. E sohte kin ketin idingkihong irail en wekila, ahpw, e kin ketin kasalehiong irail sapwellime koasoandi mwakelekel kan. Eri re anahne pilada ma irail pahn wiahda wekidekla kan me anahn.

15, 16. Ia duwen tohnsukuhl en Paipel kan ar kin kasalehda me irail men Siohwa en ketin kaiahne irail? Menlau kihda ehu karasaras.

¹⁵ Tehk dahme wiawihong emen sister nan Australia me adaneki Tessie. E uhdahn mengei ong ih en sukuhlki dahme Paipel mahsanih. Ahpw, e sohte nohn kekeirda, oh e pil sohte kin towehda mihting kan. Sistero me onop reho kapakapohng Siohwa oh pilada en kauhdi ara onopo. Ahpw mehkot kapwuriamwei wiawi. Ni ara onopo, Tessie padahkihong sistero dahme kahrehda e sohte kin kekeirda. E nda me e pehm me e wia aramas mwalaun men pwehki e kin perenki pilein mwohni. Ahpw met e pilada en uhdihsang pilein mwohni.

¹⁶ Mwurin mwo, Tessie tepida towehda mihting kan oh kasalehda irair en Kristian mendahki ekei ienge ko mahs kin kapailoke. Kedekedeo, Tessie papidaisla oh wiahla pioneer men mendahki mie nah seri pwulopwul. E sansal me ni tohnsukuhl en Paipel kan ar tepida wiahda wekidekla kan pwehn kaperenda Koht, e pahn ketin karanihala irail oh kaiahnehda irail ren wiahla, ni karasaras, sah kesempwal kan.

17. (a) Dahme ke perenki duwen Siohwa eh ketin wia Sounwiapatail? (b) Irair en kaiahn dah kei me kitail pahn koasoiapene mwuhr?

¹⁷ Pil rahnwet, ekei sounwia sah kan kin ni keneinei doadoahngki pehrail oh wiahda sah kaselel kan. Ni ahlohte, Siohwa kin ketin kanengamah oh kaiahne kitail ni eh ketin doadoahngki sapwellime kaweid, oh e kin ketin tehk mwahu ia mwomwen atail pahn mwekidki. (Wadek Melkahka 32:8.) Ke kak kilang me Siohwa ketin nsenohkin uhk? Ke kin kilang ia duwen Siohwa eh kin ketin kaiahne iuk ni keneinei? Ma ei, soangen irair dah me pahn sewese iuk en pousehlahte duwehte pwehl mwuterek me Siohwa kak ketin kaiahne? Soangen irair dah me ken soikala pwe ken dehr wiahla pwehl kekeluwak me sohte kak kaiahnda? Oh ia duwen pahpa nohno kan ar kak iang Siohwa sewese kaiahne neirail seri kan? Iren onop en mwuhr pahn sapengala peidek pwukat.