1-2. (a) Iahd me kitail kin keieu tamanda emen me kitail poakohng me mehla? (b) Dahme Sises ketin wiahda ni pwohngo mwohn eh pwoula?

 MEHNDA ma emen me kitail poakohng mehla wereilahr, kitail kin tamatamanirailte. Kitail kin keieu tamanirailda ni rahn me irail mehlao.

² Sounpar koaros, kitail kin iang aramas rar rar kei nan sampah pwon pokonpene oh wia katamanpen mehlahn emen me kitail uhdahn poakohng, Sises Krais. (1 Pit. 1:8) Kitail kin pokonpene pwe kitail en katamanda ih me ketin tounmeteikihla sapwellime mour nin duwen pweinen pweipwei sapahl ehu pwehn doareikitailla sang dihp oh mehla. (Mad. 20:28) Ni mehlel, Sises kupwurki sapwellime tohnpadahk kan ren tamataman eh pwoula. Ni pwohngo mwohn eh pwoula, e ketin wiahda koasoandi en sak en soutik tohrohr ehu oh kehkehlingki: “Kumwail en kin wia met ong ni katamanpei.”​—Luk 22:19.

3. Dahme kitail pahn koasoiapene nan iren onop wet?

³ Me malaulau kei me ahneki koapworopwor en mi nanleng kin iang towehda Kataman en pwoulahn Krais. Ahpw meh rar rar kei me ahneki koapworopwor en mi nin sampah pil kin iang towehda. Nan iren onop wet, kitail pahn koasoiapene kahrepe kan me pwihn riau wet kin kasikasik en iang towehda Katamano nan ehuehu pahr. Kitail pil pahn koasoiapene ia duwen atail kin paiekihda atail iang towehda. Keieu, kitail pahn koasoiapene ekei kahrepe kan me irail me keidi kan kin iang towehda Katamano.

4. Dahme kahrehda irail me keidi kan kin tungoale pilawao oh waino ni Katamano?

⁴ Ehuehu pahr, me keidi kan kin kasikasik en iang towehda Katamano nin duwen irail kan me kin iang tungoale pilawao oh  waino. Dahme kahrehda e konehng irail en iang tungoale pilawao oh waino? Pwehn sapengala met, medewe dahme wiawi ni kaimwiseklahn pwohngo me Sises ketiket sampah. Mwurin sak en Pahsohpao, Sises ketin wiahda koasoandi ehu me met aramas akan kin kahdaneki Sak en Soutik en Kauno. E ketikihong sapwellime wahnpoaron lelepek 11 ko pilawao oh waino oh mahsanihong irail en tungoale oh nim. Sises mahsanihong irail duwen inou riau, me iei inou kapwo oh inou en Wehio. b (Luk 22:19, 20, 28-30) Inou pwukat ritidahng wahnpoaron ko oh me malaulau teikan en kak wiahla nanmwarki oh samworo kei nanleng. (Kaud. 5:10; 14:1) Luhwen me keidi kante, c me iang mi nan inou riau pwukat, me kak iang tungoale pilawao oh waino ni Katamano.

5. Dahme me keidi kan ese duwen koapworopworo me irail alehdi?

⁵ Iet pil ehu kahrepen me keidi kan kin kasikasik en towehda Katamano: Katamano kin kihong irail ahnsou mwahu en medemedewe duwen arail koapworopworo. Siohwa ketikihong irail koapworopwor ehu me uhdahn kaselel. Koapworopwor wet iei en ahneki mour ehu nanleng me sohte kak mwerpeseng, iang Sises Krais me ketin iasadahr oh pil irail meh 144,000 teikan kaunda, oh keieu kesempwal, en iang mi rehn Siohwa Koht! (1 Kor. 15:51-53; 1 Sohn 3:2) Irail me keidi kan ese me irail aleier luhk en alehdi pwais kaselel pwukat nanleng. Ahpw pwe irail en kak pedolong nanleng, irail anahne kolokolete arail lelepek lao irail mehla. (2 Tim. 4:7, 8) E kin uhdahn kaperen ong me keidi kan en kin medemedewe duwen arail koapworopwor en mi nanleng. (Taitus 2:13) Ahpw ia duwen irail “sihpw teikan”? (Sohn 10:16) Kahrepe dah kan me irail kin iangki towehda Katamano?

6. Dahme kahrehda sihpw teikan kin iang towehda Katamano nan ehuehu pahr?

⁶ Sihpw teikan kin iang towehda Katamano oh sohte iang tungoale pilawao oh waino, ahpw re perenkihte iang towehda. Irail kan me ahneki koapworopwor en mi nin sampah tepin alehdi luhk en iang towehda Katamano nan pahr 1938. Kahn Iroir en March 1, 1938 koasoia: “E pahn uhdahn pwung oh konehng me [sihpw teikan] en iang towehda mihting wet oh kilang dahme kin wiawi. . . . E pil anahne wia ahnsou kaperen ehu ong irail.” Duwehte irail kan me kin perenki alehdi luhk en iang towehda kamadipw en kapwopwoud ehu, sihpw teikan pil perenki iang towehda Katamano oh kilang dahme kin wiawi.

7. Dahme kahrehda sihpw teikan kin kasikasik padahk en Katamano?

⁷ Sihpw teikan pil kin medemedewe duwen arail koapworopworo. Irail kin kasikasik padahk en Katamano pwehki padahko kin koasoia duwen dahme Krais oh ienge kaun 144,000 ko pahn wiahiong aramas lelepek kan erein Kaundahn Pahr Kido. Pahn kaweid en arail Nanmwarkio Sises Krais, irail kaun pwukat nanleng pahn sewese kaparadaisihala sampah oh sewese aramas akan en unsekla. Ia uwen kaperen ong irail meh rar rar kan me kin iang towehda Katamano en medewehla pweidahn kokohp en Paipel kan ni ahnsou kohkohdo, duwehte me kileldi nan Aiseia 35:5, 6; 65:21-23; oh Kaudiahl 21:3, 4. Ni arail kin medewehla pein irail oh me re poakohng kan nan sampah kapwo, met kin  kakehlakahda arail koapworopwor ong ahnsou kohkohdo oh katengehiraildi pwe irail en dehr uhdihsang papah Siohwa.​—Mad. 24:13; Kal. 6:9.

8. Ia pil ehu kahrepen sihpw teikan ar kin iang towehda Katamano?

⁸ Medewehla pil ehu kahrepen sihpw teikan ar kin iang towehda Katamano. Irail men kasalehda arail poakohng oh utung me keidi kan. Mahsen en Koht kohpada me irail me keidi kan oh irail me ahneki koapworopwor en mour nin sampah pahn kin doadoahkpene ni minimin. Ia duwen? Kitail pahn koasoiapene ekei karasepe kan.

9. Ia duwen kokohpo nan Sekaraia 8:23 eh kasalehda pepehm en sihpw teikan ong me keidi kan?

⁹ Wadek Sekaraia 8:23, NW. d Kokohp wet kawehwehda ni ahl kaselel ehu duwen pepehm en sihpw teikan ong riarail Kristian me keidi kan. Lepin lokaia ko “mehn Suhs men” oh “kumwail” kin dokedoke pwihn ehute, me iei luhwen me keidi kan. (Rom 2:28, 29) Lepin lokaia ko “ohl ehk sang ni lokaia koaros en wehi kan” kin dokedoke sihpw teikan. Irail kin “koledi teng,” de kin patehng me keidi kan ni loalopwoat oh iang irail kaudok ni min. Eri, ni pwohng en Katamano, sihpw teikan kin kasalehda arail miniminiong me keidi kan sang ni arail iang towehda Katamano.

10. Dahme Siohwa ketin wiahda pwehn kapwaiada kokohpo nan Esekiel 37:15-19, 24, 25?

¹⁰ Wadek Esekiel 37:15-19, 24, 25. Siohwa ketin kapwaiada kokohp wet sang ni eh ketin kahrehiong me keidi kan oh sihpw teikan en doadoahkpene ni minimin. Kokohpo koasoia duwen lepin dinapw riakis. Irail kan me ahneki koapworopwor en mi nanleng kin karasaraskihong lepin dinapwo “Wehin Suda” (keinek me nanmwarki en Israel kan kin pilipilda), oh irail kan me ahneki koapworopwor en mi sampah kin karasaraskihong lepin dinapwo “Wehin Israel,” de ong Epraim. e Siohwa pahn ketin kapatapene pwihn riau wet pwehn wiahla “lepin dinapw tehkis.” Met wehwehki me irail pahn miniminpene papah pahn arail Nanmwarki tehmen, Krais Sises. Pahr koaros, irail me keidi kan oh sihpw teikan kin iang towehda Katamano, kaidehn nin duwen pwihn riau, ahpw nin duwen “pelin sihpw teieu” pahn ‘sileparail mehtehmen.’​—Sohn 10:16.

11. Ia duwen “sihpw kan” me kileldi nan Madiu 25:31-36, 40 ar kin mwohneki kasalehda arail utung rien Krais kan?

¹¹ Wadek Madiu 25:31-36, 40. “Sihpw kan” me Sises mahsanih duwe kin karasaraskihong irail me pwung kan ni ahnsoun imwi me ahneki koapworopwor en mour nin sampah, me iei sihpw teikan. Irail kin utung ni loalopwoat rien Krais me keidi kan me mihmihte nin sampah sang ni arail kin mwohneki sewese kapwaiada pwukoa laud en kalohk oh katohnpadahk nan sampah pwon.​—Mad. 24:14; 28:19, 20.

12-13. Ia pil ekei ahl me sihpw teikan kin kasalehda arail utung rien Krais kan?

¹² Sounpar koaros nan wihk kan mwohn Katamano, sihpw teikan kin kasalehda arail utung rien Krais kan sang ni arail kin wia uwen arail kak en iang doadoahk en luke me perenki rong kan en iang towehda Katamano. (Menlau kilang koakono “ Dahme Ke Pilahn en Wia Mwohn oh Mwurin Katamano?”) Irail pil kin tehk mwahu me soahng koaros onopadahng Katamano, mendahki ma sohte emen nan arail  mwomwohdisou wia emen me keidi. Sihpw teikan kin uhdahn perenki utungada rien Krais kan ni soangen ahl pwukat. Irail ese me Sises kin ketin wiahki arail wiewia kan ong rie me keidi kan duwehte arail kin wiewia ong ih.​—Mad. 25:37-40.

¹³ Ia pil ekei kahrepe teikan me kitail koaros, sohte lipilipil mehnia koapworopwor me kitail ahneki, kin iang towehda Katamano?

14. Ia duwen Siohwa oh Sises ara ketin kasalehda limpoak laud ong kitail?

¹⁴ Kitail kin kalahnganki limpoak me Siohwa oh Sises ketin kasalehiong kitail. Siohwa ketin kasalehda sapwellime limpoak ong kitail ni ahl tohto. Ahpw ahl me keieu laud me atail Kohto ketin kasalehda sapwellime limpoak ong kitail iei sang ni eh ketin poaronehdo sapwellime Ohl kesempwalo en lokolongki oh pwoukinkitailla. (Sohn 3:16) Oh Sises pil ketin kasalehda limpoak laud sang ni eh ketin tounmeteikihla sapwellime mour ong kitail. (Sohn 15:13) Kitail uhdahn sohte kak dupungkihong Siohwa oh Sises soangen limpoako me ira ketin kasalehiong kitail. Ahpw kitail kak kasalehda atail kalahngan sang ni mwomwen atail mour ehuehu rahn. (Kol. 3:15) Oh kitail kin iang towehda Katamano pwehki kitail men medemedewe sapwellimara limpoak ong kitail oh pil kasalehda atail limpoak ong ira.

15. Dahme kahrehda me keidi kan oh sihpw teikan kin uhdahn kalahnganki kisakis en pweinen pweipwei sapahlo?

¹⁵ Kitail kin uhdahn kalahnganki kisakis en pweinen pweipwei sapahlo. (Mad. 20:28) Irail me keidi kan kin kesempwalki pweinen pweipwei sapahlo pwehki e kahrehda arail koapworopwor kaselelo en kak pweida. Pwehki arail pwoson meirong en Kraiso, Siohwa ketin wiahkinirailla aramas pwung kei oh ketin pwekirailda nin duwen sapwellime seri kan. (Rom 5:1; 8:15-17, 23) Sihpw teikan pil kin kalahnganki pweinen pweipwei sapahlo. Pwehki irail pwoson sapwellimen Krais meirongo, irail mwakelekeldahr mwohn silangin Koht, irail kak papah ih, oh ahneki koapworopwor en ‘kohieisang nan kahn kamakam kowahlapo.’ (Kaud. 7:13-15) Ehu ahl me me keidi kan oh sihpw teikan kin kasalehda arail kalahnganki pweinen pweipwei sapahlo iei sang ni arail kin iang towehda Katamano pahr koaros.

16. Ia pil ehu kahrepen atail kin iang towehda Katamano?

¹⁶ Pil ehu kahrepen atail kin iang towehda Katamano iei kitail kin men peikiong Sises. Sohte lipilipil mehnia koapworopwor me kitail ahneki, emenemen kitail kin men peikiong sapwellimen Sises kehkehliko ni pwohngo me e ketin wiahda koasoandi en Katamano: “Kumwail en kin wia met ong ni katamanpei.”​—1 Kor. 11:23, 24.

17. Ia duwen Katamano eh sewese kitail en karanihala Siohwa?

¹⁷ Kitail kin karanihala Siohwa. (Seims 4:8) Nin duwen me kitail koasoiapenehr, Katamano kin kihong kitail ahnsou mwahu en medemedewe duwen koapworopwor me Siohwa ketikihong kitail oh doudouloale limpoak laud me e ketin kasalehiong kitail. (Ser. 29:11; 1 Sohn 4:8-10) Ni atail kin medemedewe atail koapworopwor ong ahnsou kohkohdo oh sapwellimen Koht limpoak loalopwoat ong kitail, met kin kalaudehla atail poakohng Siohwa oh kakehlakahla atail nanpwungmwahu reh.​—Rom 8:38, 39.

18. Dahme atail doudouloale sapwellimen Sises mehn kahlemeng pahn kamwakid kitail en wia?

 ¹⁸ Katamano kin kamwakid kitail en alasang sapwellimen Sises mehn kahlemeng. (1 Pit. 2:21) Ni rahn akan mwohn Katamano, kitail en wadek, onopki, oh doudouloale duwen kaimwiseklahn sapwellimen Sises mour nin sampah, eh pwoula, oh eh iasada. Eri ni soutik en rahnen Katamano, padahk en Katamano pahn katamankihong kitail sapwellimen Sises limpoak ong kitail. (Ep. 5:2; 1 Sohn 3:16) Ni atail wadek oh doudouloale duwen sapwellimen Sises mehn kahlemeng en tounmetei, met pahn kamwakid kitail en “pousehlahte weweid duwehte meno eh kin ketin weweid.”​—1 Sohn 2:6.

19. Ia duwen atail kak wiewiahte kompoakepahn Koht?

¹⁹ Katamano pil kalaudehla atail koasoanehdi teng en wiewiahte kompoakepahn Koht. (Sud 20, 21) Kitail kin wiewiahte kompoakepahn Koht sang ni atail kin wia uwen atail kak en peikiong ih, kasarawihala mware, oh kaperenda kupwure. (Lep. Pad. 27:11; Mad. 6:9; 1 Sohn 5:3) Katamano kin kamwakid kitail en kalaudehla atail men momour ehuehu rahn ni ahl ehu me pahn patohwanohng Siohwa, ‘I men wiewiahte kompoakepahmw kohkohlahte!’

20. Kahrepe mwahu dah kan me kitail ahneki en iang towehda Katamano?

²⁰ Sohte lipilipil ma atail koapworopwor iei en mour kohkohlahte nanleng de nin sampah, mie kahrepe mwahu kan me kitail ahneki en iang towehda Katamano. Pahr koaros ni atail kin pokonpene rahno, kitail kin tamanda pwoulahn Sises Krais me kitail uhdahn poakohng. Kesempwal sang met, kitail kin tamanda wiewiahn limpoak me keieu laud, me iei limpoak me Siohwa ketin kasalehda sang ni eh ketikihda sapwellime Ohlo nin duwen pweipwei sapahl ehu. Nan pahr wet, Katamano pahn wiawi ni soutik en Nialem, April 15, 2022. Kitail kin poakohng Siohwa oh sapwellime Ohlo, eri, ni katamanpen pwoulahn Siseso, sohte mehkot me kak kesempwalsang atail iang towehda Katamano.