1. Dahme kahrehda atail ahnsou wet weksang ahnsou teikan?

KITAIL mi ni ahnsou ehu me uhdahn weksang ahnsou teikan nan poadopoad en aramas. Nin duwen me Paipel kohpada, Siohwa kin ketikihpene pokon kalaimwuno sang “nan wehi koaros, ni kadaudok koaros, nan sahpw koaros, oh lokaia koaros.” Irail “wehi lapalap ehu,” aramas peren kei me daulih meh welirar me “kin papah [Koht] ni rahn nipwong.” (Kaud. 7:9, 15; Ais. 60:22) Aramas me kin poakohng Koht oh riarail Kristian kan kin tohtohsang mahso.

2. Soangen limpoak dahieu me kitail kin kilang rehn aramas akan me sohte wia kompoakepahn Koht? (Menlau kilang tepin kilel.)

² Ahpw, Paipel pil kohpada me nan atail ahnsou, aramas akan me sohte kompoakepahnki Koht pahn ahneki ehu soangen limpoak. Soangen limpoak wet kin roporop. Wahnpoaron Pohl ntingihedi me ni imwin rahn akan, aramas akan pahn “poakohngete pein irail, poakohng mwohni,” oh “nsenkihte wia nsenarail oh sohte kin poakohng Koht.” (2 Tim. 3:1-4, NW, nting tikitik kan me mi pah) Soangen limpoak roporop wet weksang limpoak ong Koht. Limpoak me roporop sohte kin kaperenda aramas emen, mendahki e medewe me e pahn. Ahpw, met pahn kahrehda sampah ehu me roporop oh kahrehda kahpwal ong koaros.

3. Dahme kitail pahn tehk nan iren onop wet, oh dahme kahrehda?

 ³ Wahnpoaron Pohl ese me limpoak me roporop pahn wiahla mehkot me kalapw wiawi oh e pahn wia mehkot keper ong Kristian kan. Eri e katamankihong irail en kaleke irail sang, de soikala, irail kan me kin kasalehda soangen limpoak sapwung wet. (2 Tim. 3:5) Ahpw kitail sohte uhdahn kak soikala soangen aramas pwukat. Eri, dahme kitail kak wia pwehn pere kitail sang wiewiahn aramas akan rehtail, oh kaperenda Siohwa, me iei Koht en limpoak? Kitail kilang wekpeseng en soangen limpoak me Koht kupwurki kitail en ahneki oh limpoak me sansalda nan 2 Timoty 3:2-4. Kitail eri kak kilang pein kitail oh kilang ia duwen atail kak kasalehda soangen limpoak me pahn kahrehiong kitail en nsenamwahu oh peren.

4. Dahme kahrehda e sohte sapwung kitail en pein poakohng kitail?

⁴ Pohl ntingihedi: “Aramas akan pahn kin poakohngete pein irail.” Ia duwe, met wehwehki me e sapwung kitail en poakohng pein kitail? Soh, e sohte sapwung en poakohng pein kitail oh met pil wia anahn ehu. Siohwa ketin kapikada kitail ni ahl wet. Sises mahsanih: “Ke pahn poakohng mehn mpomw duwen omw kin poakohng pein uhk.” (Mark 12:31) Kitail sohte kak poakohng meteikan ma kitail sohte poakohng pein kitail. Paipel pil mahsanihong kitail: “Ohl akan uhdahn pahn poakohng ar werek kan duwehte ar kin poakohng pein paliwararail kan.  Ohl me kin poakohng eh werek, kin poakohng pein ih. Sohte me kin kailongki pein paliwere. Pwe e kin kamwenge oh e kin kanai.” (Ep. 5:28, 29) Eri e sansal me kitail anahne poakohng pein kitail.

5. Ia duwen omw pahn kawehwehda soangen aramas akan me kin nohn poakohngete pein irail?

⁵ Soangen limpoak ong pein kitail me kitail wadek nan 2 Timoty 3:2 wia limpoak ehu me kitail sohte konehng en ahneki. E kin roporop. Ma emen kin nohn poakohng pein ih, e kin medewe duwen pein ih laudsang dahme konehng. (Wadek Rom 12:3.) E kin kesempwalki pein ih laudsang meteikan. Ni soahng kan ar kin sapwungala, e kin kapwukoahki meteikan a kaidehn pein ih. Soangen aramas pwukat sohte kin uhdahn peren.

6. Ia imwila mwahu kan me kohsang atail poakohng Koht?

⁶ Ekei soun samanih Paipel kamehlele me Pohl ndahla mahs duwen limpoak ong pein emen pwehki met kin kakairada irair suwed kan me e kawehwehda mwuhr. Weksang met, soangen limpoak me Koht kupwurki kitail en ahneki kin kakairada irair mwahu kan. E kin duwehte peren, popohl, kanengamah, kadek, loalopwoat, opampap, oh liksang me suwed. (Kal. 5:22, 23) Sounmelkahkao ntingihedi: “Meid pai aramas akan me arail Koht iei KAUN-O!” (Mel. 144:15) Siohwa iei Koht peren men, oh sapwellime aramas akan pil kin peren. Oh pil, weksang irail kan me kin nohn poakohngete pein irail oh kin medemedewehte dahme re kak ale, sapwellimen Siohwa ladu kan kin peren pwehki re kin kak kihkihwei rehn meteikan.​—Wiewia 20:35.

7. Peidek dah kan me pahn sewese kitail en medewe mwahu duwen atail limpoak ong Koht?

⁷ Ia duwen atail kak ese me atail poakohng pein kitail kin lalaudla sang atail poakohng Koht? Medewehla duwen kaweid erpit wet: “Kumwail dehr wia mehkot sang ni amwail ineng en roporop ong pein kumwail de suwei mwahl; ahpw kumwail mpahipene nanpwungamwail, oh dehr wiahki me kumwail mwahusang aramas teikan. Kumwail pohnese ineng mwahu en meteikan, kaidehn amwail kante.” (Pil. 2:3, 4) Ele kitail pahn pein idek rehtail: ‘I kin rong kaweid wet? I kin song en wia dahme Koht kupwurki ien wia? I kin rapahki ahl akan en sewese meteikan nan mwomwohdiso oh nan kalohk?’ E sohte kin ahnsou koaros mengei en doadoahngkihla  atail ahnsou laud oh atail kehl. Met kakete wehwehki me kitail anahne doadoahk laud oh tounmeteikihla soahng kei me kitail kin perenki. Ahpw sohte mehkot kak kaperenda kitail laudsang atail ese me Kaunepen lahng oh sampah ketin kupwurperenki kitail!

8. Dahme ekei Kristian wia pwehki ar poakohng Koht?

⁸ Pwehki re poakohng Koht oh men papah ih ni unsek, ekei Kristian kan kin tounmeteikihla doadoahk en mwohni laud kan me kakete kahrehiong irail en uhdahn kepwehpwehla. Ericka, me wia toahkte men, pilada en pioneer a kaidehn en kilangwohngete eh doadoahk en toahkteo. Ih oh eh pwoudo papah nan ekei sahpw. E nda: “Soahng tohto me se lelohng ni at sewese mwomwohdiso kan me doadoahngki ehu lokaia tohrohr, iangahki at kompoakepahkihla meteikan, uhdahn kamwahwihala at mour.” Ericka kin doadoahkte nin duwen toahkte men, ahpw e kin doadoahngki pali laud en eh ahnsou oh kehl en padahkihong meteikan duwen Siohwa oh pil sewese rie Kristian kan. E nda me met kin uhdahn wahdohng ih “peren laud oh nsenamwahu mehlel.”

9. Dahme kahrehda aramas emen me kin poakohng mwohni sohte pahn peren?

⁹ Pohl ntingihedi me aramas pahn “poakohng mwohni.” Sounpar kei mwoweo, pioneer men nan Ireland koasoiaiong ohl emen duwen Koht. Ohlo kihpeseng nah walleto, kihda mwohni kei, oh nda: “Ih met ahi koht!” Aramas tohto pil ahneki soangen madamadau wet, mendahki re sohte kin kasalehda. Re kin poakohng mwohni oh soahng kan me mwohni kak pwainda. Ahpw Paipel mahsanih: “Ma ke pahn poakohng mwohni, ke sohte mwahn pahn itarki; ma ke inengieng kepwehpwehla, ke sohte kak alehdi mehkoaros me ke anahne.” (Ekl. 5:10) Emen me kin poakohng mwohni sohte kin itarki dahme e ahneki. E kin ahnsou koaros men ahneki soahng tohto oh kin doadoahngkihla eh ahnsou laud en ale mwohni. Met kin wahdo reh “soangen kapahtou tohtohie.”​—1 Tim. 6:9, 10.

10. Dahme Paipel mahsanihki duwen kepwehpwe oh semwehmwe?

¹⁰ Ei mehlel, kitail koaros kin anahne mwohni. E kin kak doareikitailla. (Ekl. 7:12) Ahpw ia duwe, kitail kak peren ma kitail naineki mwohni me itar ong atail anahn kan? Ei! (Wadek Eklesiasdes 5:12.) Akur me samanki Sake ntingihedi: “I en dehr wiahla aramas kepwehpwe de semwehmwe. Eri, komw ketikihong ie uwen kisin tungoal me I anahne.” E mengei en wehwehki dahme kahrehda e sohte men uhdahn semwehmwe. E nda me e sohte men lelohng songosong en pirap, pwehki pirap pahn kahrehiong en kauwehla mwaren Koht. Ahpw dahme kahrehda e sohte men kepwehpwehki? E ntingihedi: “Pwe ma e daulihala, mweinele I pahn patohwan me I sohte anahne komwi.” (Lep. Pad. 30:8, 9) Mwein ke pil ese ekei me kin likih mwohni ahpw kaidehn Koht.

11. Dahme Sises mahsanih duwen mwohni?

¹¹ Aramas me kin poakohng mwohni sohte kin kak kaperenda Koht. Sises mahsanih: “Sohte aramas emen kak liduwih soumas riemen; pwe e pahn kailongki emen, e ahpw pahn poakepoake meteio; e pahn loalopwoatohng emen, e ahpw pahn mwamwahliki meteio. Eri, ih pil duwen kumwail: kumwail sohte kak papah Koht oh pil kepwehn sampah kan.” E pil mahsanih: “Kumwail dehr kin ngoangki kepwehpwehkihla kepwehn sampah, me mer oh loangenmwet kin kauwehla, oh wasa me aramas lipirap akan kin dapengpeseng ihmw kan oh pirap ie. A kumwail ngoangki kepwehpwehkihla paien nanleng, me mer oh loangenmwet sohte kin kauwehla, oh wasa me aramas lipirap akan sohte kak dapengpeseng ihmw akan oh pirap ie.”​—Mad. 6:19, 20, 24.

12. Ia duwen en ahneki mour ehu me sohte kin kedirepwki soahng kan me sohte uhdahn kesempwal eh kin sewese kitail en papah Koht? Menlau kihda ehu karasaras.

¹² Tohto sapwellimen Siohwa ladu kan kin song en ahneki mour ehu me sohte kedirepwki  soahng kan me sohte uhdahn kesempwal. Re kin tehk me met kin kihong irail ahnsou laud en papah Siohwa oh pil kin kaperenda irail. Jack, me kin kousoan nan Wehin Amerika, netikihla imwe ihmw laudo oh pil eh pesines pwe en kak iang eh pwoudo pioneer. E nda: “E apwal en tounmeteikihla imwat oh sapwat kaselelo me mi wasa me dohsang kahnimw kan.” Ahpw erein sounpar tohto e kin kohdo imwarao oh kin pwunod pwehki kahpwal kan ni eh wasahn doadoahko. E nda: “Ei pwoudo wia pioneer men oh e kin ahnsou koaros peren. E kin nda, ‘Ei kauno me keieu mwahu!’ Pwehki ahnsou wet I pil kin iang pioneer, kiht koaros kin doadoahk ongete Siohwa.”

13. Dahme kak sewese kitail en tehk mwomwen atail madamadau ong mwohni?

¹³ Ni atail kin tehk mwomwen atail madamadau ong mwohni, kitail anahne mehlel oh pein idek rehtail: ‘Ei mour kin kasalehda me I uhdahn kamehlele dahme Paipel mahsanih duwen mwohni? En wiahda mwohni wia mehkot me keieu kesempwal ong ie? I kin nsenohki kepwe kan laudsang ei nanpwungmwahu rehn Siohwa oh aramas akan? I uhdahn kamehlele me Siohwa pahn ketikihda soahng koaros me I anahne?’ Kitail kak kamehlele me e sohte pahn ketin kansensuwedihala irail kan me kin likih ih!​—Mad. 6:33.

14. Ia madamadau toupahrek ong mour peren?

¹⁴ Nin duwen me Paipel kohpada, aramas tohto rahnwet kin “nsenkihte wia nsenarail.” Duwehte atail ese me e sohte sapwung en ahneki madamadau toupahrek ong pein kitail oh mwohni, kitail pil ese me e sohte sapwung en perenki mour ni ahl ehu me toupahrek. Ekei aramas kamehlele me re sohte kak ahneki mour peren, ahpw kaidehn met me Siohwa kupwurki ong kitail. Paipel kangoange sapwellimen Koht ladu lelepek kan: “Weneweite​—tungoatungoale omw tungoal kisin mwenge kan oh pereperen; niminim wain oh nsensenamwahu.”​—Ekl. 9:7.

15. Ia wehwehn en wia emen me kin “nsenkihte wia nsenarail”?

¹⁵ Keriaun Timoty 3:4 mahsanih duwen irail kan me kin nsenkihte wia nsenarail oh kihsang Koht nan arail mour. Tehk me iretikitiko sohte mahsanih me aramas akan pahn poakohng peren laudsang Koht. Met pahn wehwehki me re  ekis poakohng Koht. Ahpw iretikitiko mahsanih me re “sohte kin poakohng” Koht. Emen soun samanih Paipel ntingihedi me iretikitik wet “sohte wehwehki me re pil ekis poakohng Koht. E wehwehki me re sohte douluhl poakohng Koht.” Met wia mehn kataman kesempwal ehu ong irail kan me kin nsenkihte wia nsenarail. Paipel kawehwehda duwen irail kan me kin nsenkihte wia nsenarail nin duwen irail kan me kin kedirepwkihla peren en mour.​—Luk 8:14.

16, 17. Mehn kahlemeng dahieu me Sises ketin kasalehda me pid sapwellime madamadau ong soahng kaperen kan?

¹⁶ Sises ketin kasalehiong kitail ia wehwehn en ahneki madamadau toupahrek ong peren. E ketin kohla ni kapwopwoud ehu oh pil ni “lapalahn kamadipw ehu.” (Sohn 2:1-10; Luk 5:29) Ni kapwopwoudo, sohla itar wain, eri Sises ketin wiahda manaman ehu oh kahrehiong pihl en wiahla wain. Oh pil ni ehu ahnsou, ni aramas akan ar kauwe Sises pwehki e sakasak oh niminim, e ketin kasalehda ni sansal me aramas ako sohte ahneki madamadau toupahrek.​—Luk 7:33-36.

¹⁷ Sises sohte ketin wiahki soahng kaperen kan mehkot me keieu kesempwal nan sapwellime mour. E mwohneki mahs Siohwa oh wia soahng koaros me e kak pwehn sewese meteikan. E kupwurki pwoula mendahki eh ketin lelohng weirek laud pohn tuhkehn kalokoloko pwehn kapitala aramas akan. Sises mahsanihong irail kan me men idawehn ih: “Meid pai kumwail ma aramas akan pahn lahlahwei kumwail oh kalokei kumwail oh karaunkin kumwail soangen suwed oh likamw koaros pwehki ngehi. Kumwail nsenamwahu oh perenda, pwe ketingpamwail me laud kowahlap nanleng. Ih duwen ar kaloke soukohp ako me tiengehr mwohmwail.”​—Mad. 5:11, 12.

18. Peidek dah kan me pahn sewese kitail en tehk ia uwen atail kin poakohng soahng kaperen kan?

¹⁸ Dahme pahn sewese kitail en tehk ia uwen atail poakohng soahng kaperen kan? Kitail kak pein idek rehtail: ‘Mehn kamweit kan uhdahn kesempwal ong ie laudsang mihting kan oh doadoahk en kalohk? I kin men tounmeteikihla soahng kei me I kin perenki pwehki I men papah Koht? Ni ei kin pilada mehn kamweit kan, I kin medewe ia pahn sapwellimen Siohwa madamadau ong ei pilipil kan?’ Pwehki kitail poakohng Koht oh men kaperenda ih, kitail kin ni keneinei soikala kaidehn soahng kante me kitail ese me sapwung ahpw pil soahng kan me kitail medewe me kak kansensuwedihala ih.​—Wadek Madiu 22:37, 38.

19. Ihs me sohte kak uhdahn peren?

¹⁹ Ahn Sehdan sampah kahrehiong aramas akan en lokolok erein mpen sounpar 6,000. Ahnsou wet, ni imwin rahn akan en koasoandi wet, sampah kin direkihla aramas akan me kin medemedewehte pein irail, mwohni, oh soahng kaperen kan. Re kin medewe dahme re kak alehdi oh wiahki me arail ineng kan me keieu kesempwal nan mour. Ahpw soangen aramas pwukat sohte kak uhdahn peren! Weksang met, Paipel mahsanih: “Meid pai aramas me Koht en Seikop kin ketin sewese oh me kin koapworopworki KAUN-O eh Koht.”​—Mel. 146:5.

20. Ia duwen omw limpoak ong Koht eh kahrehiong uhk en peren?

²⁰ Limpoak me sapwellimen Siohwa ladu kan kin kasalehiong ih kin lalaudla. Sounpar koaros, aramas tohto teikan kin esehla duwen ih oh pil poakohngala ih. Met kadehdehda me Wehin Koht wie kakaun, oh ni ahnsou keren e pahn wahdo soangen kapai kan me apwal ong kitail en medewehla! Ni atail kin wia dahme Siohwa kupwurki kitail en wia, kitail kin kaperenda ih, oh met kin wahdohng kitail peren mehlel. Irail kan me kin poakohng Siohwa pahn peren kohkohlahte! Nan iren onop en mwuhr, kitail pahn tehk ekei irair suwed kan me kin imwikihla limpoak me roporop. Mwuhr kitail pahn kilang ia duwen mepwukat ar weksang irair mwahu kan en sapwellimen Siohwa ladu kan.