1-2. (a) Ni ahl dah kan me Sehdan pitihdier aramas akan? (b) Dahme kitail pahn koasoiapene nan iren onop wet?

 SEHDAN me wia “semen likamw” pitihdier aramas akan sangete ahnsou me Adam oh Ihp momour. (Sohn 8:44) Ekei eh likamw kin iangahki padahk likamw duwen mehla oh mour mwurin mehla. Tiahk oh wiewia tohto me me tohto kin wia poahsoandahsang padahk likamw kan sang Sehdan duwen mehla. Pwehki met, riatail Kristian tohto anahne “pei kehlail pwehn pere pwoson” ni emen sang kisehrail kan oh arail wasa mehla.​—Sud 3.

² Ma ke lelohng soangen kasongosong pwukat, dahme kak seweseiuk en kolokolete omw lelepek pwehki omw ese dahme Paipel padahki duwen me melahr kan? (Ep. 6:11) Ia duwen omw kak kansenamwahwihala oh kakehlakahda riomw Kristian men me ele mi pahn kasongosong en iang wia tiahk oh wiewia kan me sohte kin kaperenda Koht? Nan iren onop wet kitail pahn koasoiapene kaweid kan me Siohwa ketikihongehr kitail. Keieu, kitail tehk dahme Paipel mahsanih duwen mehla.

3. Ia imwilahn tepin likamwo?

³ Koht sohte ketin kupwurki aramas akan en mehla. Ahpw pwe Adam oh Ihp en mour kohkohlahte, ira anahne peikiong Siohwa, me ketikihong ira kehkehlik mengei ehu: “Wahntuhkehn kehsehki aramas dahme mwahu oh dahme suwed me ke sohte pahn tungoale, ma ke pahn tungoale, ke pahn mehkihla rahnohte.” (Sen. 2:16, 17) Ahpw Sehdan eri wiahda kahpwal. Ni eh doadoahngki serpent men, e ndaiong Ihp: “Kumwa sohte pahn mehla.” E kansensuwed pwe Ihp kamehlele likamwo oh kang wahntuhkeo. Mwuhr eh pwoudo pil iang kang wahntuhkeo. (Sen. 3:4, 6) Ni ahl wet, dihp oh mehla lelohngehr aramas koaros.​—Rom 5:12.

4-5. Ia duwen Sehdan eh kin doulahte pitih aramas akan?

 ⁴ Adam oh Ihp mehla, duwehte me Koht mahsanih pahn wiawihong ira. Ahpw Sehdan sohte uhdihsang eh kin wiahda likamw duwen mehla. Mwuhr, e tepida wiahda likamw teikan. Ehu likamw ko iei padahk likamw me dene paliwar kin mehla ahpw mie mehkot rehn aramaso me wie momour nin duwen ngehn emen. Likamw wet kahredahr soangsoangen padahk likamw kan me pitihdier aramas tohto sangete mahs leledo rahnwet.​—1 Tim. 4:1.

⁵ Dahme kahrehda aramas tohto kamehlele ahn Sehdan likamwo? Sehdan ese ia ahn aramas akan pepehm duwen mehla oh kin doadoahngki met pwehn pitih irail. Pwehki kitail kapikipikda pwehn mour kohkohlahte, kitail sohte men mehla. Kitail kin wiahki mehla imwintihti men.​—1 Kor. 15:26.

6-7. (a) Sehdan pweida ni eh ekihsang aramas akan padahk mehlel duwen me melahr kan? Menlau kawehwehda. (b) Ia duwen Paipel eh sewese kitail en dehr masak me melahr kan?

⁶ Mendahki ahn Sehdan nanti koaros, padahk mehlel me pid duwen mehla sohte rirsang aramas akan. Ni mehlel, laudsang mahs aramas tohto ahnsou wet ese oh kin kalohki dahme Paipel padahngki duwen irair en me melahr kan oh koapworopwor ong me melahr kan. (Ekl. 9:5, 10; Wiewia 24:15) Padahk mehlel pwukat kin kansenamwahwihala kitail oh sewese kitail en dehr masak oh peikasalki dahme kin wiawi ni aramas akan ar mehla. Karasepe, kitail sohte kin masak me melahr kan oh me mehkot suwed pahn wiawihong irail. Kitail ese me irail sohte wie momour oh irail sohte kak lidere kitail. E mwomwen me irail meir kelik. (Sohn 11:11-14) Kitail pil ese me me melahr kan sohte ese dahme kin wiawi. Eri ni ahnsoun kaiasada, pil irail kan me melahr erein sounpar tohto, pahn medewehiong ahnsou me irail mehla duwehte ahnsou mwotomwot ehu.

⁷ Ke seu pwungki me padahk mehlel me pid irair en me melahr kan kin sansal, mengei, oh mehlel? Met uhdahn weksang ahn Sehdan likamw kapwonopwon kan! Patehng pitih aramas akan, likamw pwukat pil kin karaunlikamwih Sounkapikpatailo. Pwehn sewese kitail kalaudehla atail wehwehki kahpwal me Sehdan wiahda, kitail pahn koasoiapene peidek pwukat: Ia duwen ahn Sehdan likamw kan ar karaunlikamwih Siohwa? Ia duwen likamw pwukat ar kahrehiong aramas akan en medewe me sohte anahnepen en kamehlele sapwellimen Krais pweinen pweipwei sapahlo? Ia duwen ar kalaudehla ahn aramas pahtou oh lokolok?

8. Nin duwen me Seremaia 19:5 kasalehda, ia duwen ahn Sehdan likamw kan duwen me melahr kan ar kin karaunlikamwih Siohwa?

⁸ Ahn Sehdan likamw kan duwen me melahr kan kin karaunlikamwih Siohwa. Iangahki likamw pwukat iei padahk likamw me me melahr kan kin lokolok nan kisiniei. Padahk pwukat kin karaunlikamwih Koht! Ia duwen? Padahk pwukat kin kahrehiong aramas akan en kamehlele me Koht en limpoak kin sapwellimanki soangen irairohte me Tepil ahneki. (1 Sohn 4:8) Ia omw madamadau ong met? Keieu kesempwal, ia sapwellimen Siohwa madamadau ong met? Ni mehlel, e kin ketin kalahdeki soahng suwed koaros.​—Wadek Seremaia 19:5.

9. Ia duwen ahn Sehdan eh likamw kan ar kamwakid aramas akan arail pahn kamehlele duwen sapwellimen Krais pweinen pweipwei sapahlo me Sohn 3:16 oh 15:13 kawehwehda?

⁹ Ahn Sehdan likamw me pid mehla kaluwetehla ahn aramas akan ar kamehlele duwen sapwellimen Krais pweinen pweipwei sapahlo. (Mad. 20:28) Pil ehu ahn Sehdan likamw iei me mie mehkot me soh sansal nan paliwar en aramas akan me kin wie momour mwurin mehla. Eri ma met mehlel, koaros pahn mour kohkohlahte. Krais sohte pahn ketikihda sapwellime mour nin duwen pweinen pweipwei sapahl ehu ong kitail pwehn alehdi mour soutuk. Tamataman me sapwellimen Krais meirongo wia kasalepen limpoak me keieu laud me e ketikihda ong aramas akan. (Wadek Sohn 3:16; 15:13.) Medewehla sapwellime Siohwa oh Sises pepehm duwen padahk kan me kahrehiong kisakis kesempwal wet eh sohla katepe!

10. Ia duwen ahn Sehdan likamw kan duwen mehla ar kalaudehla ahn aramas akan ar pahtou oh lokolok?

¹⁰ Ahn Sehdan likamw kin kalaudehla ahn aramas akan ar pahtou oh lokolok. Pahpa nohno kan me kin pahtouki mehlahn neirail seri men ele kin rong sang meteikan me Koht ketikihsang serio pwehn wiahla emen tohnleng nanleng. Ia duwe, likamw wet sang Sehdan kin katikitikihala arail medek de kalaudehla? Padahk likamw me pid kisiniei en ehl kin kadoadoahk pwehn utung duwen kalokolok laud, oh pil iangahki isihslahn irail kan me uhwong pelien lamalam ni tuhkehn kalokolok. Pwuhk ehu me koasoia duwen ehu mwoalen kopwung mahso (Spanish Inquisition) kasalehda me ekei me pwukoahki wiewia suwed wet kin kamehlele me irail kin kihong irail me uhwong kan en “song kalokolok nan ehl kohkohlahte” pwe irail en koluhla mwohn arail mehla oh pitsang kisiniei en ehl. Nan sahpw tohto, aramas akan kin pehm me irail pwukoahki kaudokiong kisehrail me melahr kan, waunekin irail, de rapahki ahl ehu pwehn ale kapai sang irail. Meteikan men kaperenda arail peneinei en mahs kan pwehn soikala kalokolok sang irail. E kansensuwed me arail kamehlele padahk kan me poahsoankihda ahn Sehdan likamw sohte kin kihong irail nsenamwahu mehlel. Ahpw e kin kihong irail pwunod de masak.

11. Ia duwen kisehtail oh kompoakepatail kan ar kin song en kasonge kitail en sapeikiong Mahsen en Koht?

¹¹ Poakohng Koht oh sapwellime Mahsen kin kakehlaka kitail en peikiong Siohwa pil ni kisehtail kan de kompoakepatail kan ar song en kasonge kitail en iang irail nan wiewia kan me sohte poahsoankihda Paipel me pid me melahr kan. Ele irail kin song en kanamenekih kitail ni arail nda me kitail sohte poakohng de wauneki me melahr kan. De ele irail nda me atail wiewia kan pahn kahrehiong aramas mehlao en lidere me momour kan ni soangen ahl ehu. Ia duwen atail kak utung padahk mehlel en Paipel? Tehk ia duwen omw kak kapwaiada kaweid oh ire mehlel en Paipel pwukat.

12. Ia tiahk de wiewia kan me pid me melahr kan me ni sansal sohte poahsoankihda Paipel?

¹² Koasoanehdi teng en “katohreikumwailla”  sang padahk oh tiahk kan me sohte kin kaperenda Koht. (2 Kor. 6:17) Ehu pwuhk nda, nan ehu sapwen Caribbean, aramas tohto kin kamehlele me mwurin aramas emen eh mehla, “eni” en me mehlao kin mihmiseli oh kaloke irail kan me wiakauwe ih. “Eni” en me mehlao kak “kahrehda kahpwal nan wasa ehu.” E wia tiahk ehu nan Aperika en perehla kilahs en irongen kan nan imwen me melahr kan oh wekidala kilel en me mehlao en sohpeilahng ni dihd. Ia kahrepen met? Ekei dene me mehlao en dehr kilang pein irail! Nin duwen sapwellimen Siohwa ladu kan, kitail sohte kin kamehlele soai likamw kan de iang pidada wiewia kan me kin utungada ahn Sehdan likamw kan!​—1 Kor. 10:21, 22.

13. Ma ke peikasalki duwen ehu tiahk de wiewia, dahme ke anahne wia nin duwen me Seims 1:5 kasalehda?

¹³ Ma ke peikasalki duwen ehu tiahk de wiewia, patohwanohng Siohwa ni kapakap, peki ni pwoson sapwellime erpit. (Wadek Seims 1:5.) Mwurin mwo, wia roporop nan neitail sawasepen Paipel kan. Ma anahn, peki sawas sang elder kan nan omw mwomwohdiso. Irail sohte pahn ndaiong uhk dahme ke pahn wia, ahpw irail kak kasalehiong uhk kaweid oh ire mehlel kan sang Paipel, duwehte me kitail koasoiapene. Ni omw wia soahng pwukat, ke kin kaiahnehda omw “kehl en madamadau,” oh kehl wet pahn seweseiuk en “ese wekpeseng en dahme pwung oh dahme sapwung.”​—Ipru 5:14.

14. Ni ahl dah kan me kitail kak soikala kadipekelekele aramas akan?

¹⁴ “Kumwail wia mehkoaros ong ni kalinganpen Koht. Kumwail dehr wiahla mehn kadipekelekel.” (1 Kor. 10:31, 32) Ni atail kin wiahda pilipil kan ma kitail pahn iang pidada nan ehu tiahk de wiewia, kitail pil anahne medemedewe ia duwen atail pilipil kan ar kin kamwakid kadeikpen loalen meteikan, ahpw mehlel riatail Kristian kan. Uhdahn kitail sohte men kadipekelekele emen! (Mark 9:42) Pil ehu, kitail men soikala wia soahng kan me pahn kansensuwedih irail kan me sohte wia Sounkadehde kei. Limpoak pahn kamwakid kitail en koasoiong irail ni wahu, oh met kin kalinganahla Siohwa. Kitail sohte pahn akamaiong aramas de kauwe arail tiahk kan. Tamataman me limpoak kin uhdahn kehlail! Ni atail kasalehda limpoak ni elen nsenoh oh wahu, kitail kakete kahrehiong me uhwong kan en sohte nsensuwed pahtail.

15-16. (a) Dahme kahrehda e wia elen loalokong ken kasalehiong meteikan dahme ke kin kamehlele? Menlau kihda ehu karasaras. (b) Ia duwen dahme Pohl ntingihedi nan Rom 1:16 eh kin kadoadoahk ong kitail?

¹⁵ Kasalehiong meteikan nan omw wasa me  kowe emen Sounkadehdehn Siohwa. (Ais. 43:10) Ma emen nan omw peneinei mehla, kisehmw kan oh mehn mpomw kan kakete lingeringerda ma ke sohte iang irail wia soangen tiahk ehu. Ele e pahn mengei ong uhk en apwalihala irairo ma ke kawehwehiongehr irail mwoweo dahme ke kin kamehlele. Francisco, me kin kousoan Mozambique, nda: “Ni ahnsou me ngehi oh ei pwoudo, Caroline sukuhlki padahk mehlel, se padahkihong at peneinei me se solahr pahn kaudokiong me melahr kan. At pilipilo kahrehiong sen lelohng songosong ni ahnsou me rien Caroline serepeino mehla. Arail tiahk en kasarawih paliwar en me mehlao iei en duhp paliwaro nan pihl. Mwuhr peneinei me keieu karanih me mehlao pahn anahne pweidi erein rahn siluh wasa me re wudekihdi pilen duhduo ie. Tiahk pwukat kin wiawi pwe dene en kaperenda ngehn en me melahro. Ahn Caroline peneineio kasik me e pahn kapwaiada tiahk en pweidi wasa me re wudekihdi pihlo.”

¹⁶ Ia duwen Francisco oh eh pwoudo ara mwekidki met? Fransciso nda: “Pwehki se poakohng Siohwa oh men kaperenda ih, se soikala iang wia tiahko. Ahn Caroline peneineio uhdahn lingeringerda. Irail kapwukoahkin kiht me se sohte wauneki me mehlao oh nda me irail sohla pahn mwemweitdo reht de sewese kiht. Pwehki se kawehwehiongehr irail dahme se kin kamehlele, se sohte koasoiaiong irail ireo erein arail lingeringer. Ekei kiseht ko uhpalih kiht, nda me se kawehwehiongehr irail dahme se kin kamehlele. Kedekedeo, ahn Caroline peneineio sohla nohn lingeringer oh se kakehr ahneki meleilei nanpwungat. Ni mehlel, ekei irail kohdo imwat pwehn peki sawasepen Paipel kan.” Kitail en dehr namenengki atail en kolokolete atail lelepek pwehki kitail ese dahme Paipel padahngki duwen me melahr kan.​—Wadek Rom 1:16.

17. Dahme kak sewese kitail en wia kompoakepah mehlel men ong riatail Kristian men me pahtoula?

¹⁷ Ni emen me riatail Kristian men poakohng eh mehla, kitail anahne wia uwen me kitail kak en wia “kompoakepah kan” me kin “kasalehda ar limpoak ahnsou koaros.” (Lep. Pad. 17:17) Ia duwen atail kak wia “kompoakepah” mehlel men ahpw mehlel ni ahnsou me riatail brother de sister men me lelohng kasongosong en iang wia tiahk ehu me sohte poahsoankihda Paipel? Tehk  kaweid oh ire mehlel en Paipel riau pwukat me kak sewese kitail en kansenamwahwih me pahtoulao.

18. Dahme kamwakid Sises en ketin tentenihr, oh dahme kitail kak sukuhlkihsang sapwellime mehn kahlemeng?

¹⁸ “Sengiseng rehn irail kan me kin sengiseng.” (Rom 12:15) Ele kitail kin apwalki dahme kitail pahn ndaiong emen me uhdahn pahtoula. Mendahki kitail sehse dahme kitail pahn nda, ma irail kilang kitail sengiseng, irail pahn ese me kitail nsenohki arail pepehm kan. Ni kompoakepahn Siseso Lasarus eh mehla, Mery, Marda, oh meteikan mwahieiki riarailo oh kompoakparailo. Ni Sises eh ketila wasao rahn pahieu mwuri, e pil ketin “tentenihr,” mendahki e ketin mwahngih me e pahn kaiasada Lasarus. (Sohn 11:17, 33-35) Sises eh tentenihr kin kasalehda pepehm en Semeo. Ni ahnsou me peneinei en Lasaruso kilang Sises ketin tentenihr, irail kak ese me Sises ketin uhdahn poakohng irail. Met uhdahn kansenamwahwihala Mery oh Marda. Pil duwehte met, ni riatail Kristian kan ar kin kehn atail poakohng oh nsenohkin irail, irail ese me irail sohte kelekelehpw ahpw irail mi nanpwungen kompoakparail kan me kin nsenohki oh sewese irail.

19. Ni atail kin kansenamwahwih riatail Kristian men me kin pahtoula, ni ahl dah me kitail kak kapwaiada Eklesiasdes 3:7 (NW)?

¹⁹ “Ahnsoun nennenla oh ahnsoun koasoi.” (Ekl. 3:7, NW) Pil ehu ahl en kansenamwahwihala emen riatail Kristian iei en wia sounrongorong mwahu men. Mweidohng riomwo en kasalehda ia uhdahn eh pepehm, oh dehr nsensuwedki eh “pato mwahl akan.” (Sohp 6:2, 3) Ele e uhdahn pwunod laud pwehki kasongosong kan sang kiseh kan me sohte wia Sounkadehde kei. Eri iang ih kapakap. Peki Sounkaronge kapakap en ketikihong ih kehl oh en ahneki madamadau pwung. (Mel. 65:2) Ma eh irairo mweidada, kumwa wadekpene Paipel. De wadek ehu oaralap sang neitail sawasepen Paipel kan, duwehte koasoipen ahn emen eh mour, me kak kangoange ih.

20. Dahme kitail pahn koasoiapene nan iren onop en mwuhr?

²⁰ Kitail uhdahn kalahnganki me kitail ese padahk mehlel duwen me melahr kan oh ahnsou kohkohdo kaselel ehu me awiawih irail kan me mi nan sousou! (Sohn 5:28, 29) Eri, ni lokaia oh wiewia, kitail en eimah kolokolete padahk mehlel en Paipel oh ehukihong meteikan ni ahnsou kan koaros me konehng. Iren onop en mwuhr pahn koasoia duwen ehu ahl me Sehdan kin song en kerempwa aramas akan sang arail en esehla padahk mehlel, me iei wunahni. Kitail pahn kilang dahme kahrehda kitail anahne soikala tiahk oh mehn kamweit kan me kin pidada lidip wet en ngehn suwed kan.