Pwehki kitail kin kihda neitail sawaspen Paipel kan ni soh isepe, ekei kin medewe me e mweimwei en wiahda copy oh kihda nan website kan de nan social media. Ahpw, arail wia met kin kauwehla kosonned me pid duwen doadoahngki neitail website (Terms of Use *), oh e pil kahrehda kahpwal tohto. Nin duwen me kosonnedo (Terms) koasoia, sohte mweimwei emen en “post mahlen ape (artwork), sawaspen Paipel kan me kohda nan tablet de cellphone ape, kilel me se kin doadoahngki (trademarks), koul kan, kilel kan, kasdo kan, de artikel kan sang website wet ong nan Internet (soangen website koaros, file-sharing site, video-sharing site, de social network).” Dahme kahrehda iren keinepw wet wiawihda?

Soahng koaros me pwarada nan neitail website kin mi pahn kosonned me sohte mweidada emen en wiahda copy de alasang neitail sawaspen Paipel kan (copyright). Irail me kesehla oh uhwongada kaudok mehlel oh pil soun uhwong teikan kin song en doadoahngki neitail sawaspen Paipel kan nan neirail website pwehn kasonge Sounkadehdehn Siohwa kan oh pil meteikan. Kahrepen arail wiahda soangen website pwukat iei en kahrehiong sounwadawad kan en peikasalda. (Mel. 26:4; Lep. Pad. 22:5) Ekei pil doadoahngki soahng kan nan neitail sawaspen Paipel kan de neitail kilel (logo) en jw.org ong arail pesines, ong dipwisou kan me re pahn netiki, oh pil ong tablet de cellphone app kan. At doadoahngki kosonned en copyright oh trademark kin kahrehda sen ahneki pwuhng nin duwen kosonned en kauhdi mwekid sohte konehng pwukat. (Lep. Pad. 27:12) Ahpw ma se uhdahn ese oh pil mweidohng  aramas akan, pil riat Kristian kan, en post neitail sawaspen Paipel kan ong website teikan de mweidohng irail en doadoahngki neitail trademark en jw.org pwehn netiki arail dipwisou ape, mwoalen kopwung kan ele sohte pahn utung at nannanti en keinapwih soun uhwong oh pesines kan.

En download neitail sawaspen Paipel kan sang ehu website tohrohr likin jw.org kin uhdahn keper. Siohwa ketikihong ‘ladu lelepek oh loalokongo’ kelehpw pwukoahn kihda padahk mehlel me rasehng kisin tungoal. (Mad. 24:45, NW) “Ladu” menet kin doadoahngkihte website pwukat pwehn kihda padahk mehlel—www.jw.org, tv.jw.org, oh wol.jw.org. Pil mie app siluhte ong tablet de cellphone ape—JW Language^®, JW Library^®, oh JW Library Sign Language^®. Kitail kak likih me website oh app pwukat sohte kin saminkihla soahng kan sang ahn Sehdan sampah. Ma padahk mehlel kohsang ehu ahl tohrohr likin wasa pwukat, padahk pwukat kakete wekila de saminla.—Mel. 18:26; 19:8.

Patehng met, en post neitail sawaspen Paipel kan nan website teikan me kin luke meteikan en kihda arail iren koasoi kin wia wasa ehu ong irail me kesehla oh uhwongada kaudok mehlel oh soun uhwong teikan en kahrehiong ekei en tepida kalikamwe sapwellimen Siohwa pwihn. Ekei riatail Kristian kan kin lohdiong lidip en akamaiong ekei nan Internet, oh met kin kalaudehla ahn meteikan ar kauwe mwaren Siohwa. Koasoipene nan Internet kaidehn wasa ehu me konehng kitail en “kaweid irail me kin pelian ni meleilei.” (2 Tim. 2:23-25, NW; 1 Tim. 6:3-5) E pil sansalda me mie ekei me kin wiahda ahd likamw kan nan social media oh website kan doadoahngki eden sapwellimen Siohwa pwihn, Pwihn me Kin Apwalih Mwomwohdiso nan Sampah Pwon, oh pil eden emenemen tohn pwihn wet. Ahpw, sohte emen sang Pwihn me Kin Apwalih Mwomwohdiso nan Sampah Pwon me naineki pein neirail Web page de naineki site ehu nan social media.

Lukehiong aramas akan en doadoahngki jw.org kin sewese lohkihpeseng ‘rongamwahwo.’ (Mad. 24:14) Sawaspen Paipel kan nan jw.org me kitail kin doadoahngki nan kalohk kin mwamwahula ahnsou koaros. Kitail men aramas koaros en iang paiekihda. Eri, nin duwen Terms of Use kasalehda, ke kak e-mail ong emen ehu copy en sawaspen Paipel de kasalehiong ih ehu link ong soahng kan me mi nan jw.org. Sang atail kin lukehiong irail kan me men rong de kilang neitail website, kitail kin sewese irail en paiekihda sang ehute elen alehdi padahk mehlel, me iei sang “ladu lelepek oh loalokong.”