MIE soangsoangen madamadau tohto duwen mour oh mehla. Ekei kin medewe me mwurin mehla re pahn momourte, mwein ni ehu soangen mwohmw tohrohr de nan ehu wasa tohrohr. Meteikan kin medewe me re pahn pwurehng ipwidi nan ehu soangen mour tohrohr. Meteikan pil kin medewe me mehla iei imwilahn mehkoaros.

Ele mie pein omw madamadau ong ire wet, sang ni omw tiahk de wasa me ke tikida ie. Pwehki mie soangsoangen madamadau tohto duwen dahme kin wiawi ni ahnsoun mehla, ia duwe, mie emen de ehu wasa me kitail kak sohpeiong pwehn alehdi pasapeng pwung ong peidek sawehwe wet?

Sounpar epwiki kei, kaun en pelien lamalam kan kin padahngki me mie mehkot soh sansal nan paliwar me kin wie momour mwurin emen eh mehla. Kereniong koaros tohn pelien lamalam laud kan me duwehte Kristian kan, mehn Hindu, mehn Suhs, mehn Muslim, oh pil meteikan kin kamehlele me mie mehkot soh sansal ehu me kin wie momour mwurin emen eh mehla oh dene kin momour wasa me ngehn kan kin mi ie. Ni pali teio, mehn Budda kan kin kamehlele me ipwidien me tohto oh kehl, de kehl en madamadau rehn aramas emen kak lel wasa ehu me adaneki Nirvana.

Pwehki soangen padahk pwukat pali tohto en aramas nan sampah kin kamehlele me mehla ritingada wenihmw en mour nan ehu wasa tohrohr. Ong me tohto, mehla kin wia ahl kesempwal ehu nan mwekid en mour, oh ong irail mehla wia kisehn kupwuren Koht. Ahpw dahme Paipel mahsanihki duwen met? Menlau wadek iren onop en mwuhr. Ke pahn pwuriamweikihla pasapengo.