DOREEN pwuriamwei ni ahnsou me eh pwoud Wesley, me sounparte 54 alehdi soumwahu laud ehu en kanser en mwahliel. * Toahkte kan padahkihong ih me sounpwong keite me e pahn momourki. E koasoia: “I sohte kak kamehlele dahme I rongorong. I uhdahn sohla kak kehn wasa erein wihk kei. I pehm me met wiewiawihong emen tohrohr, kaidehn kiht. I saikinte onopada.”

E kansensuwed pwehki dahme wiawihong Doreeno kin kalapw wiawi. Soumwahu laud ehu kakete lelohng emen ni ahnsou sohte lipilipil. E mwahu en kilang me me tohto kin men kihda arail ahnsou en apwalih emen me re poakohng me kin alehdi soumwahu laud ehu. Ahpw, e kin wia kahpwal laud ehu ong emen me kin apwalih me soumwahwo. Dahme emenemen tohnpeneinei kak wia pwehn kansenamwahwih oh apwalih kisehrail me alehdi soumwahu laud ehu? Ia duwen irail me kin apwalih me soumwahwo ar kak powehdi soangen pepehm kan me re pahn ahnekihda erein arail pahn apwahpwalih me soumwahwo? Ni emen eh pahn kereniong mehla, dahme kitail kak kasik me pahn kakete wiawi? Keieu, kitail pahn tehkpene dahme kahrehda apwalih emen me soumwahu laud kin wia kahpwal laud ehu rahnpwukat.

Soahng kan me pid palien wini me palien sains wiahda kin kak kahrehiong kitail en ekis mour werei. Sounpar epwiki kei samwalahro, pil nan sahpw kepwehpwe kan, mour en aramas akan kin mwotomwot. Aramas akan kin mwadang mehla sang ni soumwahu lusulus de aksident kan. Imwen wini kan malaulau, oh pali laud en me soumwahu kan arail peneinei me kin apwalih irail oh mehlahte ni imwarail kan.

Rahnwet, kekeirdahn palien wini kin kamangaiong toahkte kan en kak apwalihala soumwahu kan pwehn kak ekis kawereila mour. Mie soumwahu kan me aramas  kin mwadangete mehkihla mahso. Rahnpwukat emen me ahneki soumwahu pwukat kak momourki sounpar tohto. Ahpw, en momour ekis werei sohte wehwehki me e pahn mwahula. Me soumwahu kan kin luwetala oh sohla ahneki kehl en apwalih pein irail. Apwalih soangen aramas pwukat kin apwal oh kin anahne ahnsou laud.

Ihme kahrehda tohto me luwetalahr kereniong mehla kin kohkohsang ni imwarail oh kapidelong nan imwen wini. Aramas tohto rahnwet sahn kilang emen me luluwet oh mehla, oh me malaulau kin kilang met. Eri, en masak dahme kitail sohte wehwehki, ele pahn kakete katikala de kahrehiong emen en sohla men sewese emen tohnpeneinei me soumwahu. Dahme kak sawas?

Nin duwen me kitail wadekehr duwen Doreen, aramas tohto kin mwoarosala ni ar kin esehda me emen me re poakohng kin alehdi soumwahu laud ehu. Erein omw kin pwunopwunod, masmasak, oh pahpahtou, dahme kak seweseiuk en kaunopada mwohn met eh pahn wiawi? Sapwellimen Koht ladu lelepek men kapakapki: “Padahkihong kiht ia mwomwen at pahn wadek at rahn akan pwe sen kak alehdi mohngiong erpit.” (Melkahka 90:12, NW) Ei, kapakap ngidingidiong Siohwa Koht en ketin kasalehiong uhk ia mwomwen omw pahn ‘wadek omw rahn akan’ ni erpit, pwe ken kak doadoahngki luhwen omw rahn akan rehn emen me ke poakohng ni ahl me keieu mwahu.

Met kin anahne koasoandi mwahu. Ma me soumwahwo kakete koasoakoasoi oh men koasoia ireo, e pahn wia elen loalokong ken idek reh ihs me pahn wiahda pilipil ong ih ni ahnsou me e sohla pahn kak. Koasoiapene ni mehlel ma e men mwahula, kapedolong, de ale wiepen epwelpen eh soumwahwo. Met pahn kak kihsang sawehwe kan oh pepehm me kowe me pwukoahki en wiahda pilipil ong me soumwahwo. Koasoipene ni saledek oh mwadang koasoiapene kak kahrehiong peneineio en medemedewehte ren apwalihala anahn kan erein soumwahwo. Paipel mahsanih: “Nsensuwed kin pwarada ma sohte koasoakoasoipene.”​—Lepin Padahk 15:22, NW.

Pwukoa kesempwal me sounapwalih soumwahu kak wia iei kansenamwahwihala. Aramas emen me luhluwetala anahne en wehwehki me aramas kin poakepoake oh e sohte kelehpw. Ia duwen met e kak wiawi? Wadawad de koul ong ih, pilada ehu pwuhk oh koul me kak kangoange ih oh kansenamwahwihala. Aramas tohto kin nsenamwahula ni ahnsou me emen tohn arail peneinei kin kol pehrail oh koasoi ni kamantik ong irail.

 E kin kalapw sawas ma ke kin ndaiong ihs me mwemweitdo. Ehu ripoht koasoia: “Rong iei nanpwungen pepehm limau ko me kin pwand en sohla mie. Aramas kin kak rong mendahki re kin wie memeir, eri ke dehr koasoia mehkot me ke sohte pahn koasoiaiong [me soumwahwo] ni ahnsou me e pepehd.”

Ma e konehng, iang ih kapakap. Paipel kasalehda me ehu ahnsowo, wahnpoaron Pohl oh ienge ko mi pahn kahpwal laud ehu oh re uhdahn pil sehse dahme pahn wiawihong arail mour. Soangen sawas dah me irail rapahki? Pohl peki rehn kompoakepah kan: Kumwail “sewesehkin kiht amwail kasakas akan.” (2 Korint 1:8-11) Kapakap sang nan mohngiong ni ahnsoun kapwunod oh soumwahu laud uhdahn kin kesempwal.

En medewehla duwen emen me ke poakohng pahn mehla uhdahn kin kapwunod. Pwehki kitail sohte kin perenki kilang emen eh kin mehla. Kitail sohte kepikipikda pwe mehla en wia kisehn atail mour. (Rom 5:12) Mahsen en Koht kin kahdaneki mehla “imwintihti.” (1 Korint 15:26) Eri e sohte kapwuriamwei ken kahng medewe duwen emen me ke poakohng pahn mehla, pwehki met wia ahnepen aramas.

Ahpw, en tehkpene mahs dahme pahn kakete wiawi kak sewese tohnpeneinei kan ren katikala dahme re perki oh nsenohki mahs en wiahda soahng kan en soanamwahu ni uwen ar kak. Ekei soahng kan me ele kak pwarada mi nan kisin koakon “ Kaimwiseklahn Wihk en Eh Mour.” Mehlel, kaidehn irair pwukat koaros kin pwarada rehn me soumwahu kan, de ni soangen irekdiohte me koakono kasalehda. Ahpw, pali laud en me soumwahu kan kin lelohng ekei soahng pwukat.

Mwurin mehlahn emen me ke poakohng, e pahn wia elen loalokong en tuhwong emen kompoakepahmw me pwungkihdahr mwoweo en seweseiuk. Sounapwalih me soumwahwo oh peneinei ele pahn anahne ese me aramas me re poakohngo solahr mi nan kahpwal oh lokolok. Sounkapikada aramas limpoako kamehlelehiong kitail me “me melahr akan sohte ese mehkot.”​—Eklesiasdes 9:5.

E kesempwal en likih Koht kaidehnte ni ahnsou me emen tohnpeneinei kin soumwahu laud ahpw pil ni ahnsou me pahtou kin mie mwurin me soumwahwo eh mehla. Ele E pahn ketin seweseiuk sang ni koasoi oh wiewia mwahu kan me meteikan kin wiahiong uhk. Doreen koasoia: “I sukuhlkihdi en dehr kin soikala sawas en meteikan. Ni mehlel, sawas laud me se alehdi uhdahn kansenamwahwihkihtala. Ei pwoudo oh ngehi uhdahn ese me met rasehng Siohwa eh kin mahmahsanih, ‘I mihmi rehmwa pwehn sewesei kumwa.’ I sohte pahn manokehla met.”

Ei, Siohwa Koht iei me sounapwalih Lapalapo. Nin duwen Sounkapikpatail, e mwahngih atail medek oh lokolok kan. E kak oh kupwurki ketikihda sawas kan me anahn oh kangoang pwe kitail en kak dadaur. Ahpw me keieu mwahu iei e ketin inoukihda me ni ahnsou keren e pahn ketikihsang mehla kohkohlahte oh kaiasada aramas lik kei me e ketin tamataman. (Sohn 5:28, 29; Kaudiahl 21:3, 4) Koaros ahpw pahn kak iang koasoia en wahnpoaron Pohl koasoio: “Kowe, Mehla, a ia omw manaman en powehdi? Ia omw tehtehn meninkau?”​—1 Korint 15:55.