Medemedewe duwen nanpwungmwahu ehu me aramas kak ahneki​—nanpwungmwahu en mpwer ehu. Ira kin ehukipene nanpwungmwahu me uhdahn kehlail. Nancy Segal, kaunen wasahn roporop ehu (Twin Studies Center), me pil wia mpwer men nda me ekei mpwer pil ese ia pepehm ma ke pahn ndaiong emen mehkot oh sohte anahne kawehwe pwehki meteio uhdahn wehwehki dahme ke koasoakoasoia. Emen lih kawehwehda duwen nanpwungmwahu me ih oh eh mpwero ahneki: “Se kin ese soahng koaros me pidada emenemen kiht.”

Dahme wiahda soangen wehwepene tohrohr wet? Roporop kan kasalehda me e kin kohsang irair en keirda oh kaweid en pahpa nohno, ahpw keieu, e mwomwen me e kohsang ni soahng kan me mi nan paliwar (genes) en mpwer ehu me kereniong duwepenehte.

MEDEMEDEWE: Sounkapikada me ketin wiahda soangen genes kapwuriamwei pwukat koaros uhdahn ketin mwahngih duwen emenemen kitail laudsang en meteikan ar ese kitail. Ni mehlel, sounmelkahkao Depit koasoia: “Komwi me ketin kakonepene paliwereiet nan kapehd en inei. Ni tih kat eh kakonokonpene ni keneinei nan kapehd en inei, ni ei tepin kekeirda wasa riro, . . . Komw ketin mahsanihieier mwohn ei ipwidi. Rahn akan en mouriet kileldi nan sapwellimomwi pwuhk.” (Melkahka 139:13, 15, 16) Koht kelehpw ketin mwahngih ni unsek soangen genes dah me kitail ahneki oh dahme kin lelohng kitail nan atail mour me kin kasalehda mwomwatail. Koht eh ketin mwahngih kitail oh ia duwen atail wiawihda kin kamehlelehiong kitail me e ketin uhdahn wehwehki emenemen kitail ni oaritik.

Depit kapakapki: “Maing Kaun, komw ketin kasawih ie, eri, komw ketin mwahngih ie. Komw ketin mwahngih mehkoaros me I kin wia; sang wasa doh, komw ketin mwahngih ei lamalam akan koaros. Pil mwohn ei kin pato, komw mwahngiher dahme I pahn patohwan.” (Melkahka 139:1, 2, 4) Patehng met, Siohwa kin ketin mwahngih atail pepehm loal kan oh pil “ketin mwahngih audepen atail lamalam oh ineng koaros.” (1 Kronikel 28:9; 1 Samuel 16:6, 7) Dahme iretikitik pwukat kasalehda duwen Koht?

Mendahki ele kitail sohte kin ndahsang nan ewetail atail madamadau oh pepehm kan koaros ni atail kin kapakap, Sounkapikpatailo sohte kin ketin tehkte dahme kitail kin wia ahpw e pil ketin wehwehki ia kahrepen atail kin wia met. Oh e pil kin ketin mwahngih soahng mwahu kan me kitail men wia, mendahki atail soh itar kan kin ireikitaildihsang en kapwaiada ineng en atail mohngiong. Pwehki Koht me tepin ketikihong limpoak nan mohngiongitail, e uhdahn ketin kupwurki tetehk oh pil wehwehki atail madamadau limpoak kan oh kahrepen atail mwekid limpoak kan.​—1 Sohn 4:7-10.

 Iren Paipel kan kamehlelehiong kitail

• “Silangin Siohwa kin mahmahsanih me pwung kan, oh e kin ketin karonge arail kapakap ni ngidingid.”​—1 PITER 3:12.

• Koht ketin inoukihda: “I pahn padahkihong uhk ahl me ke pahn weid ie; I pahn kaweid uhk oh panawihiuk.”​—MELKAHKA 32:8.

Ia duwe, atail ese me Koht ketin mwahngih atail irair oh pepehm kan kak sewese kitail en dadaur pahn kahpwal kan? Tehk dahme wiawihong Anna, sang Nigeria. E koasoia: “I kin peidengki ma mour mie katepe pwehki ei irair kin uhdahn apwal. Ngehi liohdi men me kin apwalih nei serepein tikitik me mihmi nan imwen wini pwehki soumwahu me adaneki hydrocephalus (pihl kadirehla nan mwahliel). Ni ahnsowo, toahkte ndaiong ie me I ahneki kanser en dihdi oh anahne pwal, ale chemotherapy, oh radiotherapy. E uhdahn apwal ong ie I en mihmi nan imwen wini ni ahnsowohte me nei serepein soumwahwo mi mwo.”

Dahme sewese Anna? E koasoia: “I kin doudouloale duwen iren Paipel kan me duwehte Pilipai 4:6, 7, me mahsanih, ‘sapwellimen Koht popohl me inenen siksang madamadau en aramas koaros pahn pere omw mohngiong oh omw kehl en madamadau.’ Ehuehu ahnsou me I kin tamanda ire wet, I kin pehm me I uhdahn karanih Siohwa, pwe I ese me e ketin wehwehkin ie laudsang ei wehwehki pein ngehi. Riei kan nan mwomwohdisohn Kristian pil kin kangoange ie.

“Mendahki ei kahpwal en soumwahu mihmihte rehi, en ngehi oh nei serepeino irairo mwahula. Pwehki Siohwa kin ketin ieiang kiht, se esehla en dehr ahneki madamadau sapwung ni at kin lelohng apwal kan. Seims 5:11 mahsanih: ‘Kitail kin nda me irail kan me kin dadaur kin peren. Kumwail rongehr duwen Sohp eh kin dadaur oh pil kilangehr imwila me Siohwa ketikihong ih, pwe Siohwa me diren limpoak [de, “uhdahn kin ketin poakehla emen,” ntp] oh kadek kalahngan.’” Siohwa ketin mwahngih ni unsek en Sohp irair, oh kitail kak kamehlele me e uhdahn pil ketin mwahngih soangen kahpwal sohte lipilipil me kitail kin lelohng.