Ma lokolok sohte kohsang rehn Koht, dahme kin kahrehda lehk laud kan, semwehmwe me sohte kak uhdi, mahwen kan, soumwahu kan, oh melimel de rerrer en sahpw ape? Mahsen en Koht, Paipel kasalehda soahng siluh me kin kahrehiong aramas akan lokolok:

1. Roporop ong Pein Emen, Noahrok, oh Kailok. “Ekei kin wie lokolok pahn ar manaman.” (Eklesiasdes 8:9) Aramas kin kalapw lokolok pwehki dahme aramas soh unsek, me kin medemedewehte pein ih, de lemei kin wiahiong irail.

2. Ahnsou oh Mwekid me Sohte Kasikpe. Aramas kin kalapw lokolok “pwe paisuwed kin lelohng aramas koaruhsie. ”(Eklesiasdes 9:11) Met wehwehki, aramas kin mi wasa ehu ni ahnsou me aksident wiawi, de aramas kin salelepekda, de wiahda sapwung kan.

3. Kaun Suwed En Sampah. Paipel kasalehda ni sansal dahme keieu kin kahrehda aramas en lokolok. E mahsanih: “Sampah pwon mi pahn manaman en me suwedo.” (1 Sohn 5:19) “Me suwedo” iei Sehdan me Tepil, ngehn kehlail men me nin tapio wia sapwellimen Koht tohnleng, ahpw “e sohte kin tengediong me mehlelo.” (Sohn 8:44) Tohnleng teikan iangala Sehdan oh uhwongada Koht pwehn kaitarala ar ineng roporop kan me kahrehiong irail en wiahla ngehn suwed kan. (Senesis 6:1-5) Sangete ni ar uhwongada Koht, Sehdan oh nah ngehn suwed kan ahnekier manaman me kehlail oh lemei pohn soahng kan me kin wiawi nin sampah. Met kin mehlel nan atail ahnsou. Ahnsou wet, Tepil inenen lingeringer kowahlap oh “kin pitipitih sampah pwon” me kahredahr “meid suwediong sampah.” (Kaudiahl 12:9, 12) Ei, Sehdan kaun lemei men. E kin nsenamwahuki en aramas akan kin lokolok. Eri Sehdan me kin kahrehiong aramas en lokolok, kaidehn Koht.

MEDEMEDEWE: Ihte emen me inenen lemei oh uhdahn suwed me pahn kahrehiong aramas soh dipe kan ren lokolok. Ahpw, Paipel kin mahsanih me, “Koht iei limpoak.” (1 Sohn 4:8) Pwehki Koht me limpoak, E “kak ketin wiahda sapwung?” Soh. “Koht Wasa Lapalahpie sohte kin ketin wia me suwed.”​—Sohp 34:10, 12.

Ahpw ele ke kin medewe, ‘Ia uwen werei Koht Wasa Lapalahpie pahn ketin mweidohng Sehdan en pousehlahte eh kaunda suwed?’ Nin duwen atail koasoiapenehr, Koht ketin kalahdeki suwed, oh atail wie lokolok kin kahrehiong ih medek laud. Patehng met, sapwellime Mahsen kin kangoange kitail: “Patohwanohng ih amwail pwunod akan koaros, pwehki eh kin ketin nsenohkin kumwail.” (1 Piter 5:7) Koht ketin poakohng kitail oh sapwellimanki manaman en ketin kasohrehla lokolok koaros oh pwung sapahrek, me oaralap en mwurin met pahn kawehwehda. a