• Pilipilda sang rehn Koht. “I kasapwiladahr nei nanmwarki . . . I pahn kihong uhk wehi kan koaros; oh ke pahn limankihla sampah pwon.”​—Melkahka 2:6, 8.

• Ahneki pwuhng en sohsohki mwoalen Nanmwarki Depit. “Kisin seri kis ipwidiongkitailehr! Neitail pwutak emen kohiengkitailehr! . . . Sapwellime manaman pahn wie lapalapala, oh popohl pahn poatopoat nan sapwellime wehi. E pahn ketin kaunda wasa nin duwen kadaudok en Nanmwarki Depit.”​—Aiseia 9:6, 7.

• Ipwidi nan Pedleem. “Kowe, Pedleem . . . , I pahn ketikihda sang rehmw emen me pahn kaunda . . . Aramas akan wasa koaros nin sampah pahn pohnese sapwellime roson lapalap.”​—Maika 5:2, 4.

• Aramas soikala oh kamakamala. “Sohte emen mie me men kilang​—kitail kin pohnsehse pwe likamwete sohte mwahn ih mehkot. . . . Dipatail kan me e lipwalipwkihda, oh atail wiewia suwed kan me e wowokihki.”​—Aiseia 53:3, 5.

• Iasada sang rehn me melahr kan oh Koht ketikihong dehu lingan ehu. “Komw kin ketin sinsile ie sang manaman en mehla. I kin loalopwoat ni ei kin papah komwi, oh komwi sohte pahn ketin likidmelieiehla nan sapwen me melahr akan. . . . Omwi kin ketiket rehi kin kadirehkiniehla peren oh kahrehiong ie peren poatopoat.”​—Melkahka 16:10, 11.

Erein poadopoad, aramas tehmen me pahrekiong soangen oaritik pwukat me kawehwehdier duwen Kaun keieu mwahu; oh memenet iei Sises Krais. Ni mehlel, tohnleng men ndaiong Mery, en Sises nohnou: “Koht pahn ketikihong ih mwoalen seme Depit, . . . oh sapwellime Wehi sohte pahn imwisekla.”​—Luk 1:31-33.

Sises sohte ketin wiahla kaun en sampah men. Ahpw, e pahn kaunda tohnsampah sang nanleng nin duwen Nanmwarki en Wehin Koht. Dahme kahrehda e pahn wia Kaun keieu mwahu men? Medewehla dahme Sises ketin wia ni ahnsou me e ketiket nin sampah.

•   Sises kin ketin nsenohki aramas. Sises ketin sewese ohl oh lih akan, me pwulopwul oh me mah kan, sohte lipilipil wasa me re kohsang ie, de ma re kepwehpwe de semwehmwe. (Madiu 9:36; Mark 10:16) Ni ahnsou me aramas tokutok men peki reh nda: “Ma komw kupwurki, komw kak ketin kamwakeleiehda,” Sises uhdahn ketin poakehla oh kamwahwihala.​—Mark 1:40-42.

• Sises ketin padahkihong kitail ia duwen atail pahn kaperenda Koht. E mahsanih: “Kumwail sohte kak liduwih Koht oh Kepwe.” E pil mahsanih me kitail anahne wiahiong meteikan dahme kitail men meteikan en wiahiong kitail. Patehng met, e ketin kasalehda me Koht ketin nsenohki kaidehn ihte dahme kitail wia, ahpw pil ia mwomwen atail madamadau oh pepehm. Pwe kitail en kaperenda Koht, kitail anahne kaunda pepehm en nan mohngiongitail. (Madiu 5:28; 6:24; 7:12) Sises ketin kasalehda me ma kitail men uhdahn nsenamwahu, kitail anahne sukuhlki dahme Koht ketin kupwurki kitail en wia oh eri kapwaiada.​—Luk 11:28.

• Sises ketin padahngki ia wehwehn poakohng meteikan. Sapwellimen Sises mahsen oh wiewia kan kin kamwakid laud irail kan me kin rong ih: “Pokono ahpw pwuriamweikihla mwomwen eh kin ketikihwei sapwellime padahk, pwe e kin ketin padahkih irail nin duwen aramas emen me ahneki manaman.” (Madiu 7:28, 29) E ketin padahkihong irail: “Poakohng amwail imwintihti kan.” E pil ketin loulouki ekei irail me pwukoahki sapwellime pwoula: “Ipa, komw ketin mahkohng irail pwe re sehse dahme re wiewia.”​—Madiu 5:44; Luk 23:34.

Sises sapwellimanki koahiek unsek en wia Kaun en sampah men me kin ketin sawas mwahu oh kadek. Ahpw iahd me e pahn ketin tepida kakaun?