Dahme Aramas Kin Ndahki Duwen Kapakap
“Ni ei kin kapakap, I kin pehmw duwehte ma Koht ketiket limwahi, kolokol pehi oh kaukaweid ie ni ei kin pehm me I salongala.”—MARÍA.
“Ei pwoudo mehla mwurin eh kohwahki soumwahu en kanser erein sounpar 13. I kin taman ei kin kapakap ong Koht rahn koaros oh pehm me e uhdahn ketin karonge ie ni ei pehm medek. Ngehi eri kin meleileidi.”—RAÚL.
“Kapakap iei kisakis kaselel ehu sang rehn Koht ong aramas akan.”—ARNE.
Kapakap kin wia kisakis tohrohr ehu ong Maria, Raúl, Arne, oh pil aramas tohto teikan. Irail kin medewe me sang ni kapakap, re kak koasoiong Koht, kalahngan ong ih, oh peki sapwellime sawas. Re uhdahn kamehlele dahme Paipel mahsanihki duwen kapakap ong Koht: “Iet koapworopwor me kitail ahneki reh, pwe sohte lipilipil dahme kitail kin peki nin duwen kupwure, e pahn ketin karonge kitail.”—1 Sohn 5:14.
Ahpw pil aramas tohto sohte kamehlele dahme Paipel mahsanihki duwen kapakap. Steve kawehwehda eh madamadau duwen kapakap: “Ni ahnsou me I lel sounpar 17, kompoakepahi silimen mehla. Emen mehla nan aksident, a meh riemen duhla nansed.” Dahme Steve wia? E nda: “I kapakap ong Koht pwe en ketin sapengdohng ie ia kahrepen mepwukat koaros ar wiawi, ahpw sohte pasapeng me I alehdi. Ngehi eri pein idek rehi, ‘Ia kahrepen ien kapakap?’” Kapakap kan me mwomwen sohte pasapengla kin kahrehiong me tohto en idek ma mie kahrepe mwahu ren kin kapakap.
Pil mie soangen kahrepe teikan me ekei kin medewe me kapakap sohte kin sewese irail. Ekei nda me pwehki Koht ketin mwahngih soahng koaros, e ketin mwahngiher dahme kitail anahne de atail kahpwal kan, kahrehda kitail sohte anahne patohwanohng ih soahng pwukat.
Pil ekei kin kamehlele me Koht sohte kin ketin kupwurki karonge arail kapakap kan pwehki sapwung kan me irail wiahda mahso. Jenny nda: “Dahme keieu apwal ong ie iei me I pehm me sohte katepei. I wiahda soahng kan me I koluhkihla, kahrehda I kin ndaiong pein ngehi me I sohte warohng Koht en ketin karonge ie.”
Ia omw madamadau duwen kapakap? Ma mie pak me ke ahneki soangen madamadau pwukat de peikasalki duwen kapakap, eri ke kak nsenamwahula pwe Paipel kak kihda pasapeng mwahu kan. Kitail kak uhdahn likih dahme Paipel mahsanihki duwen kapakap; * e kak seweseiuk ken diarada pasapengpen peidek kan me duwehte:
-
Ia duwe, Koht kin ketin uhdahn sapengala atail kapakap kan?
-
Dahme kahrehda ekei kapakap sohte kin pasapengla?
-
Ia duwen omw kak kapakap pwe Koht en ketin karonge?
-
Ia duwen kapakap eh kak seweseiuk?
^ par. 9 Kapakap en sapwellimen Koht ladu tohto mi nan Paipel, iangahki sapwellimen Sises Krais. Daulih kapakap 150 mi nan Palien Paipel ni Lokaiahn Ipru, de Kadehde Mering.
