Sang nin tapio, kitail ekisekis sukuhlki soahng kan me kak sewese kitail en diarada pasapengpen peideko, Ihs Koht? Kitail sukuhlki sang nan Paipel me mwareo iei Siohwa oh sapwellime irair me keieu kesempwal iei limpoak. Kitail pil tehkpene dahme e ketin wiadahr oh dahme e pahn ketin wia ong kamwahupen aramas koaros. Pil miehte soahng tohto me ke kak sukuhlki duwen Koht, ahpw ele ke pahn medewe ia duwen omw pahn paiekihda omw pahn wia met.

Siohwa ketin inoukihda me “ma ke pahn sohpeiong, e pahn ketin kupwurperenkinuhkala.” (1 Kronikel 28:9) Song medewehla kisakis kesempwal me awiawihiuk ni omw pahn rapahki oh esehla Koht, me iei “kompoakepahnki” Siohwa! (Melkahka 25:14) Ia duwen omw kompoakepahnkihla ih eh pahn wia kamwahupomw?

Nsenamwahu mehlel. Paipel kawehwehda Siohwa nin duwen “Koht me peren.” (1 Timoty 1:11) Omw karanihala ih oh kin idawehn sapwellime ahl akan pahn kahrehiong uhk nsenamwahu mehlel, me kak wia kamwahu ong omw pepehm, madamadau oh paliweromw. (Melkahka 33:12) Ke pahn pil kak wiahda mour nsenamwahu ehu​—sang ni omw soikala soangen mour ehu me keper, kakairada wiewia kan me karoson, oh kolokol nanpwungmwahu rehn meteikan. Ke pahn pwungkihla dahme sounmelkahkao koasoia. “Ia uwen kesempwal en ei karanih Koht!”​—Melkahka 73:28.

Nsenohki oh apwahpwalih. Siohwa ketin inoukihong sapwellime ladu kan: “I pahn kaweid uhk oh panawihiuk.” (Melkahka 32:8) Met wehwehki me Siohwa kin ketin tetehk sapwellime ladu kan oh ketikihong emenemen dahme e uhdahn anahne. (Melkahka 139:1, 2) Ni omw pahn kakairadahr omw nanpwungmwahu rehn Siohwa, ke pahn diarada me e pahn ketin ieiang uhk ahnsou koaros.

Ahnsou kaselel ni ahnsou kohkohdo. Patehng eh ketikihong uhk elen ahneki mour nsenamwahu oh katapan ahnsou wet, Siohwa Koht pil ketikihda ahl ehu ken kak ahneki mour nsenamwahu ahnsou kohkohdo. (Aiseia 48:17, 18) Paipel mahsanih: “Met wehwehki mour soutuk, arail pahn eseikomwihla, me komwihte me Koht mehlel, oh Sises Krais me komw ketin poaronehdo.” (Sohn 17:3) Nan ahnsou apwal pwukat, koapworopwor me Koht ketikihda kak duwehte angke ehu me kak sewese kitail en tengeteng oh kehlail.​—Ipru 6:19.

Mepwukat iei ekeite kahrepe kan nanpwungen kahrepe kesempwal tohto kitail en esehla mwahu Koht oh kakairada nanpwungmwahu reh. Se lukeiuk ken koasoiong emen Sounkadehdehn Siohwa kan de kohla jw.org pwehn kalaudehla omw wehwehki duwen met.