KITAIL koaros kamehlele me Siohwa kin ketin kaukaweid oh kakehlaka sapwellime aramas akan oh kin ketikihong dahme re anahne pwehn mi karanih ih ni “imwin rahn akan.” (2 Tim. 3:1) Ahpw pein nsenen emenemen kitail ma kitail men peikiong. Kitail kak kapahrekiong atail irairo ong en mehn Israel ko nan sapwtehno. Re pahn kin anahne mwekid ma re rong ngilen sowi ko.

Siohwa ketin mahsanihong Moses en wiahda sowi riau me sukusukdahsang silper “pwehn kin kapokonepene aramas akan oh pwehn wia kilel en mweselda.” (Nemp. 10:2) Samworo ko pahn kin peuk sowi ko ni soangsoangen ngihl kei pwehn kasalehda dahme aramas ko anahne wia. (Nemp. 10:3-8) Rahnwet, sapwellimen Koht aramas akan kin alehdi kaweid kan ni soangen ahl kei. Tehk ahl siluh me kin katamanda ngilen sowi eh kin pepeuk mahso. Ahl siluh pwukat iei ni sapwellimen Koht aramas akan ar kin ale luhk ong kapokon laud kan, ni elder kan kin ale kasukuhl, oh ni koasoandi kan kin wekila de pwurehng kamwahula ong mwomwohdiso koaros.

Ni Siohwa eh ketin kupwurki “koaros pahn pokonpene” ni wenihmw en impwalo ni palimese, samworo ko pahn kin peuk sowi ko. (Nemp. 10:3) Keinek ko koaros, me wiahda pwihn pahieu me kousoan kapilpene impwalo, kin rong ngilen sowi ko. Irail kan me uhdahn karanih wenihmwo kak lel mwo erein minit keite. Ahpw ekei uhdahn dohsang oh re pahn anahne ahnsou oh nanti laud pwehn lella mwo. Mehnda ma re keren de doh, Siohwa ketin kupwurki koaros en pokonpene oh paiekihda.

Rahnwet kitail sohte kin pokonpene nan impwal ehu, ahpw kitail kin ale luhk ong kapokon en sapwellimen Koht aramas. Mepwukat kin iangahki mihting tohrohr kan oh ekei kapokon teikan, wasa me kitail kin ale kaweid oh ire kesempwal kan. Nan sampah pwon, sapwellimen Siohwa aramas akan kin perenki prokram kohte. Ahpw koaros me iang towehda kin perenki arail iang pokonpene nin duwen pwihn peren ehu. Ekei kin anahne seiloak doh sang ekei. Mendahki met, irail koaros me kin iang towehda pwungki me e uhdahn kesempwal.

Ia duwe, riatail Kristian kan me mi wasa me uhdahn dohsang wasahn kapokon kan kak iang paiekihda? Pwehki computer oh Internet, tohto en riatail pwukat kak iang paiekihda prokram ohte oh pil pehm me irail iangete kisehn kapokono. Karasepe, erein ehu mwemweit en wiliepen poasen kaun en Sounkadehdehn Siohwa kan, ohpis en Sounkadehde kan nan Benin kadarala prokramo ong Arlit, Niger, kisin kahnimw ehu en Sahara Desert. Riatail Kristian meh limen, patehng me perenki rong ko meh ehk wenemen me pokonpene. Mendahki arail mi wasa doh, re pehm me re  iang pokonpene rehn meh 44,131. Emen brother ntingihedi: “Se uhdahn kalahnganki amwail kadarodo prokramo. Met kasalehiong kiht ia uwen amwail poakohng kiht.”

Ni samworo en Israel ko ar kin peuk ehute sowi, “kaun akante, kaunen mehn Israel kid kan,” pahn kin anahne kohdo ni impwalo. (Nemp. 10:4, NW) Wasao me re kak ale kaweid oh kasukuhl sang Moses. Met pahn sewese irail en apwalih arail pwukoa kan en arail keineko. Ma kowe emen kaun ko, ke sou pahn wia uwen omw kak koaros pwehn iang towehda oh paiekihda?

Rahnwet, elder kan nan mwomwohdiso kaidehn “kaun” kei; re pil sohte kin kaunda sapwellimen Koht pelin sihpw kan me irail kin apwalih. (1 Pit. 5:1-3) Ahpw re uhdahn kin wia uwen arail kak en apwalih pelin sihpwo. Eri re kin mwekidki ar alehdi luhk ong pil ekei kasukuhl, me duwehte Sukuhl ong Elder kan oh Sounsawas kan. Erein kasukuhl pwukat, elder kan kin sukuhlki ia duwen ar kak uhdahn koahiekla pwehn apwalih soahng kan nan mwomwohdiso. Pwehki kasukuhl wet, elder kan oh irail kan me re kin apwalih nan mwomwohdiso kak karanihala Siohwa. Mendahki ke saikinte iang ehu sukuhl ko, ke pil kin iang paiekihda pwehki elder kan me iang towehda kin doadoahngki dahme re sukuhlki pwehn sewese mwomwohdiso.

Ekei ahnsou samworo ko kin peuk sowi ni ngihl marahra oh toutou. Met kin pakairki me Siohwa ketin kupwurki mehn Israel ko koaros en mwekid. (Nemp. 10:5, 6) Ni aramas ko ar kin mwekid, re kin wia met ni soandi mwahu, ahpw met pil wia doadoahk laud ehu. Ekei pak ekei mehn Israel ko ele sohte kin men mwekidla ehu wasa tohrohr. Dahme kahrehda?

Ele ekei medewe me pakair en mwekid ko kin kalapw wiawi oh re sohte kasik. Ni ehuehu ahnsoun mwekid ko, “ekei ahnsou pelien depweko kin mihmihte sang nin soutik lel nimenseng.” Ekei pak, “e mihmihki rahn riau, de sounpwong ehu, . . . de pil reireisang.” (Nemp. 9:21, 22) Oh pak depe aramas ako kin mwekid? Nempe irelaud 33 kasalehda me mpen wasa 40 me mehn Israel ko mwekidla ie.

Ekei pak, ele ekei irail kin diarada wasa ehu me mie mwete. Nan “sapwtehn kalaimwun oh kamasepwehko,” met kakete wia wasa mwahu ehu. (Deud. 1:19) Eri, e kakete wia kasongosong ehu ni ar kin anahne mwekidla ehu wasa pwehki met pahn ehute apwalla.

Ni ahnsou me keinek ko kin mweselda, ekei kin apwalki en awih arail ahnsou en mwekid. Koaros kin rong ngilen pepeuk en sowi marahra oh toutouwo, ahpw kaidehn koaros kak wiahkintehieu mwekid ni ahnsowohte. Ngilen sowi marahra oh toutouwo kin kehsehki me keinek me mi palimese ko me adaneki Suda, Isakar, oh Sepulon, anahne mweselda. (Nemp. 2:3-7; 10:5, 6) Mwurin arail mweselda, samworo ko kin peuk ngilen sowi marahra oh toutouwo keriapak en ahnsou pwehn kehsehki keinek siluhwo me mi palieir en impwalo. Samworo ko kin doulahte wia met lao aramas ko koaros mweselda.

Mwein mie pak ke kin apwalki en pwungki wekidekla kan me sapwellimen Siohwa pwihn kin wiahda. Dahme kahrehda? Mwein ke kin medewe me wekidekla kan nohn tohtohla. De mwein ke mwahuki mwomwen koasoandi kan en mwoweo oh sohte men en wekidekla. Sohte lipilipil kahrepe dah, ele ke diarada me e apwal en kanengamah ni omw ekisekis ahnla wekideklao. Ahpw ma kitail nantihong en kapwaiada nin duwen me kitail anahne wia, kitail pahn kakete kilang me wekideklao mwahu ong kitail oh me Siohwa ketin kupwurperenkin kitail.

Ni mwehin Moseso, Siohwa ketin kahluwa aramas rar rar kei nan sapwtehno. Ma e sohte ketin apwalih oh kaweid irail, irail sohte pahn pitila. Rahnwet, Siohwa kin ketin kaweid kitail erein imwin rahn keper pwukat. E kin ketin sewese kitail en karanihala ih oh kakehlailihala atail pwoson. Eri kitail koaros en wia uwen atail kak en kin peik duwehte mehn Israel lelepek ko ni ar kin peikiong ngilen sowi ko!