1, 2. (a) Kisakis dahieu me sapwellimen Koht ladu kan kin kasikasik? (b) Dahme sewese kitail en kilikilangwohngete kisakiso? (Menlau kilang tepin kilel.)

 KRISTIAN keidi kan ahneki koapworopwor kaselel ehu. Irail kasikasik en mour nanleng. Wahnpoaron Pohl kahdaneki koapworopwor wet “paeker en Koht . . . ong ni mouren powe.” (Pil. 3:14) Irail pahn iang Sises Krais ketin kakaun nan sapwellime Wehi nanleng, oh iang ih ketin doadoahk pwehn sewese aramas akan en unsekla. (Kaud. 20:6) Ia uwen kaselel en koapworopwor wet! Ahpw sihpw teikan kin kasikasik ehu kisakis tohrohr. Arail koapworopwor iei en mour kohkohlahte nan paradais nin sampah, oh koapworopwor wet kin kahrehiong irail peren laud!​—2 Pit. 3:13.

² Pohl men sewese ienge Kristian keidi ko en lelepekte oh ale kisakiso. E ndaiong irail: “Kumwail perenki medemedewe duwen soahng kan me mi wasao [“powe,” NW].” (Kol. 3:2) Irail anahne medemedewehte koapworopwor kaselelo nanleng. (Kol. 1:4, 5) En medemedewe duwen sapwellimen Siohwa kapai kan kin sewese sapwellimen Koht ladu koaros en kilikilangwohngete kisakiso.  Met mehlel mehnda ma irail ahneki koapworopwor en mour nanleng de nin sampah.​—1 Kor. 9:24.

3. Dahme Pohl katamankihong Kristian ko?

³ Pohl pil katamankihong Kristian kan duwen keper kan me kak ireirailsang kisakiso. Karasepe, e ntinglahng mehn Kolose ko duwen Kristian likamw kan me kin songosong en kaperenda Koht sang ni arail idawehn Kosonned en Moseso ahpw sohte kin pwoson Krais. (Kol. 2:16-18) Pohl pil koasoia duwen keper kan me mie rahnwet oh me pil kak kauhdi kitail sang en ale kisakiso. E kawehwehda ia duwen atail en soikala ineng suwed kan oh dahme kitail anahne wia ni atail kin ahneki kahpwal kan rehn riatail Kristian kan de nan atail peneinei. En Pohl kaweid mwahu kak sewese kitail rahnwet. Kitail pahn koasoiapene ekei mehn kataman pwukat nan nah kisinlikou ong mehn Kolose ko.

4. Dahme kahrehda ineng suwed kan kak kauhdi kitail sang ale kisakiso?

⁴ Mwurin Pohl eh katamankihong rie Kristian ko duwen koapworopwor kaselel me re ahneki, e ntingihedi: “Eri, kumwail uhdahn pahn kemehla ineng kan en sampah me kin wie doadoahk loalamwail, eri, iet akan; kamwahl, sarsuwed, ineng suwed, oh noahrok kepwe.” (Kol. 3:5) Ineng suwed kak uhdahn kehlail oh kak kahrehiong kitail en sohla ahneki nanpwungmwahu rehn Siohwa oh atail koapworopwor ong ahnsou kohkohdo. Emen brother me wiahda sapwung laud ehu oh mwuhr pwurodo nan mwomwohdiso nda me eh ineng suwed kan uhdahn kehlailla me kahrehiong en “sohte sohpeisang lao pwandala.”

5. Ia duwen atail kak pere kitail nan irair keper kan?

⁵ Kitail anahne uhdahn kanahieng ma kitail mi nan irair ehu me kak kahrehiong kitail en sapeikiong sapwellimen Siohwa koasoandi kan me pid dahme pwung oh dahme sapwung. Karasepe, e wia elen loalokong ong ohl emen oh lih emen me kin date ira en koasoanehdi nin tapio irepen soahng kan me duwehte en doahke, metik, oh kelehpwla. (Lep. Pad. 22:3) Irair keper teikan kakete wiawi ni atail seiloak pwehki doadoahk de ma kitail brother men oh iang lih emen doadoahk. (Lep. Pad. 2:10-12, 16) Dahme ke kak wia pwehn pere pein uhk? Kasalehda me kowe emen Sounkadehdehn Siohwa. Omw wiewia en konehng oh dehr manokehla me kalahiong emen kak kahrehiong uhk nan apwal. Kitail pil anahne kanahieng ma kitail kin nsensuwed de sangat. Ele kitail men emen en ndaiong kitail me kitail kesempwal. Mwein kitail uhdahn nsensuwed kahrehda kitail men emen, sohte lipilipil ihs, en tehk kitail. Met uhdahn keper. Ma ke kin ahneki soangen pepehm wet, dehr wia mehkot me pahn irehdi omw pahn alehdi kisakiso. Sohpeiong Siohwa oh riomw Kristian kan pwehn sewese iuk.​—Wadek Melkahka 34:18; Lepin Padahk 13:20.

6. Dahme kitail anahne taman ni atail en pilada mehn kamweit kan?

⁶ Pwehn kemehla ineng suwed kan, kitail anahne soikala mehn kamweit kan me pidada tiahk samin. Rahnwet, mehn kamweit tohto me mie kin katamankihong kitail soahng kan me wiawi nan Sodom oh Komora. (Sud 7) Irail me kin wiahda mehn kamweit pwukat kin wiahda en mwomwen me e mwahu oh sohte keper. Eri ahnsou koaros kitail anahne kanahieng. Kitail en dehr ale mehn kamweit sohte lipilipil me sampah wet kin kihda. Ahpw kitail anahne pilada mehn kamweit kan me sohte pahn ireikitailsang kisakis en mour.​—Lep. Pad. 4:23.

7. Kahpwal dah kei me kakete wiawi nan mwomwohdisohn Kristian?

⁷ Kitail kin perenki atail iang kisehn mwomwohdisohn  Kristian. Kitail kin onopki Mahsen en Koht nan mihting kan, oh ni limpoak kitail kin sewese emenemen. Met kin sewese kitail en kilangwohngete kisakiso. Ahpw ekei pak mie sawehwe kan me kak kahrehda kahpwal rehn riatail Kristian kan. Ma kitail sohte kamwahwihala kahpwal pwukat, e kak mengei en kahrehda nanpwung suwed.​—Wadek 1 Piter 3:8, 9.

8, 9. (a) Soangen irair kaselel dah me kak sewese kitail en ale kisakiso? (b) Dahme kak sewese kitail en kolokolete popohl ma iengetail Kristian men kansensuwedihala kitail?

⁸ Kitail sohte kak mweidohng nanpwung suwed en ireikitailsang kisakiso. Pohl kawehwehda dahme Kristian kan anahne wia: “Kumwail sapwellimen Koht aramas; e ketin loalloalei kumwail oh ketin pilkumwailda pwe en sapwellimankinkumwailla. Ihme kahrehda kumwail en limpoak ong me mi nan apwal akan, kadek, mpahi oh karakarahk, aktikitik oh kanengamah. Kumwail en sawaspene oh mahkpene nanpwungamwail, ni emen rehmwail eh pahn kin kaulime emen. Kumwail uhdahn pahn mahkpene nanpwungamwail, nin duwen Kaun-o eh ketin mahkohngkumwailehr. Eri, kumwail kapatahiong soahng pwukat limpoak, pwe ih me kin kapatapene oh oarepene mehkoaros pwe en wiahla ehu ni mehlel.”​—Kol. 3:12-14.

⁹ Limpoak oh kadek kak sewese kitail en mahkohng meteikan. Ma dahme emen nda de wia kamedekihala kitail, kitail kak medewehla ahnsou kan me kitail nda de wia mehkot sohte kadek ong meteikan ahpw re mahkohng kitail. Ia uwen atail kin kalahnganki arail limpoak oh kadek ong kitail! (Wadek Eklesiasdes 7:21, 22.) Kitail kin uhdahn kalahnganki me Krais kin ketin kadek oh kaminiminpene tohnkaudok mehlel kan. (Kol. 3:15) Kitail koaros poakohng Kohtohte, kalohki Rongamwahuohte, oh pil ahneki soangen kahpwal tohto me duwepenehte. Ma kitail kin kadek oh limpoak oh mahkpene, met pahn kalaudehla miniminpene en mwomwohdiso oh kitail kak kilikilangwohngete en ale kisakiso.

10, 11. (a) Dahme kahrehda peirin uhdahn keper? (b) Ia duwen atail kak tehk mwahu pwe peirin en dehr ireikitailsang kisakiso?

¹⁰ Peirin kak ireikitailsang kisakiso. Karasaras kan nan Paipel kasalehda uwen keper en peirin. Karasepe, Kain tepida peirinki Eipel oh kemehla. Kora, Dadan oh Apiram tepida peirinki Moses oh uhwongada. Nanmwarki Sohl tepida peirinki Depit oh song en kemehla. Dahme Mahsen en Koht mahsanih uhdahn mehlel: “Wasa me peirin oh mehwo kin mie, iei wasao me pingiping oh soangen suwed koaros pil kin mi ie.”​—Seims 3:16.

¹¹ Ma kitail doadoahk laud pwehn uhdahn ahneki limpoak oh kadek, kitail sohte pahn mwadangete tepida peirin. Mahsen en Koht mahsanih: “Limpoak me kanengamah oh kadek; e sohte kin peirin.” (1 Kor. 13:4) Pwehn tehk mwahu me kitail en dehr peirin, kitail anahne kilangwohng irairo nin duwen me Siohwa kin ketin wia. Kitail anahne kilangwohng riatail Kristian kan nin duwen kakon en war ehu, me iei mwomwohdiso. Paipel mahsanih: “Ma kakon en war ehu kin medekla, kakon koaros kin iang medekla, ma kakon ehu kin ale kaping, kakon koaros kin iang paieki kapingo.” (1 Kor. 12:16-18, 26) Ma mehkot mwahu wiawihong emen riatail Kristian, kitail pahn perenkihda ih, ahpw kaidehn peirinkihda ih. Medewehla mehn kahlemeng mwahu en nein nanmwarki Sohl pwutak, Sonadan. Sonadan sohte peirinki Depit ni ahnsou me Depit pilipilda pwehn wiahla nanmwarki ah kaidehn ih. E pil kangoange oh utungada Depit. (1 Sam. 23:16-18) Ia duwe, kitail kak duwehte Sonadan me kin kadek oh limpoak?

12. Kaweid dahieu sang nan Paipel me pahn sewese peneinei kan en ale kisakiso?

¹² Ma emenemen tohn atail peneinei kapwaiada kaweid en Paipel, atail peneinei pahn ahneki meleilei oh nsenamwahu oh pahn ale kisakiso. Pohl kihong kaweid kaselel wet ong peneinei kan: “Kumwail lih akan, kumwail peikiong amwail pwoud kan, pwe ih me kumwail uhdahn pahn wia . . . Kumwail ohl akan, kumwail en poakohng amwail pwoud kan, oh dehr lemeiong irail. Kumwail seri kan, iei amwail pwukoa . . . kumwail pahn kin peikiong amwail pahpa oh nohno kan, pwe iei me Koht kin ketin kupwurperenki. Kumwail pahpa oh nohno kan, kumwail dehr kamwakara mwahl noumwail seri kan, pwe re dehr mworusala.” (Kol. 3:18-21) Ia duwe, ke kak kilang ia duwen kaweid wet eh kak sewese omw peneinei?

13. Ia duwen sister Kristian men eh kak sewese eh pwoudo en men papah Siohwa?

¹³ Ele kowe emen sister me omw pwoudo sohte kin papah Siohwa. Dahme ke pahn wia ma ke medewe me eh wiewia kan ong uhk sohte konehng? Ele ke pahn lingeringerda oh akamaiong ih, ahpw ia duwe, met pahn kahrehiong irairo en mwahula? Mehnda ma ke kana nan amwa akamaipene, ke pahn kahrehiong ih en men papah Siohwa? Mwein soh. Ahpw ma ke kasalehda wauneki eh pwukoa nin duwen tapwi, ke kak sewese omw peneinei en ahneki meleilei oh ke pahn wahdo kaping ong Siohwa. Omw mehn  kahlemeng mwahu pil kak kahrehiong omw pwoudo en men papah Siohwa, oh kumwa koaros kak ale kisakiso.​—Wadek 1 Piter 3:1, 2.

14. Dahme ohl pwopwoud Kristian men anahne wia ma eh pwoudo sohte kin wauneki ih?

¹⁴ Ele kowe emen brother me omw pwoudo sohte kin papah Siohwa. Dahme ke pahn wia ma ke pehm me e sohte kin waunekin uhk? Ma ke kasalehiong ih ihs me kaun sang ni omw lipwoare, ia duwe, e pahn waunekin uhk? Uhdahn soh! Koht kupwurki ken wia ohl pwopwoud limpoak men me kin kahlemengih Sises. (Ep. 5:23) Sises, me wia tapwin mwomwohdiso, kin ahnsou koaros ketin kanengamah oh limpoak. (Luk 9:46-48) Ma ke kin kahlemengih Sises, kedekedeo omw pwoudo kakete pil men iang papah Siohwa.

15. Ia duwen ohl pwopwoud men eh kasalehiong eh pwoudo me e poakohng?

¹⁵ Siohwa ketin kaweidki ohl pwopwoud kan: “Kumwail en poakohng amwail pwoud kan, oh dehr lemeiong irail.” (Kol. 3:19) Ohl pwopwoud limpoak men kin wauneki eh pwoud. Ia duwen? E kin rong mwahu ni eh pwoudo kin kasalehda eh madamadau oh kamehlelehiong me e kesempwalki dahme e ndao. (1 Pit. 3:7) Mehnda ma e sohte kak ahnsou koaros kapwaiada dahme eh pwoudo peki, en rong liho kak sewese ohlo en wiahda pilipil mwahu. (Lep. Pad. 15:22) Ohl pwopwoud limpoak men sohte kin idingkihong eh pwoudo en wauneki ih. Ahpw, e kin song en wia soahng kan pwe liho en kak wauneki ih. Ni ohl pwopwoud men eh kin poakohng eh pwoud oh nah seri kan, irail pahn uhdahn nsenamwahu ni arail papah Siohwa oh alehdi kisakis en mour.

16, 17. Nin duwen me pwulopwul men, ia duwen ahmw kak dehr nohn nsensuwedla pahn ahmw pahpa nohno?

¹⁶ Ele kowe emen me pwulopwul oh ke pehm me ahmw pahpa nohno sohte kin wehwehkin uhk de re inenen kakos. Mwein met kin uhdahn kansensuwedihiukala me kahrehda ken pil medewe ma ke men papah Siohwa. Ahpw ma ke kohkohsang Siohwa, ke pahn diarada me sohte emen nin sampah poakohng uhk duwehte ahmw pahpa nohno Kristian kan oh kompoakepahmw kan nan mwomwohdiso.

¹⁷ Medewehla met: Ma ahmw pahpa nohno sohte kin kapwunguhkala, ia duwen ahmw pahn ese ma ira uhdahn nsenohkin uhk? (Ipru 12:8) Mehlel me ira sohte unsek, eri mwomwen ara kin kaiahne iuk ele kin kansensuwedihiukala. Ahpw dehr kin medemedewehte met. Song en wehwehki kahrepen ara wiewia de koasoi kan. Ken meleilei, oh song en dehr mwadang lingeringerda. Mahsen en Koht mahsanih: “Aramas emen me kin wehwehki pein ih, sohte kin lokolokaia ahnsou koaros. Aramas me kin kanengamah ahneki erpit.” (Lep. Pad. 17:27) Akadeiong ken wiahla aramas koahiek men me kin ale kaweid oh sukuhlkihsang, sohte lipilipil ia duwen kaweido eh kohwong uhk. (Lep. Pad. 1:8) Dehr manokehla me e wia kisakis kesempwal ehu en ahneki pahpa nohno me kin poakohng Siohwa. Ira men sewese iuk en mour kohkohlahte.

18. Dahme kahrehda ke koasoanehdi teng en alehdi kisakiso?

¹⁸ Ma kitail ahneki koapworopwor en mour soutuk nanleng de nan paradais nin sampah, emenemen kitail kak kasikasik ahnsou kohkohdo kaselel ehu. Atail koapworopwor uhdahn mehlel. E poahsoankihda inowo me Sounkapikpen nanleng oh sampah me mahsanih: “Sampah pahn direkihla kupwurokong en KAUN-O.” (Ais. 11:9) Ahnsou keren, aramas koaros nin sampah pahn ale kasukuhl sang Koht. Mie katepe laud kitail en alehdi kisakiso. Eri ahnsou koaros tamataman dahme Siohwa ketin inoukihong uhk, oh dehr mweidohng mehkot en ireiukasang kisakiso!