MWOHN Sises ketidahla nanleng, e ketin padahkihong sapwellime tohnpadahk ko: “Kumwail ahpw pahn kadehde ie . . . lelohng ni irepen sampah.” (Wiewia 1:8) Ia duwen tepin Kristian ko ar kak kapwaiada pwukoa laud wet?

Emen professor sang sukuhl laud ehu (Oxford University), Martin Goodman, koasoia me “arail pohnese arail pwukoa doadoahko kahrehda Kristian ko en weksang pwihnen pelien lamalam teikan, iangahki mehn Suhs kan ni kaundahn mwehin Rom en mahs.” Sises ketin kakahnseli wasa koaros pwehn wia sapwellime doadoahk en kalohk. Kristian mehlel kan me kin alasang sapwellimen Sises mehn kahlemeng wehwehkihier me lohkiseli “rongamwahu en Wehin Koht” kin pidada en rapahki irail kan me inengieng esehla padahk mehlel en Paipel. (Luk 4:43) Met iei ehu kahrepe me “wahnpoaron” kan miehki, lepin lokaia ehu me dokedoke irail kan me emen poaronehla de meninkeder kei, nan mwomwohdisohn tepin Kristian ko. (Mark 3:14) Sises ketin kehkehlikihong sapwellime tohnpadahk ko: “Kumwail eri kohwei wasa koaros oh padahkihong tohn wehi kan koaros.”—Mad. 28:18-20.

Sapwellimen Sises wahnpoaron 12 ko sohte mi rehtail rahnwet, ahpw tohto me kin papah Siohwa kin kasalehda irair kan me duwehte ahn misineri kan. Ong luhk me kohwohng irail en kalaudehla arail doadoahk en kalohk, re nda: “Iet ngehi, Maing, komwi ketin poaroneiehla.” (Ais. 6:8) Ekei keseula wasa doh, duwehte irail me kid kid kei me kesepwil sang Sukuhl en Kilead. Meteikan kin keseula wasa kan nan pein sapwarail. Me tohto kin sukuhlki ehu lokaia tohrohr pwehn wia kisehn mwomwohdiso oh pwihn en kalohk kan pwehn sewese apwalih anahn en irail me lokaiahki lokaiahn wasao. Kristian pwukat me keseula wasa me anahn tohrohr ehu mie de sukuhlki ehu lokaia tohrohr ele ahneki irair kan me sohte nohn mengei.  Re anahne irair en tounmetei pwehn kasalehda arail limpoak ong Siohwa oh mehn mparail. Irail eri koasoanehdi mwahu dahme re pahn wia oh doadoahngki arail ahnsou, kehl oh mwohni pwehn sewese doadoahk en kalohko wasa me anahn laud mie. (Luk 14:28-30) Dahme brother oh sister pwukat kin wiewia uhdahn kesempwal.

Ahpw, irair kan kin wekpeseng. Kaidehn Sounkadehde koaros kak keseula wasa kan me anahn laud mie de sukuhlki ehu lokaia tohrohr. Eri ia duwe, kitail koaros kak duwehte misineri kan nan pein atail mwomwohdiso?

Tepin Kristian ko kadehdehda me re kin ngoangki doadoahk en kalohk mehnda ma pali laud en irail kin mihmihte nan pein arail wasa oh kaidehn irail misineri kei. Pohl padahkihong Timoty: “Wia omw pwais en sounkadehde en Rongamwahu, oh pil kapwaiada omw pwukoa nin duwen me konehng ladun Koht men.” (2 Tim. 4:5) Kehkehlik wet kohwohng tepin Kristian ko oh e pil kadoadoahkte ong kitail rahnwet. Kristian koaros anahne peikiong kehkehlik en kalohki rongamwahu en Wehin Koht oh katohnpadahk. Pil nan atail mwomwohdiso, mie soangsoangen ahl kan me kitail kak duwehte misineri kan.

Karasepe, ni misineri kan ar keseula ehu sahpw tohrohr, soahng kan wasao uhdahn weksang dahme re kin ese, oh re anahne diarada ia duwen arail kak ahnla arail irair kapwo. Pil mehnda ma kitail sohte kak keseula wasa me anahn laud mie ong sounkalohk, kitail kak rapahki wiepe kapw en kalohk ong aramas? Karasepe, nan pahr 1940, iei tepin ahnsou me riatail Kristian ko alehdi kangoang en tepida kalohk nanial rahn ehu nan wihk koaros. Ke songehr kalohk nanial? Mie pak ke doadoahngki mehn kadahr me pwuhk kan kin mi loale? Ire kesempwalo iei, Ke kin men song wiepe kapw kan ong kalohki rongamwahwo?

Ma ke ahneki madamadau pwung, ke pahn ngoangki oh perenki kalohk. Irail kan me keseula wasa kan me anahn laud mie ong sounkalohk de sukuhlki lokaia tohrohr ehu kin kalapw wia sounkalohk koahiek kei oh kak wia sawas laud ong mwomwohdiso. Karasepe, irail kin tiengla mwowe nan doadoahk en kalohk. Misineri kan kin kalapw tiengla mwowe nan mwomwohdiso lao brother kan en wasao koahiekla en wia met. Ma kowe brother men me papidaislahr,  ke kin “nantihong ale pwukoa” oh men papah riomw Kristian kan nan omw mwomwohdiso nin duwen sounsawas de elder men?​—1 Tim. 3:1, NW.

Patehng atail ngoangki iang doadoahk en kalohk oh toukihda pein kitail pwehn alehdi pwukoa nan mwomwohdiso, mie soahng kan me kitail kak sewesehki atail mwomwohdiso. Kitail koaros, me pwulopwul de mah, ohl de lih, kitail kak wia emen me kin “sawas laud” ong riarail kan me anahne sawas.​—Kol. 4:11.

Ma kitail men sewese riatail kan, kitail anahne esehla mwahu duwen irail. Paipel kangoange kitail en “nsenoh sawaspene,” de medewe duwen anahn en riatail kan, ni atail kin tuhpene. (Ipru 10:24) Met sohte wehwehki me kitail en nohn men esehla soahng koaros duwen mour en meteikan. Ahpw kitail en song en esehla oh wehwehki riatail kan oh arail anahn akan. Ele irail anahne sawas de kangoang sang nan Paipel. Mehlel me nan ekei irair, ihte elder kan oh sounsawas kan me kak sewese irail. (Kal. 6:1) Ahpw, kitail koaros ele kak sewese brother oh sister mah kan, de peneinei kan me kin lelohng kahpwal.

Salvatore alehdi soangen sawas wet. Pwehki e lelohng kahpwal laud me pid mwohni, e anahne netikihla eh pesineso, imweo, oh soahng tohto me eh peneineio ahneki. E kin pwunodki laud eh peneineio. Ehu peneinei tohrohr nan mwomwohdiso tehkada me irail anahne sawas. Irail sewesehki Salvatore mwohni oh sewese ih oh eh pwoudo en rapahkihda ara doadoahk. Re pil kin mwemweitla pak tohto rehn Salvatore oh eh peneineio ni soutik kan pwehn rong oh kangoange irail. Irail uhdahn kompoakepahnkihla emenemen. Met peneinei riauo kin taman ahnsou kaperen kan me re ahnekipene erein ahnsou apwalo.

Kristian mehlel kan sohte kin pweiek en ehukihong meteikan dahme re kamehlele. Kitail anahne alasang Sises oh padahkihong koaros duwen inou kaselel kan me Koht ketin inoukihda. Ekei kin kak keseula wasa me anahn tohrohr ehu mie ong sounkalohk, a meteikan sohte kak. Ahpw kitail koaros kak wia uwen atail kak en sewese meteikan nan pein atail mwomwohdiso. (Kal. 6:10) Ni atail kin sapan ong meteikan, kitail pahn peren oh kitail pahn pousehlahte “kasalehda wa mwahu ni soangen doadoahk mwahu koaros.”​—Kol. 1:10; Wiewia 20:35.