Nan 2 Korint 12:2, 3, Pohl koasoia duwen ohl emen me “pwekipwekdahla nanleng kesiluh.” Ihs ohl menet? Ni Pohl eh ntinglahng mwomwohdisohn Korint, e kawehwehda me Koht ketin doadoahngki ih nin duwen wahnpoaron men. (2 Kor. 11:5, 23) E koasoia duwen “kasansal kan oh kaudiahl kan en Kauno.” Pohl sohte koasoia duwen rie Kristian teikan. Eri, e sansal me e koasoakoasoia me pein ih iei ohlo me alehdi kasansal oh kaudiahl ko.​—2 Kor. 12:1, 5.

Eri Pohl iei aramaso me “pwekipwekdahla nanleng kesiluh” oh “pwekipwekdahla paradais.” (2 Kor. 12:2-4) E koasoia duwen “kaudiahl kan,” me iei kasansaldahn dahme pahn wiawi ni ahnsou kohkohdo.

Dahme Pohl kilangada nan “nanleng kesiluh”?

Nan Paipel, “nanleng” kak dokedoke nanleng me kitail kin kak kilang. (Sen. 11:4; 27:28; Mad. 6:26) Ahpw “nanleng” pil kak wehwehki mehkot tohrohr. Ekei pak e kin dokedoke ahn aramas kaunda. (Dan. 4:20-22) De e kak dokedoke kaundahn Koht, sang ni eh ketin doadoahngki Wehin Koht.​—Kaud. 21:1.

Pohl kilangada “nanleng kesiluh.” Ia wehwehn met? Paipel kin kalapw mahsanih duwen lepin lokaia ehu pak siluh pwehn kasansalehda, kasalehda uwen kesempwalpen de kehlail en ire ehu. (Ais. 6:3; Kaud. 4:8) E mwomwen me ni eh koasoia duwen “nanleng kesiluh,” Pohl wie koasoakoasoia duwen kaunda ehu me inenen ileile oh kesempwal​—me iei Wehin Mesaiao me Sises Krais oh meh 144,000 ko pahn kaunda. (Menlau kilang pwuhken Insight on the Scriptures, (lokaiahn wai) Vol. 1, pali 1059, 1062.) Nin duwen me wahnpoaron Piter ntingihedi, kitail awiawih ‘lahng kapwo’ me Koht ketin inoukidahr.​—2 Pit. 3:13.

Ahpw ia duwen lepin lokaiao “paradais” me Pohl pil koasoiao?

Pil mie ekei wehwe tohrohr ong lepin lokaiao “paradais”: (1) Me pid dahme aramas medewehki me iei uhdahn wasa me aramas pahn kousoan ie, “paradais” kak wehwehki uhdahn Paradaiso me pahn miehla nin sampah ni ahnsou keren. (2) E kak wehwehki irair en popohl me Siohwa ketikihong sapwellime aramas akan. (3) Patehng met, e kak wehwehki irair kaselel en nanleng, “paradais en Koht” me kileldi nan Kaudiahl 2:7.​—Menlau kilang Kahn Iroir en July 1, 2015, pali 12. par. 8.

Pohl kakete koasoakoasoia soahng siluh pwukat nan 2 Korint 12:4 ni ahnsou me e kawehwehda dahme wiawihong ih.

Pwehn oaralapihada:

‘Nanleng kesiluho’ me 2 Korint 12:2 mahsanih duwe ele iei Wehin Mesaiao me Sises Krais oh meh 144,000 ko kaunda, me iei ‘lahng kapwo.’​—2 Pit. 3:13.

Met iei “nanleng kesiluh” pwehki Wehio iei kaunda ehu me inenen lapalap oh ileile.

Nan kaudiahlo, ‘paradaiso’ me Pohl “pwekipwekdahla” ie ele dokedoke (1) uhdahn Paradaiso me pahn miehla nin sampah ni ahnsou keren, (2) irair en popohl oh minimin me rasehng paradais me pahn mie ni ahnsowo, pahn mie wereisang irair en popohl me rasehng paradais me mie ni ahnsou wet, oh (3) “paradais en Koht” nanleng pahn pil mie ni ahnsowohte me sampah kapwo mie.

Sampah kapwo iei patpenehn nanleng kapwo oh sampah kapwo. E pahn wia koasoandi kapw ehu, me iangahki Wehin nanleng oh tohnsampah me kin papah Siohwa nan paradais nin sampah.