1. Dahme kahrehda papidais wia kahk kesempwal ehu? (Menlau kilang tepin kilel.)

 SOUNPAR koaros, tohnsukuhl en Paipel kid kei kin papidaisla. Me tohto nanpwungarail iei me pwulopwul kan me sounpar 13-19, de pil pwulopwulsang. Mwein irail tikida nan padahk mehlel. Kowe emen irail? Ma iei, ke wiahda mehkot me inenen mwahu. Kristian men anahne papidaisla pwe en komourala oh mour kohkohlahte.​—Mad. 28:19, 20; 1 Pit. 3:21.

2. Dahme kahrehda ken dehr perki inoukihong Siohwa omw mour?

² Ni ahnsou me ke papidaisla, Siohwa ketin tepida kapaiukada ni ahl tohto. Pil mie pwukoa kapw kan me ke ahneki. Ni ahl dah? Ni rahno me ke papidais, brother me wia padahko, idek: “Sang ni poahsoanpen meirong en Sises Krais, ke koluhkihlahr dipomw kan oh inoukihong Siohwa omw mour pwe ken wia kupwure?” Ke sapengki ei. Ke inoukihda me ke pahn poakohng Siohwa oh wiahki omw papah ih mehkot me keieu kesempwal nan omw mour. Ia duwe, ke pahn koluhkihla omw wiahda inou  kesempwal wet? Uhdahn soh! Ke soh mwahn pahn koluhkihla omw mweidohng Siohwa en ketin kaweid omw mour. Irail kan me sehse Siohwa kin wia kisehn ahn Sehdan sampah. Tepilo sohte mwahn kin nsenohkin irail de pil kowe. Ni mehlel, e pahn perenki ma ke katihasang omw koapworopwor en mour kohkohlahte pwehki omw iangala eh pali oh soikala Siohwa.

3. Kapai dah kan me kohsang omw inoukihong Siohwa omw mour?

³ Medewehla duwen Siohwa eh ketin kapaiukada pwehki omw inoukihong ih omw mour oh papidaisla. Ke patohwanohng Siohwa omw mour, eri ke kak nda ni eimah: “[“Siohwa,” NW] ketin ieiang ie, I sohte pahn masak mehkot; dahme aramas kak wiahiong ie?” (Mel. 118:6) Sohte pwais kaselel ehu me mwahusang omw pahn uhpalih Koht oh ese me e ketin kupwurperenkin uhk.

4, 5. (a) Dahme kahrehda kitail kak nda me kitail me pein pwukoahki atail inoukihong Siohwa atail mour? (b) Kahpwal dah kan me Kristian koaros, sohte lipilipil sounpar depe, kin lelohng?

⁴ Nin duwen Kristian men me papidaislahr, ke sohte kak ahneki nanpwungmwahu rehn Siohwa ihte pwehki omw pahpa nohno ahneki nanpwungmwahu reh. Kowe me pein pwukoahki omw nanpwungmwahu rehn Siohwa, mehnda ma ke mihmihte rehra. Dahme kahrehda e kesempwal en taman met? Sohte emen rehtail kak uhdahn ese ia duwen atail pwoson pahn lelohng kasongosong ni ahnsou kohkohdo. Karasepe, ele ke papidaisla ni omw tikitik. Ahpw met ni omw ekis laudla, mie soangen pepehm oh kahpwal kapw kan me ke ahneki. Emen serepein me sounpar 18 nda: “Seri men sohte kin nsensuwedki eh wia Sounkadehdehn Siohwa men ihte pwehki eh sohte kak iang kang keik en ipwidi nan sukuhl. Ahpw sounpar kei mwuri, ni ahnsou me ineng en wia nsenen pwopwoud kin laudla, e pahn anahne uhdahn kamehlele me peikihong sapwellimen Siohwa kosonned kan kin keieu mwahu ahnsou koaros.”

⁵ Kaidehn me pwulopwul kante me pahn ahneki kahpwal kapw kan. Pil pwoson en irail kan me papidaisla ni arail laudla kin lelohng songosong ni ahl kan me re sohte kasik. Kasongosong kan kak kohsang mouren arail pwopwoud, arail roson, de arail doadoahk. Sohte lipilipil atail sounpar, emenemen kitail pahn anahne lelepek ong Siohwa nan soangsoangen irair kan.​—Seims 1:12-14.

6. (a) Ia wehwehn omw wiahda inou ong Siohwa? (b) Dahme ke kak sukuhlkihsang Pilipai 4:11-13?

⁶ Pwehn seweseiuk kolokol omw lelepek, tamataman ahnsou koaros me ke inoukihong Siohwa, Wasa Lapalahpie, me ke pahn papah ih sohte lipilipil dahme pahn wiawi, mehnda ma kompoakepahmw kan de omw pahpa nohno uhdihsang papah ih. (Mel. 27:10) Nan irair koaros, peki rehn Siohwa en ketin seweseiuk ken kolokolte omw inowo ong ih.​—Wadek Pilipai 4:11-13.

7. Ia wehwehn en nantihong doadoahk laud “ni lemmwin oh poadidi” pwe ken kaunsekala komourpomw?

⁷ Siohwa ketin kupwurki ken kompoakepahnki ih. Ahpw ke anahne nantihong kolokol nanpwungmwahu wet en kehlail oh doadoahk laud pwe ken kaunsekala komourpomw. Pilipai 2:12 mahsanih: “Kumwail nantihong doadoahk ni lemmwin oh poadidi pwe kumwail en kaunsekala komourpamwail.” Eri kitail anahne medemedewe mwahu ia duwen atail pahn mihmi karanih Siohwa oh kolokol atail lelepek sohte lipilipil dahme pahn wiawi. Kitail sohte kak medewe me ihte met me kitail pahn wia. Tamataman me pil mie ekei me papah Koht erein sounpar tohto ahpw sohla lelepek. Dahme kak seweseiuk en  doadoahk laud pwe ken kaunsekala komourpomw?

8. Dahme onop en Paipel kin pidada? Dahme kahrehda e kesempwal?

⁸ Pwehn wia kompoakepahn Siohwa, kitail anahne rong oh patohong ih. Ahl me keieu mwahu en rong Siohwa iei en onopki Paipel. Met kin pidada en wadek oh doudouloale Mahsen en Koht oh sawaspen Paipel kan. Ahpw e pil pidada laudsang en ihte wadlikihala ire mehlel kan duwehte omw kin onopadahng des nan sukuhl. E duwehte omw wia seiloak kaperen ehu oh kilang soahng kapw kan duwen Siohwa. Ke pahn karanihala Koht, oh e pil pahn ketin karanihiukala.​—Seims 4:8.

9. Mehn sawas dah kan me seweseiuk nan omw onop en Paipel?

⁹ Sapwellimen Siohwa pwihn kin kihda mehn sawas tohto me kak seweseiuk nan omw koasoandi en onop. Karasepe, mie iren sawas kan nan jw.org me mi pahn “Teenagers,” me oaralape “Bible Study Activities,” me pahn seweseiuk ken doadoahngki dahme ke sukuhlkihsang koasoipen Paipel kan. Pil nan wasaohte, ke kak diarada sawaspen onop kan nan “What Does the Bible Really Teach?” Mepwukat kak seweseiuk en kalaudehla omw pwoson oh kawehwehiong meteikan dahme ke kin kamehlele. Ke kak diar iren sawas teikan ong omw onop nan oaralap me koasoia “Young People Ask . . . How Can I Make Bible Reading Enjoyable?” nan Awake! (lokaiahn wai) en April 2009. Onop oh doudouloale kin kesempwal ong omw doadoahk laud pwe ken kaunsekala komourpomw.​—Wadek Melkahka 119:105.

10. Dahme kahrehda Kristian papidaisla men anahne kapakap?

¹⁰ Ni atail kin onop Paipel, kitail kin rong Siohwa, oh ni atail kin kapakap, kitail kin patohwan koasoiong ih. Kitail en dehr medewe me kapakap kin wiahte tiahk ehu de mehn silasil ehu me pahn kahrehiong uhk en pweida. Kapakap uhdahn wia elen kapehse rehn Sounkapikpatailo. Nna medewehla: Siohwa kin ketin kupwurki karonge dahme ke pahn nda! (Wadek Pilipai 4:6.) Eri ni omw kin pwunodkihda mehkot, Paipel mahsanih ken “mweidohng  KAUN-O omw kahpwal akan.” (Mel. 55:22) Riatail Kristian rar rar kei kak ndaiong uhk me kaweid wet sewesehier irail. E pil kak seweseiuk!

11. Dahme kahrehda ke anahne kasalehda kalahngan ong Siohwa ahnsou koaros?

¹¹ Ahpw kitail en dehr kapakap ihte pwehki kitail men Siohwa en ketin sewese kitail. Paipel katamankihong kitail: “Kumwail en kin kasapahlkalahngan ong Koht.” (Kol. 3:15) Ekei pak kitail kin nohn pwunodki atail kahpwal kan me kahrehda kitail sohla tehk soahng mwahu koaros me kitail ahneki. Eri song wia met: Rahn koaros, medewehla soahng siluh me ke kin kalahnganki, kowe eri kalahngankihong Siohwa. Serepein pwulopwul men me adaneki Abigail, me papidaisla ni eh sounpar 12, nda: “I medewe me Siohwa me keieu warohng atail kalahngan laudsang koaros nanleng oh sampah. Kitail en kalahngankihong ih kisakis kan me e ketikihong kitail ahnsou koaros me kitail kak.” Ekei pak Abigail kin pein idek reh peidek wet me e rongada: ‘Ma kitail pirida lakapw oh ahneki soahng kante me kitail kalahngankihong Siohwa rahnwet, dahme kitail pahn ahneki?’

12, 13. Ia duwen omw pein paiekihda sapwellimen Siohwa kupwuramwahu, oh dahme kahrehda e kesempwal en medewe ia duwen Siohwa eh ketin seweseiukehr?

¹² Siohwa ketin sewese Nanmwarki Depit en dadaur pahn kahpwal tohto. Eri Depit koasoiahda dahme e paiekihda ni eh nda: “Kumwail pein rapahki [“song oh kilang,” NW] ia uwen kalahngan en KAUN-O. Meid pai irail kan me kin diar sileparail pahn kupwure.” (Mel. 34:8) Iretikitik wet kasalehiong kitail me kitail anahne pein kehn sapwellimen Siohwa kupwuramwahu ong kitail. Ni omw wadek Paipel oh neitail sawaspen Paipel kan oh towehda atail mihting kan, ke kin sukuhlki ia duwen Koht eh ketin sewesehier meteikan ren kolokol arail lelepek. Ahpw ni omw nanpwungmwahu rehn Siohwa eh kin kehlailla, ke anahne kilang ia duwen Siohwa eh kin ketin seweseweseiuk. Ia duwen omw pein kehn sapwellimen Siohwa kupwuramwahu?

¹³ Kristian kan koaros kehnehr sapwellimen Siohwa kupwuramwahu ni ahl tohrohr ehu. E ketin luke kitail en karanihala ih oh sapwellime Ohlo. Sises mahsanih: “Sohte emen me pahn kak kohdo rehi, ma Semei me ketin kadariehdo sohte kainangihedo rehi.” (Sohn 6:44) Ia duwe, ke pehm me Siohwa ketin kainangihiukodo reh? De ke medewe, ‘Siohwa ketin kainangihedo ei pahpa nohno reh oh I kin idawehnte’? Tamataman me ni omw inoukihong Siohwa omw mour oh papidaisla, ke ahnekiher nanpwungmwahu tohrohr ehu reh. Paipel mahsanih: “Me kin limpoakohng Koht, iei ih me Koht kin ketin mwahngih.” (1 Kor. 8:3) Ahnsou koaros ken kesempwalki pwukoa me Siohwa ketikihonguhkehr nan sapwellime pwihn.

14, 15. Ia duwen kalohk eh kak seweseiuk en kakehlakahda omw pwoson?

¹⁴ Ke pil kehnehr sapwellimen Siohwa kupwuramwahu ni eh ketikihong uhk eimah en koasoiong meteikan duwen omw pwoson, mehnda ma nan kalohk de sukuhl. E kin kak apwal en kalohk ong iengomw tohnsukuhl kan. Ele ke kin pwunodki ia duwen arail pahn mwekidki. E uhdahn kak kamasepwehk en kawehwehiong pokon laud ehu duwen dahme ke kin kamehlele. Dahme kak seweseiuk?

¹⁵ Medewehla kahrepen omw kin kamehlele soahng kan me ke kamehlele. Ma sawaspen onop kan (study guides) me mi nan jw.org mie ni omw lokaia, eri doadoahngki. Mepwukat kak seweseiuk en medewe duwen dahme ke  kamehlele, dahme kahrehda ke kamehlele, oh ia duwen omw kak kawehwehiong meteikan dahme ke kamehlele. Ni omw uhdahn kamehlelehier oh kaunopada mwahu, ke pahn men kalohki duwen Siohwa.​—Ser. 20:8, 9.

16. Dahme kak seweseiuk en eimah koasoia duwen dahme ke kin kamehlele?

¹⁶ Mehnda ma ke kaunopada mwahu, ele ke kakete saloh ni omw pahn kawehwe dahme ke kamehlele. Sister men me sounpar 18, me papidaisla ni eh sounpar 13, nda: “I ese dahme I kamehlele, ahpw ekei pak I kin apwalki kawehwehda dahme I medewe.” Ih eri song en koasoia duwen padahk mehlel ni meleilei ahpw kaidehn ni mwomwen padapadahk. E nda: “Iengei tohnsukuhl kan kin koasoia ni saledek duwen soahng kan me re kin wia. I pil men wia duwehte. Eri I pahn nda mehkot duwehte, ‘Rahn teio, I koasoakoasoia duwen Paipel oh . . . ’ Ngehi eri pousehla koasoiahda dahme wiawi. Mendahki dahme I koasoiao sohte uhdahn dokedoke Paipel, met kin kalapw kahrehiong meteikan en men ese dahme I kin wia ni ei padahki duwen Paipel. Ekei pak re kin idek peidek kan duwen met. Ni ei kin pwurepwurehng doadoahngki wiepe wet, e kin mengeila. Oh mwuhr, I kin ahnsou koaros perenkihda!”

17. Dahme pil kak seweseiuk en koasoiong meteikan?

¹⁷ Ni meteikan ar kehn me ke uhdahn nsenohki oh wauneki irail, e pahn mengei ong irail en waunekin uhk oh pil dahme ke kin kamehlele. Karasepe, Olivia, me sounpar 17 oh me papidaisla ni eh uhdahn pwulopwul, nda: “I kin ahnsou koaros perki me ma I tepida koasoia duwen Paipel, aramas pahn wiahkin ie emen me nohnla poadidi.” Ih eri tepida wekidala eh madamadau. E sohla kin nohn medewe duwen eh kin per, ahpw e uhd medewe: “Me pwulopwul tohto uhdahn sehse duwen Sounkadehdehn Siohwa kan. Kiht kelehpw me wia Sounkadehde kei wasao. Eri mwomwen at wiewia kak kamwakid dahme re pahn wia. Ia duwen ma se kin namenek oh apwalki koasoia duwen dahme se kamehlele, de pil suwedki at pahn koasoia met? Re pahn medewe me se sohte kin pohlki at wia Sounkadehde kei. Ele re pahn pil kauwe kiht pwehki at sohte eimah. Ahpw ma se eimah oh sohte per ni at koasoia duwen dahme se kamehlele oh kin wia met ni ahl me mwomwen se sohte padapadahk, re pahn kakete wauneki kiht.”

18. Dahme ke anahne wia pwehn kaunsekala komourpomw?

¹⁸ Kitail kilangehr duwen eh wia pwukoa kesempwal ehu en doadoahk laud pwehn kaunsekala komourpomw. Pwehn wia met, ke anahne wadek oh doudouloale Mahsen en Koht, kapakap ong Siohwa, oh medewe mwahu duwen ahl akan koaros me e kin ketin seweseiuk. Omw kin wia soahng pwukat koaros pahn seweseiuk en uhdahn kamehlele me Siohwa iei Kompoakepahmw. Met pahn kahrehiong uhk en men koasoiaiong meteikan dahme ke kin kamehlele.​—Wadek Melkahka 73:28.

19. Dahme kahrehda e uhdahn katapan en doadoahk laud pwehn kaunsekala komourpomw?

¹⁹ Sises mahsanih: “Mehmen me men idawehniehdo, en tounmeteikihla pein ih, kapaikada eh [“tuhkehn kalokolok,” NW], oh idawehniehdo.” (Mad. 16:24) Ei, pwe en idawehn Sises, emenemen Kristian anahne inoukihong Siohwa eh mour oh papidaisla. Ahpw met wiahte tepin mour kaselel ehu ahnsou wet me pil pahn imwikihla mour soutuk nan sapwellimen Koht sampah kapw. Eri wia soahng koaros me ke kak oh doadoahk laud pwe ken kaunsekala komourpomw!