Ekei pak, kitail kin pil nda met. E mwomwen pahrekiong dahme kitail kin wadek nan Ipru 12:16. Iretikitiko mahsanih me Esau “sohte kin wauneki mehkot sarawi” oh “netikihla [ong Seikop] eh sohso pwehki delen mwenge ehu.” Met mwomwen koasoia me ni Seikop eh alehda “sohso” nin duwen mesenih, e pil wiahla kadaudok me Mesaia kohsang.​—Mad. 1:2, 16; Luk 3:23, 34.

Ahpw, petehkpen ire kan en Paipel kasalehda me ohl emen sohte anahne wia mesenih pwe en wia kisehn peneinei en Mesaia. Tehk ekei mehn kadehde:

Nanpwungen nein Seikop (Israel) pwutak kan, nah mesenih rehn Lia iei Reupen. Mwuri, nein Seikop mesenih rehn eh pwoud kompoake Resel, iei Sosep. Ni ahnsou me Reupen dipkihda tiahk suwed ehu, eh pwung en mesenih eri kohieng Sosep. (Sen. 29:31-35; 30:22-25; 35:22-26; 49:22-26; 1 Kron. 5:1, 2) Ahpw, Mesaia sohte kohsang kadaudok en Reupen de pil Sosep. E kohsang kadaudok en Suda, nein Seikop kapahmen en pwukat rehn Lia.​—Sen. 49:10.

Luk 3:32 kasalehda ohl wenemen me iang irekidien kadaudok me Mesaia kohsang.  Mwomwen me meh limmen nanpwungarail wia mesenih kei. Kahrehda Pohas naineki Oped, Oped me naineki Sehsi.​—Rud 4:17, 20-22; 1 Kron. 2:10-12.

Ahpw Depit nein Sehsi kaidehn mesenih men. Ih me keieu tikitik rehn rie pwutak welimen ko. Ahpw Mesaia kohsang kadaudoken Depit. (1 Sam. 16:10, 11; 17:12; Mad. 1:5, 6) Pil duwehte, Solomon iei kadaudoko mwuri, ahpw kaidehn ih me nein Depit mesenih.​—2 Sam. 3:2-5.

Met sohte wehwehki me mesenih kan sohte kesempwal. Mie pwukoa kesempwal me mesenih kan kin ahneki oh re kin kalapw wiahla kaunen peneinei. Ih me pil kin alehdi pwaisen sohso pak riau laudsang meteikan nan eh peneinei.​—Sen. 43:33; Deud. 21:17; Sos. 17:1.

Ahpw pwung en mesenih kak kohieng emen tohrohr. Eipraam kausala Ismael oh kihong Aisek pwung en mesenih. (Sen. 21:14-21; 22:2) Oh nin duwen me sansalehr, pwung en mesenih kohieng Sosep, kaidehn Reupen.

Met kitail pahn pwurehng kilang Ipru 12:16, me mahsanih: “Kumwail mwasahn pwe emen kumwail de mour samin de sohte kin wauneki mehkot sarawi duwehte Esau, me netikihla eh sohso pwehki delen mwenge ehu.” Ire kesempwal dahieu me sansal wasaht?

Wahnpoaron Pohl sohte koasoakoasoia kadaudok me Mesaia kohsang. E ahpwtehn kangoangehki Kristian akan ren “weweidwei nan ahl inen.” Eri, re sohte pahn ‘soikeweisang rehrail kalahngan en Koht,’ ahpw met kak wiawi ma re wia tiahk samin me pid wia nsenen pwopwoud. (Ipru 12:12-16) Ma re wia met, re pahn duwehte Esau. E sohte kin “wauneki mehkot sarawi,” ahpw e mweidala pein ih ong soahng kan me sohte sarawi.

Esau momourte ni ahnsou ehu me ohl akan ahneki manaman de pwukoa laud kan, oh ekei pak, e kakete ahneki pwais kaselel en wia meirong kan. (Sen. 8:20, 21; 12:7, 8; Sohp 1:4, 5) Ahpw pwehki eh kin men kapwaia eh ineng kan, e kesehla pwais kaselel pwukat koaros pwehki delen mwenge ehu. Ele e sohte men lelohng lokolok me pahn wiawihong kadaudok en Eipraam nin duwen me kokohpdahr. (Sen. 15:13) Esau pil kasalehda me e kin inengieng soahng kan me sohte sarawi ni eh pwoudikihda lih riemen me sohte kin kaudokiong Siohwa. Met kansensuwedihada eh pahpa nohno. (Sen. 26:34, 35) E uhdahn weksang Seikop, me pwoudikihda emen tohnkaudok en Koht mehlel!​—Sen. 28:6, 7; 29:10-12, 18.

Eri, dahme kitail kak ndahki duwen irekidien kadaudok kan me Mesaiao Sises kohsang? Ekei pak, e kin kohsang mesenih kan, ahpw kaidehn ahnsou koaros. Mehn Suhs kan kin wehwehki met oh re kin pwungki, duwehte arail pwungki me Krais kohsang kadaudok en Depit, nein Sehsi pwutak keieu tikitik.​—Mad. 22:42.