1, 2. Dahme kahrehda Koht ketin soikala Sohl? (Menlau kilang tepin kilel.)

 SOHL wia aramas mpahi men ni ahnsou me Siohwa ketin pilada en wia nanmwarki. (1 Sam. 9:1, 2, 21; 10:20-24) Ahpw mwurin eh wiahla nanmwarki, e aklapalapala. Ehu pak, mehn Pilisdia kan kohlahng mahweniong mehn Israel ko. Soukohp Samuel ndaiong Sohl me e pahn kohla oh wiahda meirong ehu ong Siohwa. Ahpw, mwohn Samuel lel mwo, mehn Israel ko masepwehkada oh me tohto tangasang Sohl. Sohl sohte kanengamah, e sohte awih Samuel ahpw e pein wiahda meirongo. Sohl sohte ahneki manaman en wia met, oh Siohwa sohte ketin kupwurperenki dahme e wiahdao.​—1 Sam. 13:5-9.

² Ni ahnsou me Samuel leledo wasao, e panawih Sohl pwehki eh sapeikiong Siohwa. Ahpw Sohl sohte medewe me mie mehkot sapwung e wiahda. E song en rapahki kahrepe kan, oh e pil kapwukoahki meteikan sapwung me e wiahdao. (1 Sam. 13:10-14) Sangete ahnsowo, Sohl pil kasalehda wiewia  aklapalap tohto. Eri Siohwa ketin soikala ih sang eh nanmwarki. (1 Sam. 15:22, 23) Ahn Sohl mour tepida mwahu ahpw imwila suwed.​—1 Sam. 31:1-6.

3. (a) Dahme aramas tohto kin medewehkihong mpahi? (b) Peidek dah kan me kitail pahn sapengala?

³ Aramas tohto rahnwet pehm me irail sohte kak kasalehda mpahi oh ni ahnsowohte ahneki mour de doadoahk me kin pweida mwahu. Re kin suweiki pein irail pwehn mwomwen me irail mwahusang meteikan. Karasepe, emen actor me pil wia tohn politik nda me e sohte kin kasalehda mpahi oh e koapworopworki me e sohte pahn douluhl. Ahpw dahme kahrehda e kesempwal Kristian men en kasalehda mpahi? Dahkot mpahi, oh dahme e sohte kin pidada? Nan iren onop wet, kitail pahn sapengala peidek pwukat. Oh nan iren onop en mwuhr, kitail pahn kilang ia duwen atail kak kolokolete atail mpahi pil ni ahnsou me ele apwal ong kitail en wia met.

4. Dahkot wiewiahn aklapalap?

⁴ Paipel kasalehda me aklapalap uhdahn weksang mpahi. (Wadek Lepin Padahk 11:2.) Depit patohwan peki rehn Siohwa: “Komw pil ketin sileiesang soangen dihp sansal akan [“wiewiahn aklapalap,” NW].” (Mel. 19:13) Dahkot wiewiahn aklapalap? Met iei wiewia mehkot me kitail sohte ahneki pwuhng de manaman en wia, mwein pwehki kitail sohte kanengamah de kitail pohnmwahso. Ekei pak kitail koaros kin kasalehda aklapalap pwehki kitail sohte unsek. Ahpw nin duwen me kitail sukuhlkier sang mehn kahlemeng en Nanmwarki Sohl, ma kitail kin kalapw wia met, Siohwa sohte pahn ketin kupwurperenkin kitail. Melkahka 119:21 mahsanih me Siohwa pahn ketin “angiangih me aklapalap akan.” Dahme kahrehda?

5. Dahme kahrehda wiewiahn aklapalap wia sapwung laud ehu?

⁵ Keieu, ma kitail kasalehda wiewiahn aklapalap, kitail kin kasalehda me kitail sohte wauneki Siohwa, atail Koht oh Kaun. Keriau, ni atail wia soahng kan me kitail sohte ahneki manaman en wia, kitail pahn kakete akamaiong oh sohte pwungkipene soahng kan rehn meteikan. (Lep. Pad. 13:10) Oh kesiluh, kitail ele pahn mwomwen pweipwei ni meteikan ar tehkada me kitail kasalehda wiewiahn aklapalap. (Luk 14:8, 9) Kitail kak kilang ni sansal dahme kahrehda Siohwa ketin kupwurki kitail en mpahi.

6, 7. Ia duwen mpahi eh duwehte aktikitik?

⁶ Mpahi kereniong duwehte aktikitik. Kristian aktikitik men sohte kin pohnmwahso ahpw e kin wiahki meteikan lapalap sang ih. (Pil. 2:3) Aramas aktikitik men pil kin mpahi. E kin pohnese soahng kan me e kak de sohte kak wia, oh ni aktikitik kasalehda ni mehlel eh sapwung kan. E kin men rong dahme meteikan kin medewe oh sukuhlkihsang irail. Aramas aktikitik men uhdahn kin kaperenda Siohwa.

⁷ Paipel kasalehda me aramas mpahi men kin ese duwen pein ih oh pohnese me mie soahng kan me e sohte kak de kak wia. Met kin sewese ih en wauneki meteikan oh kadekohng irail.

8. Pwehn kolokol irair en mpahi, soangen madamadau dah me kitail anahne soikala?

⁸ Kitail kak tepida ahneki madamadau aklapalap  ahpw kitail sohte ese. Ia duwen met eh kak wiawi? Ele kitail tepida pehm me kitail kesempwalsang meteikan pwehki kitail de irail kan me kitail ese ahneki soangen pwukoa kei nan mwomwohdiso. (Rom 12:16) De ele kitail tepida nohn men meteikan en tehk kitail. (1 Tim. 2:9, 10) Ele kitail pil tepida ndaiong meteikan dahme ren wia de sohte wia.​—1 Kor. 4:6.

9. Dahme kahrehda ekei aklapalapkihla? Menlau kihda ehu karasaras sang nan Paipel.

⁹ Kitail kak tepida kasalehda aklapalap ma kitail sohte kaunda atail ineng sapwung kan. Me tohto kin aklapalapala pwehki re men kaping en kohwong irail, re kin luwangki meteikan, de re sohte kaunda arail lingeringer. Met wiawihong ekei nan Paipel, duwehte Apsalom, Usaia, oh Nepukadnesar. Siohwa ketin kasalehiong irail ni sansal me re anahne kasalehda aktikitik.​—2 Sam. 15:1-6; 18:9-17; 2 Kron. 26:16-21; Dan. 5:18-21.

10. Dahme kahrehda kitail en dehr kadeik dahme meteikan kin wiahda? Menlau kihda ehu karasaras sang nan Paipel.

¹⁰ Ele mie kahrepe teikan me aramas kin ekei pak sohte kasalehda mpahi. Karasepe, medewehla duwen Apimelek oh Piter. (Sen. 20:2-7; Mad. 26:31-35) Ia duwe, ohl pwukat aklapalap? De mwein ira sohte uhdahn ese ire mehlel kan, de ira wia soahng kan ni soh madamadau? Pwehki kitail sohte kak ese dahme mi nan mohngiong en meteikan, kitail en dehr kadeik irail.​—Wadek Seims 4:12.

11. Dahme kitail anahne wehwehki?

¹¹ Aramas mpahi men kin wehwehki duwen eh pwukoa nan sapwellimen Koht koasoandi. Siohwa iei Koht men me kin soandi mwahu. E ketikihong emenemen nan mwomwohdiso pwukoa kan. Mie anahnepen kitail koaros. Ni kadek, Siohwa ketikihong emenemen kitail soangsoangen kisakis de koahiek kan. Ma kitail mpahi, kitail pahn doadoahngki atail kisakis ni ahl ehu me Siohwa ketin kupwurki. (Rom 12:4-8) Kitail pohnese me Siohwa kin ketin kasik me kitail en doadoahngki mepwukat pwehn kawauwih ih oh sewese meteikan.​—Wadek 1 Piter 4:10.

12, 13. Dahme kitail anahne tamataman ma kitail lelohng wekidekla kan nan atail pwukoa nan sapwellimen Siohwa doadoahk?

¹² Dahme kitail kin wia nan sapwellimen Siohwa doadoahk ele kin wekiwekla. Karasepe, medewehla duwen wekidekla tohto me Sises ketin lelohng. Keieu, e kin kelehpw patopato rehn Semeo. (Lep. Pad. 8:22) Mwuhr, e sewese Siohwa ketin wiahda tohnleng kan, lahng oh sampah, oh aramas akan. (Kol. 1:16) Mwurin mwo, Siohwa ketin poaronehdo ih sampah. E ipwidi seri pwelel oh kekeirda wiahla aramas laud men. (Pil. 2:7) Mwurin eh pwoula, Sises ketidahla nanleng pwehn wiahla Nanmwarki en Wehin Koht nan pahr 1914. (Ipru 2:9) Oh ni ahnsou kohkohdo, mwurin eh kaunki sounpar kid nin duwen Nanmwarki men, Sises pahn patohwanohng Siohwa Wehio oh “Koht ahpw pahn ketin kakaun mehkoaruhsie.”​—1 Kor. 15:28.

¹³ Kitail pil kin lelohng wekidekla tohto nan atail mour. Ekei pak atail pwukoa kan ele kin wekila pwehki pein atail pilipil kan. Karasepe, mwein kitail kiripw oh mwuhr kitail pilada en pwopwoudida. De ele kitail nainekihda seri. Mwuhr, kitail ele pilada en wiahda ekei wekidekla kan pwe kitail en kak  doadoahngki pali laud en atail ahnsou en papah Siohwa. Ekei pak atail pwukoa kan ele kin wekila pwehki atail irair kan. Kitail ele kak kalaudehla de katikala atail wia met. Ahpw mehnda ma kitail pwulopwul de mah, ahneki roson mwahu de soh, Siohwa ketin mwahngih ia duwen emenemen kitail kak papah ih ni ahl me keieu mwahu. E sohte kin ketin kasik laudsang dahme kitail kak wia. E pil kin uhdahn kupwurperenki soahng koaros me kitail kin wiahda ong ih.​—Ipru 6:10.

14. Ia duwen mpahi eh kak sewese kitail en itarki oh peren nan irair sohte lipilipil?

¹⁴ Sises perenki pwukoa koaros me Siohwa ketikihong ih, oh kitail pil kak wia duwehte. (Lep. Pad. 8:30, 31) Aramas mpahi men kin itarki eh pwukoa kan nan mwomwohdiso. E sohte kin tetehkte dahme meteikan kin wia. Ahpw, e itarki pein eh pwukoa nan sapwellimen Koht pwihn. E kin kilangwohng met nin duwen pwukoa ehu me kohsang rehn Siohwa. Aramas mpahi men pil kin wauneki meteikan oh kin perenki utung irail. E pohnese me Siohwa pil ketikihongehr arail pwukoa.​—Rom 12:10.

15. Dahme kitail kak sukuhlkihsang mehn kahlemeng en Kidion?

¹⁵ Kidion kasalehda mehn kahlemeng mwahu en emen me kin mpahi. Ni Siohwa eh ketikihong Kidion pwukoa en kapitala mehn Israel ko sang mehn Midian ko, Kidion nda: “Ei peneinei me keieu luwet nan kadaudok en Manase, oh ngehi me keieu sohte  wadei rehn ei peneinei.” (Sounkopwung 6:15) Ahpw Kidion likih Siohwa oh e ale pwukoa wet. Mwuhr Kidion tehk mwahu ma e uhdahn wehwehki dahme Siohwa ketin kupwurki en wia oh kapakapki sapwellimen Koht kaweid. (Sounkopwung 6:36-40) Kidion ohl kehlail oh eimah men oh e pil ahneki erpit oh kin kanahieng. (Sounkopwung 6:11, 27) Mwuhr, aramas ako men Kidion en kaunda irail, ahpw e sohte men wia met. Mwurin eh wiahda dahme Siohwa ketin mahsanihong ih, e pwurala imweo.​—Sounkopwung 8:22, 23, 29.

16, 17. Ia duwen aramas mpahi men eh kak kekeirda?

¹⁶ Ma aramas emen ale pwukoa kapw ehu de men wia laudsang nan mwomwohdiso, met sohte wehwehki me e sohte mpahi. Paipel mahsanih me e mwahu ong sapwellimen Siohwa ladu men en men kalaudehla eh kin papah rie Kristian kan oh pil kekeirda mwahu. (1 Tim. 4:13-15) Ahpw ia duwe, kitail anahne pwukoa kapw ehu pwehn kekeirda? Soh. Kitail koaros kak doulahte kamwahwihala atail irair en Kristian oh pil atail koahiek kan me Siohwa ketikihong kitail pwe kitail en kak papah ih oh sewese meteikan ni ahl me mwahu.

¹⁷ Mwohn aramas mpahi men ale pwukoa ieu, e kin men diarada dahme e anahne wia. E kin kapakapki met oh medemedewe kanahieng ma e pahn kak wia doadoahk wet de soh. Ia duwe, e pahn miehte eh ahnsou oh kehl en wia soahng kesempwal teikan? Ma soh, meteikan pahn kak wiahda ekei doadoahk me e kin wia met? Mwurin eh medemedewe met, aramas mpahi men ele pilada me e sohte kak apwalihala mwahu pwukoa kapwo. Ma kitail mpahi, kitail ele pahn anahne nda soh.

18. (a) Dahme aramas mpahi men pahn wia ni eh ale pwukoa kapw ehu? (b) Ia duwen Rom 12:3 eh kin sewese kitail en mpahi?

¹⁸ Siohwa ketin kupwurki kitail en ‘peikiong ih ni karakarahk.’ (Maika 6:8) Eri ni atail alehdi pwukoa kapw ehu, kitail kin rapahki sapwellime kaweid oh peki sapwellime sawas, duwehte me Kidion wia. Kitail anahne medewe laud duwen dahme Siohwa ketin mahsanihong kitail sang nan Paipel, oh pil sapwellime pwihn. Kitail en tamataman me kaidehn pwehki pein atail koahiek me kitail kak wia soahng koaros nan sapwellimen Siohwa doadoahk, ahpw pwehki Siohwa ketin aktikitik oh kupwurki sewese kitail. (Mel. 18:35) Aramas mpahi men sohte pahn ‘medemedewe me ih me lapalap.’​—Wadek Rom 12:3.

19. Dahme kahrehda kitail en kin mpahi?

¹⁹ Aramas mpahi men ese me Siohwa kelehpw me warohng kaping koaros pwehki ih me Sounkapikpatail oh Wasa Lapalahpie nanleng oh sampah. (Kaud. 4:11) Ma kitail kin mpahi, kitail pahn perenki wia soahng koaros me kitail kak wia nan sapwellimen Siohwa doadoahk. Kitail pahn wauneki pepehm oh madamadau en riatail Kristian kan, oh imwilahn met, kitail koaros pahn miniminpene. Aramas mpahi men kin medemedewe mwahu dahme e pahn wia mwohn e wia, oh ni ahl wet e kin soikala wiahda sapwung laud. Siohwa uhdahn ketin kupwurperenki irail kan me kin mpahi. Pwehki kahrepe pwukat, mpahi wia irair ehu me uhdahn kesempwal ong sapwellimen Koht aramas akan. Nan iren onop en mwuhr, kitail pahn tehkpene ia duwen atail kak kolokol atail mpahi ni ahnsou kan me ele apwal ong kitail en wia met.