Aramas akan kin kalapw mwadang mwekidki rongen Wehio ni ar kin rong ni pein arail lokaia. Mwein ih kahrepeo me ni Pendekos pahr 33, Siohwa ketin koasoanehdi ong “mehn Suhs poadidi kei me kohsang nan wehi koaros nin sampah” ren rong rongamwahwo ni ‘pein ar lokaia,’ mehnda ma re kin lokaiahki lokaia ehu, duwehte Ipru de Krihk. (Wi 2:5, 8) Nan rahnpwukat, wasa kan me kin lokaiahki soangsoangen lokaia, mwomwohdiso kan me mihting kan kin wiawi ni soangsoangen lokaia ele mie wasahn kalohk nan wasaohte. Ia duwen sounkalohk kan nan soangen mwomwohdiso pwukat ar kak sawaspene pwe ren kalohk ong koaros ni ar sohte pahn kelingeringerihada tohnihmw kan pwehki re kalapw kalokalohkte wasao?

• Ale kaweid (Lep 15:22): Sounapwalih en kalohk kan anahne koasoipene oh rapahkihda elen kalohki rongamwahwo me pahn keieu mwahu ong mwomwohdiso koaros me iang pidada. Ma arail wasahn kalohk malaulau, mwomwohdiso kan me kin kalohk ni lokaia teikan ele pahn mwahuki ken daulih ihmw kan me mi nan arail wasahn kalohk. Ahpw, ma irail sohte kin kak kanekehla arail wasahn kalohk pwehki ihmw ko mihseli nan lapalahn wasa ehu, ele re pahn men ken dehr daulih ihmw kan ahpw padahkihong irail ni emen nan arail wasahn kalohko eh perenki rong. (od-E 93 par. 37) De ele re pahn peki omw mwomwohdiso en sewese irail rapahkihda aramas me kin lokaiahn arail mwomwohdisou oh me adres en imweo kak iangala arail wasahn kalohko. (km 7/12 5, koakon) Tamataman me ekei ihmw, towe kan kin doadoahngki lokaia tohtohsang ehu. Koasoandi en kanekehla wasahn kalohko anahne idawehn kosonned kan me irehdi mwomwen omw doadoahngki ire me pid duwen tohn wasao.

• Sawaspene (Ep 4:16): Idawehn ni keneinei dahme omw sounapwalih en kalohko kaweidkin uhk. Ia duwe, ke kin onop Paipel rehn emen me mwahuki lokaia me kaidehn lokaiahn omw mwomwohdiso? Tohnsukuhl en Paipelo pahn kakete mwadang kekeirda ma ke kihong tohnsukuhlo rehn emen nan mwomwohdiso ehu de pwihn ehu me keren me kin lokaiahki eh lokaiao.

• Kaunopada (Lep 15:28; 16:1): Ma tohnihmw men nan omw wasahn kalohko kin lokaiahki ehu lokaia tohrohr, wia uwen omw kak ken ehukihong rohng mwahuo. Ke kak kaunopada lokaia me ke pahn doadoahngki oh downloadihdi mwowe kawehwehn Paipel kan oh kisin kasdo kan nan noumw cellphone ape. Ke pil kak doadoahngki JW Language app pwehn sukuhlki rahn mwahu en lokaia teikan.