Ni mwomwohdisou nan Rom eh rongada me Pohl pahn kohla, pwihn en brother kei seiloangki mwail 40 (kilometer 64) pwe ren kohla tuhwong ih. Ia duwen arail limpoak en tounmetei eh kamwakid Pohl? “Ni Pohl eh kilangirailda, e ahpw kalahngankihong Koht oh kehlailda.” (Wi 28:15) Mendahki aramas kin esehki Pohl sounkangoange mwomwohdiso kan me e kin mwemweitla ie, ahnsou wet ni eh sensel, ih me alehdi kangoang.​—2Ko 13:10.

Rahnwet, sounapwalih me kin seiloak kin seiloak sang ehu mwomwohdiso ong ehu mwomwohdiso pwehn kangoange brother oh sister kan. Duwehte sapwellimen Koht aramas koaros, ekei pak re kin pwangada, pwunodada oh mworusala. Ma sounapwalih me kin seiloak oh eh pwoud pahn pwurehng mwemweitdo nan omw mwomwohdiso, dahme ke kak wia pwe ken sewese ira pwe ira en kehlailda, pwe “kitail en kangoange emenemen”?​—Ro 1:11, 12.

• Iang towehda tuhpenehn kalohk. Sounapwalih me kin seiloak kin kehlailda ni sounkalohk kan ar kin wiahda tounmetei kan pwe ren paiekihda wihk tohrohr en mwemweito. (1De 1:2, 3; 2:20) Wiahda koasoandi en iang sawasepen pioneer erein sounpwong en eh mwemweito. Ke kak wiahda en iang ih oh eh pwoud kalohk de wa emen ira kohla rehn emen noumw onop en Paipel? Ira kin perenki iang soangsoangen sounkalohk kan, iangahki sounkalohk kapw kan de irail akan me pehm me re sohte koahiek nan doadoahk en kalohk.

• Kasamwo ni kadek. Ke kak sawaskihda wasahn pweidi de mwenge? Met kin kasalehiong sounapwalih me kin seiloak oh eh pwoud me ke poakepoake ira. Ira sohte kin kasik mehkot me kaselel de pweilaud.​—Lu 10:38-42.

• Rong oh kapwaiada eh sawas oh kaweid. Sounapwalih me kin seiloak kin ni limpoak sewese kitail en kilang ia duwen atail kak kamwahwihala atail papah Siohwa. Ekei pak, ele e kihda kaweid kehlail. (1Ko 5:1-5) E kin kansenamwahu ong ih ni atail kin peik oh uhpah.​—Ipr 13:17.

• Kasalehda kalahngan. Ndaiong sounapwalih me kin seiloak oh eh pwoud ia uwen omw paiekihda ara doadoahk laud. Ke kak wia met ni omw pahn pein ndaiong ira de ntingihada ehu card de kisinlikou.​—Kol 3:15.